Izikẹlụ 47 - Ika

Isi Nke Ẹsa Kwasị Ọgụnnaị Iyi Hụn Gha Ụlọ-nsọ E Hupụha

¹ Okẹnnyẹ ahụn rị a ghọsị m ihiẹn nọ wekinhẹn m imẹ Ụlọ-nsọ, we shi ebe wẹ gha a banye Ụlọ-NSỌ kẹti-kẹti: E lee mirin rị a mụpụha okpuru ọnụmụzọ Ụlọ-NSỌ! Ọ hụ e hushi ibe ọwụwa-ẹnyanwụn, azụụn hụ Ụlọ-NSỌ bu ihun zinmẹ. Nkọ ndịdan Ụlọ-NSỌ k'ọ ghachanrịn rị e hupụha, e hughafezi ukpo nchụn-ẹjan nkọ hụ.

² Okẹnnyẹ hụ nọ gha ọnụ-mgbọn rị ẹbamịn-ugu wepụha m, we m ghahunmẹ d'a pụha ihun ọnụ-mgbọn ibuzọ Ụlọ-nsọ hụn bu ihun zinmẹ ẹbamịn ọwụwa-ẹnyanwụn: e lee mirin nwẹn k'ọ gha nkọ ndịdan ebẹhụ e hupụha ẹkẹrẹ-ẹkẹrẹ.

Ọ Hụ E Miwaye!!

³ Okẹnnyẹ hụ nọ dọn ihun ẹbamịn ọwụwa-ẹnyanwụn, gi ẹgbe o gi a ma ihiẹn makọ jẹnkọ. Ọ mapụ amụkụ ọgụn-mmisẹn kwasị nnụ (700) wụ kubiti nnụ-uku, ọ nọ we m gha imẹ mirin hụ: o ru m olu-ụkụ;

⁴ ọ mazị amụkụ ọgụn-mmisẹn kwasị nnụ, o wezi m gha imẹ mirin hụ: o ru m mkpụkụ; ọ mazị amụkụ ọgụn-mmisẹn kwasị nnụ, o wezi m gha imẹ mirin hụ: o ru m ukun.

⁵ K'ọ mazị nwan amụkụ ọgụn-mmisẹn kwasị nnụ, mirin hụ anịzịnị m gi ụkụ fetu makẹni o miọlẹ — o rugụọ hụn w'e gu, ẹlẹzi hụn wẹ gi ụkụ e fetu.

⁶ Ya k'ọ nọ sị m, “Nwa-ịhịan, y'a hụnghọ ihiẹnni ile?” Ya ọ nọ we m kinhẹn mkpẹnrẹn Iyi hụ.

⁷ E kinhẹn m mkpẹnrẹn Iyi hụ, m nọ hụn osisi bugbu enwẹn wẹ ọda jun Iyi hụ azụụnnị lẹ azụụnnị.

⁸ Ọ nọ sị m, “Mirinni hushikọ ẹbamịn ọwụwa-ẹnyanwụn. O ru, ọ kpọtu shi Ọdanmgbugbu Araba. O k'a gha ebahụn huye Ohimin Nwụnnị; o sikọ d'e mẹ mirin ohimin hụ rị mma.

⁹ Ebe-lẹ-ebe iyini hushi, mirin ọwụlẹ o huye, ihiẹn rị ndụn jẹnkọ d'e jun. Azụn k'a rị a ọda-ọda makẹni mirinni e hubangụọ ebahụn, mirin ohimin rịlẹni mma sikọ d'a rị mma; ebe ọwụlẹ Iyi ahụn huban ihiẹn k'a rị ndụn.

¹⁰ Wẹ k'a gha e gbu azụn imẹ ẹ, ghakwọrị alị Ẹn-Gẹdi d'e ru Ẹn-Ẹglaim, ẹgbẹrẹ hụ ile a wụrụ ebe ndị e gbu azụn a tanmasọnmẹ ọga wẹ gi e gbu azụn. Ụdị azụn bu ọda k'a rị a, nọkẹ ndị hụ rị Ohimin Uku wụ Mẹditerenia.

¹¹ “Kanị alị eje-ẹfịfịa lẹ alị eje-ịkpọtọ ndị rị a la iwi mkpẹnrẹn ohimin ahụn arịkọ mma, nnu e wiwi alị k'e weri wẹ.

