Jẹnẹsisi 17 - Ika

Isi Nke Mmẹsa Ahịma Nkwerigbama Ahụn

¹ Ogẹn Ebram gi rị ahụa ohu arịa ọgụn-isẹn, Osolobuẹ nọzị we enwẹn ẹ ghọsị Ebram, sị a, “Mmẹ wụ Chuku Hụn nwọn ikẹn ile; bi kẹ m dọn chọ; emẹkwọlẹ ihiẹn wẹ e gi kọrịanị ị —

² kẹni m mẹmẹ nkwerigbama ẹgbata mmẹ lẹ yụ, mẹ i barahị.”

³ Ya kẹ Ebram nọ gbuni Chuku osekpu. Chuku nọ sị a,

⁴ “O mẹ nke m, ọnwan wụ nkwa m hụn rị ẹgbata mmẹ lẹ yụ: n'i jẹnkọ d'a wụ nẹdi alị bu ọda rị ichẹn-ichẹn.

⁵ Ẹfan ị awụkọzị ‘Ebram’ kanị ‘Ebraham’, makẹni e mẹgụọ m'ị wụrụ nẹdi alị bu ọda rị ichẹn-ichẹn.

⁶ M k'e mẹ i barahị; m k'e mẹ i wụrụ alị bu ọda; ndị-nze k'a gha imẹ i pụha.

⁷ M k'e tumẹ nkwanị m nkwe ẹgbata mmẹ lẹ yụ lẹ ụmụ ị, d'e rukwọrị agbọ wẹ ile rị ihun: nị m k'a wụrụ Chuku i, wụrụzịkwọ Chuku ụmụ ị.

⁸ M sikọ d'e ye yụ lẹ mmụ ị alịnị ị wụ nwan abịamabịa; ebe ile alị Kenaanị gha k'a wụrụ nke ụnụ jẹnrin ejẹn. Mmẹ k'a wụrụ Chuku ụmụ ị.”

⁹ Chuku nọzị sị Ebraham, “Nke i rịn'a wụ ọnwan: i k'e dọnmẹrịrị iwu m jẹnkọ d'e ti ẹgbata mmẹ lẹ ụnụ, kẹ ịyụ kẹ ụmụ ị sikọ d'e dọnmẹ ẹ d'e rukwọrị agbọ wẹ ile rị ihun.

¹⁰ Hụnnị wụ nwan iwu nkwerigbama ahụn, hụn yụ lẹ mmụ ị ndị rị ihun sikọ d'e dọnmẹni m: okẹnnyẹ ọwụlẹ rị imẹ igunrun ụnụ k'a kwarịrị ugun.

¹¹ Ụnụ k'a kwa ugun, bepụ ọnụnụ ẹhụ-okẹnnyẹ ụnụ; ya k'a wụrụ ahịma nkwerigbama hụn rị ẹgbata mmẹ lẹ ụnụ.

¹² Agbọ ụnụ ile lalanị, okẹnnyẹ ọwụlẹ rị imẹ igunrun ụnụ k'a kwarịrị ugun, o zugụ akpọhịn ẹsatọ wẹ mụ a — ọsụọn'a nị igbọn rọ, kẹ igbọn wẹ mụ iwe i kẹ hụn i gi egho ṅọnnarịn onyẹ alị ọzọ hụn wụlẹni ebọn i.

¹³ Ẹghẹẹ, kẹ igbọn wẹ nọ iwe i mụ kẹ igbọn i gi egho ṅọnrin k'a kwarịrị ugun. Ẹrịra kẹ ụnụ k'e bu ahịma nkwerigbama m ẹhụ ụnụ jẹnrin ejẹn.

¹⁴ Okẹnnyẹ ọwụlẹ wẹ kwalẹni ugun, wẹ bepụlẹni ọnụnụ ẹhụ-okẹnnyẹ ẹ, wẹ bepụ hụnyẹ imẹ ndị nke ẹ; o tikpọlẹ iwu-nkwerigbama m.”

¹⁵ Chuku nọzị sị Ebraham, “O mẹ nke Saraị nwunyẹ i, akpọzịl'a Saraị: ẹfan a k'a wụ Sẹra.

¹⁶ M k'a gọzi ẹ; m k'a gha ẹka a ye i okẹnnyẹ. Ẹghẹẹ, m k'a gọzi ẹ; alị ichẹn-ichẹn k'a gha ẹfọ a pụha; ndị-nze alị ichẹn-ichẹn k'a gha ẹfọ a pụha.”

¹⁷ Ebraham nọ tụha enwẹn ẹ ye alị, bu ihun kpumẹ alị, mụ ẹmụ, sị enwẹn ẹ, “Nị okẹnnyẹ rị nwa ahụa ọgụn-isẹn saẹka mụ nwa? Nị Sẹra hụn rị nwa ahụa iri kwasị ọgụn-ẹnọ saẹka mụ nwa?”

¹⁸ Ya Ebraham nọ sị Chuku, “Ishmẹlụ rịọlẹ ndụn y'e lepụ ẹnya, ọhụn e higụọ!”

¹⁹ Kanị Chuku nọ sị a, “Mba. Sẹra nwunyẹ i k'a mụn'ị okẹnnyẹ; ị k'a gụn a Aziki; m k'e tumẹ nkwerigbama m ẹgbata mmẹ lẹ ịya, nkwerigbama hụn k'e ru ụmụ a ẹka jẹnrin ejẹn.

²⁰ “Kanị, o mẹ nke Ishmẹlụ, a nụgụọ m ihiẹn i ku. M k'a gọzi ẹ, mẹ ẹ mụba, mụba ọhụnma-ọhụnma; ọ k'a mụ ndị-nze mmẹbụọ; m k'e gi ẹ họnrin okẹn alị.

²¹ Kanị, Aziki kẹ m k'e mẹni ihiẹnni rị nkwerigbama m, Aziki hụn Sẹra k'a mụn'ị mgbeni akan-ile.”

²² Chuku a gwachanrịngụ Ebraham oku ndịnị, ọ nọ la Ebraham tọ.

²³ Ụhụọhịn ahụn daị, Ebraham nọ weri nwa a wụ Ishmẹlụ lẹ igbọn ile wẹ mụ iwe ẹ lẹ ndị hụn o gi egho ṅọn lẹzi ikẹnnyẹ ile rị iwe ẹ, kwa wẹ ugun, bepụchanrịn wẹ ile ọnụnụ ẹhụ-okẹnnyẹ, kẹ Chuku dọn gwa a.

²⁴ Ebraham rị ahụa mmitenẹi kwasị ọgụn-ẹnọ k'ọ kwa ugun, bepụ ọnụnụ ẹhụ-okẹnnyẹ ẹ.

²⁵ Nwa a wụ Ishmẹlụ rị ahụa mmẹtọ k'ọ kwa ugun, e bepụ w'a ọnụnụ ẹhụ-okẹnnyẹ ẹ.

²⁶ Ụhụọhịn ahụn kẹ Ebraham lẹ nwa a wụ Ishmẹlụ kwa ugun;

²⁷ ikẹnnyẹ ile rị iwe Ebraham kwa ugun ụhụọhịn ahụn — kẹ igbọn ndị wẹ nọ iwe ẹ mụ kẹ igbọn ndị o gi egho ṅọnrin.