Jẹnẹsisi 27 - Ika

Isi Nke Ẹsa Kwasị Ọgụn Jekọpụ A Tụnarịn Isọ Ọkwa Nwa-ibuzọ

¹ Ogẹn Aziki gi kagụ ẹgẹdi, kaye ẹnya, ọ nọ kpọ nwa a hụn kanị wụ Isọ, sị a, “Nwa m”; Isọ nọ za a, “E lee m ebeni.”

² Ọ nọ sị Isọ, “Y'a hụngụọ a nwan nị a kagụọ m ẹgẹdi; amarịn m ụhụọkịn m k'a nwụnhụn.

³ Weri nwan ụta ị lẹ ẹkpa ọbara ị, ihiẹn ndị i gi a chụ nta, n'i jẹn ọfịa d'e gbuhẹni m anụ.

⁴ N'i gi ẹ mẹmẹni m ihiẹn-oriri sụọnị, ụdị hụn a sụọnị m; y'e buhẹni m'ẹ, nị m ri — kẹni m hụn ụzọ gọzi i m gini d'a nwụn.”

⁵ Kẹ Aziki rị a gwa Isọ okuni, Rebika hụ e gọn ntịn. Ogẹn Isọ gi nwan jẹnmẹ d'a chụ nta kẹni o gbuhẹ anụ,

⁶ Rebika nọ sị Jekọpụ nwa a, “M nụ kẹ nẹdi i rị a sị nwẹnẹ i wụ Isọ,

⁷ ‘D'e gbuhẹni m anụ imẹ ọfịa, n'i gi shini m ihiẹn-oriri sụọnị, nị m ri — kẹni m ye i ngọzi m idẹnya Osolobuẹ m gini d'a nwụn.’

⁸ Nwa m, mẹ nwan ihiẹn m jẹnkọ d'a gwa ị kikẹnni:

⁹ Jẹn nwan imẹ igunrun anụ ẹnyi d'a nwụnhannị m ụmụ ewu ẹbụọ rị mma, nị m gi shini nẹdi i ihiẹn-oriri sụọnị — ụdị hụn a sụọn'a;

¹⁰ y'e buru ẹ jẹnni nẹdi i, n'o ri, n'ọ hụn ụzọ gọzi i o gini d'a nwụnhụn.”

¹¹ Kanị Jekọpụ nọ sị Rebika nnẹ ẹ, “Lee, ẹhụ Isọ nwẹnẹ m mẹ ẹṅẹnrẹn-ẹṅẹnrẹn, kanị ẹhụ mmẹ nwẹn riẹn eriẹn.

¹² Nẹdi m nwọn ikẹn rịra m ẹka, o weri ẹ nị m bịa d'a kpari ẹ — ogẹn ahụn, e sehẹni m enwẹn m ọnụ-ẹsọn, ẹlẹzi ngọzi.”

¹³ Nnẹ ẹ nọ sị a, “Dodo nwa m, ọnụ o k'a bụ ị ya nọ m isi bụn, ka mẹ ihiẹn m gwa ị: d'e wẹhẹni m ewu ndị ahụn.”

¹⁴ Ya ọ nọ jẹn d'a nwụnhannị nnẹ ẹ wụ Rebika ewu ndị ahụn; Rebika nọ shi ihiẹn-oriri sụọnị, ụdị hụn a sụọ Aziki nẹdi wẹ.

¹⁵ Ya Rebika nọ kịrị ẹkwa Isọ kachanrịn mma, hụn rị mmụlọ ebẹhụ ọ rị, yimẹ nwa a hụn nta wụ Jekọpụ;

¹⁶ Ya ọ nọ weri akpụkpọ ụmụ ewu ndị ahụn mẹ ẹṅẹnrẹn-ẹṅẹnrẹn fụma Jekọpụ ẹka lẹ ebe ẹṅẹnrẹn rịlẹni olu ẹ.

¹⁷ Ọ nọ buye nwa a wụ Jekọpụ ihiẹn-oriri ahụn sụọnị lẹ brẹdi o mẹmẹ.

¹⁸ Ya Jekọpụ nọ jẹn d'e kunrun nẹdi ẹ, sị a, “Baba-ee!” Nẹdi ẹ nọ za, “Ee nwa m; elee nwa m rọ?”

