Jẹnẹsisi 13 - Ika

Isi Nke Mmẹtọ Ebram Lẹ Lọtụ E Kebe

¹ Ya Ebram nọ gha alị Ijiptu pụ, shi Nẹgẹvụ, ya lẹ nwunyẹ ẹ lẹ ihiẹn ile o nwọn, lẹzi Lọtụ nwa-nwẹnẹ ẹ.

² Ebram nwọn anụ-ụlọ lẹ siliva lẹ goru ọda-ọda.

³ Ọ nọ gha Nẹgẹvụ kwasọnmẹ d'e ru Bẹtẹlụ, kwaru ẹgbata Bẹtẹlụ lẹ Aị — ebahụn o tumẹ ọdụ a isi-ibuzọ,

⁴ ebahụn ọ rụnye ukpo nchụn-ẹjan ibuzọ ọ rụn; ya ọ nọ nwan nọ ebahụn kpọku ẹfan Osolobuẹ.

⁵ Lọtụ hụn rị e sọnhunmẹ Ebram nwọnzikwọ efin lẹ atụnrụn lẹ ewu lẹ ndị ọ kị lẹ ndị rị iwe wẹ.

⁶ Alị hụ wẹ bi e ezuzini wẹ ẹbụọ, makẹni ihiẹn wẹ nwọn e bukẹ ọda; asazịnị wẹ ẹka bi ụzọ ohu —

⁷ ikpe nọ semẹni ndị e duni Ebram anụ lẹ ndị e duni Lọtụ anụ. Ndị Kenaanị lẹ ndị Pẹrẹzi bizikwọ alị ahụn ogẹn hụ.

⁸ Ebram nọ sị Lọtụ, “Ikpe y'e selẹni mmẹ lẹ yụ, y'e selẹni ndị e dun'i anụ lẹ ndị e duni m anụ, makẹni ẹnyi wụ umunẹ.

⁹ Ẹlẹ alị wụ hụnnị ile ị rị e legha? Nị ẹnyi kebe: i shi ẹka-nni, e shi m ẹka-ekpẹn; i shi ẹka-ekpẹn, e shi m ẹka-nni.”

¹⁰ Lọtụ e lee ẹnya, hụn a nị alị-aradan Jọdanị, ibe sikọ Zụa, e nwọnhẹn mirin ọhụnma-ọhụnma nọkẹ ugbo-nta Osolobuẹ, nọkẹ alị Ijiptu. (Osolobuẹ eke tikpọ alị Sodọm lẹ Gomora ogẹn ahụn.)

¹¹ Ya Lọtụ nọ hanrịn alị-aradan rị ọdanmgbugbu Jọdanị, dọn ihun nkọ ọwụwa ẹnyanwụn. Onyẹ-onyẹ imẹ wẹ ẹbụọ nọ warị ẹbụ a:

¹² Ebram e biri alị Kenaanị, Lọtụ nkẹ e biri obodo shịa ẹfọ rị alị-aradan, kwarị ibu ẹ jẹn d'e biri ẹhụ obodo Sodọm.

¹³ Bụ ndị Sodọm e mẹ njọ ọda-ọda. W'e mẹ ihiẹn Osolobuẹ sị w'e emẹlẹ e mẹshi ẹ ikẹn.

¹⁴ Ogẹn Lọtụ gi ghagụ ebe Ebram rị pụ, Osolobuẹ nọ sị Ebram, “Gha nwan ebahụn ị rị lehunmẹ ẹnya: lee ẹnya ẹka-nni lẹ ẹka-ekpẹn, ihun lẹ azụụn:

¹⁵ M k'e we alịnị ile ị rị e legha ye yụ lẹ mmụ ị werichanrịn.

¹⁶ M k'e ye i ụmụ bu ọda nọkẹ ẹjan rị alị, omẹni a sa wẹ ẹka gụn ẹjan rị alị, ya wụ nị a sa wẹ ẹka gụnmarịn ụmụ ị.

¹⁷ Buli nwan, n'ị ghahunmẹchanrịn alịnị k'ọ han — usue ẹ lẹ ụshịa a, m rị e ye y'ẹ.”

¹⁸ Ya Ebram nọ tọtu ụlọ a w'a kpụkpọrị, kwarị, jẹn d'e biri ebẹhụ okẹn osisi Mamre rị imẹ alị Hibrọnụ, nọ ebahụn rụnnị Osolobuẹ ukpo nchụn-ẹjan.