Jẹnẹsisi 38 - Ika

Isi Nke Mmẹsatọ Kwasị Ọgụn Juda Lẹ Tama

¹ Ogẹn ihiẹnni gi mẹgụ, ya kẹ Juda nọ gha ebe umunẹ ẹ rị pụ, jẹnmẹ d'e sọn onyẹ Adulam ohu w'a kpọ Hira nọdị.

² Ebahụn kẹ Juda nọ hụn okpoho ohu wụ nwa Shụa onyẹ Kenaanị, ya Juda nọ lụrụ a. A ranhịn wẹ,

³ ọ nọ tụrụ imẹ, mụ okẹnnyẹ, Juda nọ gụn a Eri.

⁴ Okpoho hụ nọ tụrụzị imẹ, mụ okẹnnyẹ, gụn a Ọnanị.

⁵ Ọ tụrụzị imẹ, mụ okẹnnyẹ, gụn a Shẹla; alị Kẹzibu k'ọ nọ mụ hụnnị.

⁶ Omẹgụ, Juda nọ lụye nwa ibuzọ a wụ Eri nwunyẹ; ẹfan nwunyẹ ẹ ahụn wụ Tama.

⁷ Kanị Eri, nwa ibuzọ Juda, wụ eje-ịhịan ẹnya Osolobuẹ, Osolobuẹ nọ gbu ẹ.

⁸ Ya Juda nọ sị Ọnanị, “Du nwunyẹ nwẹnẹ i ranhịn, kẹni i mẹn'ẹ ihiẹn nwẹnẹ-di furu n'o mẹ, mụdọnni nwẹnẹ i nwa.”

⁹ Kanị Ọnanị a marịngụọ nị nwa o k'a mụ ẹlẹ nke ẹ, ọ bankunrun ẹ, ọ nyụn ohe ye alị makẹ ọ gha a mụdọnni nwẹnẹ ẹ nwa.

¹⁰ Ihiẹnni o mẹ jọ njọ ẹnya Osolobuẹ, Osolobuẹ nọ gbuzi ya nwẹn.

Juda Lẹ Tama E Mẹtarị Ẹro

¹¹ Ya Juda nọ sị Tama nwunyẹ nwa a, “D'a nọdịgụ iwe nẹdi i nọkẹ okpoho di ẹ nwụn, nị Shẹla nwa m suepụha”. Juda ku ẹnịna makẹni obi ẹ sị a, “M gba nkịtịn, hụnnị nwọn ikẹn nwụnhụnzị kẹ umunẹ ẹ.” Ya kẹ Tama nọ shi iwe nẹdi ẹ d'a nọdị.

¹² O tebe, nwa Shụa wụ nwunyẹ Juda nọ nwụnhụn. Ogẹn Juda gi nọgụ achọ, ọ nọ shi Timna d'a hụn ndị rị a kọn'a atụnrụn ẹṅẹnrẹn; ọwụ a wụ Hira onyẹ Adulam sọnjẹn ẹ.

¹³ Mgbe Tama gi nụ nị nẹdi-di ẹ jẹnkọ Timna d'a kọ atụnrụn a ẹṅẹnrẹn,

¹⁴ ọ nọ gbụpụ ẹkwa okpoho di nwụnnahịn; o gi ẹkwa-ihun kpumẹ ihun, gi ẹkwa ọzọ fụrụ. Ọ nọ jẹn d'a nọdị alị ẹbụ wẹ gha a banye Ẹnaim. Ẹbụnị rị ụzọ Timna. Tama mẹ ihiẹnni makẹni ọ marịngụọ nị Shẹla e higụọ bụ a bịanị wẹ d'e we ẹ ye Shẹla lụrụ.

¹⁵ Ogẹn Juda gi hụn a, o ro ni ịgbaraja rọ, hụn ahụn o kpumẹ ihun.

¹⁶ Ọ marịn nị nwunyẹ-nwa a rọ, ọ nọ jẹn d'e kunrun ẹ mkpẹnrẹn ụzọ ebahụn, sị a, “Nị ẹnyi ranhịn.” Ya Tama nọ sị a, “K'i y'e ye m nị mmẹ lẹ yụ ranhịn?”

