Jẹnẹsisi 32 - Ika

Isi Nke Mmẹbụọ Kwasị Ọgụn Jekọpụ E Gi Egun Kwademẹ N'ọ Hụn Isọ

¹ Ya Jekọpụ nọ jẹnmẹ ebe o jẹnkọ, ndị mmọn-ozi Chuku nọ bịa d'e kunrun ẹ.

² Ogẹn Jekọpụ gi hụn wẹ, ọ nị sị, “Itu Osolobuẹ wụ ọnwan!” Ya ọ nị kpọ ebahụn Mahanaim.

³ Ya Jekọpụ nọ zi ndị idibo ẹ jẹngụ d'e zi Isọ nwẹnẹ ẹ hụn rị Sẹẹ imẹ alị Ẹdọm ozi.

⁴ Jekọpụ sị wẹ, “Lee ni ihiẹn ọnụ k'a gwa Isọ di-nwọnni m: ‘Odibo i wụ Jekọpụ sị, “Iwe Labanị kẹ m rị kete-ele-mgbe; ebahụn kẹ m rị nwan d'e ru kikẹnni.

⁵ M nwọn nwan efin lẹ jaki, atụnrụn lẹ ewu, idibo-ikpoho lẹ idibo-ikẹnnyẹ. M zihẹn'i nwan ozini, di-nwọnni m kẹn'i gi ẹnya rị mma lee m.” ’ ”

⁶ Ndị Jekọpụ zi ozi e kinhẹn, wẹ nị sị Jekọpụ, “Ẹnyi e jẹngụọ d'a hụn Isọ nwẹnẹ i; ọ lala nwan d'e kunrun i, ya lẹ ikẹnnyẹ nnụ wị.”

⁷ Ya kẹ okẹn egun nọ tụma Jekọpụ, obi eruzin'ẹ alị; ọ nị kebe ndị ya lẹ wẹ wị ụzọ ẹbụọ, kebezikwọ ewu lẹ atụnrụn a ile lẹ efin lẹ anyịnyan-mkpukpuke ụzọ ẹbụọ.

⁸ Ọ sị enwẹn ẹ, “Isọ maye itu bu ụzọ, hụn họdụnị a gbapụ.”

⁹ Ya Jekọpụ nọ mẹ ekpere, sị, “Euu Chuku Ebraham nẹdi m kanị, Chuku Aziki nẹdi m; Euu Osolobuẹ, Onyẹ hụn sị m ‘Lakin alị ị; laburu ndị nke i, m k'e mẹ ihiẹn ile ghan'ị’.

¹⁰ Efuruni m onyẹ i k'e mẹyeni ẹnịna, onyẹ i k'e mẹni ihiẹn ndịnị ile i gi a ghọsị n'i furu onyẹ wẹ gi e dọn ẹnya — ihiẹn ndịnị ile ị rị e mẹni mmẹ wụ odibo i. Ọkpọ m sụọ rị m ẹka isi mbidọn kẹ m fetu Iyini wụ Jọdanị, kanị e họnringụọ m nwan itu ẹbụọ!

¹¹ Dodo, gbapụha m ẹka Isọ nwẹnẹ m, makẹni egun rị a tụ m, n'ọ k'a bịa d'a maye m, maye nnẹ lẹ ụmụ ndịnị.

¹² Kanị yụ wụ Osolobuẹ sị m, ‘M k'e mẹ i gha ihun; m k'e mẹ ụmụ ị bu ọda kẹ ẹjan rị mkpẹnrẹn ohimin hụn wẹ ghalẹni a s'ẹka a gụn.’ ”

¹³ Ọ nọ nọdị ebẹhụ uhinhin ahụn; ọ nị gha ihiẹn ẹ họpụha ihiẹn o jẹnkọ d'e ye Isọ nwẹnẹ ẹ:

¹⁴ odegbe ewu ọgụn iri lẹ mkpịn ọgụn; onyẹnyẹ-atụnrụn ọgụn iri lẹ ebulu ọgụn;

¹⁵ onyẹnnyẹ anyịnyan-mkpukpuke iri kwasị ọgụn lẹ ụmụ wẹ; onyẹnnyẹ-efin ọgụnnaị lẹ okẹn-efin iri; onyẹnnyẹ-jaki ọgụn lẹ okẹn jaki iri.

¹⁶ Ọ nọ bu wẹ ile che ẹka idibo ẹ, onyẹ-onyẹ lẹ igunrun o ye ẹ du, sị wẹ, “Buruni ni m ụzọ; ẹgbata ya rịsọnmẹ igunrun ọwụlẹ lẹ ibe ẹ.”

