Jẹnẹsisi 39 - Ika

Isi Nke Mmitenẹi Kwasị Ọgụn Josẹfụ Lẹ Nwunyẹ Pọtifa Di-nwọnn'ẹ

¹ Ogẹn ndị Ishmẹlụ ahụn ṅọnrin Josẹfụ gi nwan we ẹ ru alị Ijiptu, ya kẹ onyẹ alị Ijiptu wụ Pọtifa nọ ṅọnnarịn wẹ Josẹfụ. Pọtifanị rị ndị-isi ọrụn Fẹro: ịya wụ onyẹ-isi ndị-nche Fẹro.

² Osolobuẹ nọyeni Josẹfụ anọyeni, ihiẹn ile a masị a ẹka ọda-ọda; iwe onyẹ Ijiptu ahụn nwọnn'ẹ k'o bi.

³ Ogẹn Pọtifa di-nwọnn'ẹ gi hụn a nị Osolobuẹ nọyeni Josẹfụ, lẹ ni Osolobuẹ rị e mẹ ihiẹn ile a masị a ẹka,

⁴ ihiẹn Josẹfụ nọ sụọ a, ọ nọ gi Josẹfụ họnrin nwa-ẹkpa a, bu ikpụlọ a ile che ẹ okpuru, tu ihiẹn ile o nwọn ye ẹ ẹka lepụma ẹnya.

⁵ Gha ogẹn ahụn Pọtifa gi bu ikpụlọ a lẹ ihiẹn ile o nwọn che ẹka Josẹfụ jẹnmẹ, Osolobuẹ nọ gi ufiri Josẹfụ mẹ ihiẹn masịnị ikpụlọ onyẹ Ijiptu ahụn; ngọzi Osolobuẹ hụ e sọn ihiẹn ile o nwọn, kẹ ụlọ kẹ ugbo.

⁶ Ọ nọ nwan hatuchanrịn ihiẹn ile o nwọn yeni Josẹfụ; ebe Josẹfụ rịọlẹ ebahụn, onwọnzini ihiẹn Pọtifa hụn Pọtifa e feye ẹnya, karị ihiẹn-oriri wẹ buye ẹ. Josẹfụ pu okorọbịa; ẹnya len'ẹ ara lee ọfịa.

⁷ Ọ nọbe, Josẹfụ nọ chanban nwunyẹ Pọtifa di-nwọnn'ẹ ẹnya, ọ nọ sị Josẹfụ, “Bịa nị ẹnyi ranhịn.”

⁸ Kanị Josẹfụ nọ jụ, sị a, “Lee ẹ, di-nwọnni m enwọnzi ihiẹn o feye ẹnya imẹ ụlọnị. O tugụọ ihiẹn ile o nwọn ye m ẹka.

⁹ Onwọnni onyẹ kanị m mmụlọ ebeni; imẹ ihiẹn ile di-nwọnni m nwọn, ịyụ sụọ k'o tuyelẹni ẹka m, makẹni ịyụ wụ nwunyẹ ẹ. Nanị kẹ m'a dọn nwan mẹ eje-ihiẹn han ẹnịna, mẹ Osolobuẹ njọ?”

¹⁰ Ọsụọn'a nị okpohoni hụ a gwa Josẹfụ ihiẹnni ụhụọhịn-ụhụọhịn, Josẹfụ ekweni sọn ẹ ranhịn mọbụ sọndẹ ẹ nọdị.

¹¹ O ru ụhụọhịn ohu, Josẹfụ nọ ban mmụlọ d'a rụn ọrụn a, bụ onwọnni odibo ọzọ rị mmụlọ.

¹² Ya kẹ okpoho ahụn nọ zu ẹka ye Josẹfụ ẹwuru, sị a, “Bịa nị ẹnyi ranhịn!” Kanị Josẹfụ nọ gbụ ẹwuru tọ a ẹka, gbapụ ezi.

¹³ Ogẹn nwunyẹ Pọtifa gi hụn a nị Josẹfụ a gbụ ẹwuru tọn'a, gbapụ ezi,

¹⁴ ọ nọ kpọkikomẹ idibo rị iwe ẹ, sị wẹ, “Lee n'ẹ, di m e jẹngụọ d'e wẹhẹni ẹnyi onyẹ Hibruni n'o gi ẹnyi gu egu! O te banhan d'e mẹ mgba m, m nọ yi oro;

¹⁵ ọ hụn a nị m rị e yi oro, ọ nọ gba ẹwuru ẹ tọnị m, gbapụ ezi.”

¹⁶ Okpoho ahụn nọ kwọndọn ẹwuru Josẹfụ, di ẹ e we lụa.

¹⁷ Ọ nọ gwazị di ẹ ihiẹn ohu ahụn, sị a, “Onyẹ Hibru ahụn i wẹhẹni ẹnyi te banhan d'e gi m gu egu;

¹⁸ hụn m gihụ yimẹ oro, ọ nọ gba ẹwuru ẹ tọnị m, gbapụ ezi.”

¹⁹ Pọtifa, di-nwọnni Josẹfụ, a nụ ihiẹnni nwunyẹ ẹ gwaghọsị a, ọ nọ kpọma ọnụma.

²⁰ Ọ nọ weri Josẹfụ, kpọkin ẹ ye imẹ ụlọ-ngan, ebe eze wụ Fẹro a kpọkin ịhịan e ye; Josẹfụ nọ nọdị imẹ ụlọ-ngan ebahụn.

²¹ Kanị Osolobuẹ nọ nọyeni Josẹfụ, mẹn'ẹ ẹfọma, mẹ ihiẹn ẹ sụọma onyẹ e lepụ ndị-ngan ẹnya.

²² Ya onyẹ e che ndị-ngan nọ bu ndị-ngan ile rị ụlọ-ngan ebahụn che okpuru Josẹfụ, we ihiẹn ile w'e mẹ ebẹhụ che ẹ ẹka.

²³ Onyẹ ahụn e lepụ ndị-ngan ẹnya efeyezini ihiẹn ọwụlẹ o buche ẹka Josẹfụ ẹnya, makẹni Osolobuẹ nọyeni Josẹfụ anọyeni, e mẹ ihiẹn ile a masị a ẹka.