Jẹnẹsisi 30 - Ika

Isi Nke Iri Kwasị Ọgụn

¹ Ogẹn Rechẹlụ gi hụn a n'ọ mụnịnị Jekọpụ nwa, ẹnya nọ fụma a nị nwẹnẹ rị a mụ. Ọ nọ sị Jekọpụ, “Yekwọ m ụmụ; y'e yeni m ụmụ, a nwụnhụn m.”

² Iwe nọ we Jekọpụ, ọ nọ gi iwe sị Rechẹlụ, “Mmẹ wụ Osolobuẹ mẹ i amụlẹ nwa?!”

³ Ya Rechẹlụ nọ sị a, “Lẹhụ Bil'ha, nwa rị iwe m: sọn ẹ ranhịn n'ọ hụn ụzọ mụdọnni m ụmụ, a gha m ẹka a nwọnrin ụmụ nke m.”

⁴ Ya ọ nị we nwata hụ rị iwe ẹ wụ Bil'ha weye Jekọpụ lụma; Jekọpụ nọ sọn ẹ ranhịn.

⁵ Bil'ha nọ tụrụ imẹ, mụnị Jekọpụ okẹnnyẹ.

⁶ Ya Rechẹlụ nọ sị, “Osolobuẹ a shịagụọnị m ẹri; ọ nụgụọ arịrịọ m, ye m okẹnnyẹ.” Ọ nọ gụn a “Danị”.

⁷ Omẹgụ, Bil'ha nọ tụrụzị imẹ, mụnị Jekọpụ okẹnnyẹ hụn mẹ ẹ ẹbụọ.

⁸ Ya Rechẹlụ nọ sị, “Mmẹ lẹ nwẹnẹ m a dọgụọ ọhụnma-ọhụnma, e mẹri m'ẹ!” Ọ nọ gụn a Naf'tali.

⁹ Lia a hụn a nị ya nwẹn amụzịnị nwa, ọ nị we Zil'pa, nwa rị iwe ẹ, weye Jekọpụ lụma.

¹⁰ Ya Zil'pa nwa rị iwe Lia nọ mụnị Jekọpụ okẹnnyẹ.

¹¹ Lia nị sị, “Ẹwẹrẹ m.” Ọ nị gụn a “Gadị”.

¹² Zil'pa nọ mụzịnị Jekọpụ okẹnnyẹ hụn mẹ ẹ ẹbụọ.

¹³ Ya Lia nọ sị, “Ịghọghọ e jun m obi! Ikpoho k'a kpọ m Ịghọghọ!” Ọ nị kpọ a Asha.

¹⁴ Rubẹni jẹn ugbo ogẹn wẹ gi e be ọka-witi, ọ nọ hụn ẹfịfịa mandreki hụn wẹ sị onyẹ mụlẹni nwa ri a, ọ tụrụ imẹ. Ọ nị welụa nị nnẹ ẹ wụ Lia ya. Ya Rechẹlụ nọ sị Lia, “Dodo, yebeye m mandreki hụ nwa ị welụa.”

¹⁵ Lia nọ sị a, “Di m ị narịn m ezun'i? Ị chọzị n'i weri mandreki nwa m?” Rechẹlụ nị sị a, “Ọ hụghọ mma; ye m nwan mandreki nwa ị nị yụ lẹ di ẹnyi ranhịn uhinhinni.”

¹⁶ Ogẹn Jekọpụ gi gha ugbo lụa ẹnyasị hụ, Lia nọ jẹnburu ẹ, sị a, “Ị k'e sọnrịrị m ranhịn tannị, mandreki nwa m wẹhẹ kẹ m gi kụ ụgwọ mmẹ lẹ yụ k'e gi ranhịn.” Ya Jekọpụ nị sọn ẹ ranhịn imẹ abalị ahụn.

¹⁷ Ya Osolobuẹ nị nụ ẹkwan Lia, Lia nọ tụrụ imẹ, mụnị Jekọpụ okẹnnyẹ hụn mẹ wẹ isẹn.

¹⁸ Lia nọ sị, “Osolobuẹ a kụgụọ m ụgwọ m gi we nwa rị iwe m ye di m.” Ọ nọ gi ufiri ẹ gụn a Isaka.

¹⁹ Lia a tụrụzị imẹ, mụnị Jekọpụ nwa okẹnnyẹ hụn mẹ wẹ isin.

²⁰ Lia nọ sị, “Osolobuẹ e yeọlẹ m ihiẹn rị mkpa. Di m k'e ye m nwan ọghọ, makẹni a mụpụnị m'a ikẹnnyẹ isin”; ọ nọ gi ufiri ẹ gụn a Zẹbulọnụ.

²¹ Omẹgụ, ọ nọ mụ okpoho, gụn a Daịna.

²² Omẹgụ, Osolobuẹ nọ nyanhan Rechẹlụ; ọ nị nụ ẹkwan a, kpọpụ a ẹkpa-nwa.

²³ Ọ nị tụrụ imẹ, mụ okẹnnyẹ, sị, “Osolobuẹ e bupụọlẹ m ifẹnrẹn ihun.”

²⁴ Ọ nọ gụn a “Josẹfụ”, sị “Osolobuẹ dodo yezi m nwa-okẹnnyẹ.”

Ihiẹn-uriri Jekọpụ Ebuwaye Ọda

²⁵ Ogẹn Rechẹlụ gi mụgụ Josẹfụ, ya kẹ Jekọpụ nọ sị Labanị, “Ha m ụla, nị m lakin alị m.

