Jẹnẹsisi 18 - Ika

Isi Nke Mmẹsatọ Nwa Hụn Wẹ Kwe Ebraham Lẹ Sẹra Nkwa A

¹ Omẹgụ, Osolobuẹ nọ bịa d'e kunrun Ebraham ẹhụ okẹn-osisi Mamre efinaị ohu anwụn rị a mụ, ebe Ebraham nọdị alị ọnụmụzọ ụlọ hụ w'a kpụkpọrị o bi.

² Ebraham lee ẹnya, e lee ikẹnnyẹ ẹtọ wuzo ihun ẹ. Ogẹn o gi hụn wẹ, ọ nọ gha ọnụmụzọ iwe ẹ gbaburu wẹ, hulụa alị, kele wẹ.

³ Ọ nọ sị, “Di-nwọnni m, dodo, mẹ ọhụnma banhan; dodo aghafelẹ mmẹ odibo i.

⁴ Nị wẹ kuhẹni ụnụ mirin mẹ ẹkẹrẹ, nị ụnụ gi chanchan ụkụ ụnụ, ụnụ e zu ikẹn okpuru osisi ebeni.

⁵ Nị m wẹhẹni ụnụ ihiẹn-oriri ri, kẹni ndụn banzị ụnụ, ụnụ rigụ ụnụ kebe jẹnmẹ ebe ụnụ jẹnkọ, hụnnị ụnụ rụgụ nwan iwe m.” Ya wẹ nọ sị a, “Mẹ kẹ i dọn ku.”

⁶ Ya Ebraham nọ gbaban mmụlọ d'e kunrun Sẹra, sị a, “Ozigbo-ozigbo, marịn ọka-witi ahụn pụ-ichẹn wẹ gwe; gwọ a, n'i gi ẹ mẹmẹ brẹdi.”

⁷ Ọ nọzị gbashi ebe anụmanụ a rị; o weri nwa-efin ohu mẹ pọkọ-pọkọ, rị mma; ọ nọ we ẹ ye odibo ẹ ohu; odibo hụ nọzị jẹnmẹ d'e mẹmẹ anụ ahụn ozigbo.

⁸ Ya Ebraham nọ bupụhanị wẹ mirin-ẹran anụ kpụkpụrụnị lẹ hụn kpụkpụrụlẹni lẹzi anụ nwa-efin ahụn wẹ mẹmẹgụ; ọ nọ nwan turuyeni wẹ okpuru osisi ebẹhụ ebe wẹ rị e ri ihiẹn-oriri ahụn.

⁹ Wẹ nọ sị a, “Elebe kẹ Sẹra nwunyẹ i rị?” Ọ sị wẹ, “Ọ rị imẹ mmụlọ.”

¹⁰ Onyẹ ahụn nọ sị, “O ru mgbeni akan-ile, m k'e kinhẹn, Sẹra nwunyẹ i a mụ okẹnnyẹ.” Sẹra rị ọnụmụzọ ogẹn ahụn, e gọn ntịn.

¹¹ Ogẹn ahụn, Ebraham lẹ Sẹra a kaọlẹ ẹgẹdi ọhụnma-ọhụnma; Sẹra a ghafegụọ hụn a mụ nwa.

¹² Ya kẹ Sẹra nọ mụma ẹmụ imẹ obi ẹ, sị enwẹn ẹ, “Ebeni m kagụ ẹgẹdi, nna m a kagụ ẹgẹdi, nị m marịn ụsụọnị?”

¹³ Osolobuẹ nọ sị Ebraham, “Kị haịn Sẹra gi mụ ẹmụ, sị, ‘Nị m sa nwan ẹka mụ nwa hụnnị m kagụ ẹgẹdi?’

¹⁴ O nwọn ihiẹn karị Osolobuẹ ẹka omumẹ? O ru ogẹn ahụn m ku, m k'e kinhẹn, mgbeni akan-ile, Sẹra k'a mụ okẹnnyẹ.”

¹⁵ Kanị Sẹra a ghọrị, sị, “Amụnị m ẹmụ”, makẹni egun rị a tụ a. Ọ nọ sị a, “Y'a mụghọ ẹmụ.”

Ebraham A Rịọdọnni Ndị Sodọm

¹⁶ Ya kẹ ikẹnnyẹ ndị ahụn nọ buli, dọn ihun alị Sodọm. Ebraham nọ sọnmẹ wẹ, n'ọ hụn ụzọ duzụka wẹ.

¹⁷ Osolobuẹ nọ sị, “Nị m zuemẹni nwan Ebraham ihiẹn m chọ nị m mẹ?

