Jẹnẹsisi 19 - Ika

Isi Nke Mmitenẹi Njọ Ndị Sodọm

¹ Ogẹn ẹnyasị kẹ ndị mmọn-ozi ẹbụọ ahụn gi ru Sodọm; Lọtụ nọdị alị ọnụ-mgbọn obodo ahụn — ebẹhụ wẹ nọ e zu. Ogẹn Lọtụ gi hụn wẹ, ọ nọ lihi ọtọ jẹnmẹ d'e kunrun wẹ; o hulụa, kele wẹ,

² sị wẹ, “Ndị di-nwọnni m, dodo ni, banhangụ nị iwe odibo ụnụ d'a ranhịn uhinhinni, ụnụ a chanbelụa ụkụ ụnụ; eki fọn ụnụ a zọ ụzọ jẹnmẹ ebe ụnụ jẹnkọ; eki fọn ụnụ a zọ ụzọ jẹnmẹ ebe ụnụ jẹnkọ.” Wẹ nọ sị a, “Mba, ẹnyi k'a ranhịn ogbe ebeni.”

³ Kanị, ọ rịọkẹnmẹ wẹ; wẹ nọ kweri sọnmẹ ẹ shi iwe ẹ. Ọ nọ mẹmẹni wẹ ihiẹn-oriri hi ogbe, mẹmẹdẹni wẹ brẹdi yisti rịlẹni ozigbo-ozigbo. Wẹ nọ ri.

⁴ Kanị, nị wẹ d'a ranhịn, ikẹnnyẹ ile rị Sodọm nọ fihunmẹ iwe Lọtụ, kẹ ikorọbịa kẹ ndị ẹgẹdi, onwọnni onyẹ pụn'a.

⁵ Wẹ nọ hịma Lọtụ, sị a, “Elebe kẹ ikẹnnyẹ ndị nẹi bịa ẹnyasịnị d'a hụn ị rị? Wepụha wẹ nị ẹnyi mẹ mgba wẹ.”

⁶ Lọtụ nọ pụha d'e kunrun ikẹnnyẹ ndị ahụn, gụnma enwẹn ẹ ye ezi;

⁷ sị wẹ, “Dodo ni umunẹ m, emẹlẹ ni ihiẹnni jọgbu enwẹn ẹ!

⁸ Lee ni ẹnya, m nwọn ịgbagba ẹbụọ hụn kelẹni marịn ikẹnnyẹ; dodo ni, nị m wepụhanị ụnụ wẹ, ụnụ e gi wẹ mẹ ihiẹn sụọnị ụnụ. Ka emẹlẹ ni ikẹnnyẹ ndịnị ihiẹn ọwụlẹ, makẹni ẹka m kẹ wẹ rị ebe o mẹni iwe m kẹ wẹ rị.”

⁹ Kanị, wẹ nọ sị, “Pụnị ẹnyi ụzọ! Ledẹ ni abịamabịa nwẹn k'ọ rị nwan a gwa ẹnyi ihiẹn ẹnyi k'e mẹ! Ẹnyi mẹ i ihiẹn ẹnyi k'e mẹ i kikẹnni, nke i a ka nke wẹ njọ!” Ya wẹ nọ numẹ Lọtụ ikẹn-ikẹn, kẹ ya kẹ ẹkwe, a chọ nị wẹ nukpọpụ a.

¹⁰ Kanị ikẹnnyẹ ẹbụọ ndị ahụn rị imẹ ụlọ nọ tịnpụha ẹka, dọ Lọtụ ye mmụlọ, gụnma ụzọ.

¹¹ Ya wẹ nọ mẹ ẹnya kpuchanrịn ikẹnnyẹ ndị ahụn ile rị ọnụmụzọ ishi, kẹ ndị uku kẹ ndị nta, amarịnzịnị wẹ ebe ọnụmụzọ ahụn rị.

