Izikẹlụ 41 - Ika

Isi Nke Ohu Kwasị Ọgụnnaị Ebe Rị Nsọ Lẹ Ebe Kachanrịn Nsọ Ebe Rị Nsọ

¹ Okẹnnyẹ ahụn nọ nwan weban m Ebe Rị Nsọ, mmughẹ wẹ e bu ụzọ e ru imẹ Ụlọ-NSỌ. Ọ ma ẹhụ-ụlọ rị ọnụmụzọ a azụụnnị lẹ azụụnnị: ụshịa wẹ wụsọnmẹ ụbụkụ iri lẹ mkpikpi.

² Ọnụmụzọ a wụ ụbụkụ mmẹsa lẹ mkpikpi, ulu ẹhụ-ụlọ ahụn rị ọnụmụzọ a azụụnnị lẹ azụụnnị wụ ọbụkụ ẹsatọ lẹ hụn kazị mkpikpi (8¾). Ọ ma imẹ Ebe Rị Nsọ: usue ẹ wụ ụbụkụ iri kwasị ọgụn ẹtọ, ụshịa a wụ mmisẹn kwasị ọgụn.

Ebe Kachanrịn Nsọ

³ Okẹnnyẹ hụ nọ nwan banye Ebe Kachanrịn Nsọ. Ọ ma ẹhụ-ụlọ rị ọnụmụzọ a azụụnnị lẹ azụụnnị: ulu wẹ wụsọnmẹ ụbụkụ ẹtọ lẹ mkpikpi, usue wẹ wụsọnmẹ ụbụkụ mmẹbụọ lẹ hụn rulẹni mkpikpi (12¼). Ọnụmụzọ a wụ ụbụkụ iri lẹ mkpikpi.

⁴ Ọ ma nwan Ebe Kachanrịn Nsọ; usue ẹ wụ ụbụkụ mmisẹn kwasị ọgụn, ụshịa a wụzị ọbụkụ mmisẹn kwasị ọgụn. Ọ nọ sị m, “Ọnwan wụ Ebe Kachanrịn Nsọ.”

Mmughẹ Rịsọnmẹ Ụsụọ Ụlọ-NSỌ Lẹ Azụụn A

⁵ Ọ nọ ma ẹhụ-ụlọ Ụlọ-NSỌ. Ulu ẹ wụ ụbụkụ iri lẹ mkpikpi. O nwọn mmughẹ ndị rịsọnmẹ Ụlọ-NSỌ azụụnnị lẹ azụụnnị lẹ ibe azụụn, lekẹ osẹn anụ. Usue wẹ lẹ ụshịa wẹ wụsọnmẹ ụbụkụ ẹsa-ẹsa.

⁶ Ụlọ-elu nwọn agba ẹtọ kẹ mmughẹ ndị ahụn rị: ohu rị alị, agba nke ẹbụọ lẹ agba nke ẹtọ rị elu. Wẹ rị mmughẹ iri kwasị ọgụn. O nwọn ebe suepụhasọnmẹ ẹhụ-ụlọ Ụlọ-NSỌ hụn kwọndọn mmughẹ ndịnị; wẹ rụnchanrịn wẹ ye elu ẹkpụ rị ẹhụ-ụlọ hụ, adụpuni wẹ ụsụọ-ẹjan Ụlọ-NSỌ buche wẹ.

⁷ Ụlọ-elu hụ mmughẹ ndị hụ rị gha e jẹnwaye elu, ọ hụ a shịawaye. Ibe elu shịanahịn hụn rị etintin, hụn rị etintin shịanahịn hụn rịchanrịn alị. Ẹrịra k'ọ rị Ụlọ-NSỌ hụ azụụnnị lẹ azụụnnị lẹzi ibe azụụn. Mgbanyinrin wẹ gi e nyin wẹ gha agba rị alị pụ agba etintin pụ hụn rị ibe elu.

⁸ M nọzị hụn nị Ụlọ-NSỌ rị elu mgbankpo hụn shịapụhasọnmẹ azụụn ile, kẹ ya kẹ mmughẹ ndị ahụn rị ụsụọ a. Ojijẹn elu mgbankpo hụ wụ ẹgbe ohu gbegbegbe, ụbụkụ iri lẹ mkpikpi!

⁹ Ulu ẹhụ-ụlọ mmughẹ ndị ahụn rị ụsụọ Ụlọ-NSỌ wụ ụbụkụ ẹsatọ lẹ hụn kazị mkpikpi (8¾). Agbagada rị ẹgbata mmughẹ ndị ahụn

¹⁰ lẹ mmughẹ ndị ọzọ nọchimẹ Ụlọ-NSỌ azụụnnị lẹ azụụnnị lẹ ibe azụụn wụ ụbụkụ mmisẹn kwasị ọgụn.

¹¹ Ọnụmụzọ wẹ gha a banye mmughẹ ndị ahụn rị ụsụọ Ụlọ-NSỌ pụ mgbankpo hụ ọ rị elu ẹ. Ọnụmụzọ ohu rị ẹbamịn-ugu, ohu rị ẹbamịn ndịdan-mirin. Mgbankpo hụ suepụha e suepụha, ụshịa a wụ ọbụkụ ẹsatọ lẹ hụn kazị mkpikpi (8¾). Ẹrịra k'ọ rịchanrịn azụụn ile mmughẹ ndị ahụn rị.