¹⁹ Jekọpụ nọ sị nẹdi ẹ, “Mmẹ Isọ nwa ibuzọ ị rọ, e mẹgụọ m ihiẹn ị sị m mẹ; dodo lihi n'ị nọdị alị, ri anụ m gbuhẹ, kẹni i gọzi m.”

²⁰ Ya Aziki nị sị a, “Nwa m, nanị ị dọnzi hụnkẹnrin ẹ gbu!” Ya Jekọpụ nọ sị a, “Osolobuẹ wụ Chuku i ye m ẹwẹrẹ.”

²¹ Ya Aziki nọ sị Jekọpụ, “Dodo, nọzụnhan nị m hụn ụzọ rịra ị ẹka, nị m lele kẹ yụ wụ Isọ nwa m ra ẹlẹ yụ.”

²² Ya Jekọpụ nọ nọkunmẹ Aziki nẹdi ẹ; nẹdi ẹ a rịra a ẹka, ọ nọ sị a, “Olu Jekọpụ rọ, kanị ẹka ẹbụbụọnị wụ nke Isọ.”

²³ Aziki a sanị ẹka marịn nị Jekọpụ rọ makẹni ẹka a ẹbụọ mẹ ẹṅẹnrẹn-ẹṅẹnrẹn nọkẹ nke Isọ nwẹnẹ ẹ, ya ọ nọ gọzi ẹ.

²⁴ Kanị ọ nọ jụgụ a, “Yụ wụkwọ Isọ nwa m?” Ọ nọ sị a, “Mmẹ rọ.”

²⁵ Ọ nọ sị a, “Buzuhanị m anụ ahụn i gbuhẹ — nị m ri anụ nwa m gbuhẹ, nị m gọzi i.” Ya ọ nọ buzuhann'a ya, ọ nọ ri ẹ; o wẹhẹn'ẹ manya, ọ nọ ra.

²⁶ Ya Aziki nẹdi ẹ nọ sị a, “Nọzụnhan d'e susu m ọnụ, nwa m.”

²⁷ Ya Jekọpụ nọ nọkunmẹ nẹdi ẹ, susu ẹ ọnụ; ẹwuru Isọ ndị Jekọpụ yi nọ kunye nẹdi ẹ imi, ọ nọ nwan gọzi ẹ, sị, “Euu, ishin nwa m nọhụ kẹ ishin ọfịa Osolobuẹ gọzi!

²⁸ Osolobuẹ ya hukpu i igirigi elu-igwere; ya mẹ alị mẹn'i ihiẹn ọhụnma-ọhụnma; ya mẹ i nwọn ihiẹn-oriri lẹ ihiẹn w'a ra ọhụnma-ọhụnma.

²⁹ Ndị alị ichẹn-ichẹn wẹ wụrụ idibo i, alị ichẹn-ichẹn wẹ kụn'ị isi alị; umunẹ i wẹ rị okpuru i — ẹghẹẹ, ụmụ ile nnẹ i mụ wẹ kụn'ị isi alị. Ọbụbụ-ọnụ ya rịnị onyẹ ọwụlẹ hụn k'a bụ ị ọnụ; ngọzi ya rịnị onyẹ ọwụlẹ hụn k'a gọzin'i.”

Isọ A Kwan Mmanị

³⁰ Aziki a gọzigụ Jekọpụ, hụn Jekọpụ gihụ gha ebe Aziki nẹdi ẹ rị pụ, Isọ nwẹnẹ ẹ nọ gha ebe o jẹn ọfịa anụ lụaha.

³¹ Ya nwẹn nọ shizikwọ ihiẹn-oriri sụọnị, bu ẹ jẹnni nẹdi ẹ. Ọ nọ sị nẹdi ẹ, “Baba, lihi n'i ri anụ nwa ị gbuhẹ, n'ị gọzi m.”

³² Ya Aziki nọ sị a, “Onyẹ rọ?” Ya ọ nọ sị a, “Mmẹ wụ Isọ, nwa ibuzọ ị.”

