Jẹnẹsisi 40 - Ika

Isi nke Ọgụnnaị Josẹfụ A Kọwanị Ndị-isi Ọrụn Eze Nrọ Wẹ

¹ O ru ụhụọhịn ohu, onyẹ hụn e buye eze Ijiptu wụ Fẹro manya lẹ onyẹ hụn e shin'ẹ brẹdi nọ kpasu di-nwọnni wẹ wụ Fẹro iwe.

² Fẹro nọ gi olulu sọn ndị-ọrụn a ẹbụbụọ ahụn: onyẹ-isi ndị e buye ẹ manya lẹ onyẹ-isi ndị e shin'ẹ brẹdi.

³ Ọ nọ bu wẹ che ụlọ-ngan hụn rị iwe Pọtifa, onyẹ-isi ndị-nche ẹ, imẹ ụlọ-ngan ohu hụ wẹ kpọkin Josẹfụ ye.

⁴ Pọtifa nọ han Josẹfụ yeni wẹ, Josẹfụ nọ yemẹni wẹ ẹka. Mmadụ ẹbụọnị nọbie ụlọ-ngan ahụn.

⁵ O ru uhinhin ohu onyẹ-onyẹ imẹ mmadụ ẹbụbụọ ahụn wẹ kpọkin ye ebẹhụ nọ rọ nrọ, kẹ hụn e buye eze Ijiptu manya kẹ hụn e shini eze brẹdi; nrọ onyẹ-onyẹ nwọn nkọwa nkẹ ẹ.

⁶ Ogẹn Josẹfụ gi bịa d'e kunrun wẹ ama ụtụntụn, ọ nọ hụn a nị wẹ rọnmẹ erọnmẹ.

⁷ Ọ nọ sị ndị-ọrụn eze hụ ya lẹ wẹ rị ngan rị iwe di-nwọnn'ẹ wụ Pọtifa, “Kị ụnụ rọnmẹni ihun tannị?”

⁸ Wẹ nọ sị a, “Ẹnyi ẹbụọ rọ nrọ, bụ ẹnyi ahụnnị onyẹ k'a kọwanị ẹnyi nrọ ẹnyi.” Josẹfụ nọ sị wẹ, “Ẹlẹ Chuku a kọwa nrọ? Dodo ni, ziẹnni ni m nrọ ụnụ.”

⁹ Ya onyẹ-isi ndị e buye Fẹro manya nọ ziẹnni Josẹfụ nrọ ọ rọ, sị a, “M rị nrọ, m nọ hụn osisi vaịnị turu ihun m;

¹⁰ osisi ahụn nwọn agalaba ẹtọ. Hụn o gihụ fọrị, ọ mịma obobo, ọ nọ mịma ogbe ozigbo, ya wẹ nọ chan.

¹¹ Mkpu Fẹro gi a ra manya rị m ẹka; m nọ ghọrị ogbe-vaịnị ndị ahụn, pịn wẹ ye imẹ mkpu Fẹro, bu mkpu ahụn che Fẹro ẹka.”

¹² Ya Josẹfụ nọ sị a, “Lee ihiẹn ọ wụ: agalaba ẹtọ ahụn wụ akp'ọhịn ẹtọ.

¹³ Akp'ọhịn ẹtọ tannị, Fẹro jẹnkọ d'e wepụha ị, wekin i ọnọdị ị rị mbụ; i k'e buyemẹzi ẹ manya k'i dọn e buye ẹ mbụ ogẹn i gi wụ onyẹ e buye ẹ manya.

¹⁴ Dodokwọ, ihiẹn rịgụn'ị mma y'a nyanhan m, mẹni m ọhụnma; gwa Fẹro oku m, kẹn'i wepụha m ebeni.

¹⁵ Makẹni ẹka-ikẹn kẹ wẹ gi gha alị ndị Hibru ẹnyi weri m; kẹ hụnnị m rịdẹ nwan ebeni, onwọnni ihiẹn-ngan m mẹ hụn m'e gi rị ebeni.”

¹⁶ Ogẹn onyẹ-isi ndị e shini Fẹro brẹdi gi hụn a nị nrọ hụ Josẹfụ kọwa kuyeni onyẹ rọn'a ekuye, ọ nọ sị Josẹfụ, “Mmẹ nwẹn rọzị nrọ: Imẹ nrọ, m bu ụkpalị brẹdi ẹtọ isi;

¹⁷ ụdị brẹdi ile Fẹro jẹnkọ d'e ri rị imẹ ụkpalị ahụn rị elu ẹ, kanị nnụnụ hụ a bịa d'a tụri brẹdi ndị ahụn rị imẹ ụkpalị ebahụn m bu ẹ isi.”

¹⁸ Josẹfụ nọ sị a, “Lee ihiẹn ọ wụ: ụkpalị ẹtọ ahụn wụ akp'ọhịn ẹtọ;

¹⁹ akp'ọhịn ẹtọ tannị, Fẹro jẹnkọ d'e bepụ ị isi, bu ẹhụ ị kọnmẹ elu. Nnụnụ k'a rị a bịa d'a tụri ozun i.”

²⁰ Nke akp'ọhịn ẹtọ ahụn kẹ wẹ gi a nyanhan ụhụọhịn wẹ gi mụ Fẹro. Ya Fẹro nọ kpọ ịhaịmẹ ẹ lẹ ndị-ọrụn a oriri. Ọ nọ nọ idẹnya ndị-ọrụn a wepụha madụ ẹbụọ ahụn ọ kpọkinye: kẹ onyẹ-isi ndị e buye ẹ manya kẹ onyẹ-isi ndị e shin'ẹ brẹdi.

²¹ O wekin onyẹ-isi ndị e buye ẹ manya ọnọdị ọ rị mbụ, ọ nọ buyemẹzi ẹ manya k'o dọn e mẹ mbụ,

²² kanị o hogbu onyẹ-isi ndị e shin'ẹ brẹdi. Wẹ ile mẹchanrịn kẹ Josẹfụ dọn kọwa nrọ wẹ.

²³ Kanị, onyẹ-isi ndị e buye Fẹro manya anyanhanzịnị Josẹfụ; ọ zọchanrịn a.