Izikẹlụ 43 - Ika

Isi Nke Ẹtọ Kwasị Ọgụnnaị Osolobuẹ E Kinhẹn Imẹ Ụlọ-NSỌ

¹ Okẹnnyẹ ahụn nọ wẹhẹ m ọnụ-mgbọn bu ihun zinmẹ ẹbamịn ọwụwa-ẹnyanwụn:

² e lee ọghọ Chuku Izrẹlụ k'ọ gha ibe ọwụwa-ẹnyanwụn lala. Ụzụn a nọ kẹ okẹn mirin rị e huni, ebe ile hụ e gbuke yeni ọghọ a.

³ Ọ nọchanrịn kẹ hụn m hụn mbụ ogẹn m gi hụn ọhụn ebe m nọ rị Jerusalẹm, ogẹn Chuku gi chọ n'o tikpọ a; ọ nọzị kẹ hụn m hụn mkpẹnrẹn Iyi-Kẹba isi mbidọn. Ya kẹ m nọ bu ẹfọ mama alị.

⁴ Ọghọ Osolobuẹ nọ gha ọnụ-mgbọn bu ihun zinmẹ ẹbamịn ọwụwa-ẹnyanwụn banhan ụlọ-nsọ.

⁵ Ya kẹ Mmọn Osolobuẹ nọ buli m elu, weban m ezi-ọgwa rị imẹ, m nọ hụn nị ọghọ Osolobuẹ jun imẹ Ụlọ-NSỌ.

Iwe Osolobuẹ

⁶ M nọ nụ kẹ olu gha imẹ Ụlọ-NSỌ a gwa m oku. Okẹnnyẹ ahụn rị a ghọsị m ihiẹn turuye m ụsụọ.

⁷ Olu hụ sị m: “Nwa-ịhịan, ọnwan wụ ukpo m lẹ ebe m'a tụkwasị ụkụ. Ebeni kẹ m k'e biri imẹ igunrun ndị Izrẹlụ jẹnrin-ejẹn. Ndị Izrẹlụ emẹrụkọzị Ẹfan nsọ m — kẹ wẹ kẹ ndị-nze wẹ: egikọzị wẹ mmọn ndị hụ wẹ rị a gbasọn lẹ ihiẹn wẹ rị e mẹ ozun ndị-nze wẹ elu-ugu mẹrụ a.

⁸ E bu wẹ ọnụmụzọ wẹ nọkunmẹ ọnụmụzọ m, ẹhụ-ụlọ ohu sụọ nọ rị ẹgbata mmẹ lẹ wẹ; e gi wẹ ụrụ ile wẹ mẹ mẹrụ Ẹfan m rị nsọ, m nọ gi iwe tikpọ wẹ.

⁹ Wẹ gbasọnbehi nwan mmọn ndị hụ wẹ rị a gbasọn kẹ ịgbaraja e mẹ, wepụ ozun ndị-nze wẹ, kẹni m biri imẹ igunrun wẹ jẹnrin ejẹn.

¹⁰ “Yụ nwẹn, Nwa-ịhịan, kọwanị ndị Izrẹlụ kẹ Ụlọ-nsọnị nọ, kẹni ifẹnrẹn njọ wẹ mẹ wẹ. Wẹ lele ihiẹn haịn o gi sikọ d'a rị ẹrịra.

¹¹ Omẹni ifẹnrẹn ihiẹn ile wẹ mẹ e mẹghọ wẹ, y'e mẹ wẹ marịn kẹ Ụlọ-nsọ ahụn k'a nọ — ebe wẹ k'a tụnyesọnmẹ ihiẹn ndị rịn'a, ebe w'a gha a banye lẹ ebe w'a gha a pụ ogẹn ichẹn-ichẹn. Ya wụ, gwa wẹ k'o sikọ d'a rịchanrịn lẹ usọnrọn lẹ iwu ẹ ile. Nọ idẹnya wẹ detu ihiẹn ndịnị kẹni wẹ sọnchanrịn iwu lẹ usọnrọn ẹ ile.

Iwu Ụlọ-nsọ

¹² “Ọnwan wụ iwu Ụlọ-nsọnị: ebe ile fihunmẹn'ẹ elu ugu ahụn ọ rị k'a rịchanrịn nsọ. Ịya wụ iwu Ụlọ-nsọnị.

Ukpo Nchụn-ẹjan

¹³ “Ẹnịna kẹ ukpo nchụn-ẹjan k'a han — ụbụkụ kanị kẹ wẹ gi ma a: uroro-amị ghahunmẹ ukun ẹ hụn ẹdeke e huye, omimi ẹ wụ ụbụkụ ohu lẹ hụn kazị mkpikpi (1¾), ụshịa uroro-amị hụ wụ ụbụkụ ohu lẹ hụn kazị mkpikpi; ebe wẹ gi gbihunmẹ uroro-amị a erugụnị ọbụkụ ohu. O mẹ nke ojijẹn-elu ukpo nchụn-ẹjan ahụn,

¹⁴ gha uroro-amị rị ukun ẹ d'e ru elu agba ibuzọ a wụ ụbụkụ ẹtọ lẹ mkpikpi (3½) — ebe o gi shịakarị hụn rị a elu azụụn ẹnịnọ wụ ụbụkụ ohu lẹ hụn kazị mkpikpi (1¾). Gha elu agba ibuzọnị d'e ru elu nke ẹbụọ wụ ụbụkụ ẹsa — ebe hụnnị gi shịakarị hụn rị a elu hụn wụ ẹnya-mgba wụzị ụbụkụ ohu lẹ hụn kazị mkpikpi (1¾).

