Izikẹlụ 45 - Ika

Isi Nke Isẹn Kwasị Ọgụnnaị Kẹ Wẹ K'a Dọn Ke Alị Izrẹlụ Ebe Wẹ K'a Latọnị Osolobuẹ

¹ “ ‘Ụnụ jẹnkọnị d'e keye ebọn-ebọn alị, ụnụ e we azụụn ohu kwanị Osolobuẹ. Ebẹhụ ụnụ bepụhan'a a wụrụ Idumu rị nsọ. Usue ẹ k'a wụ maịlị ẹsatọ lẹ ụzọ ohu imẹ ụzọ ẹtọ (8⅓), ụshịa a k'a wụ maịlị isin lẹ ụzọ ẹbụọ imẹ ụzọ ẹtọ (6⅔); ebahụn ile k'a rị nsọ.

² “ ‘Wẹ k'a nọ imẹ hụnnị wẹ gi kwanị Osolobuẹ mapụha azụụn ẹnọ ahanmahan wẹ sikọ d'a tụnye Ụlọ-nsọ. Usue ẹ k'a wụ ụbụkụ mmisẹn kwasị ọgụn ẹtọ kwasị nnụnaị (875), ụshịa a ọbụkụ mmisẹn kwasị ọgụn ẹtọ kwasị nnụnaị (875), e we wẹ ọfịa han kẹ ụzọ ohu imẹ ụzọ iri ẹ chen'ẹ azụụn ile (87½).

³ Imẹ hụnnị wẹ gi kwannị Osolobuẹ, mapụha nị ahanmahan hụn usue ẹ wụ maịlị ẹsatọ lẹ ụzọ ohu imẹ ụzọ ẹtọ (8⅓), ụshịa a wụ maịlị ẹtọ lẹ ụzọ ohu imẹ ụzọ ẹtọ (3⅓). Azụụnnị sikọ d'a rịchanrịn nsọ. Imẹ ẹ kẹ wẹ k'a nọ mapụha ebe wẹ k'a tụnye Ụlọ-nsọ.

⁴ Idumu ndị nchụn-ẹjan wụ azụụnnị rị nsọ hụn wẹ k'a nọ tụn Ụlọ-nsọ; idumu ndị nchụn-ẹjan hụn a rụn ọrụn imẹ Ụlọ-nsọ rọ, ndị nchụn-ẹjan hụn a nọkunmẹ Osolobuẹ a rụnn'a ọrụn. Ya wụ, o k'a wụ ebe ndị nchụn-ẹjan e bi lẹ ebe Ụlọ-nsọ sikọ d'a rị.

⁵ “ ‘Azụụn nọkunmẹ idumu ndị nchụn-ẹjan k'a hanzị kẹ ya: usue ẹ k'a wụ maịlị ẹsatọ lẹ ụzọ ohu imẹ ụzọ ẹtọ (8⅓), ụshịa a, maịlị ẹtọ lẹ ụzọ ohu imẹ ụzọ ẹtọ. O k'a wụ idumu ndị Livaị hụn a rụn ọrụn Ụlọ-nsọ kanị ẹlẹ ịchụn-ẹjan. Ebẹhụ kẹ wẹ k'a tụnyesọnmẹ ụlọ wẹ k'e bi.

⁶ “ ‘Isi-obodo sikọ d'a wụ azụụn mẹ wẹ ẹtọ. Usue ẹ k'a wụ maịlị ẹsatọ lẹ ụzọ ohu imẹ ụzọ ẹtọ (8⅓); ụshịa a wụ maịlị ohu lẹ ụzọ ẹbụọ imẹ ụzọ ẹtọ (1⅔) hụn họdụ imẹ alị ụnụ gi kwanị Osolobuẹ. O k'a wụ nke ndị Izrẹlụ ile.

