Izikẹlụ 39 - Ika

Isi Nke Mmitenẹi Kwasị Ọgụn Ihiẹn Osolobuẹ K'e Mẹ Gọgụ Lẹ Alị A Wụ Magọgụ

¹ “Nwa-ịhịan, bu amụma ihiẹn k'e mẹ Gọgụ. Sị, Osolobuẹ Nwọn Ihiẹn Ile sị, ‘Gọgụ eze Roshi lẹ Tubalụ-Mẹshẹki, mmẹ lẹ yụ rọ!

² M k'e sehutọ ị, gha alị hụ tegbu enwẹn ẹ rị ẹbamịn-ugu dọkpụnhan ị ugu ndị rị alị Izrẹlụ d'a lụsọn wẹ agha.

³ A fịantu m ụta rị ị ẹka-ekpẹn, mẹzikwọ ọbara-ụta rị ị ẹka-nni dannahịn ị.

⁴ Elu ugu Izrẹlụ ebẹhụ k'i k'a nwụntọ, yụ lẹ ndị-agha ị ile lẹ ndị alị ọzọ hụ yụ lẹ wẹ wị. E we m ozun i ye nnụnụ e ri anụ lẹ nnụnụ ndị ọzọ lẹ anụmanụ rị ọfịa nị wẹ ri.

⁵ Elu ẹfịfịa ebẹhụ k'ị k'a nwụntọ. E kugụọ m'a. Ya kẹ Osolobuẹ Nwọn Ihiẹn Ile ku.

⁶ M k'e zi ọkụn ye alị Magọgụ lẹ alị ndị hụ ẹhụ fu rị mkpẹnrẹn ohimin ibẹka hụ, e gi w'ẹ marịn nị mmẹ wụ Osolobuẹ.

⁷ M k'e gi ẹ mẹ ndị nke m wụ Izrẹlụ marịn nị ẹfan m rị nsọ. Anịkọzị m ịhịan legberi ẹfan-nsọ m. Alị ndị ọzọ k'e gi ẹ marịn nị mmẹ, Osolobuẹ, wụ Onyẹ-nsọ Izrẹlụ.

⁸ E lee ẹ k'ọ lala! O k'e mẹrịrị! Ya kẹ Osolobuẹ Nwọn Ihiẹn Ile ku. Ụhụọhịn ahụn m ku oku ẹ rọ.

⁹ “ ‘Ogẹn ahụn, ndị bi obodo ndị rị Izrẹlụ k'e gi ihiẹn-ọgụn ndị agha Gọgụ latọsọnmẹ a fiye ọkụn — kẹ akpaịn uku kẹ ndị nta, kẹ ụta kẹ ọbara-ụta, kẹ ẹgbe-agha wẹ kẹ obo. Wẹ k'e gi wẹ fiye ọkụn ọrọgbọ ahụa ẹsa.

¹⁰ Ẹlẹzi hụn w'e gi e jẹn ugbo d'a kpa nkụn mọbụ jẹn ẹgboko d'e gbugiri nkụn, makẹni wẹ k'a gha e gi ihiẹn-ọgụn ndị hụ a fiye ọkụn. Wẹ k'e gbukwarị ndị gbu wẹ kwarị ihiẹn wẹ, kpọnrin ihiẹn ndị kpọnnarịn wẹ ihiẹn wẹ. Ya kẹ Osolobuẹ Nwọn Ihiẹn Ile ku.

¹¹ “ ‘M k'e wepụha ebe wẹ k'e liye Gọgụ imẹ alị Izrẹlụ ebẹhụ, imẹ ọdanmgbugbu hụ ndị-ijẹn a gha, hụn rị ẹbamịn ọwụwa-ẹnyanwụn Ohimin. Ịhịan a hụnkọzị ụzọ gha, makẹni wẹ k'e li Gọgụ lẹ igunrun ndị nke ẹ ile ye ebẹhụ. Wẹ k'a kpọma a Ọdanmgbugbu Hamọnụ-Gọgụ, Ọdanmgbugbu Igunrun-Gọgụ.

¹² “ ‘Izrẹlụ k'e li ozun wẹ kẹni ọ rụbehi alị. Ọrọgbọ ifọn ẹsa kẹ wẹ k'e gi li wẹ.

¹³ Ndị alị Izrẹlụ ile k'e li wẹ. Izrẹlụ k'e gi ẹ nwọnrin ẹfan ụhụọhịn hụ m k'e mẹ ihiẹnni gi nwọnrin ọghọ. Ya kẹ Osolobuẹ Nwọn Ihiẹn Ile ku.

¹⁴ “ ‘Ifọn ẹsa hụ ghagụ, e tumẹ wẹ ndị k'a ghahunmẹmẹ alị, e li ndị họdụ alị, kẹni wẹ wepụ ọkpụkpụ wẹ rị e mẹ alị a rụ.

