Jẹnẹsisi 16 - Ika

Isi Nke Mmisin Haga Hụn Sẹra Sị Mụdọnn'ẹ Nwa

¹ Saraị nwunyẹ Ebram amụnịnị Ebram nwa. Kanị Sẹra e nwọn nwagbọọ Ijiptu ohu wụ igbọn ẹ, hụn ẹfan a wụ Haga.

² Ya Saraị nọ sị Ebram, “Y'a hụngụọ a nị Osolobuẹ anịnị m mụ nwa; dodo, du igbọn m ranhịn, ikẹnkwọ a gha m ẹka a mụ ụmụ.” Ebram nọ kweri ihiẹn Saraị ku.

³ Ya kẹ nwunyẹ Ebram wụ Saraị nọ we igbọn ẹ wụ Haga onyẹ Ijiptu ye di ẹ wụ Ebram lụma. Hụn mẹ ẹ ahụa iri wẹ bịa alị Kenaanị kẹ ihiẹnni gi mẹ.

⁴ Ebram e sọn Haga ranhịn, Haga nọ tụrụ imẹ. Ogẹn Haga gi hụn n'ọ rị imẹ, ọ nọ lelịama di-nwọnn'ẹ wụ Saraị.

⁵ Ya kẹ Saraị nọ sị Ebram, “Yụ haịn m gi rị e ri ụyanị! Mmẹ we igbọn m ye i; ọ hụn a n'ọ tụrụ imẹ, ọ nọ lelịama m! Osolobuẹ ya hannị mmẹ lẹ yụ eṅẹn!!”

⁶ Ya Ebram nọ sị Saraị, “Ọ hụghọ mma, igbọn i rị ị ẹka, ihiẹn sụọn'ị y'e gi ẹ mẹ.” Ya Saraị nọ mẹjama Haga, ọ nọ gbapụnị Saraị.

⁷ O ru, mmọn-ozi Osolobuẹ nọ hụn Haga ebe ohu mirin nọ a mụpụha imẹ atụ, ebẹhụ mirin nọ a mụpụha ụzọ Shuru.

⁸ Mmọn-ozi ahụn nọ sị a, “Haga, igbọn Saraị, elebe k'i gha pụha ebeni? Elebe k'i jẹnkọ?” Haga nọ sị a, “M gbapụkọnị di-nwọnni m wụ Saraị.”

⁹ Mmọn-ozi Osolobuẹ nọ sị a, “Lakin iwe di-nwọnni i, y'e welụan'a isi alị.”

¹⁰ Mmọn-ozi Osolobuẹ ahụn nọ sịzị a, “M k'e mẹ ụmụ ị ba ụba, nkesịnị onwọnni onyẹ k'a sa ẹka gụn wẹ.”

¹¹ Mmọn-ozi Osolobuẹ nọ sịzị a, “Ị rị nwan imẹ; i sikọ d'a mụ okẹnnyẹ; ẹfan a k'a wụ ‘Ishmẹlụ’, makẹni Osolobuẹ a nụọlẹ ụya ị rị a kwan.

¹² O k'a gụn agụngụn jaki-ọfịa — a lụsọn onyẹ ọwụlẹ ọgụn, onyẹ ọwụlẹ hụ a lụsọn ẹ ọgụn; ya lẹ umunẹ ẹ ekwerigbamakọ.”

¹³ Ya Haga nọ kpọ Osolobuẹ hụn gwa a oku “Ẹl-rọị”, hụn wụ “Chuku hụn rị e leghanị”, makẹni ọ sị, “Mmẹ gidẹ nwan ẹnya m hụn Onyẹ-hụn-e-leghanị m ra?”

¹⁴ Ya haịn wẹ gi kpọ ebe ahụn mirin gha a mụpụha “Biẹ-Lahaị-rọị” hụn wụ “Ọmị Onyẹ hụn rị e leghanị.” Ẹgbata Kadẹshi lẹ Bẹrẹdi k'ọ rị.

¹⁵ Omẹgụ, Haga nọ mụnị Ebram okẹnnyẹ, Ebram nọ gụn a Ishmẹlụ.

¹⁶ Ebram rị ahụa isin kwasị ọgụn-ẹnọ ogẹn Haga gi mụn'a Ishmẹlụ.