Jẹnẹsisi 43 - Ika

Isi Nke Ẹtọ Kwasị Ọgụnnaị Umunẹ Josẹfụ E Wẹhẹ Bẹnjamini Alị Ijiptu

¹ Ụnwụn nwẹn hụkwọ e kẹnrẹn imẹ alị Kenaanị.

² Ogẹn wẹ gi nwan richanrịngụ ọka ile wẹ gha alị Ijiptu bulụa, nẹdi wẹ nọ sị wẹ, “Jẹnzi ni Ijiptu d'e ṅọnhẹn ẹkẹrẹ ihiẹn-oriri ẹnyi jẹnkọ e ri.”

³ Juda nọ sị a, “Okẹnnyẹ ahụn gba ẹnyi mkpịnsịn-ẹka ẹnya ọda-ọda, sị, ‘Anịkọkwọ m ụnụ bịa d'a hụn m sokpan ụnụ lẹ nwẹnẹ ụnụ ahụn wị.’

⁴ I kweri nị ẹnyi lẹ Bẹnjamini wịrị, ẹnyi e jẹn d'e ṅọnhẹnn'i ihiẹn-oriri;

⁵ omẹni y'a nịn'a sọnjẹn ẹnyi, ẹnyi ejẹnkọ: makẹni okẹnnyẹ ahụn sị ẹnyi, ‘Elekọkwọ m ụnụ ẹnya ihun sokpan ụnụ lẹ nwẹnẹ ụnụ ahụn wị.’ ”

⁶ Izrẹlụ nọ sị wẹ, “Kị ụnụ mẹni m eje-ihiẹn nọ ẹnịna, gwama okẹnnyẹ ahụn nị ụnụ nwọnzi nwẹnẹ ichẹn?”

⁷ Wẹ nọ sị nẹdi wẹ, “Okẹnnyẹ ahụn dọnrin ẹnya jụ ẹnyi ukwere ẹnyi lẹ nẹdi ẹnyi, sị, ‘Nẹdi ụnụ hụkwọ ndụn? Ụnụ nwọnzi nwẹnẹ-okẹnnyẹ ọzọ?’ Ẹnyi zahụ ihiẹn ọ jụ ẹnyi; nanị ẹnyi a dọn marịn n'o k'a sị ẹnyi, ‘Wẹhẹ ni nwẹnẹ ụnụ’?”

Juda Sị Wẹ Tu Bẹnjamini Ye Ẹ Ẹka

⁸ Ya Juda nọ nwan sị Izrẹlụ nẹdi ẹ, “Tu nwata ahụn ye m ẹka, ẹnyi e jẹnmẹ ozigbo, kẹni ẹnyi ile rị ndụn, kẹ ẹnyi kẹ ịyụ kẹ ụmụ ẹnyi, amamgbe ẹgụn e gbu ẹnyi.

⁹ Mmẹ lẹ enwẹn m k'e biye ẹka n'o nwọnni ihiẹn k'e mẹn'ẹ, tu isi ẹ ye m ẹka. Omẹni ewelụanị m'a, bu ẹ che ihun i ebeni, e gi m isi m buru ihiẹn ile rịn'a e we m nwụn.

¹⁰ Omẹni ẹnyi jẹnmẹ nwan kete elee mgbe, nkẹ ẹnyi a lụapụgụọ mgbe ẹbụọ.”

¹¹ Izrẹlụ nẹdi wẹ nọ sị wẹ, “O mẹ nwan ni onwọnzini kẹ w'e mẹ ẹ, lee ni nwan ihiẹn ụnụ jẹnkọ d'e mẹ: kpọnrin ni ihiẹn kachanrịn mma alịnị ye imẹ ẹkpa ụnụ bujẹnnị okẹnnyẹ ahụn; werizi ni ẹkẹrẹ ori-Kenaanị lẹ ẹkẹrẹ mirin-ẹnwụn, ihiẹn ihiẹn-oriri gi a sụọ, mkpụrụ-pistachio lẹ amọndụ.

¹² Weri ni egho han kẹ hụn ụnụ gi jẹn mbụ ụzọ ẹbụọ; makẹni ụnụ jẹnkọ d'e wekinrịrị egho ndị ahụn wẹ buchekinni ụnụ imẹ ẹkpa ụnụ; ikẹnkwọ a marịn wẹ ogẹn wẹ gi buche wẹ.

¹³ Werizi ni Bẹnjamini nwẹnẹ ụnụ, ụnụ e jẹnburu okẹnnyẹ ahụn ozigbo.

¹⁴ Chuku Nwọn ikẹn ile ya mẹni ụnụ omikẹn, mẹ okẹnnyẹ ahụn kweri hatuni ụnụ nwẹnẹ ụnụ o kwọndọn lẹ Bẹnjamini, nị wẹ hụn ụzọ lụaha. O mẹ nke m, omẹni ọnwụn ụmụ e kunrungụọ m, o kunrungụọ m!”

Josẹfụ A Hụnzị Bẹnjamini

¹⁵ Wẹ nọ buru ihiẹn ndị nwẹn wẹ sikọ d'e ye, weri egho han kẹ hụn wẹ wejẹn mbụ ụzọ ẹbụọ, werizikwọ Bẹnjamini. Wẹ nọ shi Ijiptu ozigbo-ozigbo. Ya wẹ nọ pụha ihun Josẹfụ.

¹⁶ Ogẹn Josẹfụ gi hụn kẹ wẹ lẹ Bẹnjamini wị, ọ nọ sị nwata-iwe ẹ, “We ikẹnnyẹ ndịnị shi iwe m, gbu anụ, shi ihiẹn-oriri; mmẹ lẹ wẹ k'e ri ihiẹn-oriri efinaị.”