Alị Wẹ K'e Keye Onyẹ-ọkịkị

⁷ “ ‘Idumu onyẹ-ọkịkị k'a rị azụụnnị lẹ azụụnnị, Idumu-nsọ lẹ Isi-obodo a rị etintinnaị. Ya lẹ wẹ k'a nọ okẹn ibe ọdịdan-ẹnyanwụn lẹ ibe ọwụwa-ẹnyanwụn. Ya wụnị usue Idumu onyẹ-ọkịkị lẹ alị ebọn ohu-ohu k'a wụ ahanmahan — kẹ ebe alị Izrẹlụ ru ibe ọwụwa-ẹnyanwụn kẹ ebe o ru ibe ọdịdan-ẹnyanwụn.

⁸ Ịya k'a wụ nke onyẹ ọkịkị imẹ Izrẹlụ. Ẹlẹzi hụn ndị-ọkịkị m e gi mẹgbu ndị nke m. Ebọn-ebọn rị Izrẹlụ kẹ wẹ k'e keni alị Izrẹlụ.

Iwu Ndị-ọkịkị K'e Dọnmẹ

⁹ “ ‘Osolobuẹ nwọn ihiẹn ile sị: O highọnị ụnụ ndị-ọkịkị Izrẹlụ! Kụsị nị ẹka-ikẹn lẹ mmẹgbu ụnụ! E mẹ ni ihiẹn rị mma lẹ ihiẹn furuni. Anapụzịlẹ ni ndị nke m ihiẹn wẹ. Ya kẹ Osolobuẹ Nwọn Ihiẹn Ile ku.

¹⁰ E gi ni ezigbo mkpu a ma ihiẹn!

¹¹ Adana-ẹfa lẹ tini-batị sikọ d'a wụ ahanmahan. Uwẹ kẹ ụnụ e gi a ma ihiẹn. Wẹ ẹbụbụọ k'a han kẹ azụụn ohu-ohu imẹ drọmụ-homa wẹ ke ụzọ iri; drọmụ-homa kẹ w'e gi lele ihiẹn ile.

¹² Akpụrụ egho shẹkẹlụ k'a wụ akpụrụ-egho nta (gẹra) ọgụn. Shẹkẹlụ ọgụn cheni shẹkẹlụ isẹn-kwasị-ọgụn cheni shẹkẹlụ mmisẹn k'a wụ ẹkpa mina ohu.

Oyiye Ichẹn-ichẹn Ndị Izrẹlụ K'a Gha E Ye

¹³ “ ‘Ọnwan wụ oyiye ụnụ k'a gha a tụ: imẹ ọka-witi k'e jun drọmụ-homa, ụzọ ohu imẹ ọgụn-ẹtọ kẹ ụnụ sikọ d'e ye; ọka-bali k'a wụzị ụzọ ohu imẹ ọgụn-ẹtọ.

¹⁴ “ ‘Nke ofugbọn-olivu, gi ni ogbogoro-batị ma a: imẹ ofigbọn-olivu k'e jun drọmụ-kọrụ, ye ni hụn k'e jun ogbogoro-batị wẹ kebe ụzọ iri. (Drọmụ-kọrụ lẹ drọmụ-homa wụ ogbogoro-batị iri-iri.)

¹⁵ “ ‘Nke atụnrụn, ye ni ohu imẹ ọgụn iri ọwụlẹ wẹ nọ irurue rị alị nwọn mirin ọhụnma-ọhụnma imẹ Izrẹlụ zụn. “ ‘Ihiẹn ndịnị ile kẹ ụnụ sikọ nwan d'e gi e ye oyiye-ọka, a chụn ẹjan w'a dụn ọkụn lẹ ẹjan-ekele, ẹjan ndị wẹ gi a gbarị isi wẹ. Ya kẹ Osolobuẹ Nwọn Ihiẹn Ile ku.

¹⁶ Onyẹ alị Izrẹlụ ọwụlẹ jẹnkọ d'e ye onyẹ-ọkịkị Izrẹlụ oyiyeni.