²⁶ Ye m inyẹnmẹ m lẹ ụmụ m, kẹni m hụn ụzọ lama n'e gigụọ m ufiri wẹ fe i. Y'a marịngụọ nị e fegụọ m'ị ọhụnma-ọhụnma.”

²⁷ Ya Labanị nọ sị a, “Dodo, omẹni ihiẹn m a sụọghọ ị, duzi m nọdị, makẹni a mahụngụọ m'a nị ufiri i haịn Osolobuẹ gi rị a gọzi m.”

²⁸ Labanị nọzị sị a, “Gwa m ihiẹn m k'a kụ ị, m k'a kụ ị ya.”

²⁹ Ya Jekọpụ nọ sị a, “Y'a marịngụọ kẹ m fehan ị lẹzi kẹ ihiẹn-uriri i rịhan mma ẹka m.

³⁰ Ihiẹn i bulẹni ọda kẹ m bịa a barapụgụọ; Osolobuẹ e gigụọ ihiẹn ile m buche ẹka gọzi i. Elee ogẹn kẹ m'e gi nwan mẹni ezi-lẹ-ụlọ m?”

³¹ Ya Labanị nọ sị a, “K'ị sị m ye i?” Ya Jekọpụ nọ sị a, “Eyelẹ m ihiẹn ọwụlẹ; kanị, i mẹni m hụ ihiẹn ohuni m jẹnkọ d'e ku, e dusọnmẹ m ihiẹn-uriri i, lepụsọnmẹ wẹ ẹnya:

³² Nị m ghahunmẹ imẹ igunrun ihiẹn-uriri i ile, a họpụha m atụnrụn ile tụ ntụpọ mọbụ ẹkịrịka lẹ okoro-atụnrụn ile rị e gi ngi lẹzi ewu ile tụ ntụpọ mọbụ ẹkịrịka; wẹ ile a wụrụ ihiẹn i gi kụ m ụgwọ.

³³ O ru ihun, i jẹnkọ d'a marịn kẹ m gi ezioku mẹ ẹ ogẹn y'e gi lele kẹ ihiẹn i gi kụ m ụgwọ kẹ m weri: ị hụnhụ ewu ọwụlẹ nwọnlẹni ntụpọ mọbụ tụlẹni ẹkịrịka mọbụ okoro-atụnrụn gilẹni ngi, y'a marịn nị m zun wẹ e zun.”

³⁴ Labanị nọ sị a, “E kwerigụọ m. Ya rị k'i dọn ku.”

³⁵ Ụhụọhịn ahụn, Labanị nị họpụhachanrịn mkpịn ile vin ugbẹnrẹn lẹ ndị tụ ntụpọ lẹ odegbe ewu ile vin ugbẹnrẹn lẹ ndị tụ ẹkịrịka, kẹ wẹ han nwọn ebe ọwụlẹ wẹ nọ chan ụchan, lẹzi okoro-atụnrụn ile e gi ngi. Ọ nọ kị wẹ che ẹka ụmụ a ikẹnnyẹ.

³⁶ O wepụ wẹ ẹka Jekọpụ, we wẹ shi ebe wẹ gi akpọhịn ẹtọ e jẹn; Jekọpụ nị zụnma ihiẹn-uriri Labanị họdụnị.

³⁷ Ya Jekọpụ nị berisọnmẹ agala pọpla lẹ “amọndụ” lẹ pleni rị ndụn, kpụnchan wẹ mkpabe-mkpabe — hụn wụnị w'e legha ebe ile ọ kpụnchan rị a chan ụchan.

³⁸ Ọ nọ bu agala ndị ahụn che ihiẹn anụ ndị ahụn gi a ra mirin, hụn wụnị wẹ gha a ra, wẹ hụ e legha agala ndị ahụn o kpụnchan mkpabe-mkpabe; anụ ndị ahụn rị a chọ nị wẹ gba bịa ebẹhụ d'a ra mirin,

³⁹ a nọ wẹ ebẹhụ gba; a mụ wẹ anụ ndị nwọn ẹkịrịka mọbụ ntụpọ.

⁴⁰ Jekọpụ hụ e bu ụmụ ndịnị wẹ rị a mụ e che azụụn ichẹn; o ru, o bu ndị rị a chọ nị wẹ gba ihun zimẹsọnmẹ ndị nke Labanị rị e gi ngi lẹ ndị tụ ẹkịrịka; ẹrịra k'o dọn nwọnrin ihiẹn-uriri nke ẹ, e wepụ wẹ ebe nke Labanị rị.

⁴¹ Ogẹn ọwụlẹ Jekọpụ hụn nị onyẹnnyẹ ndị hụn ka ibe wẹ e ze rị a chọ nị wẹ gba, o bu agala ndị ahụn ọ kpụnchan che ihiẹn wẹ gi a ra mirin kẹni wẹ nọkunmẹ wẹ wẹ gha a gba.

⁴² Kanị, omẹni anụ ndị zelẹni rọ, o wejẹnkọ wẹ ebẹhụ. Ẹrịra kẹ ndị ile zelẹni gi wụrụ nke Labanị, ndị ile zeni a wụrụ nke Jekọpụ.

⁴³ Ẹrịra kẹ Jekọpụ gi hi okẹn-ọdanfịn, ihiẹn-uriri ẹ lẹ idibo ẹ nọ barapụ, kẹ idibo-ikpoho kẹ idibo-ikẹnnyẹ, lẹzi anyịnyan-mkpukpuke ẹ lẹ jaki ẹ.