Izikẹlụ 48 - Ika

Isi Nke Ẹsatọ Kwasị Ọgụnnaị Kẹ Wẹ Dọn Kebe Alị Izrẹlụ Ebọn Ẹsa

¹ “Ndịnị wụ ebọn ichẹn-ichẹn lẹ ebe wẹ k'e keye wẹ: “Alị Dan k'a rị isi ẹ ẹbamịn-ugu. Ya lẹ Hamatị sikọ d'a nọ okẹn, gha nkọ ọwụwa-ẹnyanwụn d'e ru nkọ ọdịdan-ẹnyanwụn. Okẹn wẹ wụ Ụwaya Hẹtịlọnụ. Ọ gha Lebo-Hamatị rị ẹka-ekpẹn gbasọnmẹ d'e ru Haza-Ẹnanị gbasọnmẹzi d'e ru Damaskọsụ ẹbamịn ọwụwa-ẹnyanwụn. Nke ebọn Danị k'a wụ ohu.

Ebọn Ẹsa Lẹ Alị Wẹ

² “Nke ebọn Asha k'a wụ ohu. Asha lẹ Danị jẹnkọ d'a nọ okẹn, gha ẹbamịn ọwụwa-ẹnyanwụn d'e ru ẹbamịn ọdịdan-ẹnyanwụn.

³ “Nke ebọn Naf'tali k'a wụ ohu. Naf'tali lẹ Asha jẹnkọ d'a nọ okẹn, gha ẹbamịn ọwụwa-ẹnyanwụn d'e ru ẹbamịn ọdịdan-ẹnyanwụn. Nke Naf'tali k'a wụ ohu.

⁴ “Nke ebọn Manasẹ k'a wụzị ohu. Manasẹ lẹ Naf'tali jẹnkọ d'a nọ okẹn, gha ibe ọwụwa-ẹnyanwụn d'e ru ọdịdan-ẹnyanwụn.

⁵ “Nke ebọn Ifrem k'a wụzị ohu. Ifrem lẹ Manasẹ jẹnkọ d'a nọ okẹn, gha ẹbamịn ọwụwa-ẹnyanwụn d'e ru ọdịdan-ẹnyanwụn.

⁶ “Nke ebọn Rubẹni k'a wụzị ohu. Rubẹni lẹ Ifrem jẹnkọ d'a nọ okẹn, gha ẹbamịn ọwụwa-ẹnyanwụn d'e ru ọdịdan-ẹnyanwụn.

⁷ “Nke ebọn Juda k'a wụzị ohu. Juda lẹ Rubẹni jẹnkọ d'a nọ okẹn, gha ẹbamịn ọwụwa-ẹnyanwụn d'e ru ọdịdan-ẹnyanwụn.

Nke Osolobuẹ Lẹ Ndị-ọrụn A

⁸ “Hụn sọn alị Juda k'a wụ ebe ụnụ gi kwanị Osolobuẹ. Nke Juda lẹ nke Osolobuẹ k'a nọ okẹn gha ẹbamịn ọwụwa-ẹnyanwụn d'e ru ẹbamịn ọdịdan-ẹnyanwụn. Ụshịa a k'a wụ maịlị ẹsatọ lẹ ụzọ ohu imẹ ụzọ ẹtọ (8⅓), ya lẹ nke ebọn ohu-ohu k'e suehan; Ụlọ-nsọ k'a rị ahanmahan a.

⁹ “Hụn rịchanrịn etintinnaị imẹ hụnnị ụnụ k'e gi kwanị Osolobuẹ k'a wụ maịlị ẹsatọ lẹ ụzọ ohu imẹ ụzọ ẹtọ (8⅓), ụshịa a k'a wụ maịlị ẹtọ lẹ ụzọ ohu imẹ ụzọ ẹtọ (3⅓).

¹⁰ “Ndị wẹ k'e ye azụụnnị rị nsọ ụnụ k'e ye Osolobuẹ wụ ndị nchụn-ẹjan. Usue ẹ ẹbamịn-ugu lẹ ẹbamịn-ndịdan k'a wụ maịlị ẹsatọ lẹ ụzọ ohu imẹ ụzọ ẹtọ (8⅓), ụshịa a ẹbamịn ọdịdan-ẹnyanwụn lẹ ẹbamịn ọwụwa-ẹnyanwụn k'a wụ maịlị ẹtọ lẹ ụzọ ohu imẹ ụzọ ẹtọ (3⅓). Ụlọ-nsọ Osolobuẹ k'a rị etintinnaị a.