¹⁷ Juda nọ sị a, “M k'e ye wẹ nwa-ewu bịan'ị.” Tama nọ sị a, “N'i ye m ihiẹn kwọndọn d'e ru mgbe i buye wẹ nwa-ewu ahụn bịa?”

¹⁸ Juda nọ sị a, “Kịnị kẹ m k'e ye i?” Ọ nọ sị Juda, “Ye m ihiẹn i gi e yi ahịma kwọndọn, ya lẹ eriri ẹ lẹ ọkpọnị i gi ẹka.” Ọ nọ we ihiẹn ndị ahụn ye Tama, ya lẹ ịya a ranhịn, ọ nọ ye ẹ imẹ.

¹⁹ Tama nọ gha ebẹhụ pụ, kpupụ ihiẹn ahụn o gi kpumẹ ihun, yirizi ẹkwa okpoho di nwụnnahịn.

²⁰ O mẹgụ, Juda nọ buye ọwụ a wụ onyẹ Adulam nwa-ewu ahụn jẹnni okpoho ahụn, n'ọ hụn ụzọ welụan'a ihiẹn ndị o gi gbama ibe ẹka a, kanị ọwụ a ahụnzịnị okpoho ahụn.

²¹ Ọ nọ jụ ndị bi ebẹhụ, “Elebe kẹ m'a nọ nị hụn ịgbaraja ụlọ-mmọn nẹi rị mkpẹnrẹn ụzọ ebeni?” Wẹ nọ sị a, “Onwọnni ịgbaraja ụlọ-mmọn a nọdị ebeni.”

²² Ya kẹ ọ nọ kin azụụn, sị Juda, “Ahụnnị m'a. Ndị bi ebahụn sị onwọntuni ịgbaraja ụlọ-mmọn rị ebahụn.”

²³ Juda nọ sị, “Ya kwọndọn nwan ihiẹn ndị ahụn o gi, ọ nọbe tan a mụma wẹ ẹnyi. E te bujẹngụọnị m'a nwan nwa-ewuni, y'a hụnn'a.”

²⁴ Ogẹn o gi zu ifọn ẹtọ, wẹ nọ gwa Juda nị Tama, nwunyẹ nwa a, a zọgụọ ụkụ ye ọfịa; n'ọ rị nwan imẹ. Juda nọ sị wẹ, “Wepụhan'a, nị wẹ dụn a ọkụn.”

²⁵ Ogẹn wẹ gi wepụha a, ọ nọ zi ozi jẹnni nẹdi di ẹ, sị, “Onyẹ nwọn ihiẹn ndịnị ye m imẹ. Dodo we ẹnya ru alị lele kẹ y'a marịnghọ onyẹ nwọn ihiẹnni wẹ gi e yi ahịma lẹ eriri lẹ ọkpọnị.”

²⁶ Juda a hụn a nị nke ẹ rọ, ọ nọ sị, “Mmẹ kẹ ikpe ka a ma karị ya nwẹn, ebe m nọlẹni kwe we ẹ ye Shẹla nwa m lụrụ.” Juda esọnzin'ẹ ranhịn.

²⁷ Ogẹn ọmụmụ gi ru ẹ, ọ rị wụ ejimẹ.

²⁸ Ogẹn o gi rị a mụ, nwa ohu nọ rụpụha ẹka; ya kẹ ọka-nwa rị e lee ẹ ọmụmụ nọ gi oruru ufie kẹnmẹ ẹ ẹka ahụn ọ rụpụha, sị, “Hụnnị bu ụzọ pụha.”

²⁹ Ogẹn hụn ahụn gi wekin ẹka, nwẹnẹ ẹ hụn rị imẹ ẹfọ nọ bun'ẹ ụzọ pụha; ọka-nwa ahụn nọ sị, “Ẹnịna k'i dọnzi zụnkpọpụha!” Ya wẹ gụnn'a Pẹrẹzi.

³⁰ O mẹgụ, nwẹnẹ ẹ hụn wẹ kẹnmẹ oruru-ufie ẹka nọ nwan pụha, wẹ nọ gụn a Zẹra.