Jemisi 5 - Ika

Isi Nke Isẹn Ndị-ịdanfịn, Kpachanpụ Nị Ẹnya!

¹ Ndị-ịdanfịn, gọn ni ntịn: kwanma nị ẹkwan, e goo, yeni nsọngbu hụn rị e kunrunni ụnụ!

² Akụ-lẹ-ụba ụnụ e rehigụọ! Ẹkịka e ripụgụọ ẹkwa ụnụ!

³ Goru ụnụ lẹ siliva ụnụ a gbagụọ nchara! Ncharanị wẹ gba k'a shịagbu ụnụ ẹri; o jẹnkọ d'e ripụ ụnụ uru-ẹhụ kẹ ọkụn dọn e ri ihiẹn, ụnụ gi kpatọ akụ-lẹ-ụba ogẹn ikpanzụụnnị.

⁴ Gọn ni ntịn! Egho ụnụ jụ nị ụnụ akụkọ ndị sụnnị ụnụ ọfịa rị nwan a shịagbu ụnụ ẹri! Ẹkwan ndị ghọnị ụnụ ihiẹn-ugbo e rugụọzị Osolobuẹ nwọn ikẹn ile ntịn!

⁵ Ụnụ e bigụọ elu ọdanfịn lẹ iri-ụwa elu ụwanị; ụnụ a zụngụọ akpobi ụnụ tọnị ụhụọhịn ogbugbu.

⁶ Ụnụ a magụọ ndị nwọnlẹni ihiẹn wẹ mẹ ikpe, gbu wẹ, onwọnni ihiẹn wẹ jụ ụnụ!

Din Ndidin

⁷ Umunẹ m, e nwọn ni nwan ndidin d'e ru ni Di-nwọnni-ẹnyi a bịa. Lee ni kẹ onyẹ-ugbo e che ihiẹn-ugbo rịgbu enwẹn ẹ mkpa, e din ndidin ni mirin ahụa lẹ mirin ikpanzụụn zueyegụ a.

⁸ Nwọn ni nwan ndidin ẹrịra, ụnụ e kwọnkẹnmẹ obi ụnụ, makẹni ọbịbịa Di-nwọnni-ẹnyi a rịgụọ nsue.

⁹ Umunẹ m, edẹnwịnnwịnkwọlẹni ni ibe ụnụ, makẹ Osolobuẹ gha a ma ụnụ ikpe: Ọka-ikpe e rugụọdẹ ọnụmụzọ!

¹⁰ Umunẹ m, leri ni okẹn-ndidin ndị-amụma mbụ gi ẹfan Di-nwọnni-ẹnyi ku oku gi sọn afụnfụn wẹ ta.

¹¹ Eziẹ, ẹnyi a ja ndị din ndidin mma. Ụnụ a nụghọ kẹ Jobu dọn din ndidin; ụnụ a hụnzịghọ ihiẹn Di-nwọnni-ẹnyi mẹ ikpanzụụn, nị Di-nwọnni-ẹnyi e mẹkẹ ẹfọma lẹ omikẹn.

Ekunlẹ Ihiẹn Ọwụlẹ

¹² Hụn ka mkpa umunẹ m, ekunlẹ ni ihiẹn ọwụlẹ, kaka! Kẹ elu-igwee kẹ elu-ụwa kẹ ihiẹn ọzọ ọwụlẹ. Kama, omẹni ẹghẹẹ rọ, sịhụ “Ẹghẹẹ;” omẹni mba rọ, sịhụ “Mba” amamgbe Osolobuẹ a ma ị ikpe.

Ekpere

¹³ Onyẹ nwọn nsọngbu imẹ ụnụ? Ya mẹ ekpere. Onyẹ kẹ ẹfọ rị a sụọ ụsụọ? Ya bụma ẹbụ ịja-mma.

¹⁴ Onyẹ kẹ emu rị a kụ imẹ ụnụ? Ya kpọ ndị-isi ụka nị wẹ mẹn'ẹ ekpere, gi ẹfan Di-nwọnni-ẹnyi tankpu ẹ udẹn-olivu.

¹⁵ Ekpere wẹ gi okukwe mẹ k'a zụọ onyẹ hụ emu rị a kụ, Di-nwọnni-ẹnyi e weli ẹ; omẹni hụnyẹ mẹ njọ, ọ gbagharị a.

¹⁶ A gwaghọsị nị nwan ibe ụnụ njọ ụnụ mẹ, e mẹni ni ibe ụnụ ekpere, kẹni ụnụ hụn ụzọ dịnhịn. Ekpere onyẹ ezi-omumẹ nwọn ikẹn ọda-ọda; ọ rụnka.

¹⁷ Ẹlaịja wụ ịhịan nọkẹ ẹnyi. Kanị, o mẹshi ekpere ikẹn makẹ mirin gha e zue, mirin nọlẹni zue ọrọgbọ ahụa ẹtọ lẹ ifọn isin!

¹⁸ O mẹzi ekpere, igwere nọ zue mirin, alị nọ mẹ ihiẹn ugbo.

¹⁹ Umunẹ m, omẹni ịhịan latọ ezioku kpahu, nị ibe ẹ e wekinhẹn ẹ,

²⁰ hụn wekinhẹnn'ẹ ya marịn nị onyẹ wekinhẹn onyẹ-njọ kpahukọnị a zụọpụhaọlẹ onyẹ njọ ẹka ọnwụn, kpumẹ njọ bu ọda.