¹¹ Ndị nchụn-ẹjan wẹ sikọ d'e ye ẹ wụ ụmụ Zadọkụ hụn dọnmẹ Iwu m, hụn jụ nị agbakịtọkọ wẹ m azụụn lekẹ ndị Livaị ibe wẹ ogẹn ndị Izrẹlụ gi kpahu.

¹² Ebẹhụ kẹ wẹ k'e ye wẹ, ebe kachanrịn nsọ imẹ hụn rị nsọ wẹ ye Osolobuẹ. Ya lẹ nke ndị Livaị wụlẹni ndị nchụn-ẹjan k'a nọ okẹn.

¹³ “Ndị Livaị wụlẹni ndị nchụn-ẹjan lẹ ndị nchụn-ẹjan k'a nọ okẹn. Usue nke wẹ k'a wụ maịlị ẹsatọ lẹ ụzọ ohu imẹ ụzọ ẹtọ (8⅓), ụshịa a k'a wụ maịlị ẹtọ lẹ ụzọ ohu imẹ ụzọ ẹtọ (3⅓). Ya wụ, usue ẹ ile k'a wụ maịlị ẹsatọ lẹ ụzọ ohu imẹ ụzọ ẹtọ (8⅓), ụshịa a maịlị ẹtọ lẹ ụzọ ohu imẹ ụzọ ẹtọ (6⅔).

¹⁴ “Alịnị kachanrịn mkpa a rị: erekọ wẹ hụn ọwụlẹ imẹ ẹ; aghatarịkọ w'a; ọ bankọ ẹka onyẹ ọzọ; ọ rị nsọ makẹni wẹ gi ẹ kwanị Osolobuẹ.

Ebe Ndị Alị K'e Bi

¹⁵ “Ebe họdụnị, hụn wụ maịlị ẹsatọ lẹ ụzọ ohu imẹ ụzọ ẹtọ (8⅓), ụshịa a maịlị ohu lẹ ụzọ ẹbụọ imẹ ụzọ ẹtọ (1⅔), k'a wụ alị wẹ gi e mẹ ihiẹn mmaka — alị w'e bi lẹ azụụn w'a nọ a kpa anụ k'a rị ebẹhụ. Isi-obodo k'a rị etintinnaị a.

¹⁶ Ẹnịna kẹ isi-obodo k'a han: O k'a wụ maịlị ohu lẹ mkpikpi, maịlị ohu lẹ mkpikpi ẹbamịn-ẹnịnọ: ẹbamịn-ugu, ẹbamịn-ndịdan, ẹbamịn ọwụwa-ẹnyanwụn lẹ ẹbamịn ọdịdan-ẹnyanwụn — k'a wụchanrịn maịlị ohu lẹ mkpikpi.

¹⁷ Ọfịa wẹ k'a nọ a kpa anụ isi-obodo hụ hụn k'a rị a azụụn ẹnịnọ k'a wụ amụkụ mmisẹn kwasị ọgụn-ẹsatọ (175) ẹbamịn ẹnịnọ.

¹⁸ Ebe k'a họdụ imẹ isi-obodo hụ azụụnnị lẹ azụụnnị wụ maịlị ẹtọ lẹ ụzọ ohu imẹ ụzọ ẹtọ (3⅓), ẹbamịn ọwụwa-ẹnyanwụn lẹ ẹbamịn ọdịdan-ẹnyanwụn. Ndịnị ile lẹ azụụn hụ rị nsọ wẹ gi kwanị Osolobuẹ nọsọnmẹ okẹn. Ịya kẹ ndị rị isi-obodo a nọ a rụnrụn ugbo e nwọnhẹn ihiẹn w'e ri.

¹⁹ Onyẹ ọwụlẹ a rụn ugbo bi isi-obodo nwọn ikẹn rụn a otuni ebọn Izrẹlụ ọ gha bịa.

²⁰ “Ya wụ, alịnị ile hụn wụ maịlị ẹsatọ lẹ ụzọ ohu imẹ ụzọ ẹtọ ẹbamịn a ẹnịnọ (8⅓) kẹ ụnụ sikọ d'e gi kwanị Osolobuẹ — kẹ azụụn hụn rị nsọ rịn'a kẹ isi-obodo lẹ ihiẹn ile wụ nke isi-obodo.

Nke Onyẹ-ọkịkị

²¹ “Alị họdụnị wụ nke onyẹ-ọkịkị. Ọ rị azụụnnị lẹ azụụnnị — kẹ ebẹhụ rị nsọ wẹ gi kwanị Osolobuẹ kẹ isi-obodo lẹ ihiẹn ẹ ile rị etintinnaị. Gha okẹn ya lẹ wẹ d'e ru ebe alị Izrẹlụ ru azụụnnị lẹ azụụnnị wụsọnmẹ maịlị ẹsatọ lẹ ohu imẹ ụzọ ẹtọ (8⅓).

