Izikẹlụ 8 - Ika

Isi Nke Ẹsatọ Ihiẹn W'a Sọ Wẹ Rị E Mẹ Imẹ Ụlọ-nsọ

¹ Hụn mẹ akpọhịn isin imẹ ọnwan nke isẹn imẹ ahụa mẹ ẹ isin ẹnyi nọpụ ebe wẹ kpụnjẹn ẹnyi, ndị-isi ndị Juda hụn wẹ kpụnhan ẹnyi lẹ wẹ alị Babilọnụ bịa d'a hụn m; ebẹhụ ẹnyi ile nọdị alị, ya kẹ Osolobuẹ nwọn ihiẹn ile nọ mẹtụ m ẹka.

² M nọ hụn ihiẹn yi ịhịan: gha ukun ẹ d'e ru alị nọ kẹ ọkụn; gha ukun ẹ shi elu hụ e gbuke kẹ igwe-bronzu wẹ fichan ọhụnma.

³ Ọ nọ tịnpụ ihiẹn nọ kẹ ẹka, dọdọn m ntutu, mmọn Chuku nọ dọrị m ẹrịra shi imẹ elu, we m shi Jerusalẹm, imẹ ọhụn hụ gha ẹka Osolobuẹ bịa. Ọ nọ we m shi Ụlọ-nsọ, ẹhụ ọnụ-ụgba hụ rị ẹbamịn-ugu hụn wẹ gha a banye ihun-ezi rị imẹ-imẹ Ụlọ-nsọ — ebe wẹ kpụtọ mmọn ahụn wẹ gi kpasu Osolobuẹ iwe, hụn ẹnya gi rị a fụ Osolobuẹ.

⁴ Ya kẹ m nọ hụn ọghọ Osolobuẹ Izrẹlụ ebẹhụ! Ọ nọ kẹ hụn m hụn imẹ ọhụn imẹ ọdanmgbugbu Iyi Kẹba, imẹ Babilọnụ.

⁵ Ya kẹ Osolobuẹ nọ sị m, “Nwa-ịhịan, lee ẹnya ẹbamịn-ugu.” M nọ lee ẹnya ẹbamịn-ugu: e lee mmọn hụ wẹ kọma hụn ẹnya gi rị a fụ Osolobuẹ! Ọnụ-mgbọnni rị ẹbamịn-ugu ukpo wẹ nọ a chụnyeni Osolobuẹ ẹjan kẹ wẹ kọma a.

⁶ Osolobuẹ nọ sị m, “Nwa-ịhịan, Ị hụ a hụn ihiẹn wẹ rị e mẹ? Ị hụ a hụn eje arụ ndị Izrẹlụ rị e mẹ ebeni, hụn wẹ gi a chụpụ m imẹ Ụlọ-nsọ m? I jẹnkọ d'a hụnzị arụ kadẹ ndịnị njọ.”

⁷ Ọ nọ nwan wẹhẹ m ebe w'a gha a banye ezi-ọgwa Ụlọ-nsọ. E lee m ẹnya, e lee oghe rị ẹhụ-ụlọ!

⁸ Ya ọ nọ sị m, “Nwa-ịhịan, gupudẹle ẹhụ-ụlọnị.” E gupu m ẹhụ-ụlọ hụ, e lee oghe hụn e ru ịhịan a gha.

⁹ Ọ nọ sị m, “Banye nwan, n'ị hụn eje arụ wẹ rị e mẹ ebeni.”

¹⁰ Ya m nọ banye, lee ẹnya: e lee ihiẹn wẹ sejun ụsụọ-ẹjan hụ ile: ụdị ihiẹn ile a rịnị lẹ anụmanụ ile Chuku sị ẹnyi sọ lẹzi mmọn ile ikpụlọ Izrẹlụ a rụa.

¹¹ Madụ iri kwasị ọgụn-ẹtọ imẹ ndị-ichẹn Izrẹlụ wuzo ihun ihiẹn ndị hụ wẹ seye ẹhụ-ụlọ; Ja-azanịa nwa Shafanị rị imẹ wẹ. Onyẹ-onyẹ imẹ wẹ gi mkpu nsẹnsi, ẹnwụnrụn nsẹnsi hụ a lọshi elu.

¹² Osolobuẹ nọ sị m, “Nwa-ịhịan, ị hụ a hụn ihiẹn ndị-ichẹn Izrẹlụ rị a rụn imẹ ishi? Ihiẹn onyẹ-onyẹ rị mmughẹ o setọsọnmẹ mmọn a rụn — a sị enwẹn wẹ, ‘Osolobuẹ arị a hụn ẹnyi. Osolobuẹ a gbakitọgụọ alịnị azụụn.’ ”

¹³ Osolobuẹ nọzị sị m, “I jẹnkọ d'a hụnzịdẹ arụ ka ndịnị njọ.”

¹⁴ Ọ nọ nwan wẹhẹ m ọnụ-mgbọn hụ rịchanrịn ẹbamịn-ugu hụn wẹ gha a banhan Ụlọ Osolobuẹ; m nọ hụn ikpoho nọdị alị ebẹhụ, a kwan mmọn wẹ wụ Tamuzu.

¹⁵ Ọ nọ sị m, “Nwa-ịhịan, y'a hụnghọ ihiẹnni? I jẹnkọ d'a hụnzịdẹ arụ ka ndịnị njọ.”

¹⁶ Ọ nọ nwan wẹhẹ m ihun-ezi rịchanrịn imẹ hụn rị Ụlọ-nsọ Osolobuẹ: e lee ihiẹn nọkẹ madụ isẹn kwasị ọgụn rị ihun Ụlọ-NSỌ Osolobuẹ ebẹhụ e fe ẹnyanwụn!! Wẹ rị ẹgbata ẹtu-ụlọ rị ebẹhụ lẹ ukpo nchụn-ẹjan Osolobuẹ! Wẹ ile bu azụụn zinmẹ Ụlọ-NSỌ Osolobuẹ, bu ihun zinmẹ ẹbamịn ọwụwa ẹnyanwụn, a kụnị ẹnyanwụn isi alị!

¹⁷ Ọ nọ sị m, “Nwa-ịhịan, y'a hụn? Arụ ndịnị ile ndị Juda rị e mẹ ebeni e hini nwan? Wẹ hụzịdẹ e gizi egbu-lẹ-egbu mẹjun alịnị ile, e mẹsọnmẹ ihiẹn we gi a kpasu m iwe? Enwẹn wẹ kẹ wẹ rị a kpa nsịn e ye ọnụ — ẹlẹ mmẹ!

¹⁸ Mmẹ nwẹn jẹnkọ nwan d'e gi olulu mẹ wẹ ihiẹn; elekọ m wẹ ẹnya ihun; emẹkọ m omikẹn wẹ. Wẹ k'a kwanghọsị m ọda-ọda, egọnkọ m wẹ ntịn.”