Jẹnẹsisi 2 - Ika

Isi Nke Ẹbụọ

¹ Ẹrịra kẹ Osolobuẹ dọn kechanrịn elu-igwere lẹ elu-ụwa lẹ ihiẹn ile rị imẹ wẹ.

Nke Akpọhịn Ẹsa Ụhụọhịn Osolobuẹ Zu Ikẹn

² Nke akpọhịn ẹsa, makẹni Chuku a rụngụọ ọrụn a, ọ nọ zu ikẹn ọrụn ile ọ rụn.

³ Ya kẹ Chuku nọ gọzi ụhụọhịn nke ẹsa, dọn ẹ nsọ, makẹni ụhụọhịn hụ kẹ Chuku zu ikẹn ọrụn okike ile ọ rụn.

Kẹ Chuku Dọn Ke Adam Lẹ Ivu

⁴ Ọnwan wụ ihiẹn mẹ ogẹn Osolobuẹ wụ Chuku gi ke elu-igwere lẹ elu-ụwa: Ogẹn Osolobuẹ gi kegụ alị lẹ igwere,

⁵ ihiẹn eke pu alị, kẹ ẹfịfịa rị ọfịa kẹ ihiẹn ọnụ e ri, makẹni Osolobuẹ wụ Chuku eke mẹ mirin zueye alị; o ke nwọnzikwọ onyẹ k'a rụn a ugbo.

⁶ Imẹ alị kẹ mirin a gha a pụha, e ru akpakalị ile.

⁷ Ya kẹ Osolobuẹ wụ Chuku nọ gi ẹjan rị alị kpụ ịhịan, ọ nị kwọn uzun wẹ gi a rị ndụn ye ẹ imi, ịhịan nọ wụrụ onyẹ rị ndụn.

⁸ Ya kẹ Osolobuẹ wụ Chuku nọ rụntọ ugbo imẹ alị Idẹni hụn rị ibẹka ọwụwa-ẹnyanwụn ụwa. Ọ nọ bu ịhịan ahụn o mẹmẹ che ebẹhụ.

⁹ Osolobuẹ wụ Chuku nọ mẹ ụdị osisi ile rị mma ẹnya lẹ ndị rị mma w'e ri gha alị suepụha — kẹ osisi ahụn e ye ndụn hụn rị etintinnaị ugbo ahụn kẹ osisi ahụn wẹ gi a marịn ihiẹn rị mma lẹ ihiẹn rịlẹni mma.

¹⁰ Iyi ohu gha alị ahụn wụ Idẹni e hupụha, e ye ugbo ahụn mirin. Iyi hụ nọ ebẹhụ wa ẹbụ ẹnọ, họnrin iyi ẹnọ ndịnị:

¹¹ ẹfan iyi ibuzọ wụ Pishọnụ. Ịya wụ hụn e hu ngịrịgọ-ngịrịgọ e hugbarị alị Havila, alị ahụn goru rị.

¹² Goru rị ebẹhụ wụ ezigbo goru; bẹdẹlium wẹ gi mirin ẹ e mẹmẹ sẹnti e sue ebẹhụ; ọmụma pụ-ichẹn wụ ọnik'si rịzị ebẹhụ.

¹³ Ẹfan iyi nke ẹbụọ wụ Gihọnụ. Ịya wụ hụn wịrịnị, hụn fetuchanrịn alị Ẹtiopịa.

¹⁴ Ẹfan iyi nke ẹtọ wụ Tigrisi. Ịya wụ hụn e hugha ibẹka ọwụwa-ẹnyanwụn alị Ashuru rị Asiria. Iyi nke ẹnọ wụ Yufretisi.

¹⁵ Osolobuẹ wụ Chuku nọ bu okẹnnyẹ ahụn che imẹ ugbo ahụn rị alị Idẹni, kẹni ọ hụn ụzọ a rụn a, e lepụ a ẹnya.

¹⁶ Osolobuẹ wụ Chuku nọ ye okẹnnyẹ ahụn iwu, sị, “Mkpụrụ-osisi ọwụlẹ rị imẹ ugboni ị chọ n'i ri, y'a ghọrị, ri;

¹⁷ ka amakwọlẹ ama ri mkpụrụ osisi ahụn wẹ gi a marịn ihiẹn rị mma lẹ ihiẹn rịlẹni mma. Makẹni, ụhụọhịn i ri ẹ kẹ y'a nwụnhụn.”

¹⁸ Osolobuẹ wụ Chuku nọ sị, “Ọ rịnị mma nị Adam sụsụọ biri. M k'e mẹmẹn'ẹ onyẹ eyemẹka furun'ẹ.”

¹⁹ Osolobuẹ wụ Chuku gha akpakalị mẹmẹ anụ ile rị imẹ ụwa lẹ nnụnụ ile e fe elu. Ọ nọ wẹhẹ wẹ ebe Adam rị, n'ọ hụn ihiẹn Adam jẹnkọ d'a gụn wẹ. Ihiẹn Adam kpọ ihiẹn ọwụlẹ rị ndụn, ịya wụ ẹfan a.

²⁰ Ya kẹ Adam nọ gụn anụ-ụlọ ile lẹ nnụnụ ile e fe elu lẹ anụ-ọfịa ile ẹfan, kanị onwọnni hụn Adam hụn furu k'e yen'ẹ ẹka.

²¹ Ya kẹ Osolobuẹ wụ Chuku nọ mẹ okẹn ụran buru Adam, Adam a ranhịn. Osolobuẹ nọ weri osẹn ohu ẹhụ Adam. O werigụọ a, ọ nọ gi uru ẹhụ kpumẹzi ebe ọ gha weri ẹ.

²² Ya kẹ Osolobuẹ wụ Chuku nọ gi osẹn ahụn o wepụha ẹhụ okẹnnyẹ mẹmẹ okpoho. Ọ nọ wẹhẹni okẹnnyẹ ahụn okpoho hụ.

²³ Ya kẹ Adam nọ sị, “Ẹhẹn! Ọnwan wụ uru-ẹhụ m lẹ ọkpụkpụ m! Wẹ k'a kpọ a ‘Okpoho’ makẹni ẹhụ Okẹnnyẹ kẹ wẹ gha wepụha a”.

²⁴ Ya haịn okẹnnyẹ gi a latọ nẹdi ẹ lẹ nnẹ ẹ, kwọnkẹnmẹ nwunyẹ ẹ, e họnrin wẹ ẹhụ ohu.

²⁵ Okẹnnyẹ ahụn lẹ nwunyẹ ẹ gba ọtọ, kanị ifẹnrẹn arị e mẹ wẹ.