Izikẹlụ 42 - Ika

Isi Nke Ẹbụọ Kwasị Ọgụnnaị Ụlọ Ọzọ Hụn Rị Ẹka-ekpẹn Ụlọ-NSỌ

¹ Ya okẹnnyẹ hụ nọ weri m kin azụụn ezi-ọgwa ibuzọ Ụlọ-nsọ, nkọ ẹbamịn-ugu. Ọ nọ we m shi mmughẹ ndị rị nfetu ezi-ọgwa rị imẹ, nkọ ẹbamịn-ugu Ụlọ-NSỌ. Ụlọ hụn mmughẹ ndịnị rị bu ihun zinmẹ ibẹka ẹbamịn-ugu hụ. Wẹ lẹ ụlọ ọzọ rị ẹbamịn-ugu ebẹhụ bu ihun zinmẹ ibe wẹ.

² Ụlọ ẹbụbụọnị wẹ gha ẹbamịn-ugu a banhan rị ụzọ ohu. Usue wẹ wụ ụbụkụ mmisẹn kwasị ọgụn ẹsatọ (175). Ụshịa a wụ ọbụkụ ẹsa lẹ mkpikpi kwasị ọgụn-ẹnọ (87½).

³ Hụnnị bu azụụn zinmẹ ezi-ọgwa rị imẹ, ebe Ụlọ-NSỌ rị — hụn wẹ gi ụbụkụ mmisẹn kwasị ọgụn e fetu; hụn ẹbọ bu azụụn zinmẹ ezi-ọgwa ibuzọ, ebe mgbankpo ibuzọ rị. Ẹtu-ụlọ rịsọnmẹ hụnnị bu ihun zinmẹ ndị rịsọnmẹ hụn-ẹbọ. Wẹ ẹbụbụọ wụ ụlọ elu agba ẹtọ-ẹtọ.

⁴ Ẹworo-ụzọ rị ihun mmughẹ ndị ahụn, ọnụmụzọ wẹ rị nkọ hụ; ụshịa ẹworo-ụzọ ahụn wụ ụbụkụ mmẹsa lẹ mkpikpi, usue ẹ wụ mmisẹn kwasị ọgụn ẹsatọ (175).

⁵ Mmughẹ ndị rị ibe elu ashịaruni ndị rị alị, makẹni ẹtu-ụlọ ndị rị ibe elu ka ndị rị ibe alị lẹ ndị rị etintin a shịa.

⁶ Ọsụọn'a ụlọ-elu agba ẹtọ rọ, adansụn arịa k'o dọn rị ezi-ọgwa; ya haịn hụn rị elu gilẹni shịahan kẹ ndị rị ibe alị lẹ ndị rị etintin.

⁷ Mgbọn rị ezi, ẹgbata ụlọ-elu hụ mmughẹ ndị hụ rị lẹ ezi-ọgwa ibuzọ; usue ẹ wụ ọbụkụ ẹsa lẹ mkpikpi kwasị ọgụn ẹnọ,

⁸ makẹni ẹrịra kẹ ụlọ-elu hụ suehan azụụn hụ. Kanị nwẹnẹ ẹ hụn bu ihun zinmẹ ẹ hụn ka a nọkunmẹ Ụlọ-NSỌ wụ ụbụkụ mmisẹn kwasị ọgụn ẹsatọ (175).

⁹ Ọnụmụzọ hụ nkọ ọwụwa-ẹnyanwụn ụlọ-elu hụ. Ịya kẹ wẹ gha a banye ẹ omẹni ịhịan gha ezi-ọgwa ibuzọ lala.

Ụlọ Ọzọ Hụn Rị Ẹka-nni Ụlọ-NSỌ

¹⁰ Azụụn hụn ẹbọ, Ẹbamịn ndịdan Ụnọ-NSỌ, mmughẹ rịsọnmẹ ụlọ-elu rịzị arị. Ibẹka hụ, wẹ rịzị nfetu ezi-ọgwa rị imẹ lẹ ihun ụlọ ahụn rị azụụn Ụlọ-NSỌ. Mgbọn rịzị ẹgbata wẹ lẹ ezi-ọgwa rị imẹ;

¹¹ ẹworo-ụzọ w'a gha hụzị ihun wẹ. Wẹ nọ kẹ mmughẹ ndị hụn rị ẹbamịn-ugu: usue wẹ lẹ ụshịa wẹ wụ ohu; ọnụmụzọ wẹ ile wụ ụdị ohu.

¹² Ọnụmụzọ hụzị ẹbamịn ọwụwa-ẹnyanwụn hụn wẹ gha a banye ẹwọrọ ụzọ wẹ gha e ru mmughẹ ndịnị ile rị ẹbamịn ndịdan.

¹³ Ya kẹ okẹnnyẹ ahụn rị a ghọsị m ihiẹn nọ sị m, “Mmughẹ ndịnị rị Ụlọ-NSỌ ẹka-ekpẹn lẹ ẹka-nni wụ mmughẹ nsọ. Imẹ wẹ kẹ ndị nchụn-ẹjan hụn a bịa ebe Osolobuẹ rị d'a rụn ọrụn k'a rị a nọ e ri oyiye ndị ahụn kachanrịn nsọ. Ebahụn kẹ wẹ k'a gha e butọ oyiye ndị ahụn kachanrịn nsọ — hụn wụ oyiye-ọka, ẹjan-njọ lẹ ẹjan-ndọnzi, makẹni ebahụn rị nsọ.

¹⁴ Ndị nchụn-ẹjan lakọ ọrụn gha ebe rị nsọ pụha, abanyekọ wẹ ezi-ọgwa ibuzọ mmanị wẹ gbụpụgụ ẹkwa wẹ yi rụn ọrụn tọ mmughẹ ndịnị, makẹni ẹkwa ndị ahụn rị nsọ. Wẹ yirigụ ẹkwa ọzọ wẹ kebe nọkunmẹ ndị mmaka.”

¹⁵ Ogẹn o gi machanrịngụ Ụlọ-nsọ lẹ ihiẹn ndị rịn'a, ọ nọ gha ọnụ-mgbọn rị ẹbamịn ọwụwa-ẹnyanwụn dupụha m, ọ nọ nwan mahunmẹ ẹ azụụn ile:

¹⁶ O buche ẹgbe hụ o gi a ma ihiẹn, ọ ma a ẹbamịn ọwụwa-ẹnyanwụn, ọ gba ụbụkụ mmisẹn kwasị ọgụn ẹtọ kwasị nnụnaị (875);

¹⁷ o buche ẹgbe hụ o gi a ma ihiẹn, ọ ma a ẹbamịn-ugu, ọ gbazị ụbụkụ mmisẹn kwasị ọgụn ẹtọ kwasị nnụnaị (875).

¹⁸ Ọ ma a ẹbamịn ndịdan, ụbụkụ mmisẹn kwasị ọgụn ẹtọ kwasị nnụnaị rọ (875).

¹⁹ O shi azụụn rị ẹbamịn ọdịdan-ẹnyanwụn. Ọ ma a, ọ gba ụbụkụ mmisẹn kwasị ọgụn ẹtọ kwasị nnụnaị (875).

²⁰ Ọ machanrịn azụụn ẹnịnọ rịn'a. Usue mgbọn ghahunmẹchanrịnn'a wụ ụbụkụ mmisẹn kwasị ọgụn ẹtọ kwasị nnụnaị (875), ụshịa a ụbụkụ mmisẹn kwasị ọgụn ẹtọ kwasị nnụnaị (875). Mgbọn ahụn kebe ebe rị nsọ lẹ ebe wẹ nọ e mẹ ihiẹn mmaka.