Izikẹlụ 38 - Ika

Isi Nke Mmẹsatọ Kwasị Ọgụn Ihiẹn Osolobuẹ K'e Mẹ Gọgụ Lẹ Ndị-agha A

¹ Osolobuẹ nọ sị m,

² “Nwa-ịhịan, bu ihun zinmẹ Gọgụ alị Magọgụ, eze-kanị hụn a kị alị-eze Mẹshẹki lẹ alị-eze Tubalụ; bu amụma ku ihiẹn k'e mẹn'ẹ,

³ sị, ‘Osolobuẹ Nwọn Ihiẹn Ile sị: eze-kanị hụn a kị alị-eze Mẹshẹki lẹ alị-eze Tubalụ, mmẹ lẹ yụ rọ!

⁴ M k'e sehutọ ị, bu ukpo che i agban, dọkpụnrụn yụ lẹ ndị-agha ị ile — kẹ ẹshin i kẹ ndị-agha ị gi ẹshin a lụ agha, uwẹ lẹ ẹwuru-agha wẹ zu oke; igwerigwe ndị-agha ị hụn busọnmẹ akpaịn uku lẹ nke nta, wẹ ile ndị ma gi ọpịa-agha lụ agha;

⁵ ndị Pẹshịa, ndị Ẹtiopịa lẹ ndị Putu k'a bann'ị — wẹ ile lẹ akpaịn lẹ okpu-agha wẹ;

⁶ kẹ alị Goma lẹ ndị-agha a ile kẹ alị Bẹt-Togama lẹ ndị-agha a ile k'a ghakwọrị ebe kachanrịn e te ẹbamịn-ugu sọnhẹn i; m k'e mẹ alị bu ọda sọnhẹn i.

⁷ “ ‘Kọnrin; kwademẹ ihiẹn i ile, kẹ yụ kẹ igwerigwe ndị agha hụ ile fihunmẹn'i, n'i duru wẹ.

⁸ Ọ nọbe, m k'a kpọ ị ọrụn; ihun-ihun, i k'e jẹn d'a lụsọn alị ohu agha: alị wẹ dọnzigụhụ kẹ agha tikpọgụ a, ndị wẹ ghagụhụ alị bu ọda wekinhẹn alị wẹ. Alị ugu wụ Izrẹlụ rọ. Alị hụn te gbabie okpokoro, wẹ nọ gha alị ndị ọzọ rị ichẹn-ichẹn welụa wẹ, e bimẹzi wẹ udọn-lẹ-ndọnkwa.

⁹ O ru ogẹn ahụn, i jẹnkọ d'a bịa lekẹ okẹn ufere, rutọ kẹ orukpu d'e kpumẹ alị Izrẹlụ, yụ lẹ ndị agha ị ile lẹ ndị alị ọzọ bu ọda yụ lẹ wẹ wị.

¹⁰ “ ‘Osolobuẹ Nwọn Ihiẹn Ile sị: o ru ogẹn ahụn, y'e romẹ ihiẹn i k'e ro, y'a mama eje-ihiẹn.

¹¹ Ị k'a sị, “M sikọ d'a maye alị Izrẹlụ: ụmụ-alị mgbọn rịlẹni jun ẹ; wẹ nọdịhụ nke wẹ, e bi udọn-lẹ-ndọnkwa; atụnhunmẹni wẹ wẹ mgbọn, ọnụ-mgbọn w'a kpọkin arịa.

¹² M k'e gbu wẹ kwarị, narịn wẹ ihiẹn wẹ nwọn. Y'e mẹmẹ n'i bu ẹka che alị wẹ te gba okpokoro hụn ịhịan bi nwan, ndịnị gha alị ndị ọzọ wẹ te kpụnjẹn wẹ lụaha, hụn nwọn nwan ihiẹn-uriri lẹ ihiẹn ndị-ọzọ, hụn bi nwan ebe rị mkpa etintinnaị ụwa.”

