Jẹnẹsisi 31 - Ika

Isi Nke Mmanaị Kwasị Ọgụn Jekọpụ A Gbapụnị Labanị

¹ Jekọpụ a nụ nị ụmụ-ikẹnnyẹ Labanị rị a sị, “Jekọpụ e werichanrịn ihiẹn ile nẹdi ẹnyi nwọn; ẹka nẹdi ẹnyi k'ọ nọ nwọn ihiẹn ndịnị ile o nwọn.”

² Jekọpụ e lepụhazị nị Labanị e gbehutọgụọ ẹka o te gi e sọn ẹ.

³ Ya kẹ Osolobuẹ nọ sị Jekọpụ, “Lakin alị ndị nẹdi i wẹ; laburu ndị nke i; m k'a nọyen'i.”

⁴ Ya Jekọpụ nọ zi wẹ d'a kpọha Rechẹlụ lẹ Lia, nị wẹ bịa ọfịa ebẹhụ ọ rị e lepụ anụ a ẹnya.

⁵ Ọ nị sị wẹ, “A hụngụọ m'a nị nẹdi ụnụ arịzị e mẹ m k'o mẹ m mbụ, kanị Chuku hụn nẹdi m e fe nọyeni m anọyeni.

⁶ “Ụnụ a marịngụọ nị e gigụọ m ndụn ile m nwọn rụnnị nẹdi ọnụ ọrụn;

⁷ kanị nẹdi ụnụ e mẹgbuọlẹ m, mgbe iri k'o gbehutọpụ ihiẹn o te k'a kụ m, kanị Osolobuẹ anịnị a rụ m ẹhụ.

⁸ Ọ sịhụ, ‘Ndị ile tụ ẹkịrịka k'a wụ ụgwọ ọrụn ị’, ihiẹn-uriri ile a mụma ndị tụ ẹkịrịka; ọ sịzị nwan, ‘Ndị vin ugbẹnrẹn k'a wụ ụgwọ ọrụn ị’, ogẹn ahụn ihiẹn-uriri ile a mụma ụmụ vin ugbẹnrẹn.

⁹ Osolobuẹ e gigụọ ẹrịra napụ nẹdi ụnụ ihiẹn-uriri ẹ, we wẹ ye m.

¹⁰ “Ogẹn anụ gi a gba, o nwọn nrọ m rọ, m nọ hụn nị mkpịn ndị rị a gbasọnmẹ anụ ndịnị wụsọnmẹ ndị vin ugbẹnrẹn lẹ ndị tụ ẹkịrịka mọbụ ntụpọ.

¹¹ Imẹ nrọ ahụn, mmọn-ozi Osolobuẹ nọ hị m, ‘Jekọpụ!’ M nọ za, ‘Elee m ebeni!’

¹² Ọ nị sị m, ‘Lee ẹnya n'ị hụn nị mkpịn ile rị a gba anụ ndịnị wụ ndị vin ugbẹnrẹn lẹ ndị tụ ẹkịrịka mọbụ ntụpọ, makẹni a hụngụọ m ihiẹn ile Labanị rị e mẹ i.

¹³ Mmẹ wụ Chuku, hụn bịa d'e kunrun i alị Bẹtẹlụ, ebẹhụ i nọ bu ọmụma tumẹ, hu udẹn-olivu ye elu ẹ, nọ ebẹhụ kwe m nkwa. Gha nwan alịnị pụ ozigbo; lakin alị ị.’ ”

¹⁴ Ya Rechẹlụ lẹ Lia nọ sị Jekọpụ, “O nwọnzidẹ nwan ihiẹn nẹdi ẹnyi k'e ru ẹnyi ẹka ra?

¹⁵ O werigụọ nị ẹnyi nwan kẹ abịamabịa? Ẹlẹdẹ orire sụọ k'o re ẹnyi, o rigụọdẹ ihiẹn wẹ gi ṅọnrin ẹnyi.

¹⁶ Ẹghẹẹ, akụ-lẹ-ụba ile hụn Chuku napụ nẹdi ẹnyi wụ nke ẹnyi lẹ ụmụ ẹnyi; mẹ nwan ihiẹn ọwụlẹ Chuku sị ị mẹ.”

¹⁷ Ya Jekọpụ nọ bu ụmụ a lẹ inyẹnmẹ ẹ che elu anyịnyan-mkpukpuke,

¹⁸ wechanrịn ihiẹn-uriri ẹ ile che ihun, burukwama ihiẹn ile o nwọnhẹn imẹ alị Padan-aram n'ọ hụn ụzọ laburu Aziki nẹdi ẹ imẹ alị Kenaanị.

¹⁹ Ogẹn Labanị gi jẹnmẹgụ d'a kọ atụnrụn a ẹṅẹnrẹn, Rechẹlụ nọ zunrun mmọn ndị nẹdi ẹ lẹ ezi-lẹ-ụlọ a a rụa.

²⁰ Jekọpụ nị mẹ Labanị onyẹ Aram ẹro: ọ gwanị Labanị n'ọ lakọ alakọ.

