Jẹnẹsisi 46 - Ika

Isi Nke Isin Kwasị Ọgụnnaị Jekọpụ Lẹ Ezi-lẹ-ụlọ A A Kwashi Alị Ijiptu

¹ Jekọpụ nọ weri ihiẹn ile o nwọn, buli; ogẹn o gi ru alị Biẹshẹba, ọ nọ chụnyeni Chuku hụn nẹdi ẹ wụ Aziki fe ẹjan.

² O ru imẹ abalị, Izrẹlụ nọ hụn ọhụn. Imẹ ọhụn ahụn, Chuku nọ hị a, “Jekọpụ! Jekọpụ!!” Jekọpụ nọ sị a, “Lee m ebeni.”

³ Ya Osolobuẹ nọ sị a, “Mmẹ wụ Chuku, Chuku hụn nẹdi i fe. Atụlẹ egun n'i jẹnkọ alị Ijiptu, makẹni m k'e gi i họnrin okẹn alị hi-ogbe ebẹhụ.

⁴ Mmẹ lẹ enwẹn m k'e sọnjẹn i alị Ijiptu. M k'e welụarịrị ị; idẹnya Josẹfụ kẹ y'a nọ nwụn, ịya k'e shikpumẹ i ẹnya.”

⁵ Ya Jekọpụ nọ gha alị Biẹshẹba buli. Ụgbọ-anyịnyan ndị ahụn Fẹro buye ụmụ Izrẹlụ d'e gi buhẹ Jekọpụ kẹ wẹ gi buru Jekọpụ nẹdi wẹ lẹ ụmụ wẹ lẹ inyẹnmẹ wẹ.

⁶ E kpọrinzịghọ wẹ anụ-ụlọ wẹ lẹ ihiẹn ile wẹ nwọn imẹ alị Kenaanị. Ya kẹ Jekọpụ lẹ ụmụ a lẹ ụmụ-ụmụ a ile nọ bịa alị Ijiptu.

⁷ Jekọpụ weri ụmụ a ikẹnnyẹ lẹ oyẹ ẹ ikẹnnyẹ, ụmụ a ikpoho lẹ oyẹ ẹ ikpoho; ẹbozo ẹ ile k'o kpọnhẹn alị Ijiptu.

⁸ Lee ẹfan ndị Izrẹlụ (Jekọpụ lẹ ẹbozo ẹ) hụn jẹn alị Ijiptu: Rubẹni nwa ibuzọ Jekọpụ.

Ndị Lia Mụ

⁹ Ụmụ Rubẹni wụ Hanọkụ, Palu, Hẹzrọnụ lẹ Kami.

¹⁰ Ụmụ Simiọnụ wụ Jemuẹlụ, Jamini, Ohadị, Jakini lẹ Zoha: uwẹ lẹ Shaulu hụn okpoho onyẹ Kenaanị mụn'a.

¹¹ Ụmụ Livaị wụ Gẹshọnụ, Kohatị lẹ Mẹrari.

¹² Ụmụ Juda wụ Eri, Ọnanị, Shẹla, Pẹrẹzi lẹ Zẹra (kanị Eri lẹ Ọnanị nwụntọ alị Kenaanị). Ụmụ Pẹrẹzi wụ Hẹzrọnụ lẹ Hamulu.

¹³ Ụmụ Isaka wụ Tola, Pụva, Jashubu lẹ Shimrọnụ.

¹⁴ Ụmụ Zẹbulọnụ wụ Seredi, Ẹlọnụ lẹ Jaliẹlụ.

¹⁵ Uwẹ wụ ụmụ Lia mụnị Jekọpụ imẹ alị Padan-Aram, wẹ lẹ Daịna hụn wụ akpụ okpoho ohu Jekọpụ mụ. Ụmụ Jekọpụ ndịnị wẹ, kẹ ikẹnnyẹ kẹ ikpoho rịn'a, rị mmẹtọ kwasị ọgụn.

Ndị Zil'pa Mụ

¹⁶ Ndịnị wụ ụmụ Gadị: Zẹfọnụ, Hagi, Shuni, Ẹz'bọnụ, Ẹri, Arodi lẹ Areli.

