Jẹnẹsisi 3 - Ika

Isi Nke Ẹtọ Njọ Ibuzọ Lẹ Afụnfụn Sọnn'ẹ

¹ Imẹ anụ-ọfịa ile Osolobuẹ wụ Chuku ke, agwọ kachanrịn akọ e nwọn. Ọ nọ sị okpoho hụ, “Osolobuẹ sịdẹ nwan ụnụ erilẹ mkpụrụ osisi ọwụlẹ imẹ ugboni ra?”

² Okpoho hụ nọ sị agwọ, “Mba; ẹnyi nwọn ikẹn ri mkpụrụ osisi ọwụlẹ rị ugboni;

³ kanị, Osolobuẹ sị ẹnyi, ‘Erikwọlẹ ni mkpụrụ osisi ahụn rị etintin ugboni mọbụ mẹtụ a ẹka, amamgbe ụnụ a nwụnhụn.’ ”

⁴ Kanị agwọ nọ sị okpoho ahụn, “Ụnụ anwụnhụnkọkwọ!

⁵ Osolobuẹ ku ẹ makẹni ọ marịngụọ nị hụn ụnụ gihụ ri ẹ, ẹnya ụnụ k'a shịapụ, ụnụ a rị kẹ Osolobuẹ: ụnụ a marịn ihiẹn rị mma lẹ ihiẹn rịlẹni mma.”

⁶ Ọ nọ ban okpoho ahụn ẹnya nị mkpụrụ osisi ahụn rị mma wẹ e ri, n'ọ la ẹnya, n'ọ rịka mma nị ịhịan ri ẹ marịn ihiẹn. Ya ọ nọ ghọrị mkpụrụ a ri, yezikwọ di ẹ ya lẹ ịya rị, di ẹ nọ ri.

⁷ Ya kẹ ẹnya wẹ ẹbụbụọ nọ shịapụ, wẹ nọ marịn nị wẹ gba ọtọ. Wẹ nọ kparịsọnmẹ ẹhụhụọ figi, kwagbama wẹ, gi kpumẹ ọtọ wẹ.

⁸ Ogẹn wẹ gi nụ ukwere Osolobuẹ wụ Chuku k'ọ ghakọ imẹ ugbo ogẹn ufere gi rị e fe ụhụọhịn hụ, Adam lẹ nwunyẹ ẹ nọ warị ebe osisi rị imẹ ugbo ebẹhụ, makẹ Osolobuẹ wụ Chuku gha a hụn wẹ.

⁹ Ya kẹ Osolobuẹ wụ Chuku nọ hị Adam, “Elebe kẹ ị rị?”

¹⁰ Adam nọ sị, “M nụ ukwere i imẹ ugbo, egun nọ tụma m makẹni m gba ọtọ, ya kẹ m nọ warị.”

¹¹ Ya kẹ Osolobuẹ nọ sị a, “Onyẹ gwa ị n'ị gba ọtọ? I ridẹ nwan mkpụrụ osisi ahụn m sị ị yụ erilẹ ra?”

¹² Ya Adam nọ sị a, “Okpoho hụn i butọ mmẹ lẹ ịya, ịya ye m mkpụrụ osisi ahụn, m nọ ri.”

¹³ Osolobuẹ wụ Chuku nọ sị hụn okpoho, “Kị wụ ihiẹnni i mẹ?” Hụn okpoho nọ sị, “Agwọ dufie m, m nọ ri.”

¹⁴ Osolobuẹ wụ Chuku nọ sị agwọ, “Ufiri ihiẹnni i mẹ, m rị nwan a bụ ị ọnụ — ịyụ sụọ, imẹ anụ-ụlọ ile lẹ anụ-ọfịa ile. Ẹfọ kẹ y'e gi a kpụn alị; ẹjan kẹ i k'a gha e ri — y'e we nwụn.

¹⁵ “M k'e mẹ ịyụ lẹ okpohoni wụrụ eṅẹnrẹn, mẹzikwọ nwa ị lẹ nwa a wụrụ eṅẹnrẹn. Nwa a k'a zọkpọ ị isi; yụ nwẹn k'a ta nwa a atụ-ụkụ azụụn.”

¹⁶ Ọ nọ sị hụn okpoho, “M k'e mẹ ọmụmụ fụwaye i ọrụn — ẹfọ-imẹ k'a tụrụ ị ọda-ọda, bụ ị k'a rị a chọkwọ di i; di i k'a kị ị.”

¹⁷ Ọ nọ nwan sị Adam, “Ufiri nị y'e giọlẹ oku nwunyẹ i dọn, ri mkpụrụ osisi ahụn m tin'i iwu, sị ị erilẹ, m rị nwan e gi ufiri i a bụ alị ọnụ: i k'a tama ezigbo afụnfụn rụn ugbo i kebe hụn ihiẹn i k'e ri y'e we nwụn.

¹⁸ Ogun-lẹ-ọkịnkan kẹ alị jẹnkọ d'a rị e pupụhanị ị; ihiẹn ugbo wepụha k'i k'e ri.

¹⁹ Ọbanje k'e sugụ ị i kebe hụn ihiẹn-oriri d'e ru mgbe i kin azụụn imẹ alị — makẹni alị kẹ m nọ weri i: ẹghẹẹ, ẹjan kẹ ị wụ; ẹjan kẹ y'a la.”

²⁰ Adam kpọ nwunyẹ ẹ “Ivu”, makẹni ịya wụ nnẹ ịhịan ile.

²¹ Osolobuẹ wụ Chuku weri akpụkpọ-anụ gi mẹmẹni Adam lẹ nwunyẹ ẹ ẹwuru, yimẹ wẹ.

²² Ya kẹ Osolobuẹ wụ Chuku nọ sị, “Lee ẹ nwan, ịhịan a rịọlẹ kẹ ẹnyi: ọ marịngụọ nwan ihiẹn rị mma lẹ ihiẹn rịlẹni mma. O ru tan, ọ tịnpụ ẹka ghọrịzịkwọ mkpụrụ osisi ahụn e ye ndụn, ri, rị ndụn jẹnrin ejẹn.”

²³ Osolobuẹ wụ Chuku nọ nwan chụpụ a imẹ ugbo ahụn rị alị Idẹni, kẹni ọ rụnma ugbo akpakalị nwẹn Osolobuẹ wụ Chuku nọ weri ẹ.

²⁴ Osolobuẹ a chụpụgụ ịhịan, ọ nọ bu Chẹrobu ẹbụọ nwọn nku lẹ ọpịa-agha rị e nwun ọkụn e fehunmẹ ohi-ohi che azụụn ọwụwa-ẹnyanwụn ugbo ahụn, gi chekin ebe wẹ gha e jẹn ukun osisi ahụn e ye ndụn.