¹⁵ Ndị ahụn k'a rị a ghahunmẹ alị, a chọ ọkpụkpụ ịhịan. Onyẹ hụn ọkpụkpụ, ọ rụ mkpịnsịn ye ebe ọ rị d'e ru mgbe wẹ li ẹ ye Ọdanmgbugbu Hamọnụ-Gọgụ.

¹⁶ Ẹrịra kẹ wẹ k'a dọn wepụ ọkpụkpụ wẹ rị a rụ alị. “ ‘Ẹfan obodo hụ k'a wụzịkwọ Igunrun.’

¹⁷ “Nwa-ịhịan, Osolobuẹ Nwọn Ihiẹn Ile sị: Hị nnụnụ ile rị ichẹn-ichẹn lẹ anụ-ọfịa ile, sị wẹ ‘Zu ni! Gha nị ebe-lẹ-ebe ụnụ rị zugbama d'e ri oriri hi ogbe m rị a kwademẹni ụnụ elu ugu alị Izrẹlụ. D'e ri ni anụ, ra ẹdeke;

¹⁸ ụnụ e ri anụ ndị odogun-agha Gọgụ, ra ẹdeke ndị-isi alị a — wẹ ile du kẹ ebulu lẹ mmụ-atụnrụn lẹ ewu lẹ okẹn-efin, ezigbo anụ ẹgbẹrẹ Bashanị;

¹⁹ ụnụ e ri ụtọrọ anụ rijun ẹfọ, ra ẹdeke, ọ tụma ụnụ — makẹni wẹ ile wụ oriri hụn m rị a kwademẹni ụnụ.

²⁰ Ụnụ sikọ d'e ri anụ m k'e buye ụnụ rijun ẹfọ: anụ ẹshin lẹ ndị e nyinni wẹ lẹ anụ ndị odogun-agha lẹ ndị agha ile.’ Ya kẹ Osolobuẹ Nwọn Ihiẹn Ile ku.

²¹ “M k'a ghọsị ọghọ m imẹ alị ndị ọzọ; alị ile k'a hụn afụnfụn m ye wẹ lẹ ihiẹn ẹka m mẹ wẹ.

²² Gha ụhụọhịn ahụn jẹnmẹ, ndị Izrẹlụ a marịn nị mmẹ, Osolobuẹ, wụ Chuku wẹ nke-esi.

²³ Ndị alị ọzọ nkẹ k'e gi ẹ marịn nị onwọnni ihiẹn ọzọ wẹ gi saẹka kpụnrụn ndị Izrẹlụ karị njọ ndị Izrẹlụ, makẹni ebuni wẹ ẹnya zinmẹ mmẹ sụọ, m nọ bupụ wẹ ihun, bu wẹ che ẹka ndị iṅẹnrẹn wẹ, wẹ nọ gi ọpịa-agha gbu wẹ — wẹ ile.

²⁴ Omẹrụ wẹ mẹrụ enwẹn wẹ lẹ Iwu m wẹ dan kẹ m gi mẹ wẹ ihiẹn m mẹ wẹ, bupụ wẹ ihun.

Osolobuẹ K'e Mẹ N'ọ Rịzịnị Izrẹlụ Mma

²⁵ “Osolobuẹ Nwọn Ihiẹn Ile sị: M k'e wepụha nwan ebọn Jekọpụ ẹka ndị gini wẹ. Ẹghẹẹ, m sikọ nwan d'e mẹ omikẹn Izrẹlụ ile; m sikọ d'e mẹ nị m dọnmẹ Ẹfan-nsọ m.

²⁶ Ogẹn hụ, wẹ hụn nị wẹ bizi udọn-lẹ-ndọnkwa imẹ alị wẹ, ifẹnrẹn enwẹn wẹ e mẹgbu wẹ hụn wẹ gi la m tọ bu ẹnya che ogbe.

²⁷ M ghagụ imẹ alị ndị hụ wẹ rị welụa wẹ, ghagụ alị ndị iṅẹnrẹn wẹ kpọnkikomẹ wẹ, m k'e gi wẹ ghọsị nị m rị nsọ, ndị alị ọzọ a hụn a.

²⁸ Izrẹlụ sikọ d'a marịn nị mmẹ wụ Osolobuẹ wụ Chuku wẹ, ogẹn m'e gi chụshigụ wẹ alị ndị ọzọ, kpọnlụazị wẹ alị wẹ. Onwọnni onyẹ ọwụlẹ imẹ wẹ m k'a latọzị ebẹhụ.

²⁹ Ebupụkọzị m wẹ ihun ogẹn ahụn, makẹni m k'e hu Mmọn m kpu wẹ wụ ebọn Izrẹlụ. Ya kẹ Osolobuẹ Nwọn Ihiẹn Ile ku.”