Jẹnẹsisi 35 - Ika

Isi Nke Mmisẹn Kwasị Ọgụn Jekọpụ A Lakin Bẹtẹlụ

¹ Ya Osolobuẹ nọ sị Jekọpụ, “Buli nị shi Bẹtẹlụ d'e biri, y'a nọ ebẹhụ rụnnị Chuku ukpo nchụn-ẹjan — Chuku hụn pụha d'e kunrun i kẹ ị gbakọnị Isọ nwẹnẹ i.”

² Jekọpụ nọ sị ezi-lẹ-ụlọ a lẹ ndị ile sọnkọn'a, “Kpọnpụchanrịn nị mmọn ile ọnụ gi; dọnmẹ ni enwẹn ụnụ ọchan, ụnụ e weri ẹkwa ọzọ yiri.

³ Nị ẹnyi shi ni Bẹtẹlụ, ebe m k'a nọ rụnnị Osolobuẹ ukpo nchụn-ẹjan, Osolobuẹ hụn za m ekpere ogẹn m gi rị imẹ nsọngbu, a nọyeni m ebe ọwụlẹ m jẹn.”

⁴ Ya wẹ nọ wechanrịn mmọn ile wẹ gi lẹ ihiẹn-ntịn wẹ ye Jekọpụ, ọ nọ li wẹ ile ye ukun osisi okuu hụn rị obodo Shẹkẹm.

⁵ Ya wẹ nọ buli; egun Osolobuẹ nọ tụ obodo ile fihunmẹni wẹ, hụn wụnị onwọnni onyẹ chụnị wẹ.

⁶ Jekọpụ lẹ ndị ile ya lẹ wẹ wị nọ ru Luzu (hụn wụzị Bẹtẹlụ), hụn rị alị Kenaanị.

⁷ Ọ nọ ebẹhụ rụn ukpo nchụn-ẹjan, kpọ ebẹhụ Ẹl-Bẹtẹlụ, makẹni ebahụn kẹ Osolobuẹ nọ we enwẹn ẹ ghọsị a ogẹn o gi gbakọnị nwẹnẹ ẹ.

⁸ Ogẹn ahụn, Debọra, hụn e lee Rebika nnẹ Jekọpụ, nọ nwụnhụn, wẹ nọ li ẹ ye ukun osisi okuu rị ọdanmgbugbu rị ẹhụ Bẹtẹlụ. Ya haịn wẹ gi kpọ osisi okuu hụ “Alọnụ Bakutu” hụn wụ “Osisi-okuu Ẹkwan”.

⁹ Ogẹn Jekọpụ gi ghagụ Padan-aram lụaha, ya Chuku nọ bịazị d'e kunrun ẹ, gọzi ẹ,

¹⁰ sị a, “Ẹfan ị wụ Jekọpụ, kanị, akpọkọzị wẹ i Jekọpụ; Izrẹlụ kẹ wẹ k'a kpọma ị.” Ya Chuku nọ gụn a Izrẹlụ.

¹¹ Chuku nọ sị a, “Mmẹ wụ Chuku Hụn nwọn ikẹn ile; mụba; alị k'a gha ẹhụ ị pụha — alị hụn nwọnsọnmẹ alị ichẹn-ichẹn; ndị-nze k'a gha ẹhụ ị pụha.

¹² M rị e yezikwọ ị alị hụ m ye nẹdi i kanị wụ Ebraham lẹ nẹdi i wụ Aziki; m k'e yezikwọ ụmụ ị ya.”

¹³ Ya Chuku nọ la a tọ ebẹhụ Chuku nọ gwa a oku.

¹⁴ Ya Jekọpụ nị bu ọmụma sueni tumẹ ebahụn Osolobuẹ nọ gwa a oku, hu manya ye elu ẹ, huzi udẹn ye elu ẹ.

¹⁵ Ya Jekọpụ nọ kpọ ebahụn Osolobuẹ nọ gwa a oku “Bẹtẹlụ”.

Rechẹlụ A Mụgụ Bẹnjamini, Nwụnhụn

¹⁶ Ya Jekọpụ lẹ ikpụlọ a nọ gha Bẹtẹlụ pụ. W'e ke jẹndẹ Ẹfratị e jẹn, imẹ nọ mẹmẹ Rechẹlụ; ọmụmụ nọ fụ a ọrụn ọda-ọda.

¹⁷ Ogẹn o gi tagbugụ enwẹn ẹ afụnfụn mụpụha, okpoho rị e lee ẹ ọmụmụ nọ sị a, “Atụlẹ egun, ọnwan wụzị okẹnnyẹ.”

¹⁸ Kanị Rechẹlụ nwụnkọ anwụnkọ. Hụn o gi rị e kwọnbepụ, ọ nọ gụn nwa ahụn “Bẹn-Oni” hụn wụ “Nwa hụn ye m nsọngbu”; kanị nẹdi ẹ nọ gụn a “Bẹnjamini” hụn wụ “Nwa m gi e mẹ ẹhụ”.

¹⁹ Rechẹlụ a nwụnhụn, wẹ nọ li ẹ ye ụzọ wẹ gha e jẹn Ẹfratị (hụn wụzị Bẹt'lẹhẹm).

²⁰ Ya Jekọpụ nọ bu ọmụma sueni tumẹye ili Rechẹlụ. Ọmụma ahụn hụ ebẹhụ d'e ru tannị.

Jekọpụ A Lụaha Hibrọnụ Ebe Nẹdi Ẹ Rị

²¹ Izrẹlụ wụ Jekọpụ nọzị jẹnmẹ. Ọ ghafegụ Mig'dalụ-Ẹda, ọ nọ tumẹzi ọdụ a.

²² Ogẹn Izrẹlụ gi rị Mig'dalụ-Ẹda kẹ Rubẹni nwa a gi bankunrun mgba Izrẹlụ nẹdi ẹ wụ Bil'ha, okpoho ahụn rị iwe wẹ — Izrẹlụ nọ nụ ihiẹn o mẹ. Ikẹnnyẹ Jekọpụ mụ rị mmẹbụọ:

²³ ndị Lia mụ wụ Rubẹni nwa ibuzọ Jekọpụ; ndị sọnn'ẹ wụ Simiọnụ lẹ Livaị lẹ Juda lẹ Isaka lẹ Zẹbulọnụ;

²⁴ ndị Rechẹlụ mụ wụ Josẹfụ lẹ Bẹnjamini.

²⁵ Ndị Bil'ha nwa rị iwe Rechẹlụ mụ wụ Danị lẹ Naf'tali;

²⁶ ndị Zil'pa nwa rị iwe Lia mụ wụ Gadị lẹ Asha. Ndịnị ile wụ ụmụ Jekọpụ hụn wẹ mụn'a ogẹn o gi rị Padan-Aram.

²⁷ Ya Jekọpụ nọ lụaha ụlọ d'e kunrun Aziki nẹdi ẹ alị Mamre hụn nọkunmẹ Kiriatị-Aba. (Kiriatị-Aba wụzị Hibrọnụ.) Ebeni kẹ Ebraham lẹ Aziki te rịzị.

²⁸ Ahụa ọgụn itenẹi kẹ Aziki tọ.

²⁹ Ya Aziki nọ nwụnhụn, buru ndị nẹdi ẹ wẹ. Ọ kagụọ ẹgẹdi ọhụnma-ọhụnma n'o d'a nwụnhụn; ụmụ a wụ Isọ lẹ Jekọpụ nọ li ẹ.