Lọtụ A Hụn isi

¹² Ya kẹ ikẹnnyẹ ẹbụọ ahụn wụ ndị mmọn-ozi nọ sị Lọtụ, “O nwọnzi onyẹ ọzọ i nwọn imẹ obodoni? Rịkẹ ndị-ịgọ ị ikẹnnyẹ mọbụ ụmụ-ikẹnnyẹ mọbụ ụmụ-ikpoho mọbụ onyẹ ọwụlẹ i nwọn imẹ obodoni? Werichanrịn wẹ ile n'i gha alịnị pụ —

¹³ nị ẹnyi e d'e tikpọ alịnị, makẹni eje-ihiẹn rị a kpọ imẹ alịnị a karịọlẹ ẹka ebe Osolobuẹ rị! Osolobuẹ zi nwan ẹnyi d'e tikpọ a.”

¹⁴ Ya Lọtụ nọ jẹn d'e kunrun ndị-ịgọ a hụn badọn ụmụ a ikpoho, sị wẹ, “Ozigbo ni, gha nị alịnị gbapụ, makẹni Osolobuẹ e d'e tikpọ alịnị!” Kanị ndị ịgọ a weri ẹ nị egu k'ọ rị e gu.

¹⁵ Ogẹn eki gi fọn, ndị mmọn-ozi ahụn nọ hụhụma Lọtụ, a sị a, “Ozigbo, weri nwunyẹ i lẹ ụmụ ị ikpoho ẹbụọnị rị ebeni pụ; ụnụ apụnị, afụnfụn lalanị alịnị k'e bu ụnụ ri.”

¹⁶ Kanị Lọtụ hụ a lọkpụn; ya ikẹnnyẹ hụ nọ zu ẹka ye Lọtụ lẹ nwunyẹ ẹ lẹ mmụ a ikpoho ẹbụọ, dọkpụnpụ wẹ alị hụ, makẹni Osolobuẹ chọ n'o mẹni ẹ omikẹn;

¹⁷ E wepụhagụ wẹ wẹ imẹ obodo, mmọn-ozi ohu nọ sị wẹ, “Gbama nị ọsọ, makẹ isi ụnụ gha a tọ a! Elekwọlẹ ni ẹnya azụụn mọbụ kụsị ebe ọwụlẹ imẹ alị-aradannị! Ka gbashi ni elu òke, amamgbe isi ụnụ a tọ a!”

¹⁸ Lọtụ sị, “Mba nụ, Di-nwọnni m; dodo,

¹⁹ y'e mẹgụọnị odibo i ọhụnma; y'e mẹgụọnị m okẹn omikẹn ebe ị nọ zụọpụha ndụn m — kanị, asakọkwọ m ẹka gbashi elu òke ndị ahụn; egun rị a tụ m, amamgbe eje-ihiẹnni e kunrun m m gini d'e ru ebẹhụ, a nwụntọ m imẹ ẹ!

²⁰ Lee ẹ, alịnị mẹ ẹkẹrẹ rị ebeni hụghọ nsue w'a gbashi; hụnnị ashịanị nwan ẹfọ; nị m gbashi ẹ nwan, ẹlẹ alị mẹ ẹkẹrẹ rọ? Nị m gbashi ebẹhụ kẹni m hụn isi wanahịn!”

²¹ Ọ nọ sị Lọtụ, “Ọ hụghọ mma, m k'e mẹzin'i ọhụnmanị, etikpọkọ m obodo ahụn ị rị e ku oku ẹ.

²² Gbashi nwan ebẹhụ ozigbo-ozigbo, nị asa m ẹka mẹ ihiẹn ọwụlẹ d'e ru mgbe i rugụ alị ahụn.” Ịya haịn wẹ gi kpọ alị ahụn “Zụa.”

Kẹ Osolobuẹ Dọn Tikpọ Sodọm Lẹ Gomora

²³ Anwụn rị a wa kẹ Lọtụ ru Zụa;

²⁴ ya kẹ Osolobuẹ nọ gi ẹka a gha elu-igwee hu nsịn-ẹnyanwụn lẹ ọkụn kpu alị Sodọm lẹ alị Gomora nọkẹ mirin rị e zueni;

²⁵ tikpọpụ obodo ndị ahụn lẹ ẹgbẹrẹ hụ ile rị alị aradan hụ lẹ ndị ile bi imẹ obodo ndị ahụn lẹzi ihiẹn ile rị e sue alị.

