Jẹnẹsisi 44 - Ika

Isi Nke Ẹnọ Kwasị Ọgụnnaị Josẹfụ E Lelezi Umunẹ Ẹ

¹ Josẹfụ nọ sị nwata-iwe ẹ, “Kpọnyeni ndịnị ihiẹn-oriri ọhụnma-ọhụnma imẹ ẹkpa ile wẹ bu, kpọnyechanrịnnị wẹ kẹ wẹ k'a s'ẹka bu, y'e bu egho onyẹ-onyẹ chen'ẹ imẹ ẹkpa a.

² Y'e bu mkpu m, hụn nẹi wẹ gi siliva kpụ, che imẹ ẹkpa nwa-ndu rịn'a, ya lẹ egho o gi ṅọn ọka.” Ọ nọ mẹ ihiẹn Josẹfụ gwa a.

³ Eki e fọnmẹ, wẹ nọ sị wẹ buru jaki wẹ lama.

⁴ A ghagụ wẹ hụ imẹ obodo ahụn pụ, wẹ e ke jẹn ejẹn, Josẹfụ nọ sị nwata-iwe ẹ, “Ọsọ, chụ ikẹnnyẹ ahụn; i kunrun wẹ, sị wẹ, ‘Kị haịn ụnụ gi gi njọ kụ mma?

⁵ Ẹlẹ mkpu ahụn ụnụ weri kẹ di-nwọnni m gi a ra mirin, a gba ẹfa? Ihiẹnni ụnụ mẹ a jọka!’ ”

⁶ Ogẹn o gi gbakunrun wẹ, ọ nọ gwachanrịn wẹ oku ndịnị Josẹfụ sị a gwa wẹ.

⁷ Wẹ nọ sị a, “Diọkpa nanị y'e kuzi oku nọ ẹnịna? W'a sọ! Ẹnyi wụ idibo i emẹkọ ihiẹn nọ ẹrịra!

⁸ Egho ndị nẹi ẹnyi hụn imẹ ẹkpa ẹnyi, ẹnyi aghanị alị Kenaanị wekinhẹn'i y'ẹ? Nanị kẹ ẹnyi a dọnzi zunrun siliva mọbụ goru iwe di-nwọnn'i?

⁹ Onyẹ ọwụlẹ wẹ hụn a ẹka imẹ ẹnyi, wẹ gbu ẹ, ndị họdụnị a wụrụ igbọn Diọkpa.”

¹⁰ Ọ nị sị wẹ, “Ọ hụghọ mma; ya rị kẹ ụnụ dọn ku: onyẹ wẹ hụn a ẹka k'e họnrin igbọn m; kanị, onwọnni ihiẹn wẹ k'e mẹ ndị họdụnị.”

¹¹ Ya onyẹ-onyẹ nọ butu ẹkpa a ozigbo-ozigbo, tọpụ a.

¹² Nwata-iwe Josẹfụ nọ gha nke hụn kanị chọma, d'e ru nke hụn nta; wẹ nọ hụn mkpu ahụn imẹ ẹkpa Bẹnjamini.

¹³ Wẹ ile nọ gi ufiri ihiẹnni dọka ẹkwa ye enwẹn wẹ olu. Onyẹ-onyẹ nọ dọnmẹzi ibu ẹ ye elu jaki ẹ, wẹ nọ kin azụụn shi imẹ obodo ahụn.

¹⁴ Josẹfụ e ke ghakwọ mmụlọ pụ kẹ Juda lẹ mmunẹ ẹ banhan; wẹ ile nọ dannị Josẹfụ alị.

¹⁵ Ya Josẹfụ nọ sị wẹ, “Kịnị wụ ihiẹnni ụnụ mẹ? Ụnụ amarịn nị onyẹ nọ kẹ mmẹ a mahụn ọhụnma-ọhụnma?”

¹⁶ Ya Juda nọ sị, “Diọkpa, kị ẹnyi k'a gwazị ị nwan? Kị ẹnyi k'e kuzi nwan? Nanị ẹnyi e dọnzi nwan ghọsị nị ẹnya ẹnyi eruni? Osolobuẹ e kpupụgụọ njọ ẹnyi wụ idibo i mẹ; Diọkpa, ẹnyi e họnringụọ nwan igbọn i, kẹ ẹnyi kẹ hụn wẹ nọ ẹka a hụn mkpu ahụn.”

