Izikẹlụ 44 - Ika

Isi Nke Ẹnọ Kwasị Ọgụnnaị Ọnụ-mgbọn Hụn Wẹ Jẹnkọlẹni D'a Kpọpụ

¹ Okẹnnyẹ hụ rị a ghọsị m ihiẹn nọ wekin m ezi-ọgwa ibuzọ, we m shi ọnụ-mgbọn hụn bu ihun zinmẹ ẹbamịn ọwụwa-ẹnyanwụn. Ọ gụnrụn agụnrụn.

² Osolobuẹ nọ sị m, “Ọnụ-mgbọnni k'a gụnrụnsọnmẹ. Agụnpụkọ w'a; onwọnni onyẹ k'a ghan'a. O k'a gụnrụnsọnmẹ makẹni Osolobuẹ wụ Chuku Izrẹlụ a ghagụọ a banye.

³ Nke eze, eze nwọn ikẹn nọ ọnụ-mgbọn hụ ri ihiẹn-oriri ihun Osolobuẹ. Kanị, o sikọ d'a gha ẹtu-ụlọ rị ihun banhan; ịya k'o k'a ghazị pụ; o fetukọ ẹtu-ụlọ rị azụụn.”

Ndị Jẹnkọlẹni D'a Ban Ụlọ-nsọ

⁴ Ya okẹnnyẹ hụ nọ we m gha ọnụ-mgbọn bu ihun zinmẹ ẹbamịn-ugu, ẹnyi nọ ghahunmẹ, pụha ihun Ụlọ-nsọ. E lee m ẹnya, m nọ hụn a nị ọghọ Osolobuẹ e jungụọ Ụlọ Osolobuẹ! M nọ bu ẹfọ mama alị.

⁵ Osolobuẹ nọ sị m, “Nwa-ịhịan, bu obi i lẹ ẹnya ị lẹ ntịn ị che ihiẹn ile m rị a gwa ị banyeni usọnrọn lẹ iwu ụlọ-Osolobuẹni; kọma ebe wẹ gha a banye Ụlọ-nsọ lẹ ebe ile wẹ gha a pụ ẹnya.

⁶ Sị ndịnị rị e nupụ isi, ndị Izrẹlụ, ‘Osolobuẹ Nwọn Ihiẹn Ile sị: Ndị Izrẹlụ, ebe ụnụ mẹru arụ e higụọ —

⁷ ndị alị ọzọ hụn kwalẹni ugun ẹhụ lẹ obi ụnụ webanhan ụlọ-nsọ m, gi ẹ mẹrụ ebe rị m nsọ ebe ụnụ rị a chụnyeni m ẹjan, ebe ụnụ rị e buye m ihiẹn-oriri m lẹ ụtọrọ lẹ ẹdeke. Ụnụ e tikpọgụọ nkwerigbama m rị ẹgbata mmẹ lẹ ụnụ ghahanị arụ ile ụnụ rị e mẹ.

⁸ Ụnụ ekwọndọnni ihiẹn m ndị rị nsọ ọhụnma; ụnụ e tumẹrindẹ ndị ụnụ tumẹ nị wẹ lepụma ụlọ-nsọ m ẹnya.

⁹ Osolobuẹ Nwọn Ihiẹn Ile sị: Onyẹ alị ọzọ kwalẹni ugun ẹhụ lẹ obi abanyekọ imẹ ụlọ-nsọ m; onyẹ alị ọzọ bidẹ imẹ igunrun ndị Izrẹlụ abanyekọd'a kaka.

Ndị Ebọn Livaị

¹⁰ “ ‘Nke ndị ebọn Livaị ahụn la m tọ ogẹn ahụn ndị Izrẹlụ gi gbakịtọ m azụụn, kpahu, sọnrin mmọn-lẹ-iyi rị ichẹn-ichẹn, wẹ k'e gi isi wẹ buru njọ wẹ.

¹¹ Nị wẹ rụnghọkwọ ọrụn imẹ Ụlọ-nsọ m, wụrụ ndị a rị ọnụ-mgbọn, e jẹnzi ozi Ụlọ-nsọ m; nị wẹ gbuzighọnị ndị alị anụ w'e gi chụn ẹjan w'a dụn ọkụn lẹ ẹjan ndị ọzọ, a rụnnị wẹ ọrụn ndị nọ ẹrịra.

¹² Kanị, ebe o mẹ ni a rụngụọnị wẹ ndị Izrẹlụ ọrụn ihun mmọn ndị hụ wẹ fe, gi ẹ mẹ ndị Izrẹlụ mẹ njọ, e weshigụọ m nwan ẹka elu kun enwẹn m nị wẹ k'e gi isi wẹ buru njọ wẹ. Ya kẹ Osolobuẹ Nwọn Ihiẹn Ile ku.

¹³ Anọkunmẹkọ wẹ m: arụnkọzịnị wẹ m ọrụn ịchụn-ẹjan; anọkunmẹkọ wẹ ihiẹn m ọwụlẹ rị nsọ mọbụ ihiẹn ndị hụ kachanrịn nsọ; ifẹnrẹn lẹ arụ wẹ mẹ k'e sọn wẹ;

¹⁴ ọrụn ilepụ ụlọ-nsọ ẹnya lẹ ọrụn ile w'a rụn imẹ Ụlọ-nsọ sụọ kẹ m rị e buche wẹ ẹka.

