Jẹnẹsisi 22 - Ika

Isi Nke Ẹbụọ Kwasị Ọgụn Osolobuẹ Sị Ebraham Gi Nwa A Chụn Ẹjan

¹ Ihiẹn ndịnị e mẹgụ, Chuku nọ lele Ebraham: ọ hị a, “Ebraham!” Ebraham nọ sị a, “Lee m ebeni.”

² Osolobuẹ a sị a, “Weri nwa ị, akpụ nwa ohu ahụn ị mụ, hụn ihiẹn ẹ a sụọ ị ọda-ọda, y'e shi alị Moria, n'i gi ẹ chụnnị m ẹjan w'a dụn ọkụn elu ugu m k'a ghọsị ị ebẹhụ.”

³ Ya Ebraham nọ zọtẹnhin, kwademẹ jaki ẹ; ọ nọ weri madụ ẹbụọ imẹ ndị idibo ẹ, werizi Aziki nwa a; ọ nọ begiri nkụn wẹ k'e gi chụn ẹjan; ya wẹ nọ jẹnmẹ ebahụn teni hụn Chuku ghọsị a.

⁴ Hụn mẹ ẹ akpọhịn ẹtọ Ebraham buli ijẹn ahụn, ọ nọ weli ẹnya elu, lecheni ebahụn.

⁵ Ya kẹ Ebraham nọ sị ikorọbịa ahụn ya lẹ wẹ wị, “Ụnụ lẹ jaki nọdị ebeni, nị mmẹ lẹ nwatanị shi ibẹka hụ; ẹnyi fegụ ofufe, ẹnyi e kinhẹn azụụn d'e kunrunzi ụnụ.”

⁶ Ya Ebraham nọ bu nkụn wẹ jẹnkọ d'e gi chụn ẹjan buye Aziki nwa a, ya lẹ enwẹn ẹ nọ weri ọkụn lẹ ẹbeke; ya lẹ Aziki nọ wịrị jẹnmẹ.

⁷ Aziki a hị nẹdi ẹ oku, sị, “Baba-ee!” Ya ọ nọ sị a, “Ee, nwa m!” Aziki nọ sị a, “Baba, ẹnyi bu ọkụn lẹ nkụn. Elebe atụnrụn ẹnyi e gi chụn ẹjan w'a dụn ọkụn rị?”

⁸ Ya Ebraham nọ sị a, “Nwa m, Chuku k'e gi ẹka a wepụha atụnrụn ahụn wẹ k'e gi chụnyen'ẹ ẹjan w'a dụn ọkụn.” Ya wẹ nọ jẹnsọnmẹ.

⁹ E ru wẹ ebahụn Chuku gwa Ebraham, ya Ebraham nọ rụn ukpo nchụn-ẹjan, kpashimẹ ọkụn elu ukpo ahụn. Ọ nọ kẹnmẹ Aziki nwa a, bu ẹ che elu nkụn ahụn o gi kpashimẹ ọkụn elu ukpo ahụn.

¹⁰ Ya Ebraham nọ tịnpụ ẹka, weri ẹbeke, n'o gi gbu nwa a.

¹¹ Ya kẹ mmọn-ozi Osolobuẹ nọ gha elu-igwee hị a, “Ebraham! Ebraham!!” Ya Ebraham nọ za, “Elee m ebeni!”

¹² Ọ nọ sị Ebraham, “Emẹtụkwọlẹ nwa-ndu ahụn ẹka; emẹkwọl'a ihiẹn ọwụlẹ. Echẹn kẹ m marịn nị y'a tụ egun Chuku — ebe o mẹ ni y'a jụnị nị y'e yekọ m nwa ị, akpụ nwa ohu i nwọn.”

¹³ Ya Ebraham nọ weshi isi elu, ọ nọ hụn ebulu mpịn a fatọ akụ-ọfịa rị ebẹhụ. Ọ nọ jẹn d'e buru ẹ, gi ẹ chụnyeni Osolobuẹ ẹjan wẹ dụn ọkụn hụn o te k'e gi nwa a chụn.

¹⁴ Ya Ebraham nọ kpọ ẹfan ebahụn “Osolobuẹ K'e Wẹhẹ.” Ya haịn wẹ gi e ku ẹ d'e ru tanị nị “Wẹ ru elu ugu Osolobuẹ, o wẹhẹ.”

¹⁵ Mmọn ozi Osolobuẹ nọ gha elu igwee hị Ebraham oku nke mgbe ẹbụọ,

¹⁶ sị Ebraham, “Mmẹ wụ Osolobuẹ e kungụọ enwẹn m, nị, ufiri ihiẹnni i mẹ, ufiri nị y'a jụnị nị y'e yekọ m nwa ị, akpụ nwa ohu i nwọn,

¹⁷ m k'a gọzi i ọhụnma-ọhụnma, mẹ ụmụ ị bu ọda nọkẹ kokisẹ rị elu-igwere lẹ ẹjan rị mkpẹnrẹn ohimin; ụmụ ị k'e mẹri ndị-iṅẹnrẹn wẹ, kị wẹ;

¹⁸ ẹka ụmụ ị kẹ alị ile rị elu-ụwa k'a gha nwọnrin ngọzi wẹ; o k'a rị ẹrịra makẹni y'e mẹọlẹ ihiẹn m ku.”

¹⁹ Ya Ebraham nọ kinhẹn azụụn d'e kunrun ikorọbịa ya lẹ wẹ wị, wẹ ile nọ lashi Biẹshẹba. Ya Ebraham nọ bibie Biẹshẹba.

Ebọn Rebika

²⁰ Ogẹn ihiẹn ndịnị gi mẹgụ, ọ nọbe, ozi nọ bịanị Ebraham, sị, “Mil'ka a mụgụọnị Nahọ nwẹnẹ i ụmụ.”

²¹ Nwa ibuzọ a wụ Uzu; ẹfan nwẹnẹ Uzu wụ Buzu; ọzọ wụ Kẹmuẹlụ hụn wụ nẹdi ndị Aram;

²² ndị ọzọ wụ Kẹsẹdi, Hazọ, Pidashị, Jid'lafụ lẹ Bẹtuẹlụ.

²³ (Bẹtuẹlụ wụ nẹdi Rebika.) Madụ ẹsatọnị kẹ Mil'ka mụnị Nahọ nwẹnẹ Ebraham.

²⁴ Mgba Nahọ w'a kpọ Rẹwuma mụyezikwọnị Nahọ ụmụ ẹnọ. Ẹfan wẹ wụ Tẹba, Gaham, Tahashi lẹ Maaka.