Jẹnẹsisi 42 - Ika

Isi Nke Ẹbụọ Kwasị Ọgụnnaị Umunẹ Josẹfụ A Chọjẹn Ihiẹn-oriri Alị Ijiptu

¹ Ogẹn Jekọpụ gi nụ nị ihiẹn-oriri rị alị Ijiptu, Jekọpụ nọ sị ụmụ a, “Kị ụnụ rị e letarịnị ile?”

² Ọ nọzị sị, “A nụghọ m nị ọka rị alị Ijiptu. Jẹnmẹ ni nwan ebahụn d'e ṅọnhẹn ihiẹn-oriri nị ẹnyi ri rị ndụn, amamgbe ẹnyi a nwụn.”

³ Ya kẹ umunẹ Josẹfụ iri nọ shi alị Ijiptu d'e ṅọn ọka.

⁴ Kanị Jekọpụ ekwerini nị Bẹnjamini, hụn Josẹfụ sụa, sọnjẹn wẹ, makẹni ọ chọnị nị eje-ihiẹn mẹ ẹ ụzọ.

⁵ Ya ụmụ Izrẹlụ nọ bịa alị Ijiptu d'e ṅọn ọka nọkẹ ndị ọzọ rị a bịanị, makẹni ụnwụn ahụn ruzi alị wẹ wụ Kenaanị.

⁶ Josẹfụ rị a kị alị Ijiptu ogẹn ahụn; ịya kẹ ndị alị ile e ṅọnnarịn ọka. Ogẹn umunẹ Josẹfụ gi nwan bịa, wẹ nọ kụn'a isi alị.

⁷ Hụn Josẹfụ gihụ hụn umunẹ ẹ, ọ nọ marịn nị uwẹ rọ, kanị ọ nọ mẹ nọkẹ sị ọ marịn wẹ, ganma wẹ, sị wẹ, “Elebe kẹ ụnụ gha bịa?” Wẹ nọ sị a, “Alị Kenaanị kẹ ẹnyi gha bịa d'e ṅọn ihiẹn-oriri.”

⁸ Josẹfụ a marịngụọ nị umunẹ ẹ rọ, kanị umunẹ ẹ amarịn nị ịya rọ.

⁹ Ya Josẹfụ nọ nyanhan nrọ o gi umunẹ ẹ rọ; ọ nọ sị wẹ, “Ụnụ wụ ndị-nchọpụha; ụnụ bịa d'a chọpụha kẹ w'a dọn mẹri alị ẹnyi!”

¹⁰ Wẹ nọ sị a, “Mba Diọkpa! Ihiẹn-oriri kẹ ụmụ ị bịa d'e ṅọn.

¹¹ Nẹdi ohu mụ ẹnyi ile; ndị ezioku kẹ ẹnyi wụ, Diọkpa; onwọnni ihiẹn ẹnyi bịa d'a chọpụha.”

¹² Kanị Josẹfụ hụ a sị wẹ, “Ntụ! Ụnụ bịa d'a chọpụha kẹ w'a dọn mẹri alị ẹnyi.”

¹³ Wẹ nọ sị a, “Ẹnyi te rị ikẹnnyẹ mmẹbụọ. Okẹnnyẹ ohu rị alị Kenaanị mụ ẹnyi; nẹdi ẹnyi lẹ nwa-mbi rị nwan ụlọ; onyẹ ohu arịzịa.”

¹⁴ Josẹfụ nọ sị wẹ, “A gwagụọ m ụnụ ihiẹn m gwa ụnụ: ụnụ bịa d'e ke nke!

¹⁵ Lee ni nwan ihiẹn ẹnyi jẹnkọ d'e gi lele ụnụ: ma isi Fẹro, ụnụ alakọ, sokpan nwẹnẹ ụnụ hụn nta bịa ebeni!

¹⁶ Zi ni nwan onyẹ ohu imẹ ụnụ la d'e wẹhẹ nwẹnẹ ụnụ ahụn. Ẹnyi k'a kpọkin ụnụ ye, nị ẹnyi lele kẹ ihiẹn ụnụ ku wụ ezioku. Omẹni ẹlẹ ezioku, ma isi Fẹro, nke kẹ ụnụ bịa d'e ke!”

¹⁷ Ya Josẹfụ nọ kpọkin wẹ ile ye imẹ ụlọ-ngan ọrọgbọ akp'ọhịn ẹtọ.

¹⁸ Nke akp'ọhịn ẹtọ, Josẹfụ nọ sị wẹ, “Nị m gwa ụnụ ihiẹn ụnụ k'e mẹ makẹ wẹ gha e gbu ụnụ, makẹni egun Chuku a tụ m a tụ:

¹⁹ Omẹni ndị ezioku kẹ ụnụ wụ, latọ nị onyẹ ohu imẹ ụlọ-ngan ebeni; ndị họdụnị wẹ bu ọka lanị ndị rị ezi-lẹ-ụlọ ụnụ rị ẹgụn.

²⁰ Kanị, ụnụ k'e wẹhẹrịrịnị m nwẹnẹ ụnụ hụn nta ahụn, nị m hụn ụzọ gi oku ụnụ dọn, dọnmẹ ụnụ ndụn.” Wẹ nọ kweri ihiẹn Josẹfụ ku.

²¹ Wẹ ile hụ a sị ibe wẹ, “Ẹhẹn, ihiẹn ẹnyi mẹ nwẹnẹ ẹnyi kẹ ẹnyi rị nwan a narịn afụnfụn a; ẹnyi a hụnghọ ụya ọ rị imẹ k'ọ rị a rịọ ẹnyi ẹgbul'ẹ, ẹnyi egọnn'ẹ ntịn. Ya haịn ihiẹn ndịnị gi rị e mẹ ẹnyi.”

