Jẹnẹsisi 1 - Ika

Isi Nke Ohu Kẹ Chuku Dọn Ke Elu-igwere Lẹ Ụwa

¹ Isi mbidọn, kẹ Chuku ke elu-igwere lẹ elu-ụwa,

² ụwa enwọnni k'ọ nọ; ụwa gbachanrịn okpokoro; elu-ụwa ile gba ishi kitikpọ. Mmọn Chuku hụ a ghahunmẹ elu mirin hụn jun ụzọ ile.

Ụhụọhịn Ibuzọ Ukpẹ

³ Ya kẹ Chuku nọ sị, “Ukpẹ ya rị.” Ukpẹ nọ rị.

⁴ Chuku e lee ukpẹ ahụn, ọ hụn a nị ukpẹ ahụn hụ mma. Chuku nọ kebepụ ukpẹ ahụn lẹ ishi.

⁵ Chuku nọ kpọ ukpẹ ahụn “efinaị”, kpọ ishi ahụn “uhinhin”. Uhinhin a gharị, efinaị a gharị: ọhụn wụ ụhụọhịn ibuzọ.

Nke Akpọhịn Ẹbụọ Igwere

⁶ Chuku nọzị sị, “Oghe ya rị mirinni n'ọ hụn ụzọ kebe ẹ ẹbụọ”.

⁷ Chuku e mẹmẹ oghe hụ, gi ẹ kebe mirin ahụn ụzọ ẹbụọ: hụn rị okpuru oghe lẹ hụn rị elu oghe. Ọ nọ rị ẹrịra.

⁸ Ya Chuku nọ kpọ oghe ahụn “elu-igwere”. Uhinhin a gharị, efinaị a gharị: ọhụn mẹ ẹ akpọhịn ẹbụọ.

Nke Akpọhịn Ẹtọ Ohimin Lẹ Akpakalị

⁹ Chuku nọzị sị, “Mirin ile rị okpuru ogheni ya kụrụ ụzọ ohu; akpakalị ya pụha.” Ọ nọ rị ẹrịra.

¹⁰ Chuku nọ kpọ alị kọrọnị “akpakalị”, kpọ mirin ahụn ile kụrụnị, “ohimin”. Chuku e lee wẹ, ọ nọ hụn a nị ọ hụ mma.

Ihiẹn E Pu Alị

¹¹ Chuku nọzị sị, “Akpakalị ya pu ihiẹn: kẹ ndị a mị mkpụrụ kẹ osisi ndị a mị ogbe nwọn mkpụrụ, onyẹ lẹ ụdị a onyẹ lẹ ụdị a; ya pu ẹrịra akpakalị ile.” Ọ nọ rị ẹrịra:

¹² akpakalị nọ pupụha ihiẹn ile rị ichẹn-ichẹn, kẹ ndị a mị mkpụrụ kẹ osisi ndị a mị ogbe nwọn mkpụrụ, onyẹ-lẹ-ụdị-a, onyẹ-lẹ-ụdị-a. Osolobuẹ e lee ẹ, ọ nọ hụn a n'ọ hụ mma.

¹³ Uhinhin a gharị, efinaị a gharị: ọhụn mẹ ẹ akpọhịn ẹtọ.

Nke Akpọhịn Ẹnọ Ẹnyanwụn Lẹ Ifọn Lẹ Kokisẹ

¹⁴ Chuku nịzị sị, “Ukpẹ ya rị oghe ahụn wụ igwere kẹni wẹ hụn ụzọ a kebe efinnaị lẹ uhinhin, lẹzi ni wẹ e gi wẹ a gụn ogẹn lẹ ụhụọhịn lẹ ahụa;

¹⁵ ukpẹ ndịnị wẹ nọdịsọnmẹ oghe ahụn wụ igwere, e nwunye imẹ ụwa.” Ọ nọ mẹ —

¹⁶ Chuku e mẹmẹ ukpẹ ẹbụọ hi ogbe: ukpẹ hụn kanị hụn k'a rị e nwun efinnaị lẹ ukpẹ hụn nta hụn k'a rị e nwun imẹ uhinhin lẹzi kokisẹ.

