Jẹnẹsisi 41 - Ika

Isi Nke Ohu kwasị Ọgụnnaị Nrọ Fẹro

¹ Ogẹn o gi zuchanrịn ahụa ẹbụọ, eze wụ Fẹro nọ rọ nrọ, hụn enwẹn ẹ ebe o wuzo mkpẹnrẹn Iyi Naịlị;

² ya kẹ efin ẹsa ma mma, nwọn ẹhụ nọ gha Iyi ahụn pụha. Wẹ nọ rimẹ ẹfịfịa ndị rị mkpẹnrẹn Iyi ebahụn.

³ A pụhagụ wẹ, ọ nọ hụn efin ẹsa ọzọ kẹ wẹ ghazị Iyi ahụn pụha. Efin ndịnị pụhanị jọ njọ-ẹhụ, mẹ kpogan-kpogan; wẹ nọ wuzoyeni efin ndị ibuzọ ahụn mkpẹnrẹn Iyi ebahụn.

⁴ Efin ndị nwẹn jọ njọ-ẹhụ, mẹ kpogan-kpogan, nọ ripụ efin ẹsa ahụn ma mma, nwọn ẹhụ. Ya kẹ Fẹro nọ tẹnhin.

⁵ Ụran e buruzi ẹ, ọ nọ rọzị nrọ: ọ hụn ọhịọ ọka-witi ẹsa dọ-isi, rị mma rị ukun ọka ohu.

⁶ Ọhịọ ẹsa mẹ wiri-wiri, ufere ọwụwa ẹnyanwụn sekpọgụ, nọzị mịpụha cheni wẹ.

⁷ Ọhịọ ẹsa ahụn mẹ wiri-wiri nọ luepụ ọhịọ ẹsa ahụn dọ-isi, rị mma. Ogẹn Fẹro gi tẹnhin, ọ nọ hụn a nị nrọ rọ.

⁸ Eki e fọn, obi eruni Fẹro alị; ọ nọ zi wẹ d'a kpọhan'a ndị ile a gbanị wẹ ẹfa imẹ alị Ijiptu, kẹ ndị dibiẹ kẹ ndị marịn ihiẹn. Ya Fẹro nọ ziẹnni wẹ nrọ ndị ahụn ọ rọ, kanị onwọnni onyẹ sa ẹka kọwan'a nrọ ndị ahụn.

⁹ Ya kẹ onyẹ-isi ndị e buye Fẹro manya nọ sị Fẹro, “Agụ, ihiẹnni mẹ tannị a nyanhangụọnị m mmẹfie m!

¹⁰ Ogẹnnẹi i gi buni ẹnyi ndị idibo i olulu, ị nọ kpọkin mmẹ lẹ hụn te kị ndị e shin'i brẹdi ye iwe onyẹ-isi ndị-nche.

¹¹ Uhinhin ohu, ẹnyi ẹbụọ nọ rọ nrọ; onyẹ-onyẹ lẹ nrọ a lẹ ihiẹn ọ wụ.

¹² O nwọn okorọbịa onyẹ Hibru ẹnyi lẹ ya rị ebahụn, odibo onyẹ-isi ndị-nche rọ. Ogẹn ẹnyi gi ziẹnn'ẹ nrọ ẹnyi rọ, ọ nọ kọwanị ẹnyi wẹ, kọwasọnmẹni ẹnyi ihiẹn nke onyẹ-onyẹ wụ.

¹³ K'ọ kọwanị ẹnyi nrọ ndị ahụn k'o dọn mẹchanrịn: E wekinhẹn wẹ m ọkwa m, e hogbu wẹ hụn wẹ kpọkin mmẹ lẹ ịya ye.”

A Gha Wẹ Ụlọ-ngan Wepụha Josẹfụ

¹⁴ Ya kẹ Fẹro nọ zi wẹ d'e wẹhẹ Josẹfụ. Wẹ nọ gha imẹ-imẹ ụlọ-ngan wepụha Josẹfụ ozigbo-ozigbo. Ọ kọchanpụ ẹtu ẹ, yiri ẹkwa ọzọ; ọ nọ bịa ihun Fẹro.

