Jẹnẹsisi 25 - Ika

Isi Nke Isẹn Kwasị Ọgụn Ndị-ọzọ Ebraham Mụ Lẹ Ọnwụn Ebraham

¹ Ebraham lụ nwunyẹ ọzọ; ẹfan a wụ Kẹtura.

² Kẹtura mụnị Ebraham Zimranị lẹ Jokshanị lẹ Mẹdanị lẹ Midianị lẹ Ish'bakị lẹzi Shụa.

³ Jokshanị wụ nẹdi Shẹba lẹ Dedanị. Dedanị wụ nẹdi ndị Ashuru lẹ ndị Letushu lẹzi ndị Lewum.

⁴ Ụmụ Midianị wụ Efa lẹ Ẹfẹ lẹ Hanọkụ lẹ Abida lẹzi Ẹl'daa. Uwẹ ile wụ ụmụ Kẹtura lẹ ụmụ-ụmụ a.

⁵ Aziki kẹ Ebraham latọchanrịnnị ukuu ẹ.

⁶ Kanị, nke ụmụ ndị mgba a, Ebraham yesọnmẹ wẹ ihiẹn ebe ọ rị ndụn, zipụsọnmẹ wẹ d'e biri alị ndị rị ibẹka ọwụwa-ẹnyanwụn, wẹ nọ yeni Aziki efe.

⁷ Ahụa mmisẹn kwasị ọgụn-ẹsatọ kẹ Ebraham tọ.

⁸ O mẹgụ, Ebraham nọ nwụnhụn ebe ọ kakpụkpọgụ ọhụnma-ọhụnma; wẹ nọ li ẹ, o buru ibe ẹ alị-mmọn.

⁹ Ya kẹ ụmụ a wụ Aziki lẹ Ishmẹlụ nọ li ẹ ye imẹ okporo ahụn rị ẹgbẹrẹ Mak'pẹla hụn rị ibẹka ọwụwa-ẹnyanwụn Mamre, imẹ alị ahụn te wụ nke Ẹfrọnụ nwa Zoha —

¹⁰ alị ahụn Ebraham ṅọnnarịn ndị Hẹti; ebahụn ke wẹ liye Ebraham — ebẹhụ o liye Sẹra nwunyẹ ẹ.

¹¹ Kẹ Ebraham nwụnhụngụ, Osolobuẹ gọzi Aziki nwa a. Biẹ-Lahaị-rọị kẹ Aziki bi.

Ebọn Ishmẹlụ

¹² Ndịnị wụ ebọn Ishmẹlụ nwa Ebraham, hụn Haga onyẹ Ijiptu nwata-iwe Sẹra mụyeni Ebraham.

¹³ Lee ẹfan ụmụ Ishmẹlụ lẹ usọnrọn wẹ gi mụ wẹ: nwa ibuzọ Ishmẹlụ wụ Nẹbayọtụ; ndị e sọnn'ẹ wụ Kẹda, Ad'bilu, Mibsam,

¹⁴ Mishma, Duma, Masa,

¹⁵ Hadadị, Tẹma, Jẹtọ, Nafishi lẹ Kẹdẹma.

¹⁶ Wẹ ile wụ ụmụ Ishmẹlụ, onyẹ-onyẹ lẹ ẹfan a, hụn wụzị ẹfan obodo lẹ ụmụ-alị ndị nke ẹ bi. Wẹ rị okẹn-ịhịan mmẹbụọ, onyẹ-onyẹ lẹ ebọn ẹ.

¹⁷ Ahụa mmẹsa kwasị ọgụn-isin kẹ Ishmẹlụ tọ O mẹgụ, Ishmẹlụ nọ nwụnhụn; wẹ nọ li ẹ, o buru ibe ẹ alị-mmọn.

¹⁸ Ụmụ Ishmẹlụ bichanrịn gha alị Havila d'e rukwọrị alị Shuru hụn bu ihun zinmẹ alị Ijiptu, ị ghashi ụzọ wẹ gha e jẹn Ashuru (Asiria). Ya lẹ umunẹ ẹ asụọnị.

