Jẹnẹsisi 4 - Ika

Isi Nke Ẹnọ Keni Lẹ Ebẹlụ

¹ O mẹgụ, Adam lẹ nwunyẹ ẹ wụ Ivu nọ ranhịn, Ivu nọ tụrụ imẹ, mụ okẹnnyẹ, kpọ a “Keni,” sị, “Osolobuẹ e yegụọnị m ẹka mụ okẹnnyẹ.”

² Omẹgụ, ọ nọ mụzị okẹnnyẹ, Ebẹlụ nwẹnẹ Keni. Ebẹlụ e dumẹ atụnrụn, Keni a rụnma ugbo.

Kẹ Keni Dọn Gbu Ebẹlụ

³ Omẹgụ, Keni nọ gha ihiẹn-ugbo ẹ wẹhẹni Osolobuẹ oyiye.

⁴ Ebẹlụ nkẹ nọ gha imẹ ụmụ ibuzọ igunrun atụnrụn a mụ họrịsọnmẹ ndị kachanrịn e tutu, yezikwọ Osolobuẹ. Ya Osolobuẹ nọ nabanhan Ebẹlụ lẹ ihiẹn o ye.

⁵ Kanị, ọ nabanhannị Keni lẹ ihiẹn o ye. Ya okẹn olulu nọ bumẹ Keni, ọ nọ rọnmẹ ihun.

⁶ Ya kẹ Osolobuẹ nọ sị Keni, “Kị ize rị e zen'i? K'i rọnmẹni ihun?

⁷ I mẹ ihiẹn rị mma, anabanhankọ m'ị? Kanị, omẹni y'e gini ẹka rị mma sọn ihiẹnni, lẹhụ, njọ warị ọnụmụzọ; ọ rị a chọ ị. Mẹrikwọ a!”

⁸ Keni nọ sị Ebẹlụ nwẹnẹ ẹ, “Nị ẹnyi jẹn ọfịa.” E ru wẹ ọfịa, ya Keni nọ maye Ebẹlụ nwẹnẹ ẹ, gbu ẹ.

Ọnụ Osolobuẹ Bụ Keni

⁹ O mẹgụ, Osolobuẹ nọ sị Keni, “Elebe kẹ Ebẹlụ nwẹnẹ i rị?” Ọ nọ sị, “Amarịn m! Mmẹ e chedẹ nwẹnẹ m nche ra?”

¹⁰ Ya kẹ Osolobuẹ nọ sị a, “Kị wụ ihiẹnni i mẹ? Lee ẹ, ẹdeke nwẹnẹ i rị a gha alị a kwanghọsị m!

¹¹ Gha kikẹnni jẹnmẹ, y'e họnringụọ onyẹ wẹ bụ ọnụ: akpakalị a jụgụọ ị: alị, hụn shịapụ ọnụ narịn ẹdeke nwẹnẹ i hụn i gbu.

¹² Ị rụnzị ugbo, alị emẹkọn'ị ihiẹn ọwụlẹ. Ọsọ-ọsọ kẹ y'a gha a gba nọkẹ onyẹ wẹ rị a chụ; ị k'a rị a wahunmẹ elu-ụwa ile.”

¹³ Ya kẹ Keni nọ sị Osolobuẹ, “Afụnfụn i ye m karị m ẹka, isi m e chekọ a!

¹⁴ Y'e gigụọ m nwan họnrin onyẹ akpakalị jụ; y'a chụpụgụọzị m ebe ị rị; m k'a gha nwan a gba ọsọ-ọsọ nọkẹ onyẹ wẹ chụkọ; m k'a rị a wahunmẹ elu-ụwa. Onyẹ kunrun m tan, o gbupụ m!”

¹⁵ Kanị, Osolobuẹ nọ sị a, “O mẹkọ ẹrịra. Onyẹ gbu Keni, e mẹgwarị m'a ya mmagi-mmagi ụzọ ẹsa!!” Ya kẹ Osolobuẹ nọ ye Keni ahịma, amamgbe ịhịan e kunrun Keni gbu ẹ.

¹⁶ Ya Keni nọ gha ihun Osolobuẹ pụ d'e biri alị Nọdụ hụn rị azụụn ọwụwa-ẹnyanwụn alị Idẹni.

Ẹbozo Keni

¹⁷ O mẹgụ, Keni lẹ nwunyẹ ẹ nọ ranhịn, nwunyẹ ẹ nọ tụrụ imẹ, mụ Ẹnọkụ; Keni rị e pumẹ obodo ogẹn hụ, ọ nọ kpọ obodo ahụn “Ẹnọkụ,” hụn wụ ẹfan nwa a.

¹⁸ Ẹnọkụ nọ mụ Iradị; Iradị wụ nẹdi Mẹhujẹlụ; Mẹhujẹlụ wụ nẹdi Mẹtushaẹlụ. Mẹtushaẹlụ wụ nẹdi Lamẹki.

¹⁹ Lamẹki lụ inyẹnmẹ ẹbụọ: ẹfan nke ibuzọ wụ Ada, ẹfan hụn ẹbọ wụ Zila.

²⁰ Ada mụ Jabalụ. Jabalụ wụ onyẹ ibuzọ bisọnmẹ ụlọ w'a kpụkpọrị, a kpa anụ.

²¹ Ẹfan nwẹnẹ ẹ wụ Jubalụ. Jubalụ wụ onyẹ ibuzọ kpọma ụbọ, gbumẹ ẹkpịrị.

²² Zila mụ Tubalụ-Keni. Tubalụ-Keni wụ onyẹ bu ụzọ kpụma ụzụn, kpụma ụdị ihiẹn ile wẹ gi igwe-bronzu lẹ igwe-mmaka a kpụ. Tubalụ-Keni nwọn nwẹnẹ okpoho w'a kpọ Naama.

²³ Lamẹki sị inyẹnmẹ ẹ ẹbụọ, “Ada lẹ Zila, gọn nị m ntịn! Inyẹnmẹ Lamẹki, gọn ni m ntịn ihiẹn m jẹnkọ d'e ku: E gbuọlẹ m okẹnnyẹ ohu makẹni ọ rụ m ẹhụ; m gbu okorọbịa ahụn makẹni ọ fịan m ihiẹn.

²⁴ Omẹni ụzọ ẹsa kẹ wẹ jẹnkọ d'e mẹgwarị onyẹ gbu Keni, ya wụ nị onyẹ gbu Lamẹki e mẹgwarị w'a ụzọ ẹsa mgbe mmanaị!”

Sẹtị

²⁵ Adam lẹ nwunyẹ ẹ a ranhịnzị, ọ nọ mụzị okẹnnyẹ, kpọ a “Sẹtị,” sị, “Makẹni Osolobuẹ e yeọlẹ m okẹnnyẹ ọzọ, gi nọkin ẹnya Ebẹlụ hụn Keni gbu.”

²⁶ Sẹtị nkẹ mụzịkwọ okẹnnyẹ, kpọ a “Ẹnọshị”. Ogẹn hụ kẹ ịhịan gi kpọkumẹ ẹfan Osolobuẹ.