²¹ Ọ nị weri ihiẹn ile o nwọn gbapụ — fetu Iyi Yufretisi, dọn ihun ẹgbẹrẹ Gilẹdị hụn rị elu òke.

Labanị A Chụrụ Jekọpụ, Osolobuẹ E Buche Ọnụ

²² Hụn mẹ ẹ akpọhịn ẹtọ, wẹ nọ gwa Labanị nị Jekọpụ a gbapụgụọ.

²³ Ya ọ nọ weri umunẹ ẹ, gi akpọhịn ẹsa chụ Jekọpụ, kunrun ẹ alị Gilẹdị hụn rị elu òke.

²⁴ Imẹ abalị, Osolobuẹ nị bịa imẹ nrọ d'e kunrun Labanị, onyẹ Aram; sị a, “Asịkwọlẹ Jekọpụ ihiẹn ọwụlẹ, kẹ mma kẹ njọ!”

²⁵ Jekọpụ wẹ e rugụọ alị Gilẹdị hụn rị elu òke, ziẹngụ, nị Labanị lẹ umunẹ ẹ d'e kunrun ẹ; wẹ nwẹn nọ ziẹnzi ebẹhụ.

²⁶ Labanị nọ sị a, “Kị wụ ihiẹnni i mẹ? Y'e mẹ m ẹro, kịrị ụmụ m ikpoho lama nọkẹ ndị wẹ nwụnrụn imẹ agha?

²⁷ Kị haịn i gi mẹ m ẹro gi nzuzue gbapụ? Kị haịn i gilẹni gwa m? Nkẹ m'e gi ẹbụ lẹ oriri du i ụla, kpọye ẹ ụbọ lẹ ẹgede-chakachaka.

²⁸ Y'a nịdẹni m susu ụmụ-ụmụ m lẹ ụmụ m ọnụ gi sị wẹ o-hẹn-eki? Omumẹ onyẹ-nzuzu k'i mẹ ihiẹnni.

²⁹ M k'a s'ẹka rụ ị ẹhụ; kanị, Chuku Aziki nẹdi i gwa m oku imẹ uhinhin, sị m, ‘Asịkwọlẹ Jekọpụ ihiẹn ọwụlẹ — kẹ mma kẹ njọ!’

³⁰ “A marịnghọ m n'ị gbapụ makẹni iwe nẹdi i rị a da ị; kanị, k'ị zunrunzini mmọn m?”

³¹ Ya Jekọpụ nọ sị Labanị, “Egun rị a tụ m; m ro n'i k'e gi ikẹn napụ m ụmụ-ị-ikpoho.

³² Kanị, ị hụn mmọn ị ẹka onyẹ ọwụlẹ rị ebeni, wẹ gbu onyẹ ahụn! Nọ nwan idẹnya umunẹ ẹnyi ndịnị lele kẹ o nwọn ihiẹn i m gi; omẹni o nwọnghọ, y'e weri ẹ.” Kanị, Jekọpụ amarịn nị Rechẹlụ e zunrungụọ mmọn ndị hụ.

³³ Ya Labanị nọ banyesọnmẹ ọdụ Jekọpụ lẹ ọdụ Lia lẹ ọdụ ikpoho ẹbụọ ahụn rị iwe ụmụ a ẹbụbụọ d'a chọ mmọn ndị hụ, kanị ọ hụnnị wẹ. Ọ gha ọdụ Lia pụha, banye ọdụ Rechẹlụ.

³⁴ Rechẹlụ e weriọlẹ nwan mmọn ndị ahụn che imẹ ihiẹn w'e gi a nọdị elu anyịnyan-mkpukpuke. Ọ nọ nọdịkwasị wẹ. Labanị a gwalọchanrịn ihiẹn ile rị ọdụ ahụn — onwọnni ihiẹn ọ hụn.

³⁵ Rechẹlụ nọ sị nẹdi ẹ, “Baba, dodo ekpelẹ nị elihinini m'i ọtọ; m rị a hụn ogẹn m.” Ẹrịra kẹ Labanị dọn chọ mmọn ndị ahụn, ọ hụnnị wẹ.

³⁶ Olulu nọ bu Jekọpụ, ọ nọ du Labanị kpemẹ, “Elee eje-ihiẹn kẹ m mẹ? Kịnị wụ njọ m hụn i gi ufiri ẹ chụkọ m ọkụn-ọkụn?

³⁷ Y'a gwalọchanrịngụọ nwan ihiẹn m ile, kịnị k'ị hụn nwan wụ nke i? Wepụha a nwan ihun ndị nke i lẹ ndị nke m kẹni wẹ hannị ẹnyi eṅẹn!

³⁸ “A nọgụọ m ẹka ị ọrọgbọ ahụa ọgụn: imẹ ekwọntuni kẹ atụnrụn ị kẹ ewu i; ewerituni m ebulu ọwụlẹ imẹ ihiẹn-uriri i;

³⁹ ebulụatuni ni m'ị ozun anụ ị ọwụlẹ nị eje-anụ tagbu ẹ; hụn nkẹ m'e gi bulụan'ị ya, e gi m nke m nọkin ẹnya a. Kẹ wẹ zunrun ẹ ebe eki rị elu-o kẹ wẹ zunrun ẹ imẹ abalị-o, ẹka m kẹ ị nọ a chọ a.

