Jẹnẹsisi 28 - Ika

Isi Nke Ẹsatọ Kwasị Ọgụn

¹ Ya Aziki nọ kpọ Jekọpụ, gọzi ẹ; gba a mkpịnsịn-ẹka ẹnya, sị a, “Alụkwọlẹ okpoho Kenaanị.

² Jẹnmẹ Padan-Aram ozigbo, iwe Bẹtuẹlụ nẹdi nnẹ i, d'a lụrụ onyẹ ohu imẹ ụmụ Labanị nwẹnẹ nnẹ i.

³ Chuku hụn nwọn ikẹn ile ya gọzi i, mẹ i mụba, kẹni i wụrụ igunrun ịhịan.

⁴ Ya ye i ngọzi Ebraham, kẹ yụ kẹ ụmụ ị, kẹni alịnị ị nọ nwan wụ otumunyẹ hụn ụzọ wụrụ nke i, alị hụn Osolobuẹ ye Ebraham.”

⁵ Ẹrịra kẹ Aziki gi zipụ Jekọpụ, Jekọpụ nọ jẹnmẹ Padan-Aram d'e kunrun Labanị nwa Bẹtuẹlụ onyẹ alị Aram. Labanị wụ nwẹnẹ Rebika, nnẹ Jekọpụ lẹ Isọ.

⁶ Isọ a hụngụọ a nị Aziki gọzi Jekọpụ, zipụ a shi alị Padan-Aram d'a lụrụ nwunyẹ, kẹ ọ rị a gọzi ẹ, n'ọ sị a, “Alụkwọlẹ okpoho Kenaanị,”

⁷ lẹzi ni Jekọpụ gi oku nẹdi ẹ lẹ nnẹ ẹ dọn, jẹnmẹ Padan-Aram ahụn.

⁸ Ya k'o gi we Isọ ẹnya nị ikpoho alị Kenaanị asụọnị Aziki nẹdi ẹ;

⁹ ọ nọ jẹn nke Ishmẹlụ d'a lụrụ Mahalatị nwa Ishmẹlụ nwa Ebraham. Mahalatị wụ nwẹnẹ Nẹbayọtụ. Isọ nọ lụrụ Mahalatị cheni inyẹnmẹ ẹ.

Nrọ Jekọpụ Rọ Ebe Ọ Gbakọnị Isọ

¹⁰ Jekọpụ nọ gha Biẹshẹba pụ, jẹnmẹ Haranị.

¹¹ O ru ebe ohu, makẹni anwụn a dangụọ, ọ nọ kụsị n'ọ ranhịn ebẹhụ uhinhin ahụn; ya ọ nọ gha imẹ ọmụma ndị rị ebẹhụ buru ohu, dinẹ alị, gi ọmụma hụ firi isi, ranhịn.

¹² Ọ nọ rọ nrọ: imẹ nrọ ahụn, ọ nị hụn obe turu alị, mkpọnụnụ a ru elu-igwee; ndị mmọn-ozi Osolobuẹ hụ e nyinjẹn ẹ e nyinlụa.

¹³ O legha Osolobuẹ k'o turu mkpọnụnụ obe ahụn. Osolobuẹ nọ sị a, “Mmẹ wụ Osolobuẹ, Chuku Ebraham nẹdi i kanị lẹ Chuku Aziki; m jẹnkọ d'e ye yụ lẹ ụmụ ị alịnị i dinẹ.

¹⁴ Ụmụ ị k'e bu ọda kẹ ẹjan rị alị. Ị k'a bashi ụzọ ile, kẹ ọdịdan-ẹnyanwụn kẹ ọwụwa-ẹnyanwụn kẹ ẹbamịn-ugu kẹ ẹbamịn ndịdan-mirin. Ịyụ lẹ ụmụ ị kẹ ụwa ile sikọ d'a gha nwọnrin ngọzi.

¹⁵ Lee ẹnya, mmẹ lẹ yụ wị! M k'e chemẹ i ebe ọwụlẹ i k'e jẹn; m k'e wekinhẹnzi i alịnị. Onwọnni ogẹn m'e gi la ị tọ d'e ru n'e mẹzuchanrịn m ihiẹn m kwe i nkwa a.”

¹⁶ Ya Jekọpụ nọ tẹnhin, ọ nọ sị, “Ete marịndẹ m nị Osolobuẹ rị ebeni nke-esi.”

¹⁷ Egun nọ tụma a, ọ nị sị “Ebeni a tụkakwọ egun! Onwọnni ihiẹn ọzọ ebeni wụ karị ụlọ Chuku; ebeni wụ ọnụ-mgbọn elu-igwee!!”

¹⁸ Eki e fọn, ụzọ-ọtụntụn biribiri, ya Jekọpụ nọ weri ọmụma ahụn o gi firi isi, bu ẹ tumẹ n'ọ wụrụ ihiẹn wẹ gi a nyanhan ebahụn; ọ nị hu udẹn-olivu ye elu ẹ.

¹⁹ Ọ nọ kpọ ebahụn “Bẹtẹlụ” hụn wụ “Ụlọ-Chuku”. Kanị ihiẹn w'a kpọ obodo ahụn mbụ wụ “Luzu”.

²⁰ Ya Jekọpụ nị kwe nkwa ebahụn, sị, “Omẹni Osolobuẹ a nọyeni m ijẹnni m jẹnkọ, chemẹ m, ye m ihiẹn-oriri lẹ ẹkwa —

²¹ hụn wụnị e gi m udọn lẹ ndọnkwa lụaru iwe nẹdi m, Osolobuẹ jẹnkọ d'a wụ Chuku m;

²² ebeni m tumẹ ọmụma-nnyanhannị k'a wụrụ ụlọ Chuku; m sikọ d'e kebe ihiẹn ile i ye m ụzọ iri, ye i ụzọ ohu.”