Jẹnẹsisi 47 - Ika

Isi Nke Ẹsa Kwasị Ọgụnnaị

¹ Josẹfụ nọ jẹnburu Fẹro, sị a, “Nẹdi m lẹ mmunẹ m a ghagụọ alị Kenaanị lụapụha, wẹ lẹ igunrun atụnrụn lẹ ewu lẹ efin wẹ lẹ ihiẹn ile wẹ nwọn; wẹ ile rị nwan alị Goshẹni.”

² Ọ nọ weri mmunẹ ẹ isẹn d'a ghọsị Fẹro.

³ Ya Fẹro nọ sị mmunẹ Josẹfụ ndị ahụn “Kịnị kẹ ụnụ a rụn?” Wẹ nọ sị Fẹro, “Anụ kẹ ẹnyi wụ ụmụ ị e du, Diọkpa, rịkẹ kẹ ndị nẹdi ẹnyi kanị dọn mẹ.”

⁴ Wẹ nọ sịzị Fẹro, “Ẹnyi lụapụha nị ẹnyi biri ebeni ẹkẹrẹ; makẹni ụnwụnnị e kẹnrẹnkẹ alị Kenaanị, ẹnyi wụ ụmụ ị ahụnzịnị ẹfịfịa ẹnyi e gi zụn anụ ẹnyi. Ẹnyi rị nwan a rịọ ị, dodo, nị ẹnyi biri imẹ Goshẹni.”

⁵ Fẹro nọ sị Josẹfụ, “Nẹdi i lẹ mmunẹ i a lụakunrungụọ ị.

⁶ Lee i lee alị Ijiptu: we nẹdi i lẹ mmunẹ i che azụụn kachanrịn mma imẹ alịnị; wẹ biri imẹ Goshẹni; ị marịn ndị marịn ẹnya a imẹ wẹ, y'e bu ihiẹn-uriri m che wẹ ẹka.”

⁷ Josẹfụ nọ nwan wẹhẹ Jekọpụ nẹdi ẹ d'a ghọsị Fẹro. Jekọpụ a gọzigụ Fẹro,

⁸ Fẹro nọ sị Jekọpụ, “Nwa ahụa ole k'ị wụ?”

⁹ Jekọpụ nọ sị Fẹro, “A wahunmẹlẹ m elu-ụwanị ahụa iri kwasị ọgụn isin. O ke te tekẹ m — bụ ẹnya a hụnọlẹ m ihiẹn; kanị m'e ke tọhandẹ kẹ ndị nẹdi m wẹ.”

¹⁰ Ya Jekọpụ nọ gọzi Fẹro, gha ebe Fẹro rị pụ.

¹¹ Josẹfụ nọ we nẹdi ẹ lẹ umunẹ ẹ che ebe wẹ jẹnkọ d'e bi. O ye wẹ ebe kachanrịn mma imẹ alị Ijiptu, ya wụ ẹgbẹrẹ Ramsisi, kẹ Fẹro dọn gwa a.

¹² Josẹfụ nọzị ye nẹdi ẹ lẹ mmunẹ ẹ lẹ ndị ile rị ikpụlọ nẹdi ẹ ihiẹn-oriri: o ye onyẹ-onyẹ kẹ ndị rị iwe ẹ buhan ọda.

Akọ-lẹ-uche Josẹfụ Gi Zụọ Ijiptu

¹³ Ogẹn ahụn, ihiẹn-oriri hụ a kọ ụzọ ile makẹni ụnwụn ahụn e kẹnrẹnpụgụọ. Onwọnzini ihiẹn rị alị Ijiptu lẹ alị Kenaanị yeni ụnwụn hụ.

¹⁴ Ya kẹ egho ile rị alị Ijiptu lẹ alị Kenaanị nọ lashi ẹka Josẹfụ, ebe wẹ rị e ṅọnnarịn a ihiẹn-oriri, Josẹfụ hụ e kpọn egho ndị ahụn ile a la obi-eze Fẹro.

¹⁵ Ogẹn egho gi gụ ndị alị Ijiptu lẹ alị Kenaanị ẹka, ndị Ijiptu ile nọ bịa d'e kunrun Josẹfụ, sị a, “Ye ẹnyi ihiẹn-oriri! Nị ẹgụn gbu ẹnyi nwan ebe ị rị a? Egho ẹnyi a gụgụọ maị!”

¹⁶ Ya Josẹfụ nọ sị wẹ, “Wẹhẹni nwan ihiẹn-uriri ụnụ, nị ụnụ gi ihiẹn-uriri ụnụ ṅọnnarịn m ihiẹn-oriri, ebe o mẹ ni egho ụnụ a gụgụọ.”

¹⁷ Ya wẹ nọ wẹhẹmẹni Josẹfụ ihiẹn-uriri wẹ; Josẹfụ nọ gi ihiẹn-oriri gbanarịnma wẹ ẹshin wẹ, atụnrụn lẹ ewu wẹ, efin wẹ lẹ jaki wẹ. Josẹfụ nọ yechanrịn wẹ ihiẹn-oriri ahụa hụ e we gụ, gi ẹ gbanarịnchanrịn wẹ ihiẹn-uriri wẹ ile.

