Jẹnẹsisi 33 - Ika

Isi Nke Mmẹtọ Kwasị Ọgụn Jekọpụ Lẹ Isọ E Zu

¹ Jekọpụ e lee ẹnya, e lee Isọ! Ya lẹ ikẹnnyẹ nnụ ọ kị wị lala. Ya Jekọpụ nọ kebe ụmụ a: ọ kị ụfọdụ ye Lia, kị ụfọdụ ye Rechẹlụ, kị ụfọdụ ye idibo ikpoho ẹbụọ ahụn rị iwe wẹ.

² Ọ nọ bu idibo ikpoho ẹbụọ ahụn lẹ ụmụ wẹ che ihun, o sọn Lia lẹ ụmụ a; o we Rechẹlụ lẹ Josẹfụ che azụụn.

³ Ya nwẹn nọ buru ụzọ, kụkọnị nwẹnẹ ẹ isi alị jẹnkọ; o mẹpụ ẹrịra mgbe ẹsa n'o d'e ru ebe nwẹnẹ ẹ rị.

⁴ Kanị, Isọ nọ gbaburu ẹ, dide ẹ, fiedọn ẹ, susu ẹ ọnụ; wẹ ẹbụbụọ nọ kwanma.

⁵ Isọ e lee ẹnya, ọ nị legha ikpoho ndị hụ lẹ ụmụ wẹ, ọ nọ sị Jekọpụ, “Elee ndị wụ ndịnị yụ lẹ wẹ wị?” Jekọpụ nọ sị a, “Ụmụ Osolobuẹ mẹ ọhụnma ye odibo i rọ.”

⁶ Ikpoho ẹbụọ ahụn rị iwe Jekọpụ lẹ ụmụ wẹ nọ nọzụnhan, gbu osekpu, kele Isọ.

⁷ O sọn Lia lẹ ụmụ a, wẹ nwẹn nịzị gbu osekpu, kele ẹ. Ndị kpazụụn pụha wụ Josẹfụ lẹ Rechẹlụ, wẹ nwẹn nọ gbuzi osekpu, kele ẹ.

⁸ Ya Isọ nị sị Jekọpụ, “Kị wụ igunrun anụ ndị ahụn ile m hụn kẹ m lala?” Jekọpụ nọ sị a, “M sị nị m gi ẹ rịọ ị.”

⁹ Ya Isọ nọ sị a, “E nwọngụọ m ọda nwẹnẹ m; bu ihiẹn tọ.”

¹⁰ Jekọpụ nọ sị, “Mba, dodo; omẹni ihiẹn m a sụọghọ ị, narịn m ihiẹn ndịnị m ye i. Makẹni, ihun i m hụn nọ m kẹ sị m hụn ihun Osolobuẹ — hụnnị ị nabanhan m.

¹¹ Dodo, narịn ihiẹn wẹ wẹhẹn'i, makẹni Osolobuẹ e mẹọlẹ ni m ọhụnma; onwọnni ihiẹn rị a kọnị m.” Makẹni Jekọpụ tọ a rịọ a, Isọ nọ kweri narịn a ihiẹn ndị ahụn.

¹² Ya Isọ nị sị a, “Nje, nị ẹnyi lama nwan; mmẹ lẹ ụnụ k'a wịrị.”

¹³ Kanị Jekọpụ nọ sị a, “Diọkpa, y'a marịngụọ nị ụmụ-ẹkanị mmẹ lẹ wẹ wị e mẹkẹ kịrị-kịrị; nị m jẹnkọ d'a rị e leban ewu lẹ atụnrụn lẹ efin ndịnị kị ụmụ mirin-mirin ẹnya. Wẹ gihụ ikẹn kị wẹ akpọhịn ohu dẹ, anụ ndịnị ile jẹnkọ d'a nwụnhụnchanrịn.

¹⁴ Jẹnmẹ ni nwan, Diọkpa, nị odibo i lala; nị m tu udọn e jẹn makẹ anụ lẹ ụmụ-ẹka ndịnị zelẹni mmẹ lẹ wẹ wị, d'e ru nị a bịa m alị Sẹẹ d'e kunrun i Diọkpa.”

¹⁵ Isọ nọ sị a, “Nị m latọn'ị nwan ndị m k'a latọnị ị imẹ ikẹnnyẹ ndịnị mmẹ lẹ wẹ wị nị wẹ du ụnụ.” Jekọpụ nọ sị a, “K'i k'e sọngbuni nwan enwẹn i? Gihụ ẹnya rị mma lee m Diọkpa — ọ gụ.”

¹⁶ Ya Isọ nọ buli ụhụọhịn ahụn, lama alị Sẹẹ.

¹⁷ Jekọpụ nkẹ nọ shi Sukọtụ, nọ ebẹhụ rụnrụn ụlọ, rụnzịkwọnị anụ a ọdụ nke wẹ. Ya haịn wẹ gi a kpọ ebẹhụ “Sukọtụ” hụn wụ “Ọdụ”.

Jekọpụ A Lụaha Alị Shẹkẹm

¹⁸ Kẹ Jekọpụ gha Padan-Aram pụha, ọ nọ lụaye obodo Shẹkẹm rị alị Kenaanị, biri ẹhụ obodo hụ.

¹⁹ Ọ nọ gi akpụrụ egho siliva ọgụn-isẹn ṅọnnarịn ụmụ Hamọ alị hụ o ziẹntọ. Hamọ wụ nẹdi okẹnnyẹ w'a kpọ Shẹkẹm hụn rị alị Shẹkẹm.

²⁰ Ọ nọ rụn ukpo nchụn-ẹjan ye ebẹhụ, kpọ a Ẹl-Ẹlohi-Izrẹlụ hụn wụ “Chuku Izrẹlụ Ehikẹ”.