¹⁷ Chuku bu ukpẹ ndịnị che imẹ oghe ahụn wụ igwere kẹni wẹ gha ebẹhụ e nwunye elu ụwa,

¹⁸ e nwun efinaị lẹ uhinhin, e kebe ukpẹ lẹ ishi. Chuku e lee wẹ, ọ nọ hụn a nị wẹ hụ mma.

¹⁹ Uhinhin a gharị, efinaị a gharị: ọhụn mẹ ẹ akpọhịn ẹnọ.

Nke Akpọhịn Isẹn Azụn Lẹ Anụ Rị Imẹ Mirin

²⁰ Chuku nọzị sị, “Ihiẹn rị ichẹn-ichẹn rị ndụn ya jun imẹ mirin; nnụnụ ya junzikwọ elu, e fehunmẹ.”

²¹ Chuku nọ ke anụ ndị higbu enwẹn ẹ ogbe rị imẹ ohimin lẹ ihiẹn ile rị ndụn jun imẹ mirin, onyẹ-lẹ-ụdị-a, onyẹ-lẹ-ụdị-a; o kezikwọ ụdị nnụnụ ile rị ichẹn-ichẹn. Chuku e lee wẹ, ọ nọ hụn nị wẹ hụ mma.

²² Chuku nị gọzi wẹ, sị wẹ, “Mụ nị ụmụ; mụba nị; jun ni ohimin ile. Nnụnụ ya junzikwọ imẹ ụwa ile.”

²³ Uhinhin a gharị, efinaị a gharị: ọhụn mẹ ẹ akpọhịn isẹn.

Nke Akpọhịn Isin Anụ A Kpa Alị

²⁴ Chuku nọzị sị, “Akpakalị ya mụpụha ụdị anụmanụ rị ichẹn-ichẹn — kẹ anụ-ụlọ kẹ ihiẹn ndị hụn a rịhumẹni kẹ ụdị anụ-ọfịa rịsọnmẹ ichẹn-ichẹn.” Ọ nọ rị ẹrịra —

²⁵ Chuku nọ ke ụdị anụ-ọfịa ile a kpa alị lẹ ụdị anụ-ụlọ ile kezikwọ ụdị ihiẹn ile a rịhunmẹ alị. Chuku e lee wẹ, ọ nọ hụn a n'ọ hụ mma.

Ịhịan

²⁶ Ya kẹ Chuku nọ sị, “Nị ẹnyi mẹmẹ ịhịan, mẹmẹ ẹ n'ọ rị kẹ ẹnyi, n'o yi ẹnyi. Okpuru ẹ kẹ azụn rị imẹ mirin lẹ nnụnụ ile rị elu lẹ anụ-ụlọ ile lẹ anụ-ọfịa ile lẹ elu-ụwa ile lẹ anụ ile a rịhunmẹni jẹnkọ d'a rị.”

²⁷ Chuku nọ nwan ke ịhịan, o yi ẹ; Chuku leri enwẹn ẹ ke ẹ — okẹn lẹ onyẹnnyẹ k'o ke wẹ.

²⁸ Chuku nọ gọzi wẹ: ọ sị wẹ, “Mụ nị ụmụ; mụba nị; jun ni elu-ụwa, ụnụ e bu elu-ụwa che okpuru ụnụ. We ni azụn rị imẹ mirin lẹ nnụnụ rị elu lẹ ihiẹn ile rị ndụn a kpa elu-ụwa che okpuru ụnụ.”

²⁹ Chuku nọzị sị, “Lee ẹ, e yegụọ m ụnụ ihiẹn ile rị elu-ụwa hụn e pu alị a mị mkpụrụ, ya lẹ osisi ndị a mị ogbe nwọn mkpụrụ: e ri ni wẹ.

³⁰ Nke anụmanụ ile rị ọfịa lẹ nnụnụ ile lẹ ihiẹn ile a rịhunmẹni lẹ ihiẹn ile rị ndụn, e yegụọ m wẹ ihiẹn ile e nwun ẹhụhụọ-oyiyi ẹhụhụọ-oyiyi hụn e pu alị n'ọ wụrụ ihiẹn-oriri wẹ.” Ọ nọ rị ẹrịra.

³¹ Chuku e lee ihiẹn ile o ke, ọ nọ hụn a nị wẹ ile a rịka mma. Uhinhin a gharị, efinaị a gharị: ọhụn mẹ ẹ akpọhịn isin.