Izikẹlụ 4 - Ika

Isi Nke Ẹnọ Izikẹlụ Ghọsị Wẹ Ihiẹn Rị E Mẹ Jerusalẹm

¹ “Nwa-ịhịan, weri ihiẹn shịa pata wẹ gi ụrụa kpụ; bu ẹ tọ ihun i, y'e se obodo Jerusalẹm ye elu ẹ.

² Mẹ ẹ kẹ wẹ e mẹ obodo wẹ kehunmẹ: kpụyesọnmẹ ẹ ihiẹn wẹ gi e kehunmẹ obodo — kẹ mkpọnyin wẹ gi e fe mgbọn obodo hụ kẹ ebe ndị-agha ziẹntọ kẹ ihiẹn ndị wẹ gi a kụtu mgbọn.

³ Y'e bu ugbugbẹ wẹ gi e ghe ihiẹn che, n'ọ wụrụ mgbọn ẹgbata yụ lẹ obodo Jerusalẹm hụ i se; y'e bu ihun zinmẹ ẹ, ọ wụrụ obodo ndị iṅẹnrẹn kehunmẹ. M sikọ d'e gi ihiẹnni gwa ikpụlọ-Izrẹlụ oku.

⁴ “Gi nwan nkọ ẹka-ekpẹn i dinẹ, y'e bu njọ ikpụlọ Izrẹlụ Ẹbamịn-ugu che nkọ hụ; i k'e bu njọ wẹ ọrọgbọ akpọhịn ole hụ i k'e gi nkọ hụ dinẹ.

⁵ Akpọhịn ole m tumẹ y'e gi dinẹ ẹrịra wụ ahụa ole wẹ mẹ njọ. Akpọhịn iri-arịa-nnụ (390) rọ, ịya wụ akpọhịn ole i k'a ta afụnfụn-njọ ikpụlọ Izrẹlụ Ẹbamịn-ugu.

⁶ “I mẹgụ ọhụn, y'e dinẹ nkọ ẹka-nni i gi tazịkwọ afụnfụn njọ ndị ikpụlọ Juda. Akpọhịn ọgụnnaị kẹ m tumẹ y'e gi mẹ ẹ: akpọhịn ohu sikọ d'a nọkin ẹnya ahụa ohu.

⁷ “I sikọ d'e bu ihun zinmẹ ibẹka Jerusalẹm hụ i se wẹ rị e kehunmẹ, fụma ẹka ẹwuru i, e bu amụma ihiẹn m sikọ d'e mẹ ẹ.

⁸ “M jẹnkọ d'e gi eriri kẹn i makẹ ị gha asẹka e hutọ nkọ i dinẹ d'e ru mgbe i nọzu akpọhịn ole hụn i k'e kehunmẹ Jerusalẹm okehunmẹ hụ i gi a ghọsị wẹ ihiẹn.

⁹ “Weri ọka-witi lẹ ọka-bali lẹ ẹgwa mmaka lẹ ẹgwa-lẹntilụ lẹ ọka-milẹtị lẹ ọka-spẹtị; bu wẹ dọnmẹ imẹ ihiẹn, y'e gi wẹ e mẹmẹrin brẹdi i k'a gha e ri ọrọgbọ akpọhịn iri-arịa-nnụ hụ i k'e dinẹ nkọ.

¹⁰ “Ụhụọkịn-ụhụọkịn, e weri ẹkẹrẹ ihiẹn-oriri hụn jẹnkọlẹni d'e jun ọb'ẹka e ri; e nwọnzikwọ ogẹn i gi e ri ẹ.

¹¹ A chụnrụnzịkwọ mirin karịlẹni ọgọ-nta ẹbụọ a ra; e nwọnzikwọ ogẹn i gi a ra a.

¹² Gi nsịn ịhịan kpọ nkụn fiye ọkụn, y'a nọ idẹnya ịhịan ile gi ẹ shi ihiẹn-oriri ọka-bali hụ, ri.”

¹³ Osolobuẹ nọzị sị, “Ẹrịra kẹ ndị Izrẹlụ k'a dọn ri ihiẹn-oriri rụnị imẹ alị ndị hụ m chụshikọ wẹ.”

¹⁴ M nọ sị, “Euu, Osolobuẹ ihiẹn ile rị okpuru ẹ! Emẹrụtukwọnị m enwẹn m. Gha alị lala, erituni m anụ nwụn ihiẹn ẹ mọbụ hụn anụ gbu; onwọnni anụ ọwụlẹ Iwu sị ẹnyi sọ bantu m ọnụ!”

¹⁵ Osolobuẹ nọ sị m, “Ọ hụ nwan mma: la nwan nsịn ịhịan tọ; gi nsịn efin shi ihiẹn-oriri i ahụn.”

¹⁶ Ọ nọzị sị, “Nwa-ịhịan, m jẹnkọ d'e mẹ ihiẹn-oriri kọ ọda-ọda imẹ Jerusalẹm. Wẹ k'a gha a tụberi ihiẹn-oriri e ri, e hue uhue n'o d'a gụ; wẹ k'a gha a tanrịn mirin a ra, obi hụ e feri wẹ n'o d'a gụ,

¹⁷ makẹ okẹn ụkọ ihiẹn-oriri lẹ mirin jẹnkọ d'a rịnị. Onyẹ lee ibe ẹ, egun a tụma a; wẹ k'e fiechanrịn ẹhụ yeni njọ wẹ rị e gbuni wẹ.