Jẹnẹsisi 21 - Ika

Isi Nke Ohu Kwasị Ọgụn Ọmụmụ Aziki

¹ Osolobuẹ bịa d'a tụnị Sẹra ụya k'o dọn ku, ọ nọ mẹni Sẹra ihiẹn o kwe ẹ nkwa.

² Sẹra nọ tụrụ imẹ, mụnị Ebraham okẹnnyẹ ebe Ebraham kagụ ẹgẹdi. Ogẹn Chuku gwa Ebraham kẹ wẹ gi mụ a.

³ Ebraham nọ gụn nwata okẹnnyẹ ahụn Sẹra mụn'a “Aziki”.

⁴ Ebraham nọ kwa Aziki ugun ogẹn Aziki gi zu akpọhịn ẹsatọ nọkẹ kẹ Osolobuẹ dọn gwa a.

⁵ Ahụa ọgụn-isẹn kẹ Ebraham rị kẹ wẹ mụ Aziki nwa a.

⁶ Ya Sẹra nọ sị, “Osolobuẹ e mẹgụọ m mụ ẹmụ; onyẹ ọwụlẹ nụ ihiẹnni k'e sọn m mụ ẹmụ!”

⁷ Ọ nọ sị, “Onyẹ te k'a sị Ebraham nị Sẹra k'a pa nwa ẹfọ a? Kanị, a mụgụọnị m'a okẹnnyẹ ebe ọ kagụ ẹgẹdi!”

⁸ Nwata ahụn nọ sue, a ha w'a ẹran. Ebraham nọ kpọ oriri hi-ogbe ụhụọkịn ahụn wẹ ha a ẹran.

⁹ Kanị Sẹra a hụn nwa ahụn Haga onyẹ Ijiptu mụyeni Ebraham k'ọ rị a mụ ẹmụ.

¹⁰ Ọ nọ sị Ebraham, “Chụpụ okpoho-igbọn lẹ nwa a, makẹni nwanị igbọnni mụ esọnkọ Aziki nwa m keri ukuu.”

¹¹ Okuni nọ gbu Ebraham ẹhụ makẹni nwa a kẹ wẹ rị e ku oku ẹ.

¹² Kanị, Osolobuẹ nọ sị Ebraham, “Anịlẹ oku nwata ahụn lẹ igbọn i okpoho gbu i ẹhụ; gi ihiẹn ile Sẹra rị e ku dọn, makẹni ẹka Aziki kẹ i k'a gha nwọnhẹn ụmụ wẹ k'a kpọ nke i.

¹³ O mẹ nke nwa igbọnni, m k'e mẹzikwọ a wụrụ okẹn alị makẹni nwa ị k'ọ wụ.”

¹⁴ Ya Ebraham nọ zọtẹnhin, buru ihiẹn-oriri lẹ ẹkpoko mirin, bu wẹ ye Haga. O bu wẹ che Haga isi uvun; ọ nọ sị ya lẹ nwa a pụ. Ya Haga nọ gha iwe Ebraham pụ, wahunmẹmẹ imẹ atụ Biẹshẹba.

¹⁵ Ogẹn mirin rị ẹkpoko wẹ gi gụ; ọ nọ la nwa-ndu ahụn tọ igungun rị akụ-ọfịa ebẹhụ.

¹⁶ Ya nwẹn nọ pụ ebẹhụ, shi ebe tekarị ebe ụta e ru d'a nọdị alị, ọ sị enwẹn ẹ, “Asa m ẹka e lee nwatanị ọ hụ a nwụn.” Ọ nọ gha ebẹhụ ọ rị azụụn hụn ẹbọ kwanshi ẹkwan elu.

¹⁷ Chuku nọ nụ olu nwa-ndu ahụn ebe ọ rị a kwan ẹkwan; ya mmọn-ozi Osolobuẹ nọ gha elu-igwee hị Haga oku, sị a, “Haga, k'ị rị a kwannị? Atụlẹ egun, makẹni Osolobuẹ a nụọlẹ olu nwata ahụn ebẹhụ ọ rị.

¹⁸ Ozigbo, jẹnmẹ d'a parị nwata ahụn, y'e kwọndọn ẹ ọhụnma, makẹni m k'e mẹ ẹ wụrụ okẹn alị.”

¹⁹ Ya Osolobuẹ nọ shịapụ a ẹnya, ọ nọ legha ọmị mirin rị; ya ọ nọ jẹnmẹ d'a gbajun ẹkpoko wẹ, ye nwa-ndu ahụn mirin ra.

²⁰ Chuku nọyeni nwata ahụn anọyeni, ọ nọ sue. Imẹ atụ k'o bi; o mẹgụ, ọ nọ họnrin ọka ịgba-ụta.

²¹ Atụ o bi wụ atụ Paranị; nnẹ ẹ wụ onyẹ Ijiptu nọ lụye ẹ onyẹ Ijiptu.

Egun Ebraham A Tụma Ndị Alị Abimẹlẹkị

²² Ogẹn ahụn, Abimẹlẹkị lẹ Fikọlụ hụn a kịn'a ndị-agha nọ sị Ebraham, “Osolobuẹ nọyeni i anọyeni imẹ ihiẹn ile y'e mẹ;

²³ m chọ nwan n'i kunni m ẹfan Chuku nị y'e gikọ ẹkanaị sọn ẹnyi, kẹ mmẹ kẹ ụmụ m kẹ ụmụ-ụmụ m ile rị ihun, kama, n'ị k'e gizi ẹka ahụn rị mma m gi sọn i sọn mmẹ lẹ alịnị ị bịa d'e biri.”

²⁴ Ebraham nọ sị, “Ma Chuku, egikọ m ẹkanaị sọn ụnụ.”

²⁵ Ya Ebraham nọ gwaghọsị Abimẹlẹkị oku ọmị idibo Abimẹlẹkị narịn a.

²⁶ Abimẹlẹkị nọ sị a, “Amarịn m onyẹ mẹ ihiẹnni; y'a gwanị m; m rịhụ a nụ a tannị”

²⁷ Ya Ebraham nọ we efin lẹ atụnrụn ye Abimẹlẹkị; wẹ ẹbụbụọ nọ kwetarị nkwa.

²⁸ Ya Ebraham nọ họpụha onyẹnyẹ-atụnrụn ẹsa imẹ igunrun atụnrụn a.

²⁹ Abimẹlẹkị nọ sị a, “K'i wepụhanị onyẹnyẹ-atụnrụn ẹsanị?”

³⁰ Ya Ebraham nọ sị a, “Narịn m onyẹnyẹ-atụnrụn ndịnị, n'ị hụn ụzọ pụhanị m ọshẹri nị mmẹ gu ọmịnị.”

³¹ Ya haịn wẹ gi a kpọ ebẹhụ “Biẹshẹba”, makẹni ebahụn kẹ onyẹ-onyẹ nọ kunni ibe ẹ ihiẹn o fe.

³² Ogẹn wẹ gi kwetarịgụ nkwa imẹ Biẹshẹba ebẹhụ, Abimẹlẹkị lẹ Fikọlụ hụn a kịn'a ndị-agha nọ lakin alị wẹ, alị ndị Filistia.

³³ Ebraham nọ gbọ osisi Tamarisi ye Biẹshẹba, nọ ukun osisi ahụn ọ gbọma fe Osolobuẹ, Chuku Itẹbitẹ.

³⁴ Ebraham nọ bibie alị ndị Filistia.