Ebọn Aziki

¹⁹ Ndịnị wụ ụmụ Aziki, nwa Ebraham: Ebraham mụ Aziki;

²⁰ Aziki rị nwa ahụa ọgụnnaị k'ọ lụrụ Rebika nwa Bẹtuẹlụ onyẹ Aram, onyẹ Padan-Aram; nwẹnẹ Rebika okẹnnyẹ wụ Labanị, onyẹ Aram.

²¹ Aziki e mẹ ekpere, rịọ Osolobuẹ n'o yeni nwunyẹ ẹ ẹka, makẹni Rebika wụ agan; Osolobuẹ nọ ye ẹ ihiẹn ọ rịọ, Rebika nọ tụrụ imẹ.

²² Ụmụ rị Rebika ẹfọ hụ a zụọ ụzọ, e mẹhunmẹ ọda-ọda imẹ ẹfọ. Ya ọ nọ sị, “Omẹni ẹrịra k'ọ rị, kị haịn m gi tụrụ imẹ?!” Ọ nọ jẹnmẹ d'a jụ Osolobuẹ.

²³ Osolobuẹ nọ sị a, “Alị ẹbụọ rị ị ẹfọ; madụ ẹbụọ i jẹnkọ d'a mụ k'e kebe; ohu k'a ka ibe ẹ, onyẹ isi rịn'a k'a rị okpuru ejimẹ.”

²⁴ Ọmụmụ e ru ẹ, e lee ụmụ ejimẹ ẹfọ a ezioku-ezioku!

²⁵ Hụn bu ụzọ pụha hụ e nwun ufie-ufie; o mẹ ẹṅẹnrẹn-ẹṅẹnrẹn nọkẹ sị wẹ yimẹ ẹ ẹṅẹnrẹn, ya wẹ nọ gụn a “Isọ”.

²⁶ Omẹgụ, nwẹnẹ ẹ a pụha; o gi Isọ atụ-ụkụ azụụn k'ọ pụla! Ya wẹ nọ gụn a “Jekọpụ”. Aziki rị ahụa ọgụn ẹtọ kẹ Rebika mụn'a ụmụ ẹbụbụọnị.

Isọ Lẹ Jekọpụ

²⁷ Ogẹn ụmụ ikẹnnyẹ ẹbụbụọnị gi hipụha, Isọ nọ wụrụ ọchụ-nta, ọfịa k'ọ ka a nọ; kanị Jekọpụ wụ ọmẹhẹn, ụlọ-ụlọ k'ọ nọdị.

²⁸ Ihiẹn Isọ a sụọ Aziki nẹdi wẹ — makẹni anụ-ọfịa Isọ e gbuhẹ a sụọ Aziki ọda-ọda; kanị ihiẹn Jekọpụ sụọ Rebika nnẹ wẹ.

²⁹ Ụhụọhịn ohu, ebe Jekọpụ nọ e shi ẹgwa, Isọ nọ gha ọfịa lụapụha, ẹgụn e d'e gbu ẹ;

³⁰ Isọ nọ sị Jekọpụ, “Dodo, yebeye m ẹgwa ahụn rị e nwun ufie-ufie ri, nị ẹgụn e d'e gbu m!” (Ya kẹ wẹ gi kpọ Isọ “Ẹdọm” hụn wụ “Ufie.”)

³¹ Ya Jekọpụ nọ sị a, “Reyegụ m ọkwa nwa-ibuzọ.”

³² Ya Isọ nọ sị a, “Ẹgụn e d'e gbu m ma! Elee erere kẹ ọkwa nwa-ibuzọ bannị m?”

³³ Kanị Jekọpụ sị a, “Kungụnị m Osolobuẹ.” Ya kẹ Isọ wụ nwa-ibuzọ nọ kunni Jekọpụ Osolobuẹ gi re ọkwa nwa-ibuzọ ye ẹ.

³⁴ Ya Jekọpụ nọ nwan ye Isọ brẹdi lẹ ẹgwa ri. Isọ nọ ri, ra, lihi ọtọ, jẹnmẹ mkpa a. Ẹrịra kẹ Isọ hụn wụ nwa ibuzọ dọn lelịa ọkwa nwa-ibuzọ ọ wụ.