Jẹnẹsisi 11 - Ika

Isi Nke Mmanaị Kẹ Osolobuẹ Dọn Mẹ Ịhịan Sụma Asụsụ Ichẹn-ichẹn

¹ Ụwa ile e te sụ asụsụ ohu lẹ ọnụ ohu.

² Ogẹn wẹ gi rị a kwahunmẹ azụụn ọwụwa-ẹnyanwụn, wẹ nọ hụn alị aradan imẹ alị Shina, wẹ nọ biri ebahụn.

³ Wẹ nọ tụgbama iroro, sị ibe wẹ, “Bịa nị; nị ẹnyi kpụ nị ẹjan, ẹnyi e gi ọkụn kikọ a n'ọ kọrọhị.” Ya wẹ nọ gi ẹjan ahụn wẹ kpụ, kikọ, nọkin ẹnya ọmụma wẹ te gi a tụn ụlọ, gizi korota nọkin ẹnya simẹnti wẹ te gi a nyangbama ọmụma.

⁴ Ya wẹ nọ sị, “Bịa nị nị ẹnyi rụnrụn nị obodo lẹ okẹn ụlọ-elu jẹn elu ru igwere, kẹni ẹnyi gi ẹ nwọnrin ẹfan, makẹ ẹnyi gha a kpayịya imẹ ụwa ile.”

⁵ Osolobuẹ nọ hidan d'e lee obodo ahụn lẹ ụlọ-elu ahụn jẹngbu enwẹn ẹ elu ịhịan-mmakalaka rị a rụn.

⁶ Osolobuẹ nọ sị, “Lee ẹ, ndịnị wụ ohu; w'a sụzịkwọ asụsụ ohu. Ya wụ nị wẹ eke mẹmẹdẹ ihiẹn wẹ k'a saẹka mẹ; onwọnzikwọnị ihiẹn wẹ chọ nị wẹ mẹ hụn wẹ jẹnkọlẹni d'a saẹka mẹ.

⁷ Bịa nị nị ẹnyi hidan d'e mẹ wẹ sụma asụsụ ichẹn-ichẹn, makẹ wẹ gha a ghọtazị ihiẹn ibe wẹ rị e ku.”

⁸ Ya Osolobuẹ nọ gha ebẹhụ feyịya wẹ elu-ụwa ile, wẹ nọ rụnbehi obodo ahụn.

⁹ Ya haịn wẹ gi a kpọ ebahụn “Babẹlụ”, makẹni ebahụn kẹ Osolobuẹ nọ mẹ ụwa ile sụma asụsụ ichẹn-ichẹn. Osolobuẹ nọ gha ebẹhụ feyịya wẹ elu ụwa ile.

Gha Shẹm D'e Ru Ebram

¹⁰ Ndịnị wụ ụmụ Shẹm. Ogẹn Shẹm gi rị ahụa ọgụn-isẹn, ọ nọ mụ Afakishadị k'o zu ahụa ẹbụọ okẹn-mirin ahụn bi;

¹¹ Shẹm a mụgụ Afakishadị, ọ nọ bizi ahụa ọgụn-isẹn kwasị nnụ. Ọ mụzịghọ ụmụ ndị ọzọ chen'ẹ, kẹ ikẹnnyẹ kẹ ikpoho.

¹² Ogẹn Afakishadị gi rị ahụa mmisẹn kwasị ọgụn, ọ nọ mụ Shẹla;

¹³ ọ mụgụ Shẹla, ọ nọ bizi ahụa ẹtọ kwasị nnụ. Ọ mụzịghọ ụmụ ndị ọzọ chen'ẹ — kẹ ikẹnnyẹ kẹ ikpoho.

¹⁴ Ogẹn Shẹla gi rị ahụa iri kwasị ọgụn, ọ nọ mụ Ẹba.

¹⁵ Ọ mụgụ Ẹba, ọ nọ bizi ahụa ẹtọ kwasị nnụ. Ọ mụzịghọ ụmụ ndị ọzọ chen'ẹ — kẹ ikẹnnyẹ kẹ ikpoho.