³³ Ẹhụ nọ mama Aziki nni ọda-ọda, ọ sị, “Onyẹ wụ nwan onyẹ ahụn gbuhẹni m anụ n'ị d'a banhan? E rigụọ m anụ ahụn, gọzigụ onyẹ ahụn n'ị d'a banhan! A gọzigụọlẹ m'a; ngọzi ahụn k'e sọn ẹ!”

³⁴ Ogẹn Isọ gi nụ ihiẹn nẹdi ẹ ku, ọ nọ dọbepụ oro, kwan ụya, sị nẹdi ẹ, “Dodo, gọzi m; euu Baba, dodo, gọzi mmẹ nwẹn!”

³⁵ Ọ nị sị a, “Nwẹnẹ i gi aghịghọ bịa; o werigụọ ngọzi i.”

³⁶ Ya Isọ nọ sị, “Ẹlẹ ya haịn wẹ gi gụn a Jekọpụ? Hụnnị mẹpụ mgbe ẹbụọ o gi aghịghọ napụ m ihiẹn wụ nke m: ọ napụgụ m ọkwa nwa-ibuzọ, hụn wụ nke m, ọ napụzị m nwan ngọzi m!” Ya Isọ nọ sị nẹdi ẹ, “Onwọnni nwan ngọzi i latọnị m?”

³⁷ Aziki nị sị Isọ, “E gigụọlẹ m'a họnrin di-nwọnni i; gi umunẹ ẹ ile họnrinsọnmẹ ndị idibo ẹ; ye ẹ ihiẹn-oriri lẹ ihiẹn-ọrịra hụn o gi bi; kẹ m k'e mẹzini i nwan, nwa m?”

³⁸ Isọ a sị nẹdi ẹ, “Euu Baba, ya wụ ngọzi ohu sụsụọ k'i nwọn? Euu Baba, gọzi m; gọzizi mmẹ nwẹn!” Ya Isọ nọ kwan ezigbo ẹkwan, a nụ wẹ olu ẹ.

³⁹ Ya kẹ Aziki nẹdi ẹ nọ sị a, “Lee ẹ, ebe i k'e bi ẹlẹ ebe alị a nọ mẹ ihiẹn ọhụnma-ọhụnma mọbụ ebe wẹ n'e nwọnhẹn igirigi elu-igwere.

⁴⁰ Ọpịa-agha ị kẹ y'e gi bi; ị k'a wụ odibo nwẹnẹ i — kanị, ogẹn ndụn elu i e gi gụ ị, ị k'a lụbepụ agbụn a olu i.”

⁴¹ Ize Jekọpụ hụ e ze Isọ ufiri ngọzi ahụn nẹdi ẹ gọzi Jekọpụ, ya Isọ nọ sị enwẹn ẹ, “Ọ họdụ ẹkẹrẹ nị nẹdi m nwụnhụn, ẹnyi kwangụ a, e gbu m Jekọpụ.”

⁴² Kanị wẹ nọ gwa Rebika ihiẹn nwa a hụn kanị wụ Isọ rị e ku; ọ nọ zi wẹ d'a kpọhan'a hụn nta wụ Jekọpụ. Ọ nọ sị Jekọpụ, “Lee ẹnya, Isọ nwẹnẹ i rị e gi oku igbun'i a rọkọ enwẹn ẹ obi.

⁴³ Nwa m, mẹ nwan ihiẹn m k'a gwa ị: gbashi alị Haranị ozigbo d'e kunrun nwẹnẹ m okẹnnyẹ wụ Labanị,

⁴⁴ y'e du ẹ nọdị ẹkẹrẹ, d'e ru mgbe olulu nwẹnẹ i rọ —

⁴⁵ d'e ru mgbe olulu nwẹnẹ i rị e bun'i rọchanrịn, n'ọ zọchanrịn ihiẹn i mẹ ẹ; ogẹn ahụn, e zi m wẹ welụa ị. Nanị kẹ ụnụ ẹbụọ e gizi akpọhịn ohu nahịn m?”

⁴⁶ Omẹgụ, Rebika nọ sị Aziki, “Ndụn ikpoho Hẹti ndịnị a gụgụọ m! Jekọpụ lụrụzị okpoho Hẹti, okpoho alịnị, nke m a gụ!!”