Jẹnẹsisi 23 - Ika

Isi Ẹtọ Kwasị Ọgụn Ọnwụn Sẹra Lẹ Olili Ẹ

¹ Ahụa ẹsa kwasị-ọgụn-isin kẹ Sẹra tọ.

² Ya Sẹra nọ nwụntọ alị Kiriatị-Aba (hụn wụ alị Hibrọnụ) hụn rị imẹ alị Kenaanị. Ya Ebraham nọ banye ebe ozun Sẹra rị d'a kwan a, kwan ezigbo ẹkwan.

³ O mẹgụ Ebraham nọ gha ebẹhụ ozun nwunyẹ ẹ rị lihi ọtọ; ọ nọ buru ndị Hẹti o bi alị wẹ, sị wẹ,

⁴ “M wụ otumunyẹ imẹ igunrun ụnụ; m bihụ ebeni e bi; dodo ni, ye ni m ebe m'e liye ozun, nị m li onyẹ nwụnnahịnnị m.”

⁵ Ya ndị Hẹti nọ sị Ebraham,

⁶ “Diọkpa, dodo gọn ntịn: okẹn-ịhịan Osolobuẹ kẹ ị wụ imẹ ẹnyi; họrị nwan ili kachanrịn mma imẹ ili-okporo ndịnị ile ẹnyi gutọ, n'i liye onyẹ nwụnnahịnnị ị; imẹ ẹnyi ile, onwọnni onyẹ k'a jụ n'o yekọ ị ili ọwụlẹ ị k'a họrị n'i liye onyẹ nwụnnahịnnị ị.”

⁷ Ya Ebraham nọ lihi ọtọ, hulụa isi, kele ndị Hẹti, ndị alị ahụn;

⁸ ọ nọ sị wẹ, “O mẹ nwan n'ọ hụ ụnụ mma nị m li onyẹ nwụnnahịnnị m, dodo ni, du ni m nwan rịọ Ẹfrọnụ nwa Zoha

⁹ n'o reye m okporo ẹ hụn rị ẹgbẹrẹ Mak'pẹla; ụsụọ ugbo ẹ k'ọ rị. Ya reye m'ẹ ọnụ-egho ẹ, idẹnya ụnụ, nị m'e liye ozun ebẹhụ.”

¹⁰ Ẹfrọnụ nọdị alị imẹ igunrun ndị Hẹti ibe ẹ ebahụn. Ọ nọ nọ ebẹhụ shịarị Ebraham, idẹnya ndị Hẹti lẹ ndị ile rị ebẹhụ ịhịan ile n'e zu ọnụ-mgbọn obodo Ẹfrọnụ, sị a,

¹¹ “Diọkpa, nsọngbu arị; lee ẹ, m rị e ye i alị ahụn; m rị e yezikwọ ị okporo rịn'a; m rị e ye y'ẹ idẹnya ndị nke m; d'e liye onyẹ nwụnnahịnnị ị.”

¹² Ya Ebraham nọ hulụa isi, kelezi ndị alị ahụn.

¹³ Ya ọ nọ nọ idẹnya ndị alị ahụn sị Ẹfrọnụ, “Nsọngbu arịa; gọn m ntịn: omẹni ọ sụọghọ ị, nị m kụ nwan ụgwọ alị ahụn. Ẹghẹẹ, narịn m'a, nị m hụn ụzọ li onyẹ nwụnnahịnnị m.”

¹⁴ Ya Ẹfrọnụ nọ sị Ebraham,

¹⁵ “Diọkpa, nsọngbu arịa, kaka; mmẹ lẹ yụ wụzị onyẹ ọzọ? Alị karịlẹni akpụrụ egho siliva nnụ! D'e li onyẹ nwụnnahịnnị ị.”

¹⁶ Ya Ebraham nị kweyeni Ẹfrọnụ, kụ Ẹfrọnụ ọnụ-egho ahụn Ẹfrọnụ nọ idẹnya ndị Hẹti kpọ ẹfan, hụn wụ akpụrụ egho siliva nnụ; ihiẹn ndị-afịa gi a ma egho ogẹn ahụn k'o gi maye ẹ ya.

¹⁷ Ẹrịra kẹ alị Ẹfrọnụ, hụn rị ẹgbẹrẹ Mak'pẹla ibẹka ọwụwa-ẹnyanwụn Mamre lẹ ihiẹn ile rịn'a, kẹ alị lẹ enwẹn ẹ kẹ okporo rịn'a kẹ osisi ile rịn'a, dọn ban

¹⁸ ẹka Ebraham idẹnya ndị Hẹti, idẹnya ndị ile rị ebẹhụ wẹ n'e zu ọnụ-mgbọn obodo Ẹfrọnụ wẹ.

¹⁹ O mẹgụ, Ebraham nọ li Sẹra nwunyẹ ẹ ye imẹ okporo ahụn rị ẹgbẹrẹ Mak'pẹla, hụn bu ihun zinmẹ Mamre wụ Hibrọnụ, imẹ alị Kenaanị.

²⁰ Kẹ alị ahụn kẹ okporo ahụn rịn'a nọ ban ẹka Ebraham; Ebraham nọ gi ẹ họnrin ebe w'e liye ndị ebọn ẹ.