Jẹnẹsisi 26 - Ika

Isi Nke Isin Kwasị Ọgụn Aziki Lẹ Abimẹlẹkị

¹ O nwọn ogẹn ụnwụn gi rị a mụ imẹ alị ahụn, ẹlẹkwọ hụn mụ ogẹn Ebraham; Aziki nọ jẹn d'e biri Gẹra ebe Abimẹlẹkị eze Filistia rị.

² Ya Osolobuẹ nọ bịa d'e kunrun Aziki, sị a, “Ejẹnlẹ alị Ijiptu; ka nọdị alị m k'a ghọsị ị.

³ Biri imẹ alịnị rịkẹ abịamabịa. I mẹ ẹ, m k'a nọyen'i, gọzi i — makẹni m jẹnkọ d'e we alịnị ile ye yụ lẹ ụmụ ị — m k'e mẹzu nkwa m kwe Ebraham nẹdi i.

⁴ M k'e mẹ ụmụ ị barahị rịkẹ kokisẹ rị elu-igwere; m k'e we alị ndịnị ile ye ụmụ ị; alị ile rị elu-ụwa k'a gha ẹka nwa ị nwọnrin ngọzi wẹ —

⁵ makẹni Ebraham gi oku m dọn, mẹ ihiẹn m chọ lẹ ihiẹn m sị a mẹ, dọnmẹsọnmẹ iwu m lẹ uhi m.”

⁶ Ya Aziki nọ biri obodo Gẹra.

⁷ Ogẹn ikẹnnyẹ rị alị ahụn gi jụ a onyẹ nwunyẹ ẹ wụ, ọ nọ sị wẹ, “Nwẹnẹ m rọ”, makẹni egun anịn'a sị wẹ “Nwunyẹ m rọ”. Ọ sị enwẹn ẹ, “Amamgbe ndịnị e gi ufiri Rebika gbupụ m, makẹni Rebika ma mma ẹhụ.”

⁸ Aziki e bibie alị ahụn, o ru ụhụọhịn ohu, Abimẹlẹkị wụ eze ndị Filistia nọ gha windo lee ẹnya, elee Aziki kẹ ya lẹ nwunye ẹ rị e gu egu nke di-lẹ-nwunyẹ.

⁹ Abimẹlẹkị nọ zi wẹ kpọha Aziki, ọ nọ sị a, “Nwunyẹ i rọ nụ! Kị haịn i gi sị, ‘Nwẹnẹ m rọ?’ ” Ya kẹ Aziki nọ sị a, “M sị amamgbe w'e gi ufiri ẹ gbu m.”

¹⁰ Abimẹlẹkị nọ sị a, “Kị wụ ihiẹnni i mẹ ẹnyi?! Nke onyẹ alịnị e sọn tan nwunyẹ i ranhịn, y'e buhẹni ẹnyi ikpe-ọmụma!!”

¹¹ Ya Abimẹlẹkị nọ ti iwu, sị ndị alị ahụn ile, “Onyẹ mẹtụ okẹnnyẹni lẹ nwunyẹ ẹ ẹka, ẹnyi e gbu ẹ.”

¹² Ya Aziki gha nọdị alị ahụn rụn ugbo ahụa hụ, ihiẹn ugbo ẹ nọ mẹ ọhụnma-ọhụnma, bawaye ụzọ ọgụn-isẹn. Osolobuẹ a gọzi ẹ,

¹³ ọ nọ hi ọdanfịn, hi ẹ ọda-ọda.

¹⁴ Ẹghẹẹ, Aziki nwọn igunrun atụnrụn lẹ efin lẹ ikpụlọ hi ogbe — nke wụnị ẹnya a fụma ndị Filistia.

¹⁵ Ndị Filistia e te gigụọ ẹjan hukinchanrịn ọmị ile idibo Ebraham nẹdi ẹ gu ogẹn Ebraham nẹdi ẹ gi rị ndụn.

¹⁶ Abimẹlẹkị nọ nwan sị Aziki, “Gha alị ẹnyi pụ, nị y'a karịkazị ẹnyi.”

¹⁷ Ya Aziki nọ gha alị ahụn pụ, ọ nọ tumẹ ọdụ a ye imẹ Ọdanmgbugbu Gẹra, biri ebahụn.

¹⁸ Ya Aziki nọ nwan gwọ ọmị ndị ahụn wẹ gu ogẹn Ebraham nẹdi ẹ gi rị ndụn — makẹni ndị Filistia e te hukinchanrịngụọ wẹ kẹ Ebraham nwụnhụngụ. Aziki a gwọgụ ọmị ndị ahụn, ọ nọ kpọma wẹ ẹfan ndị nẹdi ẹ a kpọ wẹ k'ọ rị ndụn.