Ụlọ Rị Azụụn Ụlọ-NSỌ

¹² O nwọnzighọ ụlọ rị azụụn Ụlọ-NSỌ. O bu ihun zinmẹ ezi-ọgwa ibe azụụn Ụlọ-NSỌ, ya wụ, ẹbamịn ọdịdan ẹnyanwụn. Ụshịa a wụ ụbụkụ ẹbụọ lẹ mkpikpi kwasị ọgụn isin (122½). Ulu ẹhụ-ụlọ a wụ ụbụkụ ẹsatọ lẹ hụn kazị mkpikpi (8¾) azụụn ile; usue ẹ wụ ụbụkụ mmẹsa lẹ mkpikpi kwasị ọgụn ẹsa (157½).

¹³ Ọ nọ ma Ụlọ-NSỌ: usue ẹ wụ ọbụkụ mmisẹn kwasị ọgụn ẹsatọ (175). Ọ magbama ezi-ọgwa ahụn rị azụụn Ụlọ-NSỌ lẹ ụlọ hụ rị a azụụn lẹzi ụsụọ-ẹjan ụlọ hụ, wẹ ile nọ gbazị ihiẹn ohu hụ — ụbụkụ mmisẹn kwasị ọgụn ẹsatọ.

¹⁴ Ezi-ọgwa rị ihun Ụlọ-NSỌ, ẹbamịn ọwụwa-ẹnyanwụn, wụzị ụbụkụ mmisẹn kwasị ọgụn ẹsatọ (175).

Imẹ Ụlọ-NSỌ

¹⁵ Ọ nọ ma ihun ụlọ ahụn rị ibe azụụn Ụlọ-NSỌ, mazị ẹtu-ụlọ rị a azụụnnị lẹ azụụnnị, ọ gbazị ụbụkụ mmisẹn kwasị ọgụn ẹsatọ. Kẹ ẹtu-ụlọ wẹ gha a pụ ezi-ọgwa kẹ imẹ Ebe Rị Nsọ w'e buzọ e ru

¹⁶ kẹ amanran-ụzọ lẹ windo kẹ ẹhụ-ụlọ ile, osisi kẹ wẹ gi makwama wẹ. Oghe arị windo ndị ahụn, uvun kẹ wẹ wụ.

¹⁷ Wẹ ma ihiẹn ile ama rụn: kẹ elu ọnụmụzọ wẹ gha a ban Ebe Kachanrịn Nsọ kẹ azụụn a kẹ ẹhụ-ụlọ ile rịn'a.

¹⁸ Wẹ tụyesọnmẹ chẹrobu lẹ nkụ ye ẹhụ mmughẹ hụ ile; nkụ rịsọnmẹ ẹgbata chẹrobu ndị ahụn. Chẹrobu ndị ahụn nwọnsọnmẹ ihun ẹbụọ:

¹⁹ ihun ịhịan rịn'a bu zinmẹ nkụ rị azụụn ohu, ihun ẹwọrọ rịn'a e bu zinmẹ nkụ rị azụụn hụn ẹbọ. Wẹ tụ wẹ ye ẹhụ-ụlọ ile rị Ụlọ-NSỌ.

²⁰ Wẹ tụ chẹrobu lẹ nkụ ndị hụ ghagbarị ẹhụ-ụlọ Ebe Rị Nsọ, gha akpakalị d'e ru elu ọnụmụzọ.

²¹ Akp'osisi ọnụmụzọ Ebe rị Nsọ wụ azụụn ẹnọ ahanmahan; hụn wẹ ghazị a banye Ebe Kachanrịn Nsọ yi ẹ e yi.

²² Ukpo nchụn-ẹjan wẹ gi osisi rụn rị a. Ojijẹn elu ẹ wụ ọbụkụ isẹn lẹ hụn rulẹni mkpikpi (5¼), ụshịa a wụ ụbụkụ ẹtọ lẹ mkpikpi. Ukun ẹ lẹ ntịn a lẹ ụsụọ a wụ osisi. Okẹnnyẹ ahụn rị a ghọsị m ihiẹn nọ sị m, “Ọnwan wụ teburu ahụn a rị ihun Osolobuẹ.”

²³ Kẹ Ebe Rị Nsọ kẹ Ebe Kachanrịn Nsọ nwọnsọnmẹ ọnụmụzọ wẹ kịkpama;

²⁴ ọnụmụzọ wẹ ẹbụbụọ nwọnsọnmẹ ẹkwe ẹbụọ-ẹbụọ wẹ nọ etintin wẹ a gụnpụ: ẹkwe ẹbụọ rị ọnụmụzọ ohu, ẹbụọ rị hụn-ẹbọ.

²⁵ Wẹ tụzị chẹrobu lẹ nkụ ye ẹkwe ndị rị ọnụmụzọ Ebe Rị Nsọ kẹ wẹ dọn tụ wẹ ẹhụ-ụlọ ndị ahụn. Wẹ gi osisi rụn okpukpu ihun ọnụmụzọ ẹtu-ụlọ Ụlọ-NSỌ.

²⁶ Wẹ be oghere mẹ wara yesọnmẹ ẹhụ ẹtu-ụlọ hụ azụụnnị lẹ azụụnnị, tụyesọnmẹzi wẹ nkụ. Ẹrịra k'ọ rịzị mmughẹ ndị ahụn rị ụsụọ Ụlọ-NSỌ lẹ ọnụmụzọ.