¹⁷ Ya ọ nọ ye onyẹ bu ụzọ iwu, sị a, “Isọ nwẹnẹ m kunrun i ụzọ, jụ ị, ‘Onyẹ nwọn ụnụ? Elebe kẹ ọnụ jẹnkọ? Onyẹ nwọn ihiẹn ndịnị ile ụnụ dukọ?’

¹⁸ Sị a, ‘Jekọpụ nwa ị nwọn wẹ ile; ihiẹn ọ sị wẹ ye di-nwọnn'ẹ ẹ wụ Isọ rọ; ya nwẹn lala ibe azụụn.’ ”

¹⁹ Ọ nọ sịzị hụn mẹ wẹ ẹbụọ lẹ hụn mẹ wẹ ẹtọ lẹzi ndị ile dukọ anụ ndị ahụn, “Ihiẹn ohu ahụn kẹ ụnụ sikọ d'a gwa Isọ ogẹn ụnụ e gi kunrun ẹ.

²⁰ Sịkwọn'a, ‘Jekọpụ nwa ị sọnla ẹnyi azụụn.’ ” Jekọpụ ku ẹ makẹni ọ sị enwẹn ẹ, “Nị m gi ihiẹn ndịnị m zikọn'a sị a ekpelẹ, m kebe kunrun ẹ, a, ikẹnkwọ ọ nabanhan m ogẹn m'e gi hụn a.”

²¹ Ya kẹ wẹ nọ weri ihiẹn ndị ahụn Jekọpụ chọ n'o ye Isọ jẹnmẹgụ; kanị Jekọpụ lẹ enwẹn ẹ nọ nọdị ebẹhụ wẹ ziẹntọ uhinhin ahụn.

Kẹ Jekọpụ Lẹ Osolobuẹ Dọn Gba Mgba, Jekọpụ E Mẹri

²² Uhinhin hụ, Jekọpụ nọ lihi, weri inyẹnmẹ ẹ ẹbụọ lẹ idibo ẹ ikpoho ẹbụọ hụ lẹ ụmụ a, hụn o mẹ ni ikẹnnyẹ rị mmanaị, fetu mirin Jabọkụ ebẹhụ milẹni.

²³ Ogẹn o gi mẹgụ wẹ fetu mirin hụ, ọ nọzị zi idibo ẹ bughafe ihiẹn ẹ ile.

²⁴ Wẹ nọ la Jekọpụ sụọ tọ ebẹhụ; ya lẹ okẹnnyẹ ohu nọ gbama mgba ebẹhụ eki e we fọn.

²⁵ Ogẹn okẹnnyẹ ahụn gi hụn a nị ọ sanị ẹka tụ Jekọpụ mgba, ọ nị gba ẹka ye ẹ akị, akị nọ kwapụ a ebe wẹ rị a gba mgba hụ.

²⁶ Ya okẹnnyẹ ahụn nọ sị a, “Hatu m ye nị m lama, nị eki e d'e fọnpụ.” Kanị Jekọpụ nọ sị a, “Onwọnni ogẹn m'e gi hatu i n'ị la, sokpan ị gọzigụ m!”

²⁷ Ya okẹnnyẹ ahụn nọ sị a, “Kịnị wụ ẹfan ị?” Ọ nị sị a, “Ẹfan m wụ Jekọpụ.”

²⁸ Ọ nọ sị a, “Ẹfan ị ẹlẹzi Jekọpụ, kanị Izrẹlụ — makẹni y'e sọngụọ Osolobuẹ lẹ ịhịan zụọ, ọ ghan'ị.”

²⁹ Ya Jekọpụ nọ sị a, “Dodo, gwa m ẹfan ị.” Ọ nị sị a, “K'i k'e gi ẹfan m mẹ?” Ọ gọ̀zi Jekọpụ ebẹhụ.

³⁰ Ya Jekọpụ nọ kpọ ebẹhụ Pẹniẹlụ, sị, “Makẹni a hụnọlẹ m Chuku elee-m elee-i, anwụnnị m.”

³¹ K'o fetukọ Pẹniẹlụ, anwụn nọ wakunrun ẹ; ọ hụ a sụnjẹn makẹni akị kwapụ a.

³² Ya haịn ndị Izrẹlụ gilẹni e ri akwanran kwọngbama akị lẹ ukun d'e ru tannị, makẹni Osolobuẹ gba ẹka ye Jekọpụ ebẹhụ.