¹⁹ Ogẹn idibo Aziki gi gumẹ ọmị imẹ ọdanmgbugbu ebahụn, gupu mirin,

²⁰ ndị Gẹra e du anụ nọ du ndị e duni Aziki anụ kpemẹ, a sị, “Mirinni wụ nke ẹnyi.” Ya Aziki nị kpọ ẹfan ọmị ahụn “Ẹsẹkị (Ikpe)”, makẹni wẹ du ẹ zụọ a.

²¹ E guzi wẹ ọmị ọzọ; wẹ nọ duzi wẹ zụọma a. Ọ nọ kpọ hụnnị “Sit'na (Iwe)”.

²² Ọ nọ gha ebahụn kwarị. O guzi ọmị, kanị eduzini wẹ ẹ nwan zụọ hụnnị; ọ nọ nwan kpọ a “Rẹhobọtụ”, ya ọ nị sị, “Echẹn kẹ Osolobuẹ mẹ wẹ yeni ẹnyi efe; ebeni kẹ ẹnyi a nọ ban ihiẹn.”

²³ Ọ nọ gha ebahụn pụ, shi Biẹshẹba.

²⁴ Uhinhin ahụn daị, Osolobuẹ nọ bịa d'e kunrun ẹ, sị a, “Mmẹ wụ Chuku Ebraham nẹdi i; atụlẹ egun, nị mmẹ lẹ yụ wị; m jẹnkọ d'a gọzi i, mẹ ụmụ ị barahị — m jẹnkọ d'e mẹ ihiẹn ndịnị makẹ ufiri odibo m wụ Ebraham.”

²⁵ Ya ọ nọ rụn ukpo nchụn ẹjan ebahụn, nọ ebẹhụ kpọku ẹfan Osolobuẹ, fe ẹ; ọ nọ biri ebẹhụ; omẹgụ, idibo ẹ nọ gu ọmị ye ebahụn.

²⁶ Ọ nọbe, Abimẹlẹkị nọ gha Gẹra jẹn d'a hụn Aziki. Abimẹlẹkị lẹ ọka-iroro ẹ wụ Ahuzatị lẹzi Fikọlụ hụn a kịn'a ndị-agha wị.

²⁷ Ya Aziki nọ sị wẹ, “Kị ụnụ chọhanị m, bụ ize m a bangụọ ụnụ, ụnụ nọ chụpụ m alị ụnụ?”

²⁸ Ya wẹ nọ sị, “O wegụọ ẹnyi ẹnya nị Osolobuẹ nọyeni i; ya ẹnyi nọ sị nị ẹnyi bịa nị ẹnyi lẹ yụ hụn ụzọ kuntarị iyi, ẹnyi e kwetarị ibe ẹnyi nkwa —

²⁹ n'o nwọnni ogẹn y'e gi chọ ẹnyi njọ — k'o dọn mẹni ẹnyi a hụatụnị ị ẹka, ẹnyi emẹni i ihiẹn ọwụlẹ karị ihiẹn rị mma; ogẹn ẹnyi gidẹ sị ị lama, onwọnni ihiẹn ẹnyi mẹ i. Osolobuẹ a gọzigụọ ị nwan.”

³⁰ Ya Aziki nọ shi ni wẹ ihiẹn-oriri pụ ichẹn, wẹ nọ ri, ra.

³¹ Eki e fọn, wẹ nọ zọtẹnhin, kuntarị ihiẹn wẹ kun. Aziki nọ du wẹ ụla; wẹ nọ gi udọn lẹ ndọnkwa la.

³² Ụhụọhịn ahụn daị, idibo Aziki nọ bịa d'a gwa Aziki oku ọmị wẹ gu, sị a, “Ẹnyi e gupuọlẹ mirin.”

³³ Ya ọ nọ kpọ ọmị ahụn “Shẹba”. Ya haịn wẹ gi a kpọ obodo ahụn “Biẹshẹba” d'e rukwọ tannị.

Obibi Aziki Lẹ Ikpụlọ A

³⁴ Ogẹn Isọ gi rị nwa ahụa ọgụnnaị, ọ nọ lụrụ Juditi, nwa onyẹ Hẹti w'a kpọ Biẹri, lụrụzị Basematị, nwa onyẹ Hẹti ọzọ w'a kpọ Ẹlọnụ —

³⁵ wẹ nọ bu ọkụn che Aziki lẹ Rebika obi.