Jemisi 2 - Ika

Isi Nke Ẹbụọ Egbeyelẹni Ịhịan

¹ Umunẹ m, egbeyelẹni ni ịhịan ebe o mẹni ụnụ e fe Di-nwọnni-ẹnyi wụ Jesu Kristi, Onyẹ ahụn kachanrịnnị.

² Omẹni ịhịan yi ẹkwa rị mma ṅanrannị lẹ ọla goru banhan ebe ụnụ rị e zu, nị ogbẹnnyẹ yi ẹkwa rịlẹni mma kaka a banhanzịkwọ ebẹhụ,

³ nị ụnụ a gbaye hụn kẹn ekikẹn rị mma, sị a, “Dodo, nọdị alị ocheni rị mma,” sị hụn ogbẹnnyẹ, “Wuzo ebẹhụ,” mọbụ “Nọdị alị akpakalị ebeni ụkụ m rị,”

⁴ ọhụn a ghọsịgụọnị nị ụnụ e gbeyeni ịhịan imẹ igunrun ụnụ, e gi eje-obi e mẹ ihiẹn ụnụ?

⁵ Ezigbo umunẹ m m bu obi, gọn ni ntịn! Osolobuẹ a họrịgụọnị ndị wụ igbẹnnyẹ imẹ ụwanị mẹ wẹ wụrụ ndị-ịdanfịn imẹ okukwe, wụrụzị ndị k'a banye Alị-eze hụ o kwe nkwa n'o k'e ye ndị ihiẹn ẹ a sụọ?

⁶ Bụ ụnụ hụ e legberi ndị-igbẹnnyẹ! Ẹlẹ ndị-ịdanfịn a bịangbu ụnụ? Ẹlẹ wẹ a dọjẹn ụnụ ọgwa?

⁷ Ẹlẹ wẹ e kuja oku ezigbo ẹfan Jesu ụnụ rị a za?

⁸ Omẹni ụnụ e dọnmẹghọ iwu hụ Eze ye kẹ wẹ dọn de ẹ imẹ Ẹkụkwọ-nsọ, sị, “Ihiẹn ibe i ya sụọ ị kẹ ihiẹn i dọn a sụọ ị,” nkẹ ọ rịka mma.

⁹ Kanị, omẹni ụnụ e gbeyeni ịhịan, njọ kẹ ụnụ rị e mẹ, ikpe a maọlẹ ụnụ makẹni ụnụ rị a dan iwu.

¹⁰ Makẹni, onyẹ dọnmẹchanrịn iwu ile, dan ohu, a danchanrịnọlẹ iwu ile.

¹¹ Makẹni, Osolobuẹ ahụn sị, “Aghẹrẹlẹ,” ịya sịzịkwọ, “Egbulẹ ọchụn.” O mẹ nwan nị y'a ghẹrẹni bụ y'e gbughọ ọchụn, y'a danchanrịngụọ iwu ile.

¹² Ya wụ, kẹ oku-ọnụ kẹ omumẹ, e mẹchanrịn nị wẹ kẹ ndị wẹ k'e gi iwu e mẹ ịhịan e nwọnrin enwẹn ẹ kin ikpe:

¹³ onyẹ ghalẹni e mẹ omikẹn, emẹkọnị w'a omikẹn wẹ gha e kin ẹ ikpe. Omikẹn e mẹri ikpe-ọmụma.

Okukwe Lẹ Ọrụn

¹⁴ Umunẹ, elee erere k'ọ ban nị ịhịan sị n'o nwọn okukwe, bụ o gin'ẹ rụn ọrụn? Nị okukwe ahụn saẹka zụọpụha a?

¹⁵ Omẹni ẹkwa ezuni onyẹ nke Kraịstị ibe i ukun mọbụ ihiẹn o k'e ri ụhụọhịn hụ arịa:

¹⁶ ị sị a, “Ihiẹn e mẹ i! Oyi atụkwọlẹ i! Rijunkwọ ẹfọ!” Bụ y'e yenin'ẹ ẹka, elee erere k'ọ ban?

¹⁷ Ẹrịrazịkwọ, okukwe wẹ gilẹni rụn ọrụn a nwụnhụngụọ.

¹⁸ Kanị, o nwọn onyẹ k'a sị, “Nke i wụ okukwe, nke m wụ ọrụn.” Azịza m wụ, “Ghọsị m okukwe i ahụn i gilẹni rụn ọrụn. Mmẹ nwẹn, m jẹnkọ d'e gi ọrụn m ghọsị ị okukwe m.”

¹⁹ Y'e nwọnghọ okukwe i gi kweri nị Osolobuẹ ohu sụọ rị, ẹlẹ ịya? Y'e mẹkẹ! Eje-mmọn nkẹ e nwọnzighọ okukwe wẹ gi kweri! Ya haịn wẹ gi a ma piripiri!

²⁰ Onyẹ-nzuzu! Ị chọ nị wẹ ghọsị ị nị okukwe wẹ gilẹni rụn ọrụn a nwụnhụngụọ?

²¹ Ẹlẹ ihiẹn nẹdi ẹnyi wụ Ebraham rụn kẹ Osolobuẹ gi kun'ẹ ọhụnma, ogẹn hụ o gi wẹhẹ nwa a wụ Aziki ukpo nchụn-ẹjan hụ, n'o gi ẹ chụn ẹjan?

²² Y'a hụn a? Okukwe ẹ lẹ ihiẹn o mẹ gba rụn ọrụn; ihiẹn o mẹ kẹ okukwe ẹ gi zu oke.

²³ Ya kẹ ihiẹn hụ Ẹkụkwọ-nsọ ku nọ mẹ: nị “Ebraham kweyeni Osolobuẹ, Osolobuẹ nọ gụn a yen'ẹ, kpọ a onyẹ ezi-omumẹ, kpọ a ọwụ Osolobuẹ.”

²⁴ Y'a hụn a nwan nị ihiẹn onyẹ rụn kẹ Osolobuẹ gi e kun'ẹ ọhụnma, ẹlẹ okukwe sụọ!

²⁵ Ẹlẹ ẹrịra kẹ Osolobuẹ dọnzi kuni ịgbaraja hụ wụ Rehabụ ọhụnma yeni ọrụn a, ogẹn hụ o gi nabanhan ndị Joshụa zi d'e gi nzuzue lele alị Jẹriko, o zuemẹ wẹ, ghọsị wẹ ụzọ wẹ gha la?

²⁶ Ya wụ, kẹ ẹhụ mmọn rịlẹni dọn wụ ihiẹn nwụnnị, ẹrịra kẹ okukwe ọrụn rịlẹni dọnzikwọ wụ ihiẹn nwụnnị.