¹⁷ “ ‘Onyẹ-ọkịkị nwọn wepụha ihiẹn wẹ gi chụn ẹjan w'a dụn ọkụn, oyiye-ọka lẹ oyiye-manya — oyiye ndịnị w'e ye ogẹn Mmẹmmẹ ndị ahụn m tumẹni ụnụ, Ifọn Pụ lẹ Ezumikẹn ichẹn-ichẹn lẹ mmẹmmẹ ile Izrẹlụ e mẹ. Onyẹ-ọkịkị sikọ d'e wẹhẹ ẹjan-njọ lẹ oyiye-ọka lẹ oyiye-manya lẹ ẹjan w'a dụn ọkụn lẹ ẹjan-ekele, nị wẹ gi gbarị isi ndị Izrẹlụ.

Mmẹmmẹ Nsọ

¹⁸ “ ‘Osolobuẹ Nwọn Ihiẹn Ile sị: Ụhụọhịn ibuzọ imẹ ifọn ibuzọ, i sikọ d'e weri nwa okẹn-efin ẹhụ a zu oke, gi jụ Ụlọ-nsọ gi ẹ wepụ a ụrụ.

¹⁹ Onyẹ nchụn-ẹjan k'e weberi ẹdeke anụ hụ wẹ gi chụn ẹjan-njọ deye elu ọnụmụzọ Ụlọ-NSỌ, ntịn ẹnịnọ ukpo nchụn-ẹjan lẹ elu ọnụ-mgbọn ndị rị ezi-ọgwa rị imẹ.

²⁰ Ihiẹn ohu ahụn k'i sikọ d'e mẹzi nke akpọhịn ẹsa imẹ ifọn ibuzọ ahụn — kẹni wẹ gbagharị onyẹ ọwụlẹ ọ rụnahịn mẹ njọ mọbụ onyẹ hụn mẹ njọ bụ ọ marịn, kẹni ụnụ gi ẹ dọnzi Ụlọ-nsọ.

²¹ “ ‘Nke akpọhịn mmẹnọ imẹ ifọn ibuzọ, ụnụ k'e mẹ Mmẹmmẹ-nghafe, ọrọgbọ izuka kẹ ụnụ e gi ri brẹdi yisti rịlẹni.

²² Ụhụọhịn ahụn, onyẹ-ọkịkị sikọ d'e wepụha okẹn-efin w'e gi chụn ẹjan njọ ya lẹ enwẹn ẹ lẹ njọ ndị alị.

²³ Ọrọgbọ akpọhịn ẹsa ahụn wẹ gi e mẹ mmẹmmẹ ahụn, onyẹ-ọkịkị sikọ d'e wẹhẹ okẹn-efin ẹsa lẹ ebulu ẹsa ẹhụ wẹ zu oke ụhụọhịn-ụhụọhịn. Wẹ k'e gi wẹ chụnyeni Osolobuẹ ẹjan w'a dụn ọkụn. O k'e wẹhẹ wẹ lẹ mkpịn wẹ e gi chụn ẹjan-njọ.

²⁴ O k'e yezi oyiye-ọka: adana ọka-bali ohu hụn k'e sọn nwa okẹn-efin ohu lẹ adana ohu hụn k'e sọn ebulu ohu, wẹ lẹ galọnụ ofigbọn-olivu ohu-ohu k'e sọn adana ọka ohu-ohu.

²⁵ “ ‘O ru ifọn nke ẹsa, nke akpọhịn mmisẹn, onyẹ-ọkịkị sikọ d'e wẹhẹsọnmẹ ihiẹn ohu ahụn ụhụọhịn-ụhụọhịn, ọrọgbọ akpọhịn ẹsa, makẹ ẹjan-njọ, ẹjan w'a dụn ọkụn, ẹjan-ọka lẹ ẹjan wẹ gi ofugbọn-olivu a chụn.