¹⁵ Fẹro nọ sị Josẹfụ, “O nwọn nrọ m rọ, kanị onwọnni onyẹ sa ẹka kọwanị m'a. Kanị, a nụgụọ m kẹ wẹ ku ẹ nị wẹ ziẹnn'i nrọ, y'a sa ẹka a kọwa a.”

¹⁶ Josẹfụ nọ sị Fẹro, “Mmẹ nwẹn asakọ ẹka mẹ ẹ; kanị, Chuku k'a kọwanị Fẹro ya kẹni obi ru Fẹro alị.”

¹⁷ Fẹro nọ sị Josẹfụ, “Imẹ nrọ, m wuzo mkpẹnrẹn Iyi Naịlị;

¹⁸ ya kẹ efin ẹsa ma mma, nwọn ẹhụ, nọ gha imẹ Iyi ebẹhụ pụha. Wẹ nọ rimẹ ẹfịfịa ndị rị mkpẹnrẹn Iyi ebahụn.

¹⁹ O mẹgụ efin ẹsa ọzọ nọ ghazị imẹ Iyi ahụn pụha. Efin ndị ikpanzụụnnị pụhanị jọ njọ-ẹhụ, mẹ kpogan-kpogan. Ahụntuni m efin jọ njọ-ẹhụ ẹrịra imẹ alị Ijiptu.

²⁰ Efin ndị nwẹn jọ njọ-ẹhụ, mẹ kpogan-kpogan, nọ ripụ efin ẹsa ahụn buzọ pụha, ndị ahụn ma mma, nwọn ẹhụ.

²¹ Kanị, kẹ wẹ rigụ wẹ, onwọnni onyẹ k'a marịn nị uwẹ ri ihiẹn han ẹrịra, makẹni kẹ ẹhụ wẹ rị mbụ k'ọ rịzịkwọ. Ebẹhụ kẹ m nọ tẹnhin.

²² “Imẹ nrọ, m hụnzị ọhịọ ọka-witi ẹsa dọ-isi, ma mma, hụn rị ọka-witi ohu.

²³ Ya kẹ ọhịọ ẹsa kpọgụ nkụn, mẹ wiri-wiri, ufere gha ibe ọwụwa ẹnyanwụn sekpọgụ nọ mịpụhazị cheni wẹ.

²⁴ Ọhịọ ọka ndị nwẹn mẹ wiri-wiri nọ luepụ ọhịọ ẹsa ahụn rị mma. “E ziẹngụọnị m ndị ile a gba ẹfa ya, onwọnni onyẹ s'ẹka kọwanị m ihiẹn ọ wụ.”

²⁵ Ya Josẹfụ nọ sị Fẹro, “Nrọ ndịnị ị rọ wụhụ ohu: Chuku a ghọsịgụọ Fẹro ihiẹn Chuku jẹnkọ d'e mẹ:

²⁶ efin ẹsa ahụn ma mma wụ ahụa ẹsa; ọhịọ ọka-witi ẹsa ahụn ma mma wụ ahụa ẹsa. Nrọ ndị ahụn wụ ohu.

²⁷ Efin ẹsa ndị ahụn mẹ kpogan-kpogan, jọ njọ-ẹhụ, hụn pụha cheni wẹ, lẹzi ọhịọ ọka-witi ẹsa ahụn mẹ wiri-wiri hụn ufere gha ibe ọwụwa ẹnyanwụn fehẹ sekpọgụ wụ ahụa ẹsa ụnwụn jẹnkọ d'a mụ.

²⁸ “Ọ rịhụ kẹ m dọn gwa Fẹro: Chuku a ghọsịgụọ Fẹro ihiẹn Chuku jẹnkọ d'e mẹ.

²⁹ Ihiẹn-oriri k'a barahị alị Ijiptu ile ọrọgbọ ahụa ẹsa.

³⁰ Kanị, ahụa ẹsa ahụn gharịgụ, ụnwụn k'a mụ ọrọgbọ ahụa ẹsa e sọnn'ẹ — mụ nke wụnị anyanhankọzị wẹ ihiẹn-oriri ahụn barahịnị alị Ijiptu ile; ụnwụn ahụn k'e mẹ alịnị ihiẹn.

