Izikẹlụ 7 - Ika

Isi Nke Ẹsa Osolobuẹ Sị Nke Ndị Izrẹlụ A Gụ!

¹ Osolobuẹ sị m,

² “Nwa-ịhịan, lee ihiẹn Osolobuẹ nwọn ihiẹn ile rị a gwa alị Izrẹlụ: Ọgụgụ rọ! Nke alịnị a gụgụọ — ebe ile rị alịnị!

³ Yụ wụ alị, nke i e d'a gụ nwan; m k'e gi olulu rị m obi mẹ i ihiẹn. M k'e ye i afụnfụn eje-obibi i; m k'a kụ ị ụgwọ arụ ile i mẹ.

⁴ Elekọ m'ị ẹnya ihun; emẹkọ m omikẹn i. M k'a kụ ị ụgwọ eje-obibi i lẹ arụ ile ụnụ mẹ imẹ igunrun ụnụ. Ogẹn ahụn kẹ y'e gi marịn nị mmẹ wụ Osolobuẹ.

⁵ “Osolobuẹ nwọn ihiẹn ile sị: Nsọngbu k'a gha a bịa ọbịbịa-ọbịbịa!

⁶ Ọgụgụ rọ! Ọgụgụ rọ! O tẹnhinkunrungụọ ị. Lee ẹ k'ọ lala!

⁷ Nke ụnụ a gụgụọ, ụnụ ndị bi alịnị. Ogẹn e rugụọ; ụhụọhịn hụ a rịọlẹ nsue! Isusu jẹnkọ d'a rị elu-ugu ndịnị ẹlẹ ịghọghọ.

⁸ “M'e d'e gi olulu m mẹ ụnụ ihiẹn, mẹchanrịn ụnụ ya k'ọ han m obi; m k'e ye ụnụ afụnfụn ihiẹn ụnụ mẹ; m jẹnkọ d'a kụ ụnụ ụgwọ arụ ile ụnụ mẹ.

⁹ Elekọ m ụnụ ẹnya ihun; emẹkọ m omikẹn ụnụ. M jẹnkọ d'e ye ụnụ afụnfụn ihiẹn ụnụ mẹ lẹ arụ ile ụnụ mẹ imẹ igunrun ụnụ, ogẹn hụ kẹ ụnụ k'a marịn nị mmẹ wụ Osolobuẹ rị e mẹ ụnụ ihiẹnni.

¹⁰ “Ụhụọhịn hụ e ruọlẹ! E lee ẹ k'ọ lala! Ntikpọ a pụhaọlẹ! Ọkpọ hụ a gbọrịgụọ, mbọnmẹ a karagụọ mịma obobo!

¹¹ Ẹka-ikẹn e werigụọ ọnọdị; eje-ọkpọ e werigụọdẹ ọkịkị. Onwọnni onyẹ ọwụlẹ imẹ wẹ mọbụ ihiẹn ahụn ile wẹ nwọn mọbụ ụzụn wẹ ile mọbụ ọghọ wẹ hụn k'a rịzịnị.

¹² “Ogẹn e rugụọ; ụhụọhịn ahụn a bịagụọ! Hụn e ṅọnni ya aghọghọlẹ; hụn e reni ya akwanlẹ, makẹni olulu Osolobuẹ k'e kunrun ịhịan ile.

¹³ Onwọnni onyẹ e reni hụn ihiẹn o re k'e kinhẹnni e we wẹ nwụn, makẹni ihiẹnni Osolobuẹ ghọsị k'e kunrun igunrunni ile, o hutọkọ. Makẹ ufiri njọ wẹ, onwọnni kaka onyẹ ohu k'a saẹka zụọrị isi ẹ.

Afụnfụn Njọ Ndị Izrẹlụ

¹⁴ “Opi a hangụọ nwan hụn wẹ e gi kọnrin agha, kanị onwọnni onyẹ jẹnkọ agha, makẹni e gigụọ m olulu kwọndọn alịnị.

¹⁵ “Ọpịa-agha hụ ogbe e gbu, emu lẹ ẹgụn hụ mmụlọ e gbu. Onyẹ shi ugbo, ọpịa-agha e gbu ẹ; onyẹ nọdị imẹ obodo emu lẹ ẹgụn e gbu ẹ.

¹⁶ “Ndị k'a hụn isi gbapụ k'a gbashi elu ugu, a rịa lekẹ nduru rị ọdanmgbugbu, onyẹ-onyẹ hụ a kwannị njọ a.

¹⁷ Ẹka k'a kụtọpụ onyẹ ọwụlẹ; mkpụkụ k'a rị a ma wẹ nni.

¹⁸ Wẹ k'e yiri ẹkwa-achọ, a ma piripiri; ifẹnrẹn k'e mẹgbu onyẹ ọwụlẹ; wẹ k'a kpụnpụ wẹ ntutu.

¹⁹ Wẹ k'a ma siliva wẹ ye ogbe, mẹ goru wẹ kẹ ihiẹn rụnị. Siliva lẹ goru wẹ asakọ ẹka zụọpụha wẹ ogẹn Osolobuẹ k'e gi ọnụma a mẹ wẹ ihiẹn. Asakọ wẹ ẹka gi ẹ gbọn ẹgụn mọbụ gi ẹ rijun ẹfọ, makẹni goru lẹ siliva a dọgụọ wẹ ye imẹ njọ.

²⁰ Makẹni ihiẹn-mma wẹ ile magbu enwẹn ẹ e bugụọ wẹ isi; makẹni e gigụọ w'a kpụrụ mmọn lẹ Iyi rụnị, ihiẹn m'a sọ. M sikọ nwan d'e mẹ ihiẹn-mma wẹ wụrụnị wẹ ihiẹn rụnị.

²¹ “M jẹnkọ d'e we ẹ ye itumunyẹ kwarị; ndị-ejẹ rị ụwa k'a kwanarịn wẹ ya; wẹ k'e mẹrụ a.

²² M k'e fepụdẹ ẹnya, itumunyẹ ndị ahụn e mẹrụ Ụlọ-nsọ m hụ rị m mkpa, ndị ohin a banye ẹ, mẹrụ a.

²³ “Mẹmẹ ẹgan, makẹni ẹdeke e jungụọ alịnị, ẹka-ikẹn e jun imẹ isi-obodoni.

²⁴ M k'e wẹhẹni wẹ alị ẹfọ kachanrịn a jọ, a narịn wẹ wẹ ụlọ wẹ; m k'a napụ ndị hụ zegbu enwẹn wẹ isi hụ wẹ rị a nyan; wẹ k'e mẹrụ ebe ile rị nsọ w'a nọ e fe ofufe.

²⁵ Ogẹn nsọngbu e gi bịa, wẹ k'a chọ udọn, ahụnkọ w'a.

²⁶ Ọdakin k'a gha a bịanị wẹ ọbịbịa-ọbịbịa; wẹ k'a nụsọnmẹ oku nsọngbu. Wẹ k'a chọ uche Osolobuẹ mmaka ẹka onyẹ-amụma; ndị nchụn-ẹjan asakọ ẹka kuzi Iwu Osolobuẹ; ndị-ichẹn asakọ ẹka dụn ọdụn.

²⁷ Eze k'a gha a kwan; onyẹ-ọkịkị k'a gha a kwan ụya; ẹka k'a gha a ma ndị alị nni. M k'e gi ihiẹn wẹ mẹ sọn wẹ, gi ẹka wẹ gi sọn ihiẹn sọn wẹ. Ogẹn hụ, a marịn wẹ nị mmẹ wụ Osolobuẹ.”