⁴⁰ Ogẹn ahụn ile, efinnaị anwụn a malịlọ m ẹhụ; imẹ abalị oyi a tụ m ntan, tụ m imọn; onwọnni ogẹn ụran gi e buru m.

⁴¹ Ẹrịra k'o mẹ m ọrọgbọ ahụa ọgụnnị m nọ iwe i. M gi ahụa mmẹnọ fe i kẹni m lụrụ ụmụ ị ikpoho ẹbụọ, m nọzị gi ahụa isin fe i kẹni i gi ihiẹn-uriri i kwamanị m, kanị y'e mẹgbu m — gbehutọ ụgwọ ị te k'a kụ m mgbe iri!

⁴² Omẹni ẹlẹ hụn Chuku hụn nẹdi m e fe nọyeni m — Chuku Ebraham, Chuku hụn Aziki nẹdi m a tụ egun ẹ, o te nwọnni ihiẹn nkẹ y'e ye m! Chuku a hụngụọ afụnfụn ile m rị a ta lẹ okẹn ọrụn m ile, ya haịn o gi jụgbọ ị hụn uhinhin.”

⁴³ Ya Labanị nọ sị Jekọpụ, “Ikpoho ndịnị wụ ụmụ m; ụmụ ndịnị yụ nị wẹ wị wụ ụmụ m; ihiẹn-uririni ile wụ nke m; ihiẹn ile ị rị a hụn ebeni wụ nke m. Kanị, kị m'e mẹ nwan banyeni ụmụ m ndịnị lẹ ụmụ ndịnị wẹ mụ?

⁴⁴ M chọ nwan nị mmẹ lẹ yụ kwetarị nkwa: ịya k'a wụrụ ọshẹri ẹgbata mmẹ lẹ yụ.”

⁴⁵ Ya Jekọpụ nọ bu ọmụma tumẹ.

⁴⁶ Jekọpụ nị sị ndị nke ẹ, “Kpọnkikomẹ ni ọmụma”, ya wẹ nọ buhẹsọnmẹ ọmụma, dọnshi ọmụma ndị ahụn elu; wẹ azụụn ẹbụbụọ hụ nọ nọ ebẹhụ rigbama ihiẹn-oriri wẹ gi e kwetarị nkwa.

⁴⁷ Ya Labanị nọ kpọ ebahụn “Jẹga-Sahaduta”, Jekọpụ a kpọ a “Galidi” — ẹfan ẹbụbụọnị wụ “Elumelu Shịa-ẹri”.

⁴⁸ Ya Labanị nọ sị, “Elumelu ọmụmanị wụ ọshẹri hụn rị ẹgbata mmẹ lẹ yụ tannị.” Ya haịn wẹ gi kpọ a Galidi.

⁴⁹ W'a kpọzịkwọ elumelu ọmụma hụ Mizpa, makẹni Labanị sị, “Osolobuẹ ya lemẹ mmẹ lẹ yụ ogẹn onyẹ-onyẹ e gi jẹnmẹgụ nke ẹ.

⁵⁰ I mẹja ụmụ m ndịnị ị rị a lụ mọbụ lụrụ ndị ọzọ cheni wẹ — nyanhankwọ nị Chuku wụ ọshẹri, ọsụọn'a n'o nwọnzini onyẹ ọzọ rị a hụnnị ẹnyi.”

⁵¹ Ya Labanị nọ sị Jekọpụ, “Lee elumelu ọmụmanị lẹ ọmụma hụnnị m tumẹ hụn rị ẹgbata mmẹ lẹ yụ.

⁵² Elumelu ọmụmanị lẹ hụnnị m tumẹ wụ ọshẹri nị mmẹ nwẹn aghafekọ elumelu ọmụmanị bịa ebe ị rị d'a chọ ị njọ; yụ nwẹn aghafekọ elumelu ọmụmanị lẹ hụnnị m tumẹ bịa ebe m rị d'a chọ m njọ.

⁵³ Chuku Ebraham lẹ mmọn Nahọ lẹ mmọn nẹdi wẹ, uwẹ k'a hannị ẹnyi eṅẹn.” Ya Jekọpụ nọ gi ẹfan Onyẹ hụ Aziki nẹdi ẹ a tụ egun ẹ, ẹfan Osolobuẹ, kwe nkwa;

⁵⁴ ọ nọ nọ ebẹhụ imẹ alị Gilẹdị rị elu òke chụn ẹjan, kpọ ndị nke ẹ oriri. E rigụ wẹ, wẹ nọ ranhịn elu ugu ebẹhụ.

⁵⁵ Eki e fọn ụzọ-ọtụntụn, Labanị nọ lihi, susu ụmụ-ụmụ a lẹ ụmụ a ikpoho ọnụ, gọzi wẹ. Ọ nọ la wẹ tọ, lama.