Jemisi 4 - Ika

Isi Nke Ẹnọ Awụlẹ Ọwụ Ụwa

¹ Kị rị e buhẹ ikpe imẹ igunrun ụnụ? Kị rị e buhẹ ọgụn imẹ igunrun ụnụ? Ẹlẹ ihiẹn a gụnnị ụnụ hụn rị a lụ agha imẹ obi ụnụ?

² Ụnụ chọ, ụnụ a hụnnị, ụnụ e gbumẹ ọchụn; ihiẹn la ụnụ ẹnya, nị ọ nịnị ụnụ nwọnhẹn, ụnụ e kpemẹ, lụma ọgụn. Ụnụ enwọn makẹni ụnụ ara rịọ.

³ Ụnụ rịọdẹ ụnụ ara nwọnhẹn, makẹni ụnụ rị a rịọ hụn furulẹni nị ụnụ rịọ, hụn ụnụ e gi mẹ ihiẹn a sụọnị ụnụ.

⁴ Ndị ẹnya rịlẹni ụzọ ohu! Ụnụ amarịn nị ọwụ ụwa wụ eṅẹnrẹn Osolobuẹ? Ya wụ, onyẹ chọ n'ọ wụrụ ọwụ ụwa o họnrin eṅẹnrẹn Osolobuẹ.

⁵ Ra ụnụ ro ni Ẹkụkwọ-nsọ enwọn ihiẹn haịn o gi sị, “Ẹnya a fụ Mmọn hụn Osolobuẹ bu che imẹ ẹnyi afụ”?

⁶ Kanị Osolobuẹ e ye ẹka ọda-ọda; ya haịn Ẹkụkwọ-nsọ gi sị, “Osolobuẹ a nọkin onyẹ mpache ụzọ, kanị, o yeni onyẹ e welụa enwẹn ẹ alị ẹka.”

⁷ Bu ni nwan enwẹn ụnụ che okpuru Osolobuẹ. Che ni Ekwensụ ọgụn, ọ k'a gbanị ụnụ ọsọ.

⁸ Nọkunmẹ ni Osolobuẹ kẹni Osolobuẹ nọkunmẹ ụnụ. Kwọpụ nị ẹka ụnụ, ndị njọ! Chanchanpụ nị obi ụnụ, ndị obi-ẹbụọ!

⁹ Goo ni! Kwan nị! Kwan nị ẹnya-mirin! Gi ni ẹkwan nọkin ẹnya ẹmụ ụnụ, ụnụ a la ịghọghọ tọ, rọnmẹ ihun!

¹⁰ Welụa nị enwẹn ụnụ alị ihun Di-nwọnni-ẹnyi kẹni o bushi ụnụ elu.

Ekujalẹ Ni Oku Ibe Ụnụ

¹¹ Umunẹ m, ekujakwọlẹ ni oku ibe ụnụ, makẹni onyẹ hụn kuja oku ibe ẹ mọbụ kin ẹ ikpe rị e kuja oku Iwu Osolobuẹ ye, e kin Iwu Osolobuẹ ikpe. Ị gha e kin Iwu ikpe, y'ẹlẹzi onyẹ e dọnmẹ Iwu, y'a wụrụgụọ ọka-ikpe!

¹² Onyẹ ohu sụọ e ye Iwu, e kin ikpe; nzụọpụha lẹ ntikpọ rị a ẹka. Onyẹ k'ị wụ nwan i gi e kin ibe i ikpe?

Anyanlẹ Ni Isi

¹³ Lee ni ẹnya, ụnụ ndị a sị, “Tannị mọbụ ekile, ẹnyi k'e jẹn alịnị mọbụ alị nẹi; ẹnyi k'a nọ ahụa ebẹhụ, zụ afịa, kpa egho,”

¹⁴ bụ ụnụ amarịn ihiẹn eki k'a mụ! Kị wụ ndụn ị? Ọ nọhụ kẹ igirigi hụn a nọhụ ẹkẹrẹ, o fopụ!

¹⁵ Ihiẹn furu ụnụ k'e ku wụ, “Omẹni uche Di-nwọnni-ẹnyi rọ, ẹnyi k'a rị ndụn, mẹ hụnnị mọbụ hụnnị.”

¹⁶ Kanị, hụn nkẹ ụnụ e gi e ku ẹrịra, ụnụ hụ a pache, a nyan isi. Isini ile ụnụ rị a nyan wụ njọ.

¹⁷ Ya wụ, onyẹ marịn ihiẹn furu o k'e mẹ bụ o mẹn'ẹ, e mẹọlẹ njọ.