²⁶ Kanị nwunyẹ Lọtụ hụn rị a azụụn nọ lee ẹnya azụụn, ọ nọ họnrin ọkpụrụkpụ nnu mawuruni.

²⁷ Eki e fọn, Ebraham nọ zọshi ebẹhụ ọ nọ turu Osolobuẹ ihun.

²⁸ Ọ nọ lee ẹnya azụụn ahụn Sodọm lẹ Gomora lẹ alị aradan ahụn ile rị, ọ nọ hụn kẹ alị ahụn ile rị a lọ ẹnwụnrụn nọkẹ ẹnwụnrụn ẹgboko wẹ yi ọkụn.

²⁹ Ẹrịra k'o gi mẹ ni ogẹn Osolobuẹ gi tikpọ obodo ndị ahụn rịsọnmẹ alị aradan Ọdanmgbugbu Jọdanị, ebẹhụ Lọtụ jẹn d'e biri, ọ nyanhan Ebraham, gi ufiri ẹ wepụ Lọtụ imẹ ndị wẹ tikpọ.

Ebe Ndị Mụabụ Lẹ Amọnụ Gha Pụha

³⁰ Omẹgụ, Lọtụ nọ gha Zụa pụ, shi elu òke, ya lẹ ụmụ a ikpoho ẹbụọ ahụn, makẹni egun a nịn'a nọdị Zụa; e ru wẹ ebẹhụ, wẹ nọ nwan biri imẹ okporo ugu.

³¹ Ọ nọbe, nwa ibuzọ a nọ sị hụn nta, “Nẹdi ẹnyi a kagụọ ẹgẹdi, bụ ikẹnnyẹ arịzị imẹ ụwa hụn k'e sọn ẹnyi ranhịn kẹ ịhịan ile rị imẹ ụwa e mẹ.

³² Bịa nwan nị ẹnyi mẹ nẹdi ẹnyi ra manya rakarị enwẹn ẹ, nị ẹnyi hụn ụzọ du ẹ ranhịn, kẹni ẹnyi gha ẹka nẹdi ẹnyi mụ ụmụ k'e bikin ugbẹ ẹnyi.”

³³ Ya wẹ nọ mẹ nẹdi wẹ rakarị enwẹn ẹ manya uhinhin ahụn. Nwa a hụn kanị nọ bu ụzọ banye, du nẹdi ẹ ranhịn. Nẹdi ẹ amarịn ogẹn o gi dinẹ, ọ marịn ogẹn o gi lihi.

³⁴ Eki e fọn, hụn kanị nị sị hụn nta, “Lee ẹ, mmẹ sọn nẹdi m ranhịn imẹ uhinhin ụnyanhụn; ẹnyasị tanị, nị ẹnyi mẹzi ẹ rakarị enwẹn ẹ manya, yụ nwẹn a banye d'e du ẹ ranhịnzị, kẹni ẹnyi gha ẹka nẹdi ẹnyi mụ ụmụ k'e bikin ugbẹ ẹnyi.”

³⁵ Wẹ nọzị nwan mẹ nẹdi wẹ rakarị enwẹn ẹ manya uhinhin ahụn; hụn nta nọ jẹn, du ẹ ranhịn; kanị nẹdi wẹ amarịn ogẹn o gi dinẹ, ọ marịn ogẹn o gi lihi.

³⁶ Ẹrịra kẹ mmụ Lọtụ ẹbụbụọ dọn tụrụnị nẹdi wẹ imẹ.

³⁷ Hụn ibuzọ nọ mụ okẹnnyẹ, gụn a “Mụabụ.” Mụabụ wụ nẹdi ndị w'a kpọ ndị Mụabụ tanị.

³⁸ Hụn nta nọ mụzịkwọ okẹnnyẹ, gụn a, “Bẹn-amị.” Bẹn-amị wụ nẹdi ndị w'a kpọ ndị Amọnụ tanị.