Ndị Nchụn-ẹjan Ẹbozo Zadọkụ

¹⁵ “ ‘Kanị ndị nchụn-ẹjan, ndị Livaị ebọn Zadọkụ, kwọnkẹnmẹ ofufe ụlọ-nsọ m ogẹn ndị Izrẹlụ gi la m tọ, kpahu. Uwẹ k'a nọkunmẹ m, rụnnị m ọrụn ịchụn-ẹjan. Uwẹ k'e wuzo ihun m, e wẹhẹni m ụtọrọ lẹ ẹdeke anụ wẹ gi chụn ẹjan. Ya kẹ Osolobuẹ Nwọn Ihiẹn Ile ku.

¹⁶ Uwẹ k'a banhan imẹ Ụlọ-nsọ m; uwẹ k'a nọkunmẹ teburu m, a chụnyeni m ẹjan; uwẹ k'e lepụ ihiẹn m ẹnya.

Iwu Ndị Nchụn-ẹjan K'e Gi Rụn Ọrụn

¹⁷ “ ‘Wẹ banye ọnụ-mgbọn ezi-ọgwa rị imẹ, wẹ yiri ẹkwa linẹni wẹ kebe banye ezi-ọgwa hụ; w'e yikwọlẹ ẹkwa wẹ gi ẹṅẹnrẹn-anụ kpa wẹ gha a rụn ọrụn imẹ ezi-ọgwa rị imẹ-imẹ lẹ imẹ Ụlọ-NSỌ kẹti-kẹti.

¹⁸ Okpu-isi linẹni k'a rị wẹ isi, apa linẹni k'a rị wẹ ukun. W'e yikwọlẹ ihiẹn ọwụlẹ e su ọbanje.

¹⁹ Wẹ pụlanị ezi d'e kunrun ndị mmaka, a gbụpụ wẹ ẹkwa-ọrụn wẹ, butọ imẹ mmughẹ ndị ahụn rị nsọ. E yiri wẹ ẹkwa ọzọ, amamgbe w'a dọ ndị mmaka ye ihiẹn w'a sọ lẹ eje-ihiẹn o k'e buhẹ.

²⁰ “ ‘Akpụnpụkọ wẹ ntutu wẹ, kanị anịkọ wẹ ntutu wẹ suekẹ; wẹ k'a gha e gbubelụa ntutu wẹ.

²¹ Onyẹ nchụn ẹjan arakọ manya banye ezi-ọgwa rị imẹ.

²² Onyẹ nchụn-ẹjan alụkọ okpoho di ẹ nwụn mọbụ okpoho wẹ kpechan; okpoho Izrẹlụ wẹ kelẹni wa ụkụ mọbụ nwunyẹ onyẹ nchụn-ẹjan nwụnnị kẹ wẹ sikọ d'a lụrụ.

²³ Ndị nchụn-ẹjan nwọn kuzi ndị nke m ihiẹn rị ichẹn ẹgbata ihiẹn rị nsọ lẹ ihiẹn-mmaka lẹ ẹgbata ihiẹn rụnị lẹ ihiẹn rụlẹni.

²⁴ “ ‘Ndị nchụn-ẹjan k'a gha e dọnzi oku, e gi iwu m a hannị wẹ eṅẹn. Wẹ k'a gha e gi iwu m lẹ usọnrọn m tumẹni wẹ e mẹ mmẹmmẹ nsọ ichẹn-ichẹn, e dọnmẹ Ụhụọhịn Ezumikẹn m rị ichẹn-ichẹn nsọ.

²⁵ “ ‘Onyẹ nchụn-ẹjan ejẹnkọ ebe onyẹ nwụnnị rị, makẹni o mẹ ẹ, ọ mẹrụgụọ enwẹn ẹ. Kanị omẹni nẹdi ẹ mọbụ nnẹ ẹ rọ, mọbụ nwa a okẹnnyẹ mọbụ okpoho mọbụ nwẹnẹ ẹ okpoho lụlẹni di, n'o saẹka gi ẹ mẹrụ enwẹn ẹ.

²⁶ Ọ fegụ ẹhụ a kẹ m dọn ku, a gụnnị w'a akpọhịn ẹsa o kebe wụbehi onyẹ rụnị.

²⁷ Ụhụọhịn o k'e jẹn ezi-ọgwa rị imẹ, ụhụọhịn o k'a banye azụụn hụ rị nsọ d'a rụn ọrụn, o k'a chụn ẹjan-njọ a. Ya kẹ Osolobuẹ Nwọn Ikẹn Ile ku.

²⁸ “ ‘Ukuu ndị nchụn-ẹjan k'a wụ mmẹ lẹ enwẹn m — mmẹ k'a wụ ukuu wẹ; eyelẹ ni wẹ alị imẹ Izrẹlụ. Mmẹ wụ nke wẹ.

²⁹ Uwẹ nwọn e ri oyiye ọka, ẹjan-njọ lẹ ẹjan-ndọnzi; ihiẹn ile wẹ gi kwanị Osolobuẹ imẹ Izrẹlụ k'a wụ nke wẹ.

³⁰ Hụn buchanrịn ụzọ imẹ ihiẹn-ugbo ibuzọ ile lẹ oyiye ile ụnụ ye k'a wụ nke ndị nchụn-ẹjan. Ụnụ shigụ brẹdi, wepụhagụnị nị ndị nchụn-ẹjan, kẹni ngọzi rị ụlọ ụnụ.

³¹ Onyẹ nchụn-ẹjan erikọ nnụnụ mọbụ anụ ọwụlẹ nwụnhụn ihiẹn ẹka a mọbụ hụn anụ gbu.