²² Rubẹni nọ sị wẹ, “Agwanị m ụnụ emẹlẹ nwata ahụn njọ, ụnụ a jụ? Lee ni nwan, ẹdeke ẹ rị ẹnyi isi!”

²³ Amarịn wẹ nị Josẹfụ hụ a ghọta ihiẹn wẹ rị e ku, hụn ahụn o mẹ ni wẹ rị a nayeni ya lẹ wẹ oku.

²⁴ Ya kẹ ọ nọ gha ebe umunẹ ẹ rị pụ d'a kwan ẹkwan. O kinhẹn, duzi wẹ ku. Ọ nọ weri Simiọnụ, nọ idẹnya wẹ kẹnmẹ ẹ.

²⁵ Ọ nọ sị idibo ẹ d'e kpọn ọka jun ẹkpa ndị wẹ buhẹ, sịzị wẹ bu egho onyẹ-onyẹ kụ chen'ẹ ẹkpa a, wẹ yezi wẹ ihiẹn wẹ k'e ri ụzọ. Ogẹn wẹ gi mẹchanrịnnị wẹ ihiẹn ile ọ sị wẹ mẹni wẹ,

²⁶ wẹ nọ dọn ẹkpa ọka wẹ ile jun elu jaki wẹ, lama.

²⁷ Uhinhin ahụn, wẹ nọ kụsị ebe wẹ k'a ranhịn. Onyẹ ohu tọpụzị ẹkpa n'o weri ihiẹn jaki ẹ jẹnkọ d'e ri, e lee egho ẹ ọnụ ẹkpa a!

²⁸ Ọ nọ sị umunẹ ẹ, “Wẹ wekinni m egho m! Lee n'ẹ imẹ ẹkpa m!!” A nụ w'a, obi nọ feri wẹ; wẹ nọ lemẹ wẹ ibe wẹ, ẹhụ hụ a ma wẹ nni; wẹ hụ a sị, “Kịnị wụ ihiẹnni Osolobuẹ mẹ ẹnyi?”

²⁹ Ogẹn wẹ gi lụaha d'e kunrun Jekọpụ nẹdi wẹ imẹ Kenaanị, wẹ nọ gwachanrịn a ihiẹn ile ẹnya hụn wẹ. Wẹ sị a,

³⁰ “Okẹnnyẹ hụn kị alị ahụn gan ẹnyi ọda-ọda, mẹ ẹnyi kẹ ndị bịa d'e ke alị wẹ nke.

³¹ Kanị ẹnyi nọ sị a, ‘Ndị ezioku kẹ ẹnyi wụ; ẹlẹ nke kẹ ẹnyi bịa d'e ke.

³² Ẹnyi te rị ikẹnnyẹ mmẹbụọ nẹdi ohu mụ; onyẹ ohu arịzịa; nwẹnẹ ẹnyi hụn nta lẹ nẹdi ẹnyi rị nwan alị Kenaanị.’

³³ “Ya kẹ okẹnnyẹ ahụn kị alị ahụn nọ sị ẹnyi, ‘Lee ni ihiẹn m'e gi marịn omẹni ndị ezioku kẹ ụnụ wụ: latọ nị nị m onyẹ ohu imẹ ụnụ, ụnụ e bu ọka lanị ndị rị ezi-lẹ-ụlọ ụnụ rị ẹgụn,

³⁴ ụnụ e wẹhẹni m nwẹnẹ ụnụ hụn nta ahụn ụnụ ku oku ẹ, nị m gi marịn nị ndị ezioku kẹ ụnụ wụ, nị ẹlẹ nke kẹ ụnụ bịa d'e ke. Ogẹn ahụn kẹ m'e gi hatuni ụnụ hụn m kwọndọn, ẹhụ e fu ụnụ imẹ alịnị.’ ”

³⁵ Ogẹn wẹ gi hupụma ọka wẹ bulụa, e lee ukun egho onyẹ-onyẹ gi kụ ụgwọ ọka imẹ ẹkpa ọka a! Ogẹn wẹ lẹ nẹdi wẹ gi hụn ngungun egho ndị ahụn, egun nọ tụma wẹ.

³⁶ Ya Jekọpụ nẹdi wẹ nọ sị wẹ, “Ụnụ a napụchanrịn m ụmụ: Josẹfụ arịzịa, Simiọnụ arịzịa! Ụnụ chọkọzị nwan nị ụnụ narịn m Bẹnjamini. Mmẹ kẹ ihiẹn ndịnị ile rị e mẹtụrụ!”

³⁷ Ya Rubẹni nọ sị nẹdi ẹ, “Omẹni ewelụanị nị m'ị Bẹnjamini, i nwọn ikẹn gbupụ ụmụ-ikẹnnyẹ ẹbụọ m nwọn; tu ẹ nwan ye m ẹka; m k'e welụa a.”

³⁸ Kanị Jekọpụ nọ sị a, “Nwa m esọnkọkwọ ụnụ! Josẹfụ nwa nnẹ ẹ a nwụnhụngụọ, ya sụọ họdụ nwan. Eje-ihiẹn mẹzi ẹ tan ijẹnni ụnụ chọ nị ụnụ jẹn, ụnụ e mẹ mmẹ lẹ isi m ni chanchanrịngụ ẹwọ kwan ụya la mmọn.”