³¹ Ọ nịkọzị wẹ nyanhan nị ihiẹn-oriri te barahị alịnị, makẹni ụnwụn ahụn k'e sọnn'ẹ k'e kẹnrẹn ọda-ọda.

³² Ihiẹn Fẹro gi rọhụn ihiẹnni mgbe ẹbụọ wụ nị Chuku a kwademẹgụọ n'o jẹnkọ d'e mẹrịrị ihiẹnni, lẹzi ni Chuku k'e mẹ ẹ ẹgwa.

³³ “Fẹro ya dodo chọrịkwọ nwan onyẹ ohu ẹnya e ru alị, marịn ihiẹn, n'ị we alị Ijiptu che ẹ ẹka;

³⁴ Fẹro ya tumẹsọnmẹzikwọ ndị-ọrụn imẹ azụụn ichẹn-ichẹn rị alịnị, bu okuni che wẹ ẹka, nị wẹ a narịnsọnmẹ ịhịan ile ụzọ-ohu imẹ ụzọ-isẹn imẹ ihiẹn-ugbo wẹ rụnpụha imẹ alị Ijiptu, ọrọgbọ ahụa ẹsa ahụn lalanị ihiẹn-oriri e gi barahị, e bu hụn wẹ nahan e dọnmẹ.

³⁵ Wẹ nakikomẹ ihiẹn-oriri k'a pụhanị dọnmẹ ọrọgbọ ahụa ẹsa ahụn ihiẹn e gi rị mma lalanị, bu ọka wẹ na che okpuru Fẹro, butọsọnmẹ ẹ imẹ obodo ndị shịa ẹfọ, o ru ogẹn hụ, a hụn wẹ ri.

³⁶ Wẹ dọnmẹtọnị alịnị ihiẹn-oriri ndị ahụn, gi cheri ahụa ẹsa ahụn ụnwụn e gi mụ alịnị, amamgbe ụnwụn ahụn e gbu alịnị la iwi.”

Fẹro E Ye Josẹfụ Ọkwa Ka Ọkwa Ile Imẹ Ijiptu

³⁷ Fẹro lẹ ịhaịmẹ ẹ ile nọ sị ibe wẹ nị iroro Josẹfụ tụ a rịka mma.

³⁸ Fẹro nọ sị ịhaịmẹ ẹ, “Nị ẹnyi hụn onyẹ ọzọ nọzị kẹ okẹnnyẹni, hụn mmọn Chuku rị imẹ ẹ?”

³⁹ Fẹro nọ sị Josẹfụ, “Ebe o mẹ ni yụ kẹ Chuku ghọsị ihiẹnni ile, onwọnni onyẹ ẹnya ru alị mọbụ onyẹ marịn ihiẹn kẹ yụ.

⁴⁰ Ịyụ jẹnkọ nwan d'e lepụma obi-eze m ẹnya; ihu m ile sikọ d'a rị okpuru i; ukpo-eze sụọ kẹ m'e gihụ karị ị.”

⁴¹ Ya kẹ Fẹro nọ sịzị Josẹfụ, “Lee ẹ, e bu m alị Ijiptu ile che i ẹka.”

⁴² Fẹro nọ gbụpụha ọla rị a mkpịnsịn-ẹka, ọla o gi e biye ẹka, gbụ a ye Josẹfụ mkpịnsịn-ẹka; o yimẹsọnmẹ Josẹfụ ẹkwa linẹ rị mma, bu ihiẹn olu goru che ẹ olu.

⁴³ Fẹro nọ bu ụgbọ-anyịnyan hụn e sọn nke ẹ ye Josẹfụ, yezikwọ a ndị k'a gha e sọn ẹ ebe-lẹ-ebe o jẹnkọ, e yi “Gbu ni n'ẹ osekpu!” Ẹnịna kẹ Fẹro mẹ we alị Ijiptu ile che okpuru Josẹfụ.