¹⁵ Ojijẹn elu ẹnya-mgba ahụn wụ ụbụkụ ẹsa; mpịn ohu-ohu rị a ntịn ẹnịnọ.

¹⁶ Ẹnya-mgba lẹ enwẹn ẹ wụ azụụn ẹnịnọ ahanmahan; usue ẹ lẹ ụshịa a wụ ụbụkụ ohu kwasị ọgụn.

¹⁷ Ebẹhụ ghahunmẹ ukun ẹnya-mgba wụzị ahanmahan azụụn ẹnịnọ: usue ẹ lẹ ụshịa han: ụbụkụ ẹnọ lẹ mkpikpi kwasị ọgụn. Ebe wẹ gi gbihunmẹ ẹ erugụnị ọbụkụ ohu. Uroro-amị a wụ ụbụkụ ohu lẹ hụn kazị mkpikpi azụụn ile. “Mgbanyinrin ukpo nchụn-ẹjan rị a ibe ọwụwa-ẹnyanwụn.”

Kẹ W'a Dọn Ha Ukpo Nchụn-ẹjannị Ye Ẹka Osolobuẹ

¹⁸ Olu hụ rị a gwa m oku nọ sị m, “Nwa-ịhịan, Osolobuẹ Nwọn Ihiẹn Ile sị: Ọnwan wụ usọnrọn w'e gi ha ukpo nchụn-ẹjannị ye ẹka Osolobuẹ ogẹn wẹ k'e gi tụn a, kẹni w'e gi ẹ a chụn ẹjan, e fekpu ẹ ẹdeke:

¹⁹ I k'e we okoro okẹn-efin ye ndị nchụn-ẹjan, ndị ebọn Zadọkụ hụn omẹni uwẹ sụọ wụ ndị ebọn Livaị k'a gha a nọkunmẹ m, a chụnị m ẹjan. Wẹ k'e gi okoro-efin hụ chụn ẹjan-njọ, ya kẹ Osolobuẹ Nwọn Ihiẹn Ile ku.

²⁰ I sikọ d'e weberi ẹdeke efin hụ, deye mpịn ẹnịnọ hụn rị ukpo nchụn-ẹjan ahụn lẹ ụsụọ a ẹnịnọ elu ẹ lẹ ihiẹn wẹ gi gbihunmẹ elu ẹ. Ọhụn kẹ w'e gi jụ a, wepụ a ụrụ.

²¹ I k'e we okẹn-efin ẹjan-njọ hụ pụ, a nọ wẹ ezi Ụlọ-nsọ ebe w'a nọ a dụn a ọkụn dụn a ọkụn, ẹlẹ imẹ Ụlọ-NSỌ.

²² “Nke akpọhịn ẹbụọ, ụnụ e gi mkpịn ẹhụ a zu oke chụn ẹjan-njọ; gi wepụ ụrụ ukpo nchụn-ẹjan, kẹ wẹ dọn gi okẹn-efin hụ jụ a.

²³ I wepụgụ a ụrụ, y'e weri okoro okẹn-efin lẹ nwa-ebulu ẹhụ wẹ zu oke chụn ẹjan.

²⁴ Ụnụ e wẹhẹ wẹ ihun Osolobuẹ, ndị nchụn-ẹjan e fufe wẹ nnu, gi wẹ chụnyeni Osolobuẹ ẹjan w'a dụn ọkụn.

²⁵ “Ọrọgbọ akpọhịn ẹsa k'i sikọ d'a chụn ẹjan-njọ hụ ụhụọhịn-ụhụọhịn — mkpịn ohu lẹ okoro okẹn-efin lẹ nwa-ebulu ẹhụ wẹ zu oke.

²⁶ Ọrọgbọ akpọhịn ẹsa kẹ w'e gi chụn ẹjan wẹ gi e wepụ njọ ukpo nchụn-ẹjan hụ, gi jụ a. Ẹrịra kẹ w'e dọn ha a ye ẹka Osolobuẹ.

²⁷ Akpọhịn ẹsa ahụn zugụ, n'o ru nke akpọhịn ẹsatọ, ndị nchụn-ẹjan a chụnmazịnị ụnụ ẹjan elu ukpo nchụn-ẹjannị kẹ w'e mẹ — ẹjan w'a dụn ọkụn lẹ ẹjan mkpanmịn, ogẹn hụ, a nabanhanzị m ụnụ. Ya kẹ Osolobuẹ Nwọn Ihiẹn ile ku.”