¹⁸ Ezuemẹkọnị m'a ya, ebe o mẹ ni Ebraham k'a wụrụ okẹn alị nwọn ikẹn ọda-ọda lẹni alị ile rị elu-ụwa k'a gha ẹka a nwọnrin ngọzi.

¹⁹ Mba, ezuemẹkọnị m'a ya makẹni a họrịọlẹ m'a kẹni ọ hụn ụzọ gwa mmụ a lẹ ikpụlọ a ihiẹn wẹ jẹnkọ d'e mẹ, sị wẹ e sọn ụzọ Osolobuẹ ghahanị imẹ ezi-omumẹ lẹ imẹ ihiẹn furuni, kẹni Osolobuẹ mẹzuni Ebraham nkwa o kwe ẹ.”

²⁰ Ya Osolobuẹ nọ sị Ebraham, “Ihiẹn rị a kpọ imẹ Sodọm lẹ Gomora a karị; njọ wẹ rị e mẹ a karị ẹka!

²¹ M k'a kpọtu nwan nị m d'e lele kẹ ihiẹnni rị a kpọnị kẹ wẹ rị e mẹ ezioku-ezioku; omẹni ẹlẹ ezioku, a marịn m.”

²² Ya ikẹnnyẹ ẹbụọ họdụnị nọ gha ebahụn pụ, jẹnmẹ Sodọm. Kanị Ebraham nọ turu Osolobuẹ ihun.

²³ Ya Ebraham nọ nwan nọkunmẹkẹnmẹ Osolobuẹ, sị, “N'ị tikpọgbama ndị ezi-omumẹ lẹ ndị-njọ ezioku-ezioku?

²⁴ Omẹni madụ iri kwasị ọgụnnaị wụ ndị ezi-omumẹ imẹ obodo ahụn, n'ị tikpọzị obodo ahụn? Y'e gikọ ufiri ndị ezi-omumẹ iri kwasị ọgụnnaị ahụn rịn'a gbagharị obodo ahụn?

²⁵ Y'e mẹkọ ẹrịra! Onwọnni ogẹn y'e gi tikpọgbama ndị ezi-omumẹ lẹ ndị-njọ, nke wụnị ihiẹn mẹ ndị-njọ e mẹ ndị ezi-omumẹ. Onwọnni ogẹn yụ wụ Osolobuẹ e gi mẹ ẹ! Ọka-ikpe ụwa ile a hankọ eṅẹn rị mma?”

²⁶ Osolobuẹ nọ sị a, “M hụn ndị ezi-omumẹ iri kwasị ọgụnnaị imẹ obodo Sodọm, e gi m ufiri wẹ gbagharị obodo ahụn ile.”

²⁷ Ebraham nọzị sị, “Ebe o mẹni a gwamagụọ m Di-nwọnni-ẹnyi oku, mmẹ hụn wụhụ ẹjan lẹ ntụn, nị m kumẹ nwan.

²⁸ Omẹni madụ isẹn arị imẹ madụ iri kwasị ọgụnnaị ahụn, n'i gi ufiri madụ isẹn ahụn rịlẹn'a tikpọ obodo ahụn?” Osolobuẹ nọ sị, “M hụn ndị ezi-omumẹ isẹn kwasị ọgụnnaị ebẹhụ, etikpọkọ m'a.”

²⁹ Ya Ebraham nọzị sị Osolobuẹ, “O mẹ nwan nị ndị ezi-omumẹ rị ọgụnnaị?” Osolobuẹ nọ za, sị, “E gi m ufiri madụ ọgụnnaị ahụn, hatu ẹ.”

³⁰ Ebraham nọzị sị, “Dodo, ekpelẹ, nị m kuzi: o mẹ nwan nị wẹ rị ndị ezi-omumẹ iri kwasị ọgụn?” Osolobuẹ nọ sị, “M hụn ndị ezi-omumẹ iri kwasị ọgụn ebẹhụ, emẹkọ m'a.”

³¹ Ebraham nọzị sị Osolobuẹ, “Dodo, nị m kuzi nwan. O mẹ nwan nị ndị ezi-omumẹ ọgụn kẹ wẹ hụn?” Osolobuẹ nọ sị, “E gi m ufiri madụ ọgụn ahụn hatu ẹ.”

³² Ebraham nọ nwan sị Osolobuẹ, “Di-nwọnni ẹnyi ya dodo ekpelẹ, nị m kuzi mgbe ohuni sụọ. Omẹni ndị ezi-omumẹ iri kẹ wẹ hụn?” Osolobuẹ nọ sị, “E gi m ufiri madụ iri ahụn hatu ẹ.”

³³ Osolobuẹ a gwagụ Ebraham oku, ọ nọ jẹnmẹ ebe o jẹnkọ, Ebraham nọ lashi iwe ẹ.