¹⁷ Ụmụ Asha wụ Imna, Ish'va, Ish'vi, Bẹrịa lẹ Sẹra hụn wụ nwẹnẹ wẹ okpoho. Ụmụ Bẹrịa wụ Hẹba lẹ Mal'kiẹlụ.

¹⁸ Uwẹ wụ ụmụ Zil'pa, okpoho Labanị gi du nwa a wụ Lia, mụnị Jekọpụ. Wẹ ile rị mmisin.

Ndị Rechẹlụ Mụ

¹⁹ Ụmụ Rechẹlụ nwunyẹ Jekọpụ mụn'a wụ Josẹfụ lẹ Bẹnjamini.

²⁰ Josẹfụ nke nọ mụ Manasẹ lẹ Ifrem imẹ alị Ijiptu — Asenatị nwunyẹ ẹ, nwa Pọtifẹra ohẹn-mmọn Ọọnị, mụ wẹ.

²¹ Ụmụ Bẹnjamini wụ Bẹla, Bẹkẹri, Ashibẹlụ, Gẹra, Naamanị, Ehi, Roshi, Mupim, Hupim lẹ Aridi.

²² Uwẹ wụ ikẹnnyẹ hụn Rechẹlụ mụnị Jekọpụ. Wẹ ile rị mmẹnọ.

Ndị Bil'ha Mụ

²³ Okẹnnyẹ Danị mụ wụ Hushim.

²⁴ Ikẹnnyẹ Naf'tali mụ wụ Jaziẹlụ, Guni, Jeza lẹ Shilẹm.

²⁵ Uwẹ wụ ụmụ Bil'ha, okpoho Labanị gi du nwa a wụ Rechẹlụ, mụnị Jekọpụ. Wẹ ile rị ẹsa.

²⁶ Ndị ile wẹ lẹ Jekọpụ wị jẹn alị Ijiptu, ndị hụn ọ mụ, rị isin kwasị ọgụn ẹtọ wezụka inyẹnmẹ ụmụ a.

²⁷ Wẹ gụnye ikẹnnyẹ ẹbụọ wẹ mụnị Josẹfụ alị Ijiptu, ndị ikpụlọ Jekọpụ ile hụn jẹn alị Ijiptu wụ mmadụ iri kwasị ọgụn ẹtọ.

Ebọn Jekọpụ E Biri Goshẹni

²⁸ Jekọpụ nọ sị Juda ya burun'ẹ ụzọ jẹngụ d'a jụ Josẹfụ ụzọ wẹ gha e jẹn Goshẹni. E ru wẹ ẹgbẹrẹ Goshẹni,

²⁹ ya Josẹfụ nọ buru ụgbọ-ẹshin ẹ, shi Goshẹni d'e kunrun Izrẹlụ nẹdi ẹ. Hụn Josẹfụ gihụ ru ebe nẹdi ẹ rị, ọ nọ fiedọn nẹdi ẹ, kwanbie ẹkwan ọhụnma-ọhụnma.

³⁰ Ya Izrẹlụ nọ sị Josẹfụ, “M nwụnhụn kikẹnni ọ jọnị njọ, ebe o mẹni e gigụọ m ẹnya m hụn nị echẹn kẹ ị rị ndụn!”

³¹ Josẹfụ nọ sị mmunẹ ẹ lẹ ikpụlọ nẹdi ẹ, “M k'e jẹn d'e sọn Fẹro ku; m jẹnkọ d'a sị a, ‘Mmunẹ m lẹ ikpụlọ nẹdi m hụn te rị Kenaanị a lụaburuhẹgụọ m.

³² Anụ kẹ w'e du, makẹni w'a kpa ihiẹn-uriri; e kpọnhẹngụọ wẹ igunrun atụnrụn, ewu, efin wẹ lẹ ihiẹn ndị ọzọ ile wẹ nwọn.’

³³ “Fẹro kpọ ụnụ, sị ụnụ, ‘Kịnị kẹ ụnụ a rụn?’

³⁴ Sị n'a, ‘Ihiẹn-uriri kẹ ẹnyi wụ ụmụ ị a kpa gha alị lala, rịkẹ ndị nẹdi ẹnyi kanị’. Za n'a ẹrịra kẹn'ọ nịkwọ ụnụ biri imẹ Goshẹni, makẹni ndị Ijiptu a sọ ndị ile e du anụ asọ.”