Izikẹlụ 6 - Ika

Isi Nke Isin Afụnfụn Ife-mmọn K'e Buhẹ

¹ Osolobuẹ sị m,

² “Nwa-ịhịan, bu ihun zimẹ ugu ndị rị alị Izrẹlụ, n'ị gwa wẹ ihiẹn m jẹnkọ d'e mẹ wẹ.

³ Sị wẹ: Ugu ndị rị alị Izrẹlụ, gọn ni ntịn ihiẹn Osolobuẹ nwọn ihiẹn ile ku: Ọnwan wụ ihiẹn Osolobuẹ nwọn ihiẹn ile rị a gwa ugu lẹ òke ile, mgbugbu lẹ ọdanmgbugbu ile: M'e d'e zihẹni ụnụ ọpịa-agha, m k'e tikpọchanrịn ukpo-mmọn ụnụ ile.

⁴ M k'e tikpọchanrịn ukpo mmọn ụnụ ile, tikpọ ukpo nsẹnsi ụnụ ile; m k'e gbu ndị nke ụnụ tọ ihun mmọn ụnụ ndị hụ.

⁵ M k'e kpọn ozun ndị Izrẹlụ ye ihun mmọn ndị hụn wẹ rị a rụa, fe ọkpụkpụ wẹ ghahunmẹ ukpo-mmọn wẹ.

⁶ Ebe ọwụlẹ ụnụ bi, wẹ k'e tikpọchanrịn obodo ụnụ ile shịa ẹfọ la iwi; wẹ k'e tikpọchanrịn ukpo-mmọn ụnụ, a la wẹ iwi, yeni eje-ihiẹn wẹ sehẹ; e tikpọ wẹ mmọn ụnụ la iwi; a kụkpọchanrịn wẹ ukpo-nsẹnsị mmọn ụnụ, zapụchanrịn ihiẹn ụnụ kọma.

⁷ Wẹ k'e gbu ndị nke ụnụ tọ imẹ igunrun ụnụ, ụnụ a marịn nị mmẹ wụ Osolobuẹ.

⁸ “Kanị, o nwọnghọ ndị m k'e dọnmẹ ndụn. Ogẹn hụ, ndị ọpịa-agha k'e gbuhọdụ imẹ ụnụ k'a rị alị ndị ọzọ m k'e feyịya ụnụ ye.

⁹ Ndị hụ hụn isi imẹ ụnụ k'a nyanhan m imẹ alị ichẹn-ichẹn ndị hụ wẹ kpụnjẹn wẹ, nyanhan kẹ obi dọn gbawapụ m yeni obi wẹ rịlẹni ụzọ ohu, obi wẹ hụn pụchanrịn ebe m rị shi mmọn wẹ ndị hụ chanban wẹ ẹnya, ize enwẹn wẹ a ban wẹ yeni eje-ihiẹn ile wẹ mẹ lẹ arụ ile wẹ mẹ.

¹⁰ Ogẹn hụ, a marịn wẹ nị mmẹ wụ Osolobuẹ, nị ẹlẹ m rị e ku ẹ mmaka nị m k'e mẹ wẹ ihiẹnni.

¹¹ “Lee ihiẹn Osolobuẹ nwọn ihiẹn ile ku: O sị, ‘A fịan ẹka obi, e finfin ụkụ, e yi “Heuu!” makẹ eje-ụrụ ile ndị Izrẹlụ mẹ; makẹni ọpịa-agha, ẹgụn lẹ eje-emu sikọ nwan d'e gbu wẹ.

¹² Eje-emu k'e gbu ndị rị ebe teni, ọpịa-agha e gbu ndị rị nsue, ẹgụn e gbu ndị họdụnị wẹ gbulẹni, olulu m e ruchanrịn wẹ ẹhụ k'ọ rị m obi.

¹³ Ụnụ k'a marịn nị mmẹ wụ Osolobuẹ ogẹn ozun ndị hụ e gi jun ebẹhụ mmọn wẹ lẹ ukpo-mmọn wẹ rịsọnmẹ, elu òke ile jẹn elu lẹ ugu ile, okpuru osisi ọwụlẹ duni lẹ ukun okẹn-osisi okuu ọwụlẹ ẹhụhụọ jun — ebe ile wẹ nọ a mụyeni mmọn wẹ nsẹnsi.

¹⁴ M k'a tịnpụ ẹka, mẹshi wẹ ikẹn; e mẹ m alị wẹ gba okpokoro, la iwi, ghakwọrị atụ rị ẹbamịn ndịdan d'e ru alị Dibụla rị ẹbamịn-ugu. Ogẹn ahụn kẹ w'e gi marịn nị mmẹ wụ Osolobuẹ.’ ”