⁴⁴ Fẹro nọzị sị Josẹfụ, “Mmẹ wụ eze alịnị, kanị, onwọnni ihiẹn wẹ k'e mẹ alịnị sokpan i biye ẹ ẹka.”

⁴⁵ Fẹro nọ gụn Josẹfụ “Zafẹnatị-Panịa”; we Asenatị nwa Pọtifẹra ye ẹ lụrụ. Pọtifẹranị wụ ohẹn-mmọn alị Ọọnị imẹ Ijiptu. Ya kẹ Josẹfụ nọ kịma alị Ijiptu ile.

Josẹfụ A Kịma Ijiptu Ile

⁴⁶ Josẹfụ rị nwa ahụa iri kwasị ọgụn k'ọ bịa ihun Fẹro eze Ijiptu. Josẹfụ nọ gha ebẹhụ pụ, gi ẹfan Fẹro ghagbama alị Ijiptu ile.

⁴⁷ Alị nọ mẹ ihiẹn ọda-ọda ọrọgbọ ahụa ẹsa ahụn wẹ ku ni ihiẹn-ugbo k'e mẹ.

⁴⁸ Josẹfụ nọ kpọntọ ihiẹn-oriri ile alị Ijiptu mẹ ọrọgbọ ahụa ẹsanị ihiẹn-ugbo gi mẹ ọhụnma-ọhụnma. O dọnmẹsọnmẹ ihiẹn-oriri imẹ obodo ichẹn-ichẹn shịa ẹfọ: imẹ obodo ọwụlẹ shịa ẹfọ k'o dọnmẹtọ ihiẹn-oriri wẹ rụnpụha ugbo ndị rị ẹgbẹrẹ obodo hụ.

⁴⁹ Ihiẹn-oriri Josẹfụ dọnmẹ nọ barapụ nọkẹ ẹjan rị mkpẹnrẹn ohimin, hụn wụ nị ọ mabehi ẹ, makẹni ọ karị hụn w'a ma.

⁵⁰ Nị ụnwụn ahụn d'e bidọn, Asenatị, hụn Pọtifẹra nẹdi ẹ wụ ohẹn-mmọn Ọọnị, a mụpụgụọnị Josẹfụ di ẹ ikẹnnyẹ ẹbụọ.

⁵¹ Josẹfụ gụn nwa ibuzọ a Manasẹ, gi ẹ sị, “Osolobuẹ e mẹgụọ m zọ ụya ile m ri lẹ ikpụlọ nẹdi m ile.”

⁵² Ọ nọ gụn hụn ẹbọ Ifrem, gi ẹ sị, “Makẹni Osolobuẹ e mẹgụọ m ba ụba imẹ alị m nọ hụnjun ẹnya.”

⁵³ Ahụa ẹsa ahụn ihiẹn-oriri gi barahị imẹ alị Ijiptu ile e zu,

⁵⁴ ya ahụa ẹsa ụnwụn nọ bidọn, nọkẹ kẹ Josẹfụ dọn ku ẹ. Ụnwụn mụgbarị alị ndị ọzọ ile, kanị ihiẹn-oriri rịchanrịn ebe ọwụlẹ imẹ alị Ijiptu.

⁵⁵ Ogẹn alị Ijiptu ile gi nụma ụfụ ụnwụn ahụn, ndị Ijiptu nọ kwanburu Fẹro n'o d'e ye wẹ ihiẹn-oriri. Fẹro nọ sị ndị Ijiptu ile, “Jẹnburu ni Josẹfụ; ihiẹn ọ sị ụnụ mẹ, ụnụ e mẹ.”

⁵⁶ Ogẹn ụnwụn gi mụgbarị alị hụ ile, Josẹfụ nọ kpọpụ ụlọ ndị ahụn wẹ kpọntọ ọka, reyemẹ ndị Ijiptu ọka, makẹni ụnwụn ahụn kẹnrẹn ekẹnrẹn imẹ alị Ijiptu.

⁵⁷ Ndị alị ndị ọzọ ile hụ a bịa alị Ijiptu d'e ṅọnnarịn Josẹfụ ọka, makẹni ụnwụn ahụn e kẹnrẹnpụgụọ imẹ ụwa ile.