¹⁸ Ahụa ahụn a gụ, ahụa a bọ, wẹ nọzị bịa d'e kunrun Josẹfụ, sị a, “Diọkpa, ẹnyi a s'ẹka zuemẹn'i y'ẹ, nị hụnnị egho ẹnyi gụchanrịngụ nwan, hụnnị anụ ile ẹnyi nwọn họnringụ nwan nke i, onwọnzini nwan ihiẹn họdụnị ẹnyi k'e ye i Diọkpa karị ẹhụ ẹnyi lẹ alị ndị ẹnyi nwọn.

¹⁹ Ọ hụ nwan mma nị ẹnyi ile rị alịnị nwụnhụn ebe ị rị a, kẹ ẹnyi kẹ alị ẹnyi? Weri nwan ẹnyi lẹ alị ẹnyi ye ẹnyi ihiẹn-oriri, nị ẹnyi wụrụ igbọn Fẹro, alị ẹnyi a wụrụ nke Fẹro; kasị ị ye ẹnyi ihiẹn-oriri, kẹni ẹnyi rị ndụn amamgbe ẹnyi a nwụnhụn — ogẹn ahụn, o nwọnkọzị onyẹ k'a họdụ alịnị.”

²⁰ Ya Josẹfụ nọ ṅọntọchanrịnnị Fẹro alị ile rị Ijiptu. Ya ndị Ijiptu ile nọ rechanrịn alị ile wẹ nwọn makẹni ụnwụn ahụn bitụ wẹ ẹka; alị ile rị Ijiptu nọ họnrin nke Fẹro.

²¹ Josẹfụ nọ gi ndị Ijiptu ile họnrin igbọn, ebe ile alị Ijiptu gha.

²² Ndị ohẹn-mmọn alị Ijiptu sụọ k'o ṅọnnarịnlẹni alị wẹ, makẹni Fẹro e butọnị wẹ nke wẹ, o ru ogẹn ọ kaye o ye wẹ ịya. Hụn ahụn Fẹro e ye wẹ hụ e zu wẹ. Ịya haịn wẹ gilẹni re alị wẹ.

²³ Josẹfụ nọ sị ndị Ijiptu, “Lee ni ẹnya: hụnnị m ṅọngụ nwan ụnụ lẹ alị ụnụ tannị ye Fẹro, lee ni nkpụrụ w'a kụn; rụnma nị alị ndị ahụn ugbo.

²⁴ Kanị, ihiẹn-ugbo pụha, ụzọ ohu imẹ ụzọ isẹn k'a wụrụ nke Fẹro, ụzọ ẹnọ a wụrụ nke ụnụ, hụn ụnụ k'a kụnzị lẹ hụn ụnụ lẹ ezi-lẹ-ụlọ ụnụ lẹ ụmụ ụnụ ndị ntịtị k'e ri.”

²⁵ Wẹ nọ sị a, “Y'a zụọpụhagụọ ndụn ẹnyi; y'e mẹkẹ, Diọkpa, ẹnyi jẹnkọ d'a wụ igbọn Fẹro.”

²⁶ Ya Josẹfụ nọ gi ẹ hi uhi imẹ alị Ijiptu ile: nị Fẹro nwọn ụzọ ohu imẹ ụzọ isẹn imẹ ihiẹn-ugbo ile wẹ ghọ alị Ijiptu. Ẹrịra k'ọ rịkwọ nwan d'e ru tannị. Alị ndị ohẹn-mmọn sụọ kẹ Fẹro werilẹni.

Izrẹlụ E Biri Alị Ijiptu

²⁷ Ndị Izrẹlụ e birigụọ nwan alị Ijiptu, imẹ Goshẹni, e nwọnrin alị ebẹhụ, a mụ mmụ ọda-ọda, a barahị.

²⁸ Ahụa mmẹsa kẹ Jekọpụ bi alị Ijiptu; Jekọpụ tọ ahụa ẹsa kwasị ọgụn-ẹsa.

²⁹ O rumẹ ogẹn Jekọpụ e gi nwụn, ọ nọ kpọ nwa a wụ Josẹfụ, sị a, “Omẹni ihiẹn m a sụọghọ ị, bu ẹka che m okpuru ọgbọdọgbọ kunni m'ẹ n'i sikọ d'e mẹni ihiẹn m k'a rịọ ị nke nẹdi i, m'ẹ kẹ onyẹ wẹ gi e dọn ẹnya. Elitọkwọlẹ m alị Ijiptu.

³⁰ M nwụnhụn laburu ndị nẹdi m wẹ, ghakwọ Ijiptu bupụ m d'e liye ebẹhụ wẹ liye ndị nẹdi m wẹ.” Josẹfụ nọ sị a, “M k'e mẹ kẹ i dọn ku.”

³¹ Ya Jekọpụ nọ sị a, “Kunni m Osolobuẹ.” Josẹfụ nọ kunn'ẹ Osolobuẹ. Jekọpụ nọ hulụanị Osolobuẹ isi isi bẹdi ẹ ebahụn.