Izikẹlụ 40 - Ika

Isi Nke Ọgụnnaị Ụlọ-nsọ Ọhụn

¹ Ahụa nke isẹn kwasị ọgụn wẹ kpụnhan ẹnyi Babilọnụ, Osolobuẹ mẹtụ m ẹka, we m shi Jerusalẹm imẹ ọhụn. Nke akpọhịn iri daị imẹ ifọn ibuzọ kẹ ihiẹnni mẹ. Ahụa hụ mẹzi ẹ ahụa mmẹnọ wẹ tikpọ Jerusalẹm.

² Imẹ ọhụn hụ gha ẹka Osolobuẹ bịa, Osolobuẹ nọ we m shi alị Izrẹlụ, bu m che elu-ugu jẹngbu enwẹn ẹ elu. O nwọn ebe nọ kẹ obodo elu ẹ ebẹhụ, ẹbamịn ndịdan.

³ Ọ nọ we m shi ebẹhụ nọ kẹ obodo. E lee okẹnnyẹ ohu rị e nwun goru-goru lekẹ igwe-bronzu! Ụdọ wẹ gi linẹni kpa lẹ ẹgbe wẹ gi a ma ihiẹn hụ a ẹka. O wuzohụ ọnụ-mgbọn wẹ gha a banye ebẹhụ.

⁴ Okẹnnyẹ hụ nọ sị m, “Nwa-ịhịan, shịapụ ẹnya ị lẹ ntịn ị ọhụnma, y'e bu obi che ihiẹn ile m sikọ d'a ghọsị ị, makẹni ya kẹ wẹ wẹhẹni i ebeni — kẹni i hụn ụzọ gwa Izrẹlụ ihiẹn ile i sikọ d'a hụn.”

Mgbọn Ụlọ-nsọ

⁵ A hụn m mgbọn fihunmẹ Ụlọ-nsọ. Usue ẹgbe ahụn okẹnnyẹ hụ gi ẹka wụ ụbụkụ iri lẹ mkpikpi (10½). Ọ nọ ma mgbọn ahụn: ulu ẹ wụ ẹgbe ohu, ojijẹn-elu ẹ wụ ẹgbe ohu.

Ọnụ-mgbọn Ẹnọ Wẹ Gha A Banye Ezi-ọgwa Ibuzọ Ọnụ-mgbọn Rị Ẹbamịn Ọwụwa-ẹnyanwụn

⁶ Ọ nọ shi ọnụ-mgbọn hụn bu ihun zinmẹ ọwụwa ẹnyanwụn. Ọ nọ kẹ ụlọ. O nyinrin mgbanyinrin ẹ. Ọ ma ọnụmụzọ rịchanrịn ihun: ulu ẹ wụ ẹgbe ohu.

Mmughẹ Isin Ndị-nche Lẹ Ebe W'a Gha Etintinnaị Wẹ

⁷ Usue mmughẹ ndị-nche wụsọnmẹ ẹgbe ohu-ohu, ụshịa wẹ wụzịkwọ ẹgbe ohu-ohu. Ẹhụ-ụlọ ndị rị ẹgbata mmughẹ lẹ mmughẹ wụ ụbụkụ ẹsatọ lẹ hụn kazị mkpikpi (8¾). Ulu ọnụmụzọ azụụn shi ẹtu-ụlọ rị ibe azụụn wụzị ẹgbe ohu, ụshịa a ẹgbe ohu.

⁸ Ọ nọ nwan ma ẹtu-ụlọ ahụn rị ibe azụụn: ụshịa a wụ ụbụkụ mmẹnọ.

⁹ Ụshịa ẹtu-ụlọ ahụn wụ ọbụkụ mmẹnọ. Ẹhụ-ụlọ rị a isini lẹ isini, ẹhụ-ụlọ ndị ahụn wụsọnmẹ ọbụkụ ẹtọ lẹ mkpikpi. Ẹtu-ụlọnị rị ibe azụụn pụ ezi-ọgwa ibuzọ rị ụlọ-nsọ.

¹⁰ Mmughẹ ndị nche hụ rị ẹtọ azụụnnị, ẹtọ azụụnnị, ẹworo-ụzọ hụ etintinnaị; mmughẹ ndị ahụn wụchanrịn ahanmahan, ẹhụ-ụlọ rịsọnmẹ ẹgbata wẹ wụzị ahanmahan.

