Jẹnẹsisi 15 - Ika

Isi Nke Mmisẹn Nkwa Osolobuẹ Kwe Ebram

¹ Ihiẹn ndịnị e mẹgụ, Ebram nọ hụn ọhụn ebe Osolobuẹ nọ sị a, “Ebram, atụlẹ egun; mmẹ wụ akpaịn ị hụn e che i nche; m k'a kụ ị ụgwọ higbu enwẹn ẹ ogbe.”

² Kanị Ebram nọ sị, “Osolobuẹ nwọnni m, k'i k'e yedẹ m nwan — bụ amụnị m nwa? Ẹlẹ Ẹliẹza onyẹ alị Damaskọsụ jẹnkọ d'a kwarị ukuu m?”

³ Ebram nọzị sị, “Y'e yeni m nwa; igbọn rị iwe m, y'a k'a kwarị ukuu m.”

⁴ Kanị Osolobuẹ nọ sị Ebram, “Okẹnnyẹni akwakọ ukuu i! Nwa ẹfọ ị sikọ d'a kwa ukuu i.”

⁵ Ọ nọ wepụha Ebram ihun-ezi, sị a, “Lee ẹnya elu-igwere, n'ị hụn ụzọ gụn kokisẹ ndị rị elu omẹni n'ị sa ẹka gụn wẹ.” Ọ nọzị sị a, “Ẹrịra kẹ ụmụ ị k'e bu ọda.”

⁶ Ebram nọ kweri ihiẹn Osolobuẹ gwa a, Osolobuẹ nọ gi ẹ sị ọ wụ onyẹ ezi-omumẹ.

⁷ Osolobuẹ nọzị sị a, “Mmẹ wụ Osolobuẹ hụn gha Uru rị alị ndị Kal'di Babilọnụ wepụha ị kẹni m ye i alịnị weri.”

⁸ Kanị Ebram a sị a, “Euu Osolobuẹ nwọnni m, nanị m'e dọn marịn n'o sikọ d'a wụrụ nke m?”

⁹ Ya kẹ Osolobuẹ nọ sị a, “Wẹhẹni m efin ohu rị ahụa ẹtọ lẹ onyẹnnyẹ-ewu ohu rị ahụa ẹtọ lẹ ebulu ohu rị ahụa ẹtọ, lẹzi nduru ohu lẹ oluikuku ohu.”

¹⁰ Ebram nọ wẹhẹn'ẹ ihiẹn ndịnị ile, kpọwasọnmẹ wẹ ẹbụọ ahanmahan ẹbụọ ahanmahan, dọnmẹ azụụn ẹka-nni wẹ ile nkọ ohu, dọnmẹ azụụn ẹka-ekpẹn wẹ ile nkọ ohu; kanị, ọ kpọwanị nnụnụ ndị ahụn.

¹¹ Udele hụ a bịa nị wẹ ri anụ ndị ahụn, Ebram hụ a chụpụ wẹ.

¹² Ogẹn anwụn gi danma, okẹn ụran nọ buru Ebram; idẹnmizi, egun nọ tụma a ọda-ọda, ẹnya nọ gba a ishi kitikpọ.

¹³ Osolobuẹ nọ sị Ebram, “Ya we i ẹnya nị ụmụ ị sikọ d'e bi kẹ abịamabịa imẹ alị wụlẹni alị wẹ. Wẹ k'a wụ igbọn ebahụn; wẹ k'a bịangbu wẹ ọrọgbọ ahụa nnụ.

¹⁴ Kanị, m k'e ye ndị alị ahụn wẹ k'e fe afụnfụn. Omẹgụ a pụha wẹ, okẹn akụ-lẹ-ụba kẹ wẹ sikọ d'e gi pụha.

¹⁵ Yụ nwẹn, ị k'a ka ẹgẹdi ọhụnma-ọhụnma, nwụn ọnwụn-ẹhi, e li wẹ i.

¹⁶ O ru agbọ nke ẹnọ, a lụakinhẹn wẹ ebeni, makẹni njọ ndị Amọ, ndị alịnị, eke jun mkpu.”

¹⁷ Ogẹn anwụn gi dangụ, ọhịhị a gbagụ, idẹnmizi, ite ẹnwụnrụn rị a gha imẹ ẹ a lọpụha lẹ ọwaa rị e nwun ọkụn nọ ghafe ẹgbata ikpọn anụ ẹbụbụọ ndị ahụn.

¹⁸ Ụhụọhịn ahụn kẹ Osolobuẹ kwe Ebram nkwa, sị, “M rị e ye ụmụ ị alịnị, hụn gha iyi rị ebe alị Ijiptu ru d'e rukwọrị iyi uku wụ Yufretisi —

¹⁹ alị ndị Kẹni, ndị Kẹnizi, ndị Kad'mọnụ,

²⁰ ndị Hẹti, ndị Pẹrẹzi, ndị Rẹfa

²¹ ndị Amọ, ndị Kenaanị, ndị Gẹgashị lẹ ndị Jebusu.”