Jẹnẹsisi 34 - Ika

Isi Nke Mmẹnọ Kwasị Ọgụn Kẹ Onyẹ Shẹkẹm Dọn Mẹrụ Daịna

¹ Ụhụọhịn ohu, Daịna, hụn wụ akpụ okpoho ohu Lia mụnị Jekọpụ, nọ fọn obodo d'e kunrun ịgbagba alị ahụn.

² Ogẹn Shẹkẹm, nwa Hamọ onyẹ Hivu, hụn a kị ebẹhụ, gi hụn Daịna, ọ nọ nwụnrụn a, mẹ mgba a, gi ẹ mẹrụ a.

³ Obi Shẹkẹm ekwezini pụ ebe Daịna nwa Jekọpụ rị; ihiẹn Daịna sụọ Shẹkẹm ọda-ọda, Shẹkẹm nọ gi ọnụ-ọma rẹrẹma nwata-okpoho hụ.

⁴ Ya Shẹkẹm gha sị nẹdi ẹ wụ Hamọ, “Lụhanị m nwata-okpohoni.”

⁵ Ogẹn Jekọpụ gi nụ nị Shẹkẹm e mẹrụọlẹ Daịna nwa a, ụmụ Jekọpụ rị ebe wẹ rị e dun'ẹ anụ: ya Jekọpụ nọ gba nkịtịn d'e ru ogẹn ụmụ a gi lụaha.

⁶ Hamọ nẹdi Shẹkẹm nọ jẹn d'e kunrun Jekọpụ nị wẹ ẹbụọ hụn ụzọ ku oku ịlụ Daịna.

⁷ Ogẹn o gi ru iwe Jekọpụ, ụmụ Jekọpụ a nụọlẹ ihiẹn mẹ nwẹnẹ wẹ, gha ebe wẹ nọ e du anụ lụaha ozigbo. Ọ hụ a fụ wẹ, e bu wẹ olulu makẹni Shẹkẹm e mẹgụọ ebọn Izrẹlụ ihiẹn ụya ebe ọ nọ mẹrụ nwa Jekọpụ — ihiẹn wẹ ghalẹni e mẹ.

⁸ Hamọ a bịa, ọ nọ sị wẹ, “Nwa ụnụ rị nwa m ẹnya. Dodo, yen'ẹ ya lụrụ.

⁹ Nị ẹnyi lẹ ụnụ lụtarịma; yemẹni ẹnyi ikpoho ọnụ lụrụ, ụnụ nwẹn a lụrụma ikpoho ẹnyi.

¹⁰ Sọn ni ẹnyi biri; e lee ni alịnị ile, biri ni, zụma nị afịa, ṅọnrinmẹ ni alị.”

¹¹ Ya Shẹkẹm nkẹ nọ sị nẹdi Daịna lẹ umunẹ Daịna, “Dodo ni, mẹni ni m ihiẹnni; ụnụ mẹ ẹ, ihiẹn ọwụlẹ ọnụ sị m ye ụnụ, e ye m ụnụ ya.

¹² Ku ni egho ọwụlẹ ụnụ chọ nị m bu lẹ ihiẹn ọwụlẹ ọnụ sị nị ya kẹ w'e buche — m k'a kụ ihiẹn ọwụlẹ ọnụ sị m kụ, kasị a mẹ ni ọnụ ye m nwata-okpohoni lụrụ.”

Ụmụ Jekọpụ E Mẹgwarị Ndị Shẹkẹm

¹³ Makẹni wẹ mẹrụ Daịna nwẹnẹ wẹ, ụmụ Jekọpụ nọ gi ẹro shịarị Shẹkẹm lẹ Hamọ nẹdi ẹ oku,

¹⁴ sị wẹ, “Ọnwan anịkọ ẹnyi mẹ; ẹnyi as'ẹka we nwẹnẹ ẹnyi ye okẹnnyẹ kwalẹni ugun lụrụ, makẹni ụya rọ ebe ẹnyi rị.

¹⁵ Ebe ẹnyi a nọ kweri wụ omẹni ọnụ e kwerighọ nị ụnụ rị kẹ ẹnyi ghahanị ịkwachanrịn ikẹnnyẹ ụnụ ile ugun.