²² “Ya wụ, wezụka alị ndị Livaị lẹ isi-obodo ya lẹ ya rị etintin, alịnị ile rị ẹgbata nke Juda lẹ nke Bẹnjamini wụchanrịn nke onyẹ-ọkịkị.

Ebọn Isẹn Họdụnị Lẹ Alị Wẹ

²³ “Nke ebọn isẹn họdụnị: “Nke ebọn Bẹnjamini lẹ hụn ahụn ile wẹ gi kwanị Osolobuẹ jẹnkọ d'a nọ okẹn, gha ẹbamịn ọwụwa-ẹnyanwụn d'e ru ẹbamịn ọdịdan-ẹnyanwụn. Nke Bẹnjamini k'a wụzịkwọ ohu.

²⁴ “Ebọn Simiọnụ lẹ Bẹnjamini jẹnkọ d'a nọ okẹn, gha ẹbamịn ọwụwa-ẹnyanwụn d'e ru ẹbamịn ọdịdan-ẹnyanwụn. Nke Simiọnụ k'a wụ ohu.

²⁵ “Ebọn Isaka lẹ Simiọnụ jẹnkọ d'a nọ okẹn, gha ẹbamịn ọwụwa-ẹnyanwụn d'e ru ẹbamịn ọdịdan-ẹnyanwụn. Nke Isaka k'a wụ ohu.

²⁶ “Ebọn Zẹbulọnụ lẹ Isaka jẹnkọ d'a nọ okẹn, gha ẹbamịn ọwụwa-ẹnyanwụn d'e ru ẹbamịn ọdịdan-ẹnyanwụn. Nke Zẹbulọnụ k'a wụ ohu.

²⁷ “Ebọn Gadị lẹ Zẹbulọnụ jẹnkọ d'a nọ okẹn, gha ẹbamịn ọwụwa-ẹnyanwụn d'e ru ẹbamịn ọdịdan-ẹnyanwụn. Nke Gadị k'a wụ ohu.

²⁸ “Ebọn Gadị k'a rị isi ẹ ẹbamịn-ndịdan. O k'a gha Tama rị ẹka-nni pụ mirin-Mẹriba rị Kadẹshi, ghasọnmẹ pụ Iyi Udu-mirin mkpẹnrẹn Ijiptu, gbasọnmẹ d'e ru Ohimin-uku wụ Mẹditerenia.

²⁹ “Ịya wụ alị ụnụ jẹnkọ d'e keyesọnmẹ ebọn Izrẹlụ ile; o k'a wụ nke wẹ.” Ya kẹ Osolobuẹ Nwọn Ihiẹn Ile ku.

Ọnụ-Mgbọn Mmẹbụọ Rị Isi-obodo

³⁰ “Ndịnị wụ ebe wẹ k'a ghasọnmẹ a banhan, a pụ isi-obodo: “Ẹbamịn-ugu, hụn wụ maịlị ohu lẹ mkpikpi;

³¹ ọnụ-mgbọn ẹtọ k'a rị a azụụnnị: ọnụ-mgbọn Rubẹni, ọnụ-mgbọn Juda lẹ ọnụ-mgbọn Livaị.

³² “Ẹbamịn ọwụwa-ẹnyanwụn, hụn wụzị maịlị ohu lẹ mkpikpi; ọnụ-mgbọn ẹtọ k'a rịzị a: ọnụ-mgbọn Josẹfụ, ọnụ-mgbọn Bẹnjamini lẹ ọnụ-mgbọn Danị.

³³ Ẹbamịn ndịdan wụzị maịlị ohu lẹ mkpikpi; ọnụ-mgbọn ẹtọ k'a rịzị a: ọnụ-mgbọn Simiọnụ, ọnụ-mgbọn Isaka lẹ ọnụ-mgbọn Zẹbulọnụ.

³⁴ “Ẹbamịn ọdịdan-ẹnyanwụn wụzị maịlị ohu lẹ mkpikpi; ọnụ-mgbọn ẹtọ k'a rị a: ọnụ-mgbọn Gadị, ọnụ-mgbọn Asha lẹ ọnụ-mgbọn Naf'tali.

³⁵ “Azụụn ẹnịnọ obodo hụ k'a wụ maịlị isin. Gha ogẹn ahụn jẹnmẹ, ẹfan obodo hụ k'a wụ ‘Osolobuẹ Rị Ebẹhụ.’ ”