¹² “Ụdị osisi ọwụlẹ a mị mkpụrụ w'e ri k'a rị e sue mkpẹnrẹn iyini azụụnnị lẹ azụụnnị. Agbụkọ wẹ ẹhụhụọ, mkpụrụ agụkọ elu wẹ. Ifọn ile kẹ w'e gi a mị mkpụrụ, makẹni mirin wẹ rị a ra gha Ụnọ-NSỌ e hupụha. Mkpụrụ wẹ k'a wụ ihiẹn-oriri, ẹhụhụọ wẹ a wụrụ ọgụn.”

Ebe Alị Izrẹlụ K'a Ghasọnmẹ

¹³ Osolobuẹ Nwọn Ihiẹn Ile sị: “Hụnnị wụ okẹn alị ahụn ụnụ jẹnkọ d'e keni ebọn mmẹbụọ rị Izrẹlụ — nke Josẹfụ hụn sikọ d'a wụ ẹbụọ k'e mẹ wẹ mmẹbụọ.

¹⁴ Ụnụ k'e keni ebọn ile ya ahanmahan. M weshi ẹka elu kun enwẹn m nị m jẹnkọ d'e ye ndị nẹdi ụnụ ya; o jẹnkọ nwan d'a wụrụ ukuu ụnụ.

¹⁵ “Ọnwan wụ okẹn alị hụ: azụụn rị nkọ ẹbamịn-ugu jẹnkọ d'a gha Ohimin-uku wụ Mẹditerenia dọn ihun Hẹtịlọnụ gbasọnmẹ d'e ru Zẹdadị;

¹⁶ ọ pụ Hamatị, pụ Bẹrota, pụzị Sibraim hụn rị ẹgbata Damaskọsụ lẹ Hamatị, ọ gbasọnmẹ d'e rukwọrị Haza-Hatikọnụ hụn ya lẹ Haụranị nọ okẹn.

¹⁷ Ya wụ, o k'a gha Ohimin-uku wụ Mẹditerenia pụ Hazarị-ẹnanị, hụn rị ebẹhụ Damaskọsụ ru ẹbamịn-ugu. Ọ ghazị ebahụn pụ ebe Hamatị ru ẹbamịn-ugu. Ọhụn wụ okẹn ẹ ẹbamịn-ugu.

¹⁸ “Ebe o k'a gha ẹbamịn ọwụwa-ẹnyanwụn jẹnkọ d'a gha ẹgbata Haụranị lẹ Damaskọsụ gbasọnmẹ Iyi-Jọdanị hụn rị ẹgbata Gilẹdị lẹ alị Izrẹlụ, d'a pụ ụsụọ Ohimin Nnu, Ohimin Nwụnnị, hụn rị ẹbamịn ọwụwa-ẹnyanwụn d'e rukwọrị Tama. Ọhụn wụ okẹn ẹ ẹbamịn ọwụwa-ẹnyanwụn.

¹⁹ “Ebe o k'a gha ẹbamịn-ndịdan k'a wụ gha Tama d'e rukwọrị mirin-Mẹriba hụn rị Kadẹshi, ghasọnmẹ Iyi Udu-mirin Ijiptu d'e ru Ohimin-uku wụ Mẹditerenia. Ọhụn wụ okẹn ẹ ẹbamịn-ndịdan.

²⁰ “Ebe o k'a gha ẹbamịn ọdịdan-ẹnyanwụn k'a wụ Ohimin-uku wụ Mẹditerenia d'e rukwọrị ihun Lebo-Hamatị. Ọhụn wụ okẹn ẹ ẹbamịn ọdịdan-ẹnyanwụn.

Kẹ W'a Dọn Ke Alị

²¹ “Ụnụ jẹnkọ d'e keni Izrẹlụ alịnị ebọn-ebọn.

²² Keri n'ẹ — kẹ ụnụ kẹ abịamabịa bi imẹ igunrun ụnụ hụn mụgụ mmụ imẹ igunrun ụnụ. Ụnụ k'e weri wẹ kẹ ụmụ-di-alị Izrẹlụ; wẹ k'e keri alị imẹ ebọn ichẹn-ichẹn rị Izrẹlụ.

²³ Ebọn ọwụlẹ abịamabịa bi kẹ wẹ jẹnkọ d'a nọ keye ẹ alị.” Ya kẹ Osolobuẹ Nwọn Ihiẹn Ile ku.