¹⁶ Ogẹn ahụn kẹ ẹnyi e gi yemẹ ụnụ ikpoho ẹnyi lụrụ, ẹnyi nwẹn a lụma ikpoho ọnụ; ẹnyi e sọn ụnụ biri, ẹnyi lẹ ụnụ e họnrin ohu.

¹⁷ Kanị, omẹni ụnụ ekweni kwa ugun, ẹnyi e weri nwa ẹnyi lama.”

¹⁸ Ya Hamọ lẹ Shẹkẹm nwa a nọ sị ihiẹn wẹ ku hụghọ mma.

¹⁹ Ya kẹ okorọbịa ahụn wụ Shẹkẹm nọ jẹnmẹ ozigbo d'e mẹ ihiẹn ahụn wẹ ku — makẹni ihiẹn Daịna sụọ a ọda-ọda. Shẹkẹm kẹ wẹ kachanrịn a gbaye iwe nẹdi ẹ ile.

²⁰ Hamọ lẹ Shẹkẹm nwa a nọ shi ọgwa alị wẹ nị wẹ lẹ ibe wẹ ku.

²¹ E ru w'ẹ, wẹ nọ sị, “Ndịnị wụ ndị wẹ gi e mẹ ẹhụ, ẹlẹ wẹ ndị oku. Nị ẹnyi nị nị wẹ biri alịnị, nọ ebeni zụ afịa, nị alị ẹnyi a shịaghọ hụn e ru ẹnyi lẹ wẹ biri; nị ẹnyi lụrụ ụmụ wẹ, wẹ nwẹn a lụrụ ụmụ ẹnyi.

²² Kanị edukọ wẹ ẹnyi biri hụn ẹnyi lẹ wẹ e gi wụrụ ohu sokpan ikẹnnyẹ ile rị alịnị kwa ugun kẹ wẹ.

²³ Ẹnyi kweri, ihiẹn-uriri wẹ lẹ ihiẹn wẹ ile lẹ anụ ndị ọzọ wẹ nwọn emẹkọ nke ẹnyi? Nị ẹnyi kweri nwan, kẹni wẹ du ẹnyi bi.”

²⁴ Ikẹnnyẹ ile zu ọgwa hụ nọ kweyeni Hamọ lẹ nwa a wụ Shẹkẹm; ya ikẹnnyẹ ile rị obodo ahụn nọ kwachanrịn ugun.

²⁵ O mẹpụ akp'ọhịn ẹtọ, ebe ugun rịkwọ a tụrụ wẹ, ya ụmụ Jekọpụ ẹbụọ wụ Simiọnụ lẹ Livaị hụn wụ umunẹ Daịna, nọ buru ọpịa-agha, maye ndị obodo ahụn ebe wẹ tụlẹni ẹnya a, gbuchanrịn ikẹnnyẹ ile rịn'a.

²⁶ Wẹ nọ gi ọpịa-agha gbu Hamọ lẹ nwa a wụ Shẹkẹm, gha iwe Shẹkẹm weri Daịna lama.

²⁷ Ya ụmụ Jekọpụ nọ banye imẹ obodo ahụn ozun jun, buruchanrịn ihiẹn ile rị obodo ahụn wẹ nọ mẹrụ nwẹnẹ wẹ okpoho.

²⁸ Wẹ nị werichanrịn atụnrụn lẹ ewu lẹ efin lẹ jaki lẹ ihiẹn wẹ ile rị imẹ obodo ahụn lẹ ndị rị ogbe.

²⁹ Kpọnrinchanrịn ihiẹn wẹ lẹ ụmụ lẹ inyẹnmẹ wẹ ile, gi ẹka-ikẹn hụ kwarị ihiẹn ile rị iwe wẹ.

³⁰ Ya Jekọpụ nị sị Simiọnụ lẹ Livaị, “Ụnụ e buhẹgụọnị m nsọngbu, gi m họnrin eje-ịhịan ẹnya ndị Kenaanị lẹ ndị Pẹrẹzi. Ẹnyi ebuni ọda; wẹ ile kịgbama hụ lụsọn m ọgụn, e gbucharịn wẹ mmẹ lẹ ezi-lẹ-ụlọ m.”

³¹ Ya ụmụ a nọ sị a, “Kị haịn o gi mẹ nwẹnẹ ẹnyi kẹ ịgbaraja?”