¹⁷ Josẹfụ nọ sị, “O bugharị m! Emẹkọ m'a! Onyẹ wẹ nọ ẹka a hụn mkpu ahụn sụọ k'a wụrụ igbọn m; ụnụ ndị họdụnị, laburu ni nẹdi ụnụ, ụnụ enwọn nsọngbu.”

Juda A Rịọ Josẹfụ Ya Hatu Bẹnjamini Ye

¹⁸ Juda nọ nọkunmẹ Josẹfụ, sị a, “Diọkpa, dodo nị odibo i gwa ị akpụ oku ohu, dodo ekpelẹ — n'a marịngụọ m nị yụ lẹ Fẹro han.

¹⁹ Diọkpa, y'a jụghọ ẹnyi, ‘Ụnụ e nwọnghọ nẹdi mọbụ nwẹnẹ-okẹnnyẹ?’

²⁰ Ẹnyi nọ sị ị, ‘Ẹnyi e nwọnghọ nẹdi hụn kagụ ẹgẹdi lẹ nwata okẹnnyẹ, hụn nẹdi ẹnyi gi ẹhụ ẹgẹdi mụ. Hụn nnẹ ohu mụ ya lẹ nwata-okẹnnyẹ ahụn a nwụnhụngụọ; ya sụọ họdụ imẹ ụmụ nnẹ ẹ; nẹdi ẹ e mẹn'ẹ nwa.’

²¹ “Ya ị nọ sị ẹnyi, ‘Wẹhẹ ni ni m'ẹ nị m gi ẹnya m hụn a.’

²² Ẹnyi nọ sị Diọkpa, ‘Nwata ahụn as'ẹka pụ ebe nẹdi ẹ rị, makẹni, ọ gha ẹhụ nẹdi ẹ pụ, nẹdi ẹ a nwụnhụn.’

²³ Kanị ị nọ sị ẹnyi, ‘Omẹni ụnụ ewẹhẹni nwẹnẹ ụnụ hụn nta ahụn, abịakwọlẹ ni d'a hụnzị m.’

²⁴ Ogẹn ẹnyi gi kunrun odibo i wụ nẹdi m, ẹnyi nọ gwa a ihiẹn ile i ku.

²⁵ “Omẹgụ nẹdi ẹnyi nọ sị ẹnyi, ‘Kin ni d'e ṅọnhẹnzi ẹkẹrẹ ihiẹn-oriri.’

²⁶ Ẹnyi nọ sị a, ‘Ẹnyi asakọ ẹka jẹn. Ẹnyi lẹ nwa-mbi wịrị sụọ kẹ ẹnyi a nọ jẹn; makẹni anịkọ wẹ ẹnyi hụn okẹnnyẹ ahụn sokpan ẹnyi lẹ nwa-mbi wị jẹn.’

²⁷ “Ya odibo i wụ nẹdi m nọ sị ẹnyi, ‘Ụnụ a marịngụọ nị wẹ rị ikẹnnyẹ ẹbụọ nwunyẹ m mụnị m;

²⁸ ohu a nahịngụọ m, m nọ sị, “Anụ-ọfịa a dọrinringụọ a”; ahụnkwọnị m'a nwan kete mgbe ahụn.

²⁹ Ụnụ narịnzị m nwan hụnnị, nị eje-ihiẹn e mẹ ẹ, ụnụ e mẹ mmẹ lẹ isi m ni chanchanrịngụ ẹwọ kwan ụya la mmọn.’

³⁰ “M lakin nwan azụụn d'e kunrun odibo i wụ nẹdi m bụ ẹlẹ ẹnyi lẹ nwatanị wị, nị nẹdi m, hụn gigụ nwatanị họnrin ndụn a,

³¹ a hụn a nị ẹnyi ewelụanị nwatanị, o k'a nwụnhụn, ẹnyi e mẹ nẹdi ẹnyi gi isi-ẹwọ kwan ụya la mmọn.

³² Mmẹ wụ odibo i biye ẹka kwe nẹdi m nkwa n'o nwọnni ihiẹn k'e mẹ nwatanị, sị a, ‘Omẹni ewelụanịnị m'ị y'a, e gi m isi m buru ihiẹn ile rịn'a e we m nwụn!’

³³ “Dodo, nị mmẹ lẹ enwẹn m nọdị nwan ebeni wụrụ igbọn i, Diọkpa, n'ị hatu nwa-nduni, kẹni nwa-nduni sọn mmunẹ ẹ la.

³⁴ Nanị m'a dọn laburu nẹdi m bụ ẹlẹ mmẹ lẹ nwa-nduni wị? Mba-o! Obi m echekọ eje-ọnọdị nẹdi m k'a rị!”