¹³ “ ‘Shẹba lẹ Dedanị lẹ ndị a zụru afịa Tashishi lẹ ndị-agha wẹ wụ ikoro-ẹwọrọ k'a sị ị, “I bịa d'e gbukwarị ra? I kpọkikomẹdẹ nwan igwerigwe ndị agha ị n'i d'a narịn ndịnị ihiẹn wẹ ra? Ị laladẹ nwan d'e buru siliva lẹ goru, kpụnrụn anụ, burusọnmẹ ihiẹn, gbukwarị ra?” ’

¹⁴ “Nwa-ịhịan, bu nwan amụma sị Gọgụ: Osolobuẹ Nwọn Ihiẹn Ile sị, ‘Ihun, ogẹn ndị nke m wụ Izrẹlụ k'e gi rị e bi udọn-lẹ-ndọnkwa, y'a nụkọ a?

¹⁵ I k'a ghakwọrị alị ị ebẹhụ kachanrịn e te ẹbamịn-ugu bịa, yụ lẹ alị bu ọda yụ lẹ wẹ jẹnkọ d'a wị; wẹ ile k'e nyinhẹn ẹshin agha. O k'a wụ igwerigwe ịhịan, ndị-agha bugbu enwẹn wẹ ọda.

¹⁶ Ụnụ jẹnkọ d'a maye ndị nke m wụ Izrẹlụ, rukpumẹ alị wẹ nọkẹ orukpu. Ihun-ihun k'o k'e mẹ. M k'e wẹhẹ i d'a maye alị m ọgụn, kẹni ndị alị ichẹn-ichẹn gi ihiẹn m k'e mẹ i marịn onyẹ m wụ ogẹn m'e gi nọ idẹnya wẹ gi i ghọsị nị m rị nsọ.

¹⁷ “ ‘Osolobuẹ Nwọn Ihiẹn Ile sị: Ẹlẹ yụ kẹ m ku oku ẹ mbụ ghahanị idibo m ndị-amụma Izrẹlụ hụn busọnmẹ amụma ahụa ndị hụ ile nị m k'e wẹhẹ i d'a maye wẹ?

¹⁸ Lee ihiẹn k'e mẹni ụhụọhịn ahụn: Ogẹn Gọgụ e gi bịa d'a lụsọn alị Izrẹlụ agha, m k'e bu olulu ọda-ọda. Ya kẹ Osolobuẹ Nwọn Ihiẹn Ile ku.

¹⁹ M rị e gi ẹnya rị a fụnị m lẹ okẹn olulu rị e buni m e ku ihiẹnni: nị alị k'e zinzin ọda-ọda imẹ alị Izrẹlụ ogẹn ahụn.

²⁰ Azụn rị imẹ ohimin, nnụnụ rị e fe elu, anụmanụ rị ọfịa, ihiẹn ile a rịnị lẹ ịhịan ile rị elu-ụwa k'e mẹhunmẹ makẹ ufiri m. Ugu k'a dan; ugu lẹ ebe ile jẹn elu a gbajịja; mgbọn ile k'a dan alị.

²¹ M k'a sị ọpịa-agha gbumẹ Gọgụ elu-ugu m ile. Ya kẹ Osolobuẹ Nwọn Ihiẹn Ile ku. Onyẹ ọwụlẹ k'e gi ọpịa-agha gbumẹ ibe ẹ.

²² M k'e gi eje-emu lẹ ogbugbu ye ẹ afụnfụn; m k'e hu okẹn-mirin lẹ ẹkwan-igwere lẹ ọkụn lẹ nsịn-ẹnyanwụn kpu Gọgụ lẹ ndị-agha a lẹ alị ndị ọzọ ahụn bu ọda ya lẹ wẹ wị.

²³ M k'a ghọsị ikẹn m hi ogbe, ghọsị nị m rị nsọ, ghọsị onyẹ m wụ idẹnya alị bu ọda. Ogẹn ahụn, a marịn wẹ nị mmẹ wụ Osolobuẹ.’