¹⁶ Ogẹn Ẹba gi rị ahụa mmẹnọ kwasị ọgụn, ọ nọ mụ Pẹlẹgị.

¹⁷ Ọ mụgụ Pẹlẹgị, ọ nọ bizi ahụa iri kwasị ọgụn kwasị nnụ. Ọ mụzịghọ ụmụ ndị ọzọ chen'ẹ — kẹ ikẹnnyẹ kẹ ikpoho.

¹⁸ Ogẹn Pẹlẹgị gi rị ahụa iri kwasị ọgụn, ọ nọ mụ Rewu.

¹⁹ Ọ mụgụ Rewu, ọ nọ bizi ahụa itenẹi kwasị ọgụn-iri. Ọ mụzịghọ ụmụ ndị ọzọ chen'ẹ — kẹ ikẹnnyẹ kẹ ikpoho.

²⁰ Ogẹn Rewu gi rị ahụa mmẹbụọ kwasị ọgụn, ọ nọ mụ Sẹrugu.

²¹ Ọ mụgụ Sẹrugu, ọ nọ bizi ahụa ẹsa kwasị ọgụn-iri. Ọ mụzịghọ ụmụ ndị ọzọ chen'ẹ — kẹ ikẹnnyẹ kẹ ikpoho.

²² Ogẹn Sẹrugu gi rị ahụa iri kwasị ọgụn, ọ nọ mụ Nahọ.

²³ Ọ mụgụ Nahọ, ọ nọ bizi ahụa ọgụn-iri. Ọ mụzịghọ ụmụ ndị ọzọ chen'ẹ — kẹ ikẹnnyẹ kẹ ikpoho.

²⁴ Ogẹn Nahọ gi rị ahụa itenẹi kwasị ọgụn, ọ nọ mụ Tẹra.

²⁵ Ọ mụgụ Tẹra, ọ nọ bizi ahụa mmitenẹi kwasị ọgụn-isẹn. Ọ mụzịghọ ụmụ ndị ọzọ chen'ẹ — kẹ ikẹnnyẹ kẹ ikpoho.

²⁶ Ogẹn Tẹra gi rị ahụa iri kwasị ọgụn-ẹtọ, ọ nọ mụma nwa. Ndịnị wụ ụmụ a: Ebram lẹ Nahọ lẹ Haranị.

Ebọn Tẹra

²⁷ Ndịnị wụ ụmụ Tẹra: Tẹra wụ nẹdi Ebram lẹ Nahọ lẹ Haranị. Haranị wụ nẹdi Lọtụ.

²⁸ Haranị bu nẹdi ẹ wụ Tẹra ụzọ nwụnhụn. Alị wẹ nọ mụ a, alị Uru hụn rị alị ndị Kal'di wụ Babilọnụ, k'ọ nọ nwụnhụn.

²⁹ Ebram lẹ Nahọ lụrụsọnmẹ nwunyẹ: ẹfan nwunyẹ Ebram wụ Saraị; ẹfan nwunyẹ Nahọ wụ Mil'ka. Mil'ka wụ nwa Haranị nwa Tẹra. Haranị mụzị Iska.

³⁰ Saraị wụ agan; ọ mụnị nwa.

³¹ O mẹgụ, Tẹra nọ weri Ebram nwa a lẹ nwa-nwa a wụ Lọtụ lẹ Saraị nwunyẹ nwa a, nwunyẹ Ebram nwa a, wẹ nọ gha obodo Uru hụn rị alị ndị Kal'di wụ Babilọnụ pụ, kẹni wẹ kwashi alị Kenaanị. Kanị, e ru wẹ alị w'a kpọ Haranị, wẹ nọ biri ebahụn.

³² Ahụa isẹn kwasị ọgụn-iri kẹ Tẹra tọ. Alị ahụn wụ Haranị kẹ Tẹra nọ nwụnhụn.