¹⁷ Okẹnnyẹ ahụn nọ mẹ ihiẹn Josẹfụ gwa a, we ikẹnnyẹ ahụn shi iwe Josẹfụ.

¹⁸ Egun hụ a tụ wẹ nị wẹ we wẹ shi iwe Josẹfụ. Wẹ hụ a sị ibe wẹ, “Oku egho ahụn wẹ buchekin imẹ ẹkpa ẹnyi kẹ ẹnyi bịa nke ibuzọ haịn wẹ gi wẹhẹ ẹnyi ebeni. Ọ chọkọ nwan n'o mẹ ẹnyi ihiẹn, gi ẹnyi họnrin igbọn, weri jaki ẹnyi ile.”

¹⁹ E ru w'ẹ, wẹ nọ jẹnburu okẹnnyẹ iwe Josẹfụ rị ẹka a ebe ọ rị ọnụmụzọ, sọn ẹ kumẹ,

²⁰ sị a, “Diọkpa, dodo, ẹnyi a bịagụọ ebeni mbụ d'e ṅọn ihiẹn-oriri;

²¹ Kanị, ogẹn ẹnyi gi ru ebe ẹnyi jẹnkọ d'a ranhịn ụzọ, ẹnyi nọ tọpụ ẹkpa ẹnyi, onyẹ-onyẹ imẹ ẹnyi nọ hụn a nị egho o gi ṅọn ihiẹn rịzị imẹ ẹkpa a. Egho ẹnyi ile hanchanrịndẹ k'ọ han. Ẹnyi wekinhẹn nwan egho ndị ahụn.

²² Ẹnyi gihụzị egho ọzọ ẹnyi e gi nwan ṅọnrin ihiẹn-oriri. Ẹnyi amarịn onyẹ bu egho ẹnyi chesọnmẹni ẹnyi ẹkpa.”

²³ Ọ nọ sị wẹ, “Wetu ni obi alị; atụlẹ ni egun; Chuku ụnụ e fe, hụn wụzị Chuku nẹdi ụnụ e fe, bucheni ụnụ ihiẹn-ọma imẹ ẹkpa ụnụ; egho ụnụ e rughọ m ẹka.” Ọ nọ wepụhanị wẹ Simiọnụ.

²⁴ O wẹhẹ wẹ iwe Josẹfụ, ọ nọ kuyeni wẹ mirin gi chanpụ ụkụ, yezikwọ Jaki wẹ ihiẹn-oriri.

²⁵ Ya wẹ nọ dọnmẹtọnị Josẹfụ ihiẹn ndị wẹ buhẹn'ẹ, cheri n'ọ pụha ogẹn efinaị, makẹni a nụgụọ wẹ nị wẹ k'e ri ihiẹn-oriri ebahụn.

²⁶ Ogẹn Josẹfụ gi lụaha, wẹ nọ bubanhann'a ihiẹn ndị ahụn wẹ buhẹn'ẹ mmụlọ, kụn'a isi-alị.

²⁷ Josẹfụ nọ jụ wẹ, “Nanị ụnụ rị?” Ọ sịzị wẹ, “Nẹdi ụnụ hụ ikẹn? Hụn ẹgẹdi ahụn ụnụ gwa m oku ẹ? Ọ hụkwọ nwan ndụn?”

²⁸ Wẹ nọ sị a, “Odibo i wụ nẹdi ẹnyi hụ ikẹn; echẹn k'ọ rị ndụn.” Wẹ nọ hulụan'a isi, kele ẹ.

²⁹ O lehunmẹ ẹnya, hụn Bẹnjamini nwẹnẹ ẹ, ya lẹ ịya wụ nnẹ ohu, ọ nọ sị, “Hụnnị wụ nwẹnẹ ụnụ hụn nta nwẹn ụnụ gwa m oku ẹ? Osolobuẹ ya nọyen'i nwa m!”

³⁰ Hụn ahụn Josẹfụ hụn nwẹnẹ ẹfọ a, o mẹtụ a obi ọda-ọda, ọ nọ pụ ozigbo, ẹkwan hụ a chọ n'ọ nahịn a. Ọ nọ shi mmughẹ ẹ, nọ ebẹhụ kwan ẹkwan.

³¹ O fingụ ihun, ọ nọ pụha, kwọndọn enwẹn ẹ, sị idibo ẹ, “Kemẹ ni ihiẹn-oriri.”

³² Wẹ nọ bucheni Josẹfụ nke ẹ ichẹn, buche nke umunẹ ẹ ichẹn, bucheni ndị Ijiptu a nọ iwe ẹ e ri nke wẹ ichẹn — makẹni ndị Ijiptu ara sọn ndị Hibru ri ihiẹn-oriri ụzọ ohu, agwa k'ọ wụ ebe ndị Ijiptu rị.

³³ Umunẹ Josẹfụ nọ nọdịsọnmẹ ebe wẹ sị wẹ nọdị — wẹ nọ hụn a nị kẹ wẹ dọnsọnmẹ dịan rọ, ọ tụ wẹ ẹnya ọda-ọda, wẹ hụ e lee ibe wẹ.

³⁴ Elu teburu Josẹfụ kẹ wẹ gha buyesọnmẹ wẹ ihiẹn-oriri ahụn; hụn wẹ buye Bẹnjamini wụ ụzọ isẹn. Wẹ nọ sọn Josẹfụ ra manya rajun ẹfọ.