¹¹ Ọ ma ọnụ-mgbọn hụ lẹ enwẹn ẹ, ụshịa a wụ ụbụkụ mmẹsa lẹ mkpikpi, usue ẹworo-ụzọ wụ ụbụkụ ẹbụọ kwasị ọgụn lẹ hụn kazị mkpikpi (22¾).

¹² Ebe wẹ e ṅọndan rịsọnmẹ ihun mmughẹ ndị-nche ndị ahụn. Ojijẹn-elu wẹ lẹ ulu wẹ wụsọnmẹ ọbụkụ ohu-lẹ-mkpikpi, ọbụkụ ohu-lẹ-mkpikpi. Usue mmughẹ ndị ahụn lẹ ụshịa wẹ wụ ahanmahan: ọbụkụ iri lẹ mkpikpi, ọbụkụ iri lẹ mkpikpi.

¹³ Ọ nọ makwama ọnụ-mgbọn, gha isi mmughẹ rị azụụnnị d'e ru isi hụn rị azụụnnị hụn bu ihun zinmẹ ẹ: ụbụkụ ẹtọ kwasị ọgụnnaị lẹ hụn kazị mkpikpi (43¾) rọ.

¹⁴ Ọ ma ojijẹn-elu ẹhụ-ẹjan ọnụ-mgbọn hụ, ojijẹn-elu ẹ wụ ọbụkụ isẹn kwasị ọgụn-isẹn. Ezi-ọgwa ibuzọ hụ w'a gha a abanye e ruzịghọ a azụụnnị lẹ azụụnnị.

¹⁵ Ọnụ-mgbọn hụ ile wụ ụbụkụ ẹsa lẹ mkpikpi kwasị ọgụn ẹnọ, gha ihun d'e ru azụụn a.

¹⁶ Windo ndị shịalẹni rịsọnmẹ ẹhụ-ụlọ mmughẹ ndị-nche hụ lẹ ẹhụ-ụlọ ndị rị ẹgbata wẹ. Ẹrịra kẹ wẹ rịsọnmẹ ẹhụ-ụlọ ọnụ-mgbọn hụ ile lẹ ẹtu-ụlọ a. Wẹ seyesọnmẹ nkụ ẹhụ-ụlọ ndị ahụn.

Ezi-ọgwa Ibuzọ Lẹ Mmughẹ Ndị Rị Mgbankpo

¹⁷ Okẹnnyẹ hụ rị a ghọsị m ihiẹn nọ nwan gha ọnụ-mgbọn ahụn webanhan m ezi-ọgwa hụ w'e bu ụzọ e ru imẹ Ụlọ-nsọ. Elee mmughẹ-mmughẹ lẹ mgbankpo wẹ rụn ghahunmẹ ezi-ọgwa hụ ile ohi-ohi! Mmughẹ iri-kwasị-ọgụn kẹ wẹ rụnye elu mgbankpo hụ.

¹⁸ Mgbamkponi rịsọnmẹ ọnụ-mgbọn Ụlọ-nsọ azụụnnị lẹ azụụnnị; ebe ọnụ-mgbọn ndị ahụn sueru kẹ wẹ sueru. Kanị, mgbamkponi ka alị a lụa.

¹⁹ Ọ nọ ma ezi-ọgwa ibuzọ, ya wụ ẹgbata ọnụ-mgbọn ibuzọ, hụn ka alị a lụa, hụn ẹnyi gha nwan banhan lẹ ọnụ-mgbọn nke ẹbụọ hụn shi ezi-ọgwa rị imẹ: ụbụkụ mmisẹn kwasị ọgụn ẹsatọ (175). Nke ẹbamịn ọwụwa ẹnyanwụn a gụ. O ru nwan hụn sikọ ẹbamịn-ugu.

Ọnụ-mgbọn Rị Ẹbamịn Ugu

²⁰ Okẹnnyẹ hụ nọ nwan ma usue lẹ ụshịa ọnụ-mgbọn hụn bu ihun zinmẹ ẹbamịn-ugu, hụn wẹ ghazị a banhan ezi-ọgwa ibuzọ.

²¹ Mmughẹ ẹtọ-ẹtọ rịzị azụụnnị lẹ azụụnnị imẹ ẹ; ẹhụ-ụlọ rịsọnmẹ ẹgbata mmughẹ lẹ mmughẹ; ẹtu-ụlọ rị a ihun lẹ azụụn. Ya lẹ ọnụ-mgbọn ibuzọ hụ wụ ahanmahan: usue ẹ wụ ụbụkụ ẹsa lẹ mkpikpi kwasị ọgụn-ẹnọ; ụshịa a, ụbụkụ ẹtọ kwasị ọgụnnaị lẹ hụn kazị mkpikpi (43¾).

²² Kẹ windo ẹ kẹ ẹtu-ụlọ a rị a ihun lẹ azụụn kẹ nkụ wẹ seyesọnmẹ ẹ, wẹ lẹ ndị rị ọnụ-mgbọn bu ihun zinmẹ ibe ọwụwa-ẹnyanwụn wụchanrịn ahanmahan. Mgbanyinrin nwọn agba ẹsa kẹ wẹ gi e nyinrin ẹ wẹ kebe ru ẹtu-ụlọ rị ihun ẹ.

²³ Ọnụ-mgbọnni e nwọnzighọ hụn bu ihun zinmẹ ẹ, hụn pụ ezi-ọgwa rị imẹ-imẹ, lekẹ kẹ ọnụ-mgbọn rị ẹbamịn ọwụwa-ẹnyanwụn dọn nwọn. Okẹnnyẹ hụ nọzị ma ezi-ọgwa ibuzọ nkọnị, ẹgbata ọnụ-mgbọn ẹbụbụọnị: ọ rịzị ụbụkụ mmisẹn kwasị ọgụn ẹsatọ (175).

Ọnụ-Mgbọn Rị Ẹbamịn Ndịdan

²⁴ Ya okẹnnyẹ hụ nọ we m shi ẹbamịn ndịdan. E lezi ọnụ-mgbọn azụụn hụ! Ọ nọ ma ẹhụ-ụlọ rịsọnmẹ ẹgbata mmughẹ lẹ mmughẹ lẹ ẹtu-ụlọ rị a ihun lẹ azụụn: wẹ lẹ ndị ibuzọ wụ ahanmahan.

²⁵ Windo rịchanrịn a kẹ ẹtu-ụlọ kẹ ẹhụ ile k'o dọn rị ndị ibuzọ. Usue ẹ wụ ụbụkụ ẹsa lẹ mkpikpi kwasị ọgụn-ẹnọ, ụshịa a ụbụkụ ẹtọ kwasị ọgụnnaị lẹ hụn kazị mkpikpi (43¾).

²⁶ Mgbanyinrin ọnwan nwọnzi agba ẹsa wẹ gi e nyinrin ẹ wẹ kebe ru ẹtu-ụlọ rị a ihun; wẹ sesọnmẹ nkụ ye ẹhụ-ụlọ rịsọnmẹ ẹgbata mmughẹ ndị rịn'a azụụnnị lẹ azụụnnị.

²⁷ Ọnụ-mgbọnni e nwọnzighọ hụn bu ihun zinmẹ ẹ hụn pụ ezi-ọgwa rị imẹ-imẹ. Okẹnnyẹ hụ nọzị ma ezi-ọgwa ibuzọ hụn rị nkọnị, ẹgbata ọnụ-mgbọn ẹbụbụọnị: ụbụkụ mmisẹn kwasị ọgụn ẹsatọ (175) rọzị.

Ọnụ-mgbọn Ẹnọ Wẹ Gha A Banye Ezi-ọgwa Rị Imẹ Ọnụ-mgbọn Ẹbamịn Ndịdan

²⁸ Ya kẹ okẹnnyẹ hụ nọ nwan gha ọnụ-mgbọn ahụn pụ imẹ-imẹ hụn rị ẹbamịn-ugu webanhan m ezi-ọgwa rị imẹ-imẹ. Ọ nọ ma ọnụ-mgbọnni: ya lẹ ndị ọzọ wụ ahanmahan.

²⁹ Mmughẹ ndị rịn'a, ẹhụ-ụlọ hụn rịsọnmẹ ẹgbata wẹ lẹzi ẹtu-ụlọ rị a ihun lẹ azụụn lẹ ndị hụn-ẹbọ wụzị ahanmahan. Windo hụzị ọgwa a ẹhụ ile. Usue ọnụ-mgbọnni wụzị ụbụkụ ẹsa lẹ mkpikpi kwasị ọgụn-ẹnọ, ụshịa a wụzị ụbụkụ ẹtọ kwasị ọgụnnaị lẹ hụn kazị mkpikpi (43¾).

³⁰ Usue ẹtu-ụlọ ndị rị a ihun lẹ azụụn wụsọnmẹ ụbụkụ ẹsatọ lẹ hụn kazị mkpikpi, ụshịa wẹ wụ ụbụkụ ẹtọ kwasị ọgụnnaị lẹ hụn kazị mkpikpi (43¾).

³¹ Ẹtu-ụlọ rị ihun bu ihun zinmẹ ezi-ọgwa ibuzọ. Wẹ seyezi nkụ ẹhụ-ụlọ ndị rịn'a. Agba ẹsatọ kẹ mgbanyinrin wẹ gi e nyinrin hụnnị nwọn.

Ọnụ-mgbọn Ẹbamịn Ọwụwa-ẹnyanwụn

³² Ọ nọ webanhan m ezi-ọgwa rị imẹ-imẹ ghahanị ẹbamịn ọwụwa-ẹnyanwụn a. Ọ ma ọnụ-mgbọn ẹ rị ẹbamịn hụ: ya lẹ ndị hụn-ẹbọ wụ ahanmahan.

³³ Kẹ mmughẹ ndị rịn'a kẹ ẹhụ-ụlọ rịsọnmẹ ẹgbata wẹ kẹ ẹtu-ụlọ rị a ihun lẹ azụụn — wẹ ile lẹ ndị rị ọnụ-mgbọn hụn-ẹbọ wụ ahanmahan. Windo rịzị ẹtu-ụlọ a lẹ mmughẹ ile rịn'a. Usue ẹ wụ ụbụkụ ẹsa lẹ mkpikpi kwasị ọgụn-ẹnọ, ụshịa a wụ ụbụkụ ẹtọ kwasị ọgụnnaị lẹ hụn kazị mkpikpi (43¾).

³⁴ Ẹtu-ụlọ rị ihun bu ihun zinmẹ ezi-ọgwa ibuzọ; wẹ seyezi nkụ ẹhụ-ụlọ ndị hụ suepụha a ihun azụụnnị lẹ azụụnnị. Agba ẹsatọ kẹ mkpọnyin wẹ gi e nyinrin hụnnị nwọnzikwọ.

Ọnụ-mgbọn Ẹbamịn Ugu

³⁵ Ọ nọ wẹhẹ m ọnụ-mgbọn rị nkọ ẹbamịn-ugu hụn wẹ ghazị a banhan ezi-ọgwanị rị imẹ-imẹ. Ọ ma a: ya lẹ ọnụ-mgbọn ndị hụn-ẹbọ wụ ahanmahan.

³⁶ Mmughẹ ndị rịn'a, ẹhụ-ụlọ hụn rịsọnmẹ ẹgbata wẹ lẹ ẹtu-ụlọ rị a ihun lẹ azụụn lẹ ẹhụ-ụlọ rị ndị ọzọ wụ ahanmahan. Windo rịsọnmẹ ẹ ẹhụ ile. Usue ẹ wụzị ụbụkụ ẹsa lẹ mkpikpi kwasị ọgụn-ẹnọ, ụshịa a wụzị ụbụkụ ẹtọ kwasị ọgụnnaị lẹ hụn kazị mkpikpi (43¾).

³⁷ Ẹtu-ụlọ rị ihun ẹ bu ihun zinmẹ ezi-ọgwa w'e bu ụzọ e ru; wẹ seyezi nkụ ẹhụ-ụlọ ndị hụ suepụha a ihun azụụnnị lẹ azụụnnị. Agba ẹsatọ kẹ mkpọnyin wẹ gi e nyinrin hụnnị nwọnzikwọ.

Mmughẹ Wẹ Nọ A Kwademẹ Anụ Wẹ Gi A Chụn Ẹjan

³⁸ Mmughẹ w'a nọ a chanchan ẹjan w'a dụn ọkụn rịsọnmẹ ọnụ-mgbọn ndịnị shi ezi-ọgwa rị imẹ-imẹ. Ọnụmụzọ wẹ rị ẹtu-ụlọ ọnụ-mgbọn ndịnị.

³⁹ Kanị, imẹ ẹtu-ụlọ hụ wẹ gha a banye, teburu ẹbụọ-ẹbụọ rị azụụnnị lẹ azụụnnị. Elu teburu ndị hụ kẹ wẹ nọ e gbu anụ wẹ gi a chụn ẹjan w'a dụn ọkụn, ẹjan-njọ lẹ ẹjan ndọnzi.

⁴⁰ Kanị teburu ẹbụọ-ẹbụọ hụzị azụụnnị lẹ azụụnnị ihun ọnụ-mgbọnni, ẹka-nni lẹ ẹka-ekpẹn onyẹ nyinkọ mgbanyinrin shikọ ẹtu-ụlọ ọnụ-mgbọnni.

⁴¹ Ya wụ, teburu ẹnọ rị azụụnnị, ẹnọ azụụnnị: wẹ ile rị teburu ẹsatọ hụn wẹ nọ e gbu anụ wẹ gi a chụn ẹjan.

⁴² O nwọnghọzị teburu ẹnọ ọzọ gbashịarị ẹjan w'a dụn ọkụn. Ogbe ọmụma kẹ wẹ gha bepụha teburu ẹnọnị. Usue lẹ ụshịa wẹ wụsọnmẹ ụbụkụ ẹbụọ lẹ mkpikpi, ojijẹn-elu wẹ wụ ụbụkụ ohu lẹ hụn kazị mkpikpi. Elu wẹ kẹ w'e dọnmẹzi ihiẹn ndị wẹ gi e gbu anụ ndị wẹ gi a chụn ẹjan w'a dụn ọkụn lẹ ẹjan ndị ọzọ.

⁴³ Wẹ buchesọnmẹ mkpụkpọ ndị suehan kẹ ubẹka ẹhụ-ụlọ ile mmughẹ hụ. Elu teburu ndị ahụn kẹ w'e butọ anụ wẹ gi chụn ẹjan.

Ezi-ọgwa Rị Imẹ-imẹ Lẹ Ụlọ-NSỌ Lẹ Enwẹn Ẹ Mmughẹ Ndị Nchụn-ẹjan

⁴⁴ Okẹnnyẹ hụ nọ nwan gha ọnụ-mgbọn webanhan m ezi-ọgwa rị imẹ-imẹ. Mmughẹ ẹbụọ rị ezi-ọgwanị rị imẹ-imẹ. Ohu rị ụsụọ ọnụ-mgbọn ẹbamịn-ugu, o bu ihun zinmẹ ẹbamịn ndịdan. Hụn ẹbọ rị ụsụọ ọnụ-mgbọn ẹbamịn ndịdan, o bu ihun zinmẹ ẹbamịn-ugu.

⁴⁵ Ọ nọ sị m, “Mmughẹ hụn bu ihun zinmẹ ẹbamịn-ugu wụ nke ndị nchụn-ẹjan hụn e lepụ Ụlọ-NSỌ ẹnya.

⁴⁶ Mmughẹ hụ bu ihun zinmẹ ẹbamịn ndịdan wụ nke ndị nchụn-ẹjan hụn e lepụ ukpo nchụn-ẹjan ẹnya. Ndịnị wụ ụmụ Zadọkụ. Uwẹ sụọ wụ ndị ebọn Livaị sikọ d'a nọkunmẹ Osolobuẹ d'a rụnn'a ọrụn.”

⁴⁷ Ya ọ nọ ma ezi-ọgwa ahụn rị imẹ-imẹ. Usue ẹ lẹ ụshịa a wụ ahanmahan: usue ẹ wụ ụbụkụ mmisẹn kwasị ọgụn ẹsatọ (175), ụshịa a, ụbụkụ mmisẹn kwasị ọgụn-ẹsatọ (175). Ukpo nchụn-ẹjan Osolobuẹ hụ ezi-ọgwanị ihun Ụlọ-NSỌ.

Ẹtu-ụlọ Ụlọ-NSỌ

⁴⁸ O wẹhẹ m Ẹtu-ụlọ Ụlọ-NSỌ. Ẹhụ-ụlọ rị a isini lẹ isini; ọ ma ulu ẹhụ-ụlọ ẹbụbụọ hụ: ulu wẹ wụsọnmẹ ụbụkụ ẹsatọ lẹ hụn kazị mkpikpi. Ụshịa ọnụmụzọ Ụlọ-NSỌ wụ ụbụkụ ẹnọ lẹ mkpikpi kwasị ọgụn. Ihun ẹhụ-ụlọ azụụnnị lẹ azụụnnị wụ ụbụkụ isẹn lẹzi hụn rulẹni mkpikpi.

⁴⁹ Usue Ẹtu-ụlọ hụ lẹ enwẹn ẹ wụ ụbụkụ mmisẹn kwasị ọgụn, ụshịa a wụ ụbụkụ ohu kwasị ọgụn; agba iri kẹ mgbanyinrin wẹ gi e nyinrin Ẹtu Ụlọ-NSỌ nwọn. Adansụn